Responde n’e Promesanan di Dios dor di Eherce Fe

“E [Jehova Dios] a duna nos libremente e promesanan precioso i masha grandioso.”—2 PEDRO 1:4.

 1. Kico ta permití nos ehercé berdadero fe?

JEHOVA kier pa nos ehercé fe den su promesanan. Sin embargo, “fe no ta un posesion di tur hende.” (2 Tesalonicense 3:2) E cualidad aki ta un fruta di Dios su spiritu santu of forsa activo. (Galatio 5:22, 23) P’esei, solamente esnan cu ta ser guiá p’e spiritu di Jehova por ehercé fe.

 2. Con apostel Pablo ta definí “fe”?

² Pero kico ta fe? Apostel Pablo ta yam’é “e demostracion evidente di realidadnan aunke nan no ta ser contemplá.” E evidencia dje realidadnan no-mirá aki ta asina fuerte cu fe ta ser igualá cuné. Fe ta ser yamá tambe “e expectativa sigur di cosnan sperá” debí cu esnan cu ta poseé e cualidad aki tin un garantia cu tur cos cu Jehova Dios primintí ta asina sigur cu por considerá nan como cumplí.—Hebreo 11:1.

Fe i Promesanan di Jehova

 3. Kico cristiannan ungí lo experenciá si nan ehercé fe?

³ Pa agradá Jehova, nos mester ehercé fe den su promesanan. Apostel Pedro a mustra esaki den su segundo carta inspirá, skirbí rond di 64 E.C. El a splica cu si su compañé cristiannan ungí a ehercé fe, nan lo a mira e cumplimentu dje “promesanan precioso i masha grandioso” di Dios. Como resultado, nan lo a “bira participante den naturalesa divino” como co-heredero cu Jesucristo den e Reino celestial. Cu fe i yudansa di Jehova Dios, nan a scapa for di sclabitud na custumber i prácticanan corupto dje mundu aki. (2 Pedro 1:2-4) I djis imaginá bo! Esnan cu ta ehercé berdadero fe ta disfrutá dje mésun libertad preciosísimo awe.

 4. Cua cualidadnan nos tin cu suministrá na nos fe?

⁴ Fe den Jehova su promesanan i gratitud pa nos libertad duná-pa-Dios mester impulsá nos pa haci nos máximo esfuerso pa bira cristiannan ehemplar. Pedro a bisa: “Contribuyendo como contesta na tur esfuerso sincero, suministrá na boso fe, birtud, na boso birtud, conocimentu, na boso conocimentu, dominio propio, na boso dominio propio, awante, na boso awante, debocion piadoso, na boso debocion piadoso, cariño fraternal, na boso cariño fraternal, amor.” (2 Pedro 1:5-7) Asina Pedro ta duna nos un lista cu nos lo haci bon di siña for di memoria. Laga nos examiná e cualidadnan aki mas di acerca.

Elementonan Vital di Fe

5, 6. Kico ta birtud, i con nos por suministr’é na nos fe?

⁵ Pedro a bisa cu nos mester suministrá birtud, conocimentu, dominio propio, awante, debocion piadoso, cariño fraternal i amor, un na otro i na nos fe. Nos mester traha duru pa haci e cualidadnan aki elementonan vital di nos fe. Por ehempel, birtud no ta un cualidad cu nos ta manifestá aparte di fe. E lexicógrafo, W. E. Vine, ta splica cu na 2 Pedro 1:5, “birtud ta ser agregá como un cualidad esencial den e ehercisio di fe.” Cada un dje otro cualidadnan cu Pedro a mencioná tambe mester ta un elemento di nos fe.

⁶ Promé, nos mester suministrá birtud na nos fe. Ser birtuoso ta nificá haci loke ta bon den bista di Dios. P’e palabra griego traducí aki como “birtud,” algun version ta usa “bondad.” (New International Version; The Jerusalem Bible; Today’s English Version) Birtud ta motivá nos pa evitá di haci malu of causa daño na otro hende. (Salmo 97:10) Tambe e ta stimulá accion yen di curashi den hacimentu di loke ta bon p’e beneficio spiritual, físico i emocional di otronan.

 7. Pakico nos mester suministrá conocimentu na nos fe i birtud?

⁷ Pakico Pedro ta insta nos pa suministrá conocimentu na nos fe i birtud? Wel, segun cu nos ta enfrentá desafionan nobo di nos fe, nos mester tin conocimentu si nos kier distinguí bon fo’i malu. (Hebreo 5:14) Mediante studio di Bijbel i experencia den aplicá e Palabra di Dios i den ehercisio di sabiduria práctico den bida diario, nos ta aumentá nos conocimentu. En buelta, esaki ta permití nos mantené nos fe i keda haci loke ta birtuoso ora nos ta bou di prueba.—Proverbio 2:6-8; Santiago 1:5-8.

 8. Kico ta dominio propio, i con e ta ligá cu awante?

⁸ Pa yuda nos enfrentá prueba cu fe, nos mester suministrá dominio propio na nos conocimentu. E palabra griego pa “dominio propio” ta indicá e abilidad pa haña gara riba nos mes. E fruta di spiritu di Dios aki ta yuda nos mustra restriccion den pensamentu, palabra i conducta. Mediante persistencia den ehercé dominio propio, nos ta suministrá awante na dje. E término griego pa “awante” ta nificá firmesa yen di curashi, no entrega cu cara tristu na sufrimentu inevitabel. Tabata pa e goso poní dilanti Jesus cu el a wanta e staca di tormento. (Hebreo 12:2) E fortalesa cu Dios ta duna, asociá cu awante, ta reforsá nos fe i ta yuda nos alegrá den tribulacion, resistí tentacion i evitá di haci compromiso ora nos ta ser persiguí.—Filipense 4:13.

 9. (a) Kico ta debocion piadoso? (b) Pakico nos mester suministrá cariño fraternal na nos debocion piadoso? (c) Con nos por suministrá amor na nos cariño fraternal?

⁹ Na nos awante nos mester suministrá debocion piadoso—reverencia, adoracion i sirbishi na Jehova. Nos fe ta crece segun cu nos ta practicá debocion piadoso i ta mira con Jehova ta trata cu su pueblo. Sin embargo, pa manifestá piedad, nos mester tin cariño fraternal. Despues di tur cos, “esun cu no ta stima su ruman, kende el a mira, no por stima Dios, kende e no a mira.” (1 Juan 4:20) Nos curason mester impulsá nos pa mustra berdadero cariño pa otro sirbidor di Jehova i pa busca nan bienestar na tur tempu. (Santiago 2:14-17) Pero pakico Pedro ta manda nos suministrá amor na nos cariño fraternal? E tabata kier men claramente cu nos mester mustra amor pa tur humanidad, no solamente pa nos rumannan. E amor aki ta ser mustrá specialmente dor di predicá e bon nobo i yuda hende spiritualmente.—Mateo 24:14; 28:19, 20.

Efectonan Contraste

10. (a) Con nos lo actua si nos suministrá birtud, conocimentu, dominio propio, awante, debocion piadoso, cariño fraternal i amor na nos fe? (b) Kico lo sosodé si un persona cu ta pretendé di ta cristian ta falta e cualidadnan aki?

¹⁰ Si nos suministrá birtud, conocimentu, dominio propio, awante, debocion piadoso, cariño fraternal i amor na nos fe, nos lo pensa, papia i actua den maneranan cu Dios ta aprobá. Na contraste, si un persona cu ta pretendé di ta cristian keda sin manifestá e cualidadnan aki, e ta bira ciegu spiritualmente. E ‘ta cera su wowo n’e lus’ for di Dios i ta lubidá cu el a ser limpiá di picá di pasado. (2 Pedro 1:8-10; 2:20-22) Laga nos nunca faya den e manera ei i asina perde fe den e promesanan di Dios.

11. Kico nos por spera hustamente di e ungínan leal?

¹¹ Cristian ungí leal tin fe den e promesanan di Jehova i ta forsa nan mes pa haci sigur di su yamamentu i scogementu di nan. Apesar di cualkier piedra di trompecá den nan caminda, nos por spera cu nan ta manifestá cualidadnan piadoso. P’e fiel ungínan ‘e entrada a ser suministrá ricamente den e reino eterno di Jesucristo’ mediante nan resureccion pa bida spiritual den cielu.—2 Pedro 1:11.

12. Con nos mester comprendé e palabranan di 2 Pedro 1:12-15?

¹² Pedro a realisá cu lo el a muri pronto, i el a spera di ricibí un futuro resureccion pa bida celestial. Pero tanten cu e tabata na bida den “e tabernáculo aki”—su curpa humano—el a purba di edificá fe den compañé creyentenan i animá nan na accion dor di recordá nan dje cosnan necesario pa haña fabor divino. Despues di su despedida den morto, e rumannan spiritual di Pedro por a stimulá nan fe recordando su palabranan.—2 Pedro 1:12-15.

Fe den e Palabra Profético

13. Con Dios a duna testimonio cu fortalecedor-di-fe tocante e binimentu di Cristo?

¹³ Dios mes a duna testimonio fortalecedor-di-fe tocante e siguridad di Jesus su binimentu “cu poder i gran gloria.” (Mateo 24:30; 2 Pedro 1:16-18) Faltando evidencia, sacerdote pagano a conta cuenta falsu tocante nan diosnan, miéntras Pedro, Santiago i Juan tabata testigu ocular dje mahestad di Cristo den e transfiguracion. (Mateo 17:1-5) Nan a mir’é glorificá i a tende e zonido di Dios su propio stem confirmando Jesus como Su Yu stimá. Tal confirmacion i e aparicion briyante cu Cristo a ricibí e ora ei tabata un concesion di onor i gloria riba dje. Debí n’e revelacion divino aki, Pedro a yama e sitio, probablemente riba un ceru di Hermon, “e ceru santu.”—Compará cu Éxodo 3:4, 5.

14. Con e transfiguracion di Jesus mester afectá nos fe?

¹⁴ Con e transfiguracion di Jesus mester afectá nos fe? Pedro a bisa: “P’e motibu ei nos tin e palabra profético hací mas sigur; i boso ta haciendo bon di presta atencion na dje manera na un lampi cu ta briya den un lugá scur, te ora di dia manecé i lanta un strea di dia, den boso curason.” (2 Pedro 1:19) “E palabra profético” aparentemente a incluí no solamente profecia dje Scritura hebreo tocante e Mesías sino tambe e declaracion di Jesus cu lo e bini “cu poder i gran gloria.” Con e palabra tabata “hací mas sigur” dor dje transfiguracion? Tal suceso a comprobá e palabra profético tocante Jesus su glorioso binimentu den poder di Reino.

15. Kico ta enbolbí den presta atencion n’e palabra profético?

¹⁵ Pa fortalecé nos fe, nos mester presta atencion n’e palabra profético. Esaki ta enbolbé studia e palabra ei, consider’é na reunionnan cristian i aplicá su conseho. (Santiago 1:22-27) Nos mester lagu’e ser “un lampi cu ta briya den un lugá scur,” iluminando nos curasonnan. (Efesio 1:18) Solamente e ora ei lo e guia nos te ora e “strea di dia,” of “e strea briyante di mainta,” Jesucristo, revelá su mes den gloria. (Revelacion 22:16) Tal revelacion lo nificá destruccion pa esnan sin fe i bendicion pa esnan cu sí ta ehercé fe.—2 Tesalonicense 1:6-10.

16. Pakico nos por tin fe cu tur e promesanan profético den e Palabra di Dios lo ser cumplí?

¹⁶ E profetanan di Dios no tabata simplemente hombernan astuto cu a haci prediccionnan sabí, pasobra Pedro a bisa: “Ningun profecia di Scritura ta originá for di cualkier interpretacion privá. Pasobra profecia no a ser trecé na ningun tempu pa boluntad di hende, sino cu hende a papia di parti di Dios segun nan a ser hibá pa spiritu santu.” (2 Pedro 1:20, 21) Por ehempel, David a bisa: “E spiritu di Jehova tabata loke a papia pa medio di mi.” (2 Samuel 23:1, 2) I Pablo a skirbi: “Tur Scritura ta inspirá pa Dios.” (2 Timoteo 3:16) Ya cu e profetanan di Dios a ser inspirá pa medio di su spiritu, nos por tin fe cu tur otro promesa den su Palabra lo ser cumplí.

Nan Tabatin Fe den e Promesanan di Dios

17. Cua promesa tabata e base pa Abel su fe?

¹⁷ E promesanan di Jehova tabata un base p’e fe dje ‘nubia grandi’ di su testigonan pre-cristian. (Hebreo 11:1–12:1) Por ehempel, Abel tabatin fe den e promesa di Dios tocante un “simia” cu lo machicá “e colebra” den cabes. Tabatin prueba di cumplimentu dje sentencia di Dios riba mayornan di Abel. Pafó di Eden, Adam i su famia a come pan cu sodó di nan frenta pa motibu cu e suela maldicioná a producí sumpiña i bringamosa. Probablemente Abel a nota Eva su anhelo pa su casá i a mira con Adam a dominá Eva. Siguramente Eva a papia dje doló di su embaraso. Ademas, kerubinnan i e blit flamante di un spada a protehá e entrada n’e hardin di Eden. (Génesis 3:14-19, 24) Tur esaki a constituí un “demostracion evidente” cu a sigurá Abel cu liberacion lo a bini mediante e Simia primintí. Actuando den fe, Abel a ofrecé Dios un sacrificio cu a resultá di ta di muchu mas balor cu esun di Cain.—Hebreo 11:1, 4.

18, 19. Den ki maneranan Abraham i Sara a ehercé fe?

¹⁸ E patriarcanan Abraham, Isaac i Jacob tambe tabatin fe den e promesanan di Jehova. Abraham a ehercé fe den e promesa di Dios cu tur famia dje suela lo a bendicioná nan mes mediante dje i cu su simia lo ricibí un tera. (Génesis 12:1-9; 15:18-21) Su yu Isaac i nietu Jacob tabata “heredero cuné dje mésun promesa.” Mediante fe Abraham “a biba como stranhero den e tera dje promesa” i a spera “e stad cu tin berdadero fundeshi,” e Reino celestial di Dios bou di cua lo e ser resucitá pa bida riba tera. (Hebreo 11:8-10) Abo tin e mésun fe?

¹⁹ Sara, esposa di Abraham, tabatin rond di 90 aña di edad i tabata demasiado bieu caba pa haña yu ora el a ehercé fe den promesa di Dios i tabata permití “pa concibí simia” i duna lus na Isaac. Pues, for di Abraham di 100 aña di edad, “como si fuera morto” encuanto reproduccion, despues “a nace yunan net manera e streanan di cielu den multitud.”—Hebreo 11:11, 12; Génesis 17:15-17; 18:11; 21:1-7.

20. Aunke e patriarcanan no a mira e cumplimentu completo dje promesanan di Dios na nan, kico nan a haci?

²⁰ E fiel patriarcanan a muri sin mira e cumplimentu completo dje promesanan di Dios na nan. Sin embargo, “nan a mira [e cosnan primintí] djaleu i a ricibí nan cu goso i públicamente a declará cu nan tabata stranhero i habitante temporal den e tera.” Generacionnan a pasa promé cu e Tera Primintí a bira e posesion dje desendencia di Abraham. Sin embargo, atraves di nan bida, e patriarcanan temeroso di Dios a ehercé fe den e promesanan di Jehova. Ya cu nan nunca a perde fe, pronto nan lo ser resucitá pa bida den e dominio terenal dje “stad” cu Dios a prepará pa nan, e Reino mesiánico. (Hebreo 11:13-16) Den un manera similar, fe por tene nos leal na Jehova asta ora nos no ta mira e cumplimentu inmediato di tur su promesanan maraviyoso. Nos fe tambe lo impulsá nos pa obedecé Dios, net manera Abraham a haci. I mescos cu el a pasa un herencia spiritual na su desendencia, asina nos por yuda nos yunan ehercé fe den e promesanan precioso di Jehova.—Hebreo 11:17-21.

Fe, Vital pa Cristiannan

21. Pa ta aceptabel pa Dios awe, kico nos mester incluí den nos ehercisio di fe?

²¹ Naturalmente, fe ta enbolbé mas cu tene confiansa den e cumplimentu dje promesanan di Jehova. Atraves di historia humano, tabata necesario pa ehercé fe den Dios den varios manera si nos kier gosa di su aprobacion. Pablo a mustra cu “sin fe ta imposibel pa agradá [Jehova Dios] bon, pasobra esun cu ta acercá Dios mester kere cu e ta existí i cu e ta bira recompensador di esnan cu ta busk’é encarecidamente.” (Hebreo 11:6) Pa ta aceptabel pa Jehova awe, un persona mester ehercé fe den Jesucristo i den e sacrificio di rescate cu Dios a percurá mediante dje. (Romano 5:8; Galatio 2:15, 16) Ta manera Jesus mes a bisa: “Dios a stima e mundu [di humanidad] asina tantu cu el a duna su Yu unigénito, pa tur cu ehercé fe den dje no wordu destruí sino haña bida eterno. Esun cu ta ehercé fe den e Yu tin bida eterno; esun cu ta desobedecé e Yu lo no mira bida, sino e rabia di Dios ta permanecé riba dje.”—Juan 3:16, 36.

22. E Reino mesiánico lo percurá p’e cumplimentu di cua promesa?

²² Jesus ta hunga un papel vital den e cumplimentu dje promesanan di Dios tocante e Reino pa cua cristiannan ta resa. (Isaías 9:6, 7; Daniel 7:13, 14; Mateo 6:9, 10) Manera Pedro a mustra, e transfiguracion a comprobá e palabra profético tocante binimentu di Jesus den poder di Reino i gloria. E Reino mesiánico lo percurá p’e cumplimentu di un otro promesa di Dios, pasobra Pedro a skirbi: “Tin cielu nobo i un tera nobo cu nos ta spera segun su promesa, i den esakinan husticia lo tin cu biba.” (2 Pedro 3:13) Un profecia similar a ser cumplí ora e exiliadonan hudiu den Babilonia a ser restorá na nan tera natal na 537 P.E.C. bou di un gobiernu cu Zorobabel como gobernador i Hesua como sumosacerdote. (Isaías 65:17) Pero Pedro a señalá na un tempu den futuro ora “cielu nobo”—e Reino mesiánico celestial—lo goberná riba “un tera nobo,” un sociedad humano hustu bibando rib’e planeta aki.—Compará cu Salmo 96:1.

23. Cua preguntanan tocante birtud nos lo considerá siguientemente?

²³ Como sirbidornan leal di Jehova i siguidornan di su Yu stimá, Jesucristo, nos ta anhelá p’e mundu nobo primintí pa Dios. Nos sa cu e ta cerca, i nos tin fe cu tur Jehova su promesanan precioso lo ser cumplí. Pa cana aceptablemente dilanti nos Dios, nos mester fortalecé nos fe dor di suministrá birtud, conocimentu, dominio propio, awante, debocion piadoso, cariño fraternal i amor na dje.a N’e punto aki, ta bon pa puntra, Con nos por manifestá birtud? I con e echo cu nos ta birtuoso lo beneficiá nos mes i otronan, specialmente nos compañénan cristian, kendenan a respondé n’e promesanan di Dios dor di ehercé fe?

[Nota]

Con Bo Ta Contestá?

◻ Con nos por definí “fe”?

◻ Di acuerdo cu 2 Pedro 1:5-7, cua cualidadnan nos mester suministrá na nos fe?

◻ Ki efecto e transfiguracion di Jesus mester tin riba nos fe?

◻ Ki ehempel di fe Abel, Abraham, Sara i otronan di tempu antigua a percurá p’e?

[Plachi na página 15]

Bo sa con e transfiguracion di Jesus por afectá un persona su fe?