Mantené Bo Goso den Jehova Su Sirbishi

“Semper alegrá den Señor. Un bes mas lo mi bisa: Alegrá!”—FILIPENSENAN 4:4.

 1, 2. Con un ruman cu su famia a logra mantené nan goso apesar cu nan a perde tur loke nan a poseé?

JAMES, un cristian di 70 aña cu ta biba na Sierra Leone, a traha duru henter su bida. Imaginá bo ki un goso el a sinti ora cu por fin el a spar suficiente cen p’e cumpra un casita di cuater habitacion! Pero algun tempu despues cu James cu su famia a drenta e cas, a cuminsá un guera civil den e pais ei, i hendenan a kima nan cas te na suela. Nan a perde nan cas, pero nan no a perde nan goso. Di con no?

² James i su famia no a enfocá nan mente riba loke nan a perde, sino riba loke nan tabatin ainda. James ta splica: “Asta durante e tempu dje horornan ei, nos a tene reunion, lesa Bijbel, haci oracion huntu i compartí e poco cosnan cu nos tabatin cu otronan. Nos a logra mantené nos goso dor cu nos a enfocá riba e relacion maraviyoso cu nos tin cu Jehova.” Dor di pensa riba e bon cosnan cu nan tabatin, di cua esun principal ta e relacion personal íntimo cu nan tabatin cu Jehova, e cristiannan fiel aki por a “sigui alegrá.” (2 Corintionan 13:11) Claro cu nan circunstancia penoso no tabata fácil pa wanta. Pero nan no a stop di alegrá den Jehova.

 3. Con algun dje promé cristiannan a mantené nan goso?

³ E promé cristiannan a haña nan cu pruebanan similar na esnan cu James i su famia a pasa aden. Apesar di esei, apostel Pablo a skirbi e palabranan aki n’e cristiannan hebreo: “[Boso] a aceptá cu goso plundermentu di boso pertenencianan.” Despues Pablo a splica di ki fuente nan goso a bini: “Sabiendo cu boso mes tin un posesion mihó i duradero.” (Hebreonan 10:34) Sí, e cristiannan di promé siglo ei tabatin un speransa poderoso. Cu confiansa nan a anticipá di ricibí algu cu hende no por a plunder: e “corona di bida” cu no ta marchitá, den Dios su Reino celestial. (Revelacion 2:10) Awe nos speransa cristian, sea ta celestial of terenal, por yuda nos mantené nos goso asta ora nos ta enfrentá adversidad.

“Alegrá den e Speransa”

 4, 5. (a) Di con Pablo su conseho pa “alegrá den e speransa” tabata asina oportuno p’e romanonan? (b) Kico por pone un cristian perde su speransa for di bista?

⁴ Apostel Pablo a animá su compañeronan di creencia na Roma pa nan “alegrá den e speransa” di bida eterno. (Romanonan 12:12) E conseho aki tabata oportuno p’e romanonan. Ménos cu un década despues cu Pablo a skirbi nan, nan a haña persecucion severo, i algun di nan a ser torturá te na morto riba ordu di emperador Nero. Indudablemente, nan fe cu Dios lo duna nan e corona di bida primintí a sostené nan den nan sufrimentu. Kico di nos awe?

⁵ Como cristian, nos tambe ta verwagt cu hende lo persiguí nos. (2 Timoteo 3:12) Ademas, nos ta realisá cu “tempu i suceso imprevisto” por bini riba nos tur. (Eclesiástes 9:11) Un accidente por kita bida di un hende cu nos stima. Un enfermedad mortal por causa morto di un di nos mayornan of di un amigu íntimo. A ménos cu nos keda bon enfocá riba nos speransa di Reino, ora nos haña nos cu pruebanan asina nos spiritualidad por ta na peliger. P’esei, ta bon pa nos puntra nos mes: ‘Mi ta “alegrá den e speransa”? Cu cuantu frecuencia mi ta tuma tempu pa meditá riba dje? E Paradijs binidero ta real pa mi? Mi ta mira mi mes den dje? Mi ta mes purá pa e fin dje sistema di cosnan actual yega, manera mi tabata ora mi a caba di conocé e berdad?’ E último pregunta aki ta unu cu nos mester pensa profundamente ariba. Di con? Pasobra si nos tin bon salú i suficiente cen pa biba confortabel, i ta biba na un parti di mundu caminda nos no ta sinti muchu efecto di guera, scarcedad di cuminda of desaster natural, nos lo por perde for di bista—maske ta temporalmente—cuantu necesidad tin pa Dios su mundu nobo bini.

 6. (a) Ora Pablo cu Sílas a sufri tribulacion, riba kico nan a enfocá nan pensamentu? (b) Con e ehempel di Pablo cu Sílas por animá nos awe?

⁶ Ademas Pablo a consehá e romanonan pa nan “wanta bou di tribulacion.” (Romanonan 12:12) Pablo tabata sa bon kico ta tribulacion. Na un ocasion el a mira un homber den un vision cu a invit’é p’e “pasa pa Macedonia” pa yuda hende ei siña tocante Jehova. (Echonan 16:9) E ora ei Pablo, huntu cu Lucas, Sílas i Timoteo, a subi barcu bai Europa. Kico a spera e misioneronan celoso ei? Tribulacion! Despues cu nan a predicá n’e stad macedonio di Filípos, e hendenan a suta Pablo i Sílas cu bara, i tira nan den prizon. Claramente, algun ciudadano di Filípos no tabata djis indiferente n’e mensahe di Reino; nan tabata opon’é cu rabia. E desaroyo aki a pone e misioneronan celoso perde nan goso? No. Despues cu hende a bati nan i tira nan den prizon, “rond di meianochi Pablo i Sílas tabata haciendo oracion i alabando Dios cu cantica.” (Echonan 16:25, 26) Claro cu e dolor dje sota no a duna Pablo cu Sílas ningun goso. Pero no ta esei ta loke e dos misioneronan ei a enfocá ariba. Nan a enfocá nan pensamentu riba Jehova i riba e maneranan cu e tabata bendicionando nan. Dor di “wanta bou di tribulacion” cu goso, Pablo cu Sílas a sirbi como un ehempel excelente p’e rumannan na Filípos i tur otro caminda.

 7. Di con nos oracionnan mester incluí gradicimentu?

⁷ Pablo a skirbi: “Perseverá den oracion.” (Romanonan 12:12) Bo ta haci oracion na momentonan cu bo ta sinti bo anshá? Kico bo ta resa p’e? Probablemente bo ta mencioná bo problema specífico, i pidi Jehova su yudansa. Pero bo por incluí expresionnan di gradicimentu tambe pa e bendicionnan cu bo ta gosa di dje. Ora cu problema presentá, si nos refleccioná riba e bondad cu Jehova ta desplegá den su trato cu nos, esei lo yuda nos “alegrá den e speransa.” David, cu tabata leu di ta sin problema den bida, a skirbi: “Hopi cos bo mes a haci, o Jehova mi Dios, asta bo obranan maraviyoso i bo pensamentunan pa cu nos; no tin ningun cu por ser compará cu bo. Si mi incliná mi mes pa informá i papia di nan, nan a bira mas numeroso di loke mi por relatá.” (Salmo 40:5) Si nos meditá regularmente, mescos cu David, riba e bendicionnan cu nos ta ricibí cerca Jehova, nos no por keda sin ta gososo.

Mantené un Spiritu Positivo

 8. Kico ta yuda un cristian keda cu goso ora e ta pasa den persecucion?

⁸ Jesus a animá su siguidónan pa nan mantené un spiritu positivo ora nan enfrentá diferente prueba. E ta bisa: “Felis boso ta ora hende ta reprochá boso i ta persiguí boso i cu mentira ta papia tur sorto di cos malu contra boso pa mi causa.” (Mateo 5:11) Ki motibu nos tin pa ta felis den circunstancianan asina? E echo cu nos por wanta oposicion ta prueba di cu Jehova su spiritu ta riba nos. Apostel Pedro a bisa e compañeronan cristian di su tempu: “Si boso ta ser reprochá p’e nomber di Cristo, boso ta felis, pasobra e spiritu di gloria, sí, e spiritu di Dios, ta descansando riba boso.” (1 Pedro 4:13, 14) Pa medio di su spiritu, Jehova lo yuda nos wanta tambe, i como resultado, mantené nos goso.

 9. Kico a yuda algun ruman haña motibu pa alegrá ora nan tabata den prizon pa nan fe?

⁹ Asta ora nos ta den e situacionnan di mas difícil, nos por haña motibu pa alegrá. Un cristian cu yama Adolf a mira cu ta asina. E ta biba den un pais caminda e obra di Testigonan di Jehova tabata prohibí durante hopi aña. Nan a arestá Adolf i vários di su compañeronan cristian, i sentenciá nan na castigu largu di prizon dor cu nan a nenga di renunciá nan creencianan basá riba Bijbel. Bida den prizon tabata duru, pero mescos cu Pablo i Sílas, Adolf cu su compañeronan a haña motibu pa gradicí Dios. Nan ta remarcá cu nan experencia den prizon a yuda nan fortalecé nan fe i desaroyá cualidadnan cristian balioso, manera generosidad, empatia i amor fraternal. Por ehempel, ora un prezu a ricibí un pakete cerca su hendenan di cas, e tabata compartí e contenido cu su compañeronan di creencia, i nan a siña considerá cu e provisionnan extra aki a bini di Jehova, cu realmente ta e Dunador di “tur bon don i tur regalo perfecto.” Tal gestonan di bondad a duna goso na tantu e dunadó como esun cu a ricibí nan. Di tal manera, net e experencia cu lo mester a kibra nan fe, a haci nan mas fuerte den sentido spiritual!—Santiago 1:17; Echonan 20:35.

10, 11. Con un ruman muher a trata cu interogacion intenso siguí pa un castigu largu di prizon?

¹⁰ Ella, cu tambe ta biba na un pais caminda e obra di Reino tabata prohibí pa hopi tempu, a cai cerá dor cu el a compartí su speransa cristian cu otro hende. Pa ocho luna largu el a ser interogá intensamente. Ora cu por fin nan a hib’é huicio, nan a dun’é un castigu di dies aña den un prizon caminda no tabatin otro adoradónan di Jehova. Ella tabatin 24 aña so n’e tempu ei.

¹¹ Claro cu Ella no tabatin gana di pasa gran parti di su hubentud den un cel di prizon. Pero ya cu e no por a cambia su situacion, el a dicidí di cambia su manera di mira cos. Asina, el a cuminsá mira e prizon como su teritorio personal pa predicá. E ta bisa: “Tabatin asina tantu predicacion pa mi haci, cu e añanan a pasa masha lihé.” Despues di mas cu cincu aña, nan a interogá Ella di nobo. Realisando cu trali di prizon no a kibra su fe, esnan cu a interogu’é a bis’é: “Nos no por laga bo liber; bo no a cambia.” Ella su contesta firme tabata: “Sí, mi a cambia! Mi ta mas animá awor cu tempu mi a caba di drenta prizon, i mi fe ta hopi mas fuerte cu ántes!” Anto el a agregá: “Si boso no kier laga mi liber, lo mi keda te dia Jehova haña cu ta tempu p’e libra mi.” Cincu aña i mei den prizon no a kita Ella su goso! El a siña keda satisfecho cu cualkier circunstancia cu e haña su mes aden. Bo por siña algu di su ehempel?—Hebreonan 13:5.

12. Kico por duna un cristian pas mental den situacionnan difícil?

¹² No concluí cu Ella tin un don poco comun cu ta permitié enfrentá retonan asina. Papiando dje periodo di interogacion cu el a pasa aden durante e lunanan promé cu el a ricibí su sentencia, Ella ta admití: “Mi ta corda con mi djentenan tabata bati, i mi a sinti mi mescos cu un mofi spantá.” Sin embargo, Ella tin fe fuerte den Jehova. El a siña pone su confiansa den dje. (Proverbionan 3:5-7) Como resultado, Dios ta mas real p’e cu promé. E ta splica: “Cada bes cu mi a drenta e kamber di interogacion, mi tabata sinti un pas bini riba mi. . . . Mas spantoso e situacion tabata, mas profundo e pas a bira.” Jehova tabata e fuente dje pas ei. Apostel Pablo a splica: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.”—Filipensenan 4:6, 7.

13. Kico ta sigurá nos cu si tribulacion bini riba nos, nos lo tin e forsa necesario pa wanta?

¹³ Ella, cu entre tantu a sali liber, a mantené su goso apesar cu el a pasa den sufrimentu. No ta cu su mes forsa el a hacié, sino cu forsa cu Jehova a dun’é. Mescos tabata e caso cu apostel Pablo, kende a skirbi: “P’esei, cu muchu gustu mi ta preferá di gaba en cuanto mi debilidadnan, p’e poder di Cristo por keda riba mi manera un tent. . . . Pasobra ora mi ta débil, e ora ei mi ta poderoso.”—2 Corintionan 12:9, 10.

14. Ilustrá con un cristian por adoptá un punto di bista positivo di un situacion cu ta pon’é na prueba, i kico por bira e resultado.

¹⁴ Kisas e preshonnan cu abo personalmente ta enfrentá ta un poco diferente for di esnan cu nos a considerá aki. Sin embargo, sin importá di ki manera preshon manifestá su mes, e ta difícil pa enfrentá. Por ehempel, kisas bo doño di trabou gusta criticá bo trabou, kisas hopi mas cu e ta criticá trabou di trahadónan cu ta di otro religion. Por ta cu bo no ta den posicion pa busca otro trabou. Con bo por mantené bo goso? Corda Adolf cu su compañeronan, cu a siña desaroyá cualidadnan vital dor di nan castigu di prizon. Si bo haci un esfuerso sincero pa tene bo doño di trabou contentu, asta unu cu ta “difícil pa agradá,” lo bo desaroyá cualidadnan cristian manera awante i pacenshi. (1 Pedro 2:18) Ademas, lo no ta nada straño si bo bira mas balioso como trahadó, loke lo aumentá bo chens di obtené un trabou mas satisfactorio un dia. Awor, laga nos trata otro maneranan pa nos mantené nos goso den Jehova su sirbishi.

Simplificá Ta Hiba na Goso

15-17. Kico un pareha a siña cu por a aliviá nan stres, apesar cu nan no por a kita e orígen dje stres completamente?

¹⁵ Kisas bo no tin masha opcion tocante e tipo di trabou seglar cu bo ta haci of tocante unda bo ta traha, pero por tin otro aspectonan di bo bida cu sí bo tin control riba dje te na cierto grado. Considerá e siguiente experencia.

¹⁶ Un pareha cristian a invitá un anciano bin come na nan cas. Durante e anochi, e esposo i su casá a confia n’e ruman cu últimamente nan a bin ta sinti nan mes hogá cu preshonnan di bida. Apesar cu tur dos tabatin trabou di tempu completo cu a exigí hopi di nan, nan no tabata den posicion pa busca otro trabou. Nan a puntra nan mes cuantu tempu nan por a sigui soportá.

¹⁷ Ora nan a pidi e anciano conseho, el a contestá nan: “Simplificá.” Con? E homber i su casá tabata pasa te tres ora pa dia bayendo di cas pa trabou i di trabou pa cas. E anciano, cu tabata conocé e pareha bon, a sugerí pa nan bai biba mas cerca di nan trabou, pa nan por a pasa ménos tempu bayendo i biniendo di trabou tur dia. Nan lo por usa e tempu cu nan ta scapa dje forma aki pa cumpli cu otro asuntunan di importancia, of pa nan sosegá un poco. Si preshon di bida ta kita bo goso un tiki, pakico no wak si bo por haña un alivio dor di haci algun ahuste?

18. Di con ta vital pa pensa cu cuidou promé cu tuma un decision?

¹⁸ Otro manera pa reducí preshon ta di pensa bon promé cu tuma decision. Por ehempel, un cristian a dicidí di traha un cas. El a scoge un diseño sumamente complicá, apesar cu nunca promé e no a yega di traha un cas. Awor e ta realisá cu lo e por a evitá hopi problema innecesario si el a “considerá su pasonan” promé cu el a scoge e diseño pa su cas. (Proverbionan 14:15) Un otro cristian a bai di acuerdo pa para borg pa fiansa di un compañero di creencia. Segun e acuerdo, si esun cu a fia e cen no por paga e fiansa bek, esun cu para borg lo keda obligá di pagu’é. Promé tur cos a bai bon, pero despues e fiadó a cuminsá keda sin paga. Esun cu a fi’é cen a spanta, i el a exigí pa esun cu a para borg pagu’é henter e fiansa bek. Esei a pone esun cu a para borg bou di hopi preshon. Lo e no por a evitá e preshon ei dor di considerá tur factor cu mas cuidou promé cu el a bai di acuerdo pa asumí responsabilidad p’e debe?—Proverbionan 17:18.

19. Cua ta algun manera pa nos reducí stres den nos bida?

¹⁹ Ora cu nos cansa, laga nos no dicidí nunca cu nos por reducí e preshon cu tin riba nos i haña nos goso bek dor di baha man na studio personal di Bijbel, sirbishi di veld i asistencia na reunion. No, ta net e cosnan aki ta vital pa nos ricibí Jehova su spiritu santu, cu entre otro ta producí goso. (Galationan 5:22) Semper actividadnan cristian ta refrescante, i generalmente nan no ta cansa bo di mas. (Mateo 11:28-30) Tin hopi mas chens cu ta actividadnan seglar of recreo ta contribuí na bo cansancio, i no esnan spiritual. Siña drumi na un ora razonabel lo por yuda nos recuperá. Un tiki sosiegu extra por yuda masha hopi. N. H. Knorr, cu a sirbi como miembro dje Cuerpo Gobernante di Testigonan di Jehova te na su morto, tabata bisa misioneronan: “Ora boso sinti desanimá, e promé cos pa haci ta di sosegá un poco. Lo bo keda sorprendí cuantu mas mihó cualkier problema ta mustra despues cu bo tabatin un bon anochi di soño!”

20. (a) Resumí algun dje maneranan pa nos mantené nos goso. (b) Ki motibu pa ta gososo abo por pensa ariba? (Mira e cuadro na página 17.)

²⁰ Cristiannan tin un privilegio di por sirbi “e Dios felis.” (1 Timoteo 1:11) Manera nos a mira, nos por mantené nos goso asta ora problema serio ta atacá nos. Laga nos tene e speransa di Reino nos dilanti, ahustá nos punto di bista ora ta necesario i tene nos bida simpel. E ora ei, ki situacion cu nos haña nos aden, nos lo actua segun e palabranan di apostel Pablo: “Semper alegrá den Señor. Un bes mas lo mi bisa: Alegrá!”—Filipensenan 4:4.

Pensa Cuidadosamente Riba e Preguntanan Aki:

• Pakico cristiannan mester keda bon enfocá riba e speransa di Reino?

• Kico por yuda nos mantené nos goso bou di circunstancianan difícil?

• Pakico nos mester purba simplificá nos bida?

• Den ki área algun cristian a simplificá nan bida?

[Kuadro/Plachinan na página 17]

Motibunan Adicional pa Nos Ta Gososo

Como cristiannan, nos tin hopi motibu pa alegrá. Considerá esnan cu ta sigui:

 1. Nos conocé Jehova.

 2. Nos a siña e berdad dje Palabra di Dios.

 3. Nos picánan por ser pordoná a base di nos fe den e sacrificio di Jesus.

 4. E Reino di Dios ta goberná—pronto e mundu nobo lo yega!

 5. Jehova a trece nos den un paradijs spiritual.

 6. Nos ta disfrutá di asociacion cristian sano.

 7. Nos tin e privilegio di participá den e trabou di predicá.

 8. Nos ta na bida, i nos tin un grado di fortalesa.

Cuantu motibu mas di goso bo por mencioná?

[Plachi na página 13]

Pablo cu Sílas tabata gososo asta den prizon

[Plachinan na página 15]

Bo bista ta enfocá riba e speransa gososo dje mundu nobo di Dios?