Fortalesé Bo Fe den Loke Nos Ta Spera

1, 2. (a) Ki diferensia tin entre e speransa ku kristiannan tin i e speransa ku hende ku ta parti di e mundu di Satanas tin? (b) Ki preguntanan importante nos lo konsiderá den e artíkulo akí?

KRISTIANNAN tin un speransa maravioso! Nos tur, sea nos ta ungí òf parti di e ‘otro karnénan,’ tin e speransa di mira Dios su propósito original kumpli i su nòmber ser santifiká. (Huan 10:16; Mat. 6:9, 10) Eseinan ta e kosnan di mas importante ku nos ke mira kumpli. Ademas, nos ta anhelá pa haña e rekompensa ku Dios a primintí nos, esta, di biba pa semper, sea komo parti di Dios su “shelu nobo” òf di su “tera nobo.” (2 Ped. 3:13) Entretantu, nos ta ansioso pa mira kon Yehova lo sigui guia i sostené su pueblo den e último dianan akí.

² Hende ku ta parti di e mundu di Satanas tambe ta karga un ke otro speransa, pero nan ta duda si un dia nan soño lo bira realidat. Por ehèmpel, kisas miónes di hende ku sa kumpra brièchi ta spera di gana premio mayó un dia, pero nan no por ta sigur di esei. En kambio, loke nos ta spera sí ta algu sigur; e ta basá riba fe. Fe ta “e konfiansa firme” den nos speransa kristian. (Heb. 11:1) Pero kisas bo ta puntra bo mes: ‘Kon mi konfiansa por bira mas firme? I ki benefisio mi ta haña ora mi tin un fe fuerte den nos speransa?’

 3. Riba kiko fe kristian ta basá?

³ Hende imperfekto no ta nase ku fe ni e no ta algu ku ta bini di su mes. Pa un hende por kultivá fe, e mester laga e spiritu santu di Dios obra den su kurason. (Gal. 5:22) Beibel no ta bisa ku Yehova tin fe òf ku e tin ku kultiv’é, pasobra e ta todopoderoso i e ser mas sabí den universo, i nada no por strob’é di kumpli ku su propósito. Nos Tata selestial ta asina sigur ku su promesanan lo kumpli ku pa é ya nan a kumpli kaba. P’esei el a bisa: “E palabranan akí a bira realidat!” (Lesa Revelashon 21:3-6.) Fe kristian ta basá riba e echo ku Yehova ta “e Dios fiel,” kende semper ta hasi loke e ta primintí.—Deu. 7:9.

 4. Ki speransa sirbidónan di Dios ku a biba promé ku Kristu tabatin?

⁴ E buki di Hebreonan kapítulo 11 ta menshoná 16 hòmber i muhé ku tabatin un fe fuerte. Bou di inspirashon, e eskritor di e buki akí a skirbi ku Dios a duna nan i hopi di su otro sirbidónan “un bon testimonio pa motibu di nan fe.” (Heb. 11:39) Nan tur tabatin “e konfiansa firme” ku e “simia” primintí di Dios lo a bini pa pone fin na e rebelion di Satanas i kumpli ku Yehova su propósito original. (Gén. 3:15) E fiel sirbidónan akí a muri promé ku e “simia” primintí, Hesukristu, a habri kaminda pa hende haña oportunidat di bai shelu. (Gal. 3:16) Pero danki na Yehova su promesanan ku semper ta kumpli, nan lo resusitá pa biba den Paradeis riba tera komo hende perfekto.—Sal. 37:11; Isa. 26:19; Osé. 13:14.

5, 6. Riba kiko Abraham i su famia a spera, i kon nan a mantené nan fe fuerte? (Wak e promé plachi.)

⁵ Relashoná ku e sirbidónan di Dios ku a biba promé ku Kristu, Hebreonan 11:13 ta bisa en parte: “Tur e hendenan akí a muri ku fe, aunke e promesanan no a kumpli den nan tempu, ma nan a mira nan djaleu i a risibí nan gustosamente.” Un di e sirbidónan ei tabata Abraham. El a keda tene na mente e bunita speransa di biba bou di e gobernashon di e “simia” primintí? Hesus a duna un kontesta kla pa e pregunta ei ora el a bisa su opositornan: “Boso tata Abraham a alegrá mashá den e speransa di mira mi dia, i el a mir’é i a keda masha kontentu.” (Huan 8:56) Esaki tabata e kaso tambe ku Sara, Isak, Yakòb i hopi otro sirbidó di Dios mas ku a pone tur nan speransa riba un futuro Reino ‘ku Dios mes a diseñá i konstruí.’—Heb. 11:8-11.

⁶ Kon Abraham i su famia a mantené nan fe fuerte? Probablemente nan a siña tokante Dios ora nan a skucha di fiel sirbidónan di Dios di mas edat, ora nan a haña sierto revelashonnan di parti di Dios òf ora nan a lesa manuskritonan konfiabel di antigwedat. Mas importante ainda, nan no a lubidá loke nan a siña, ma a balorá Dios su promesa- i rekisitonan i a meditá riba nan. Debí ku e hòmber- i muhénan akí tabata asina sigur di nan speransa, nan tabata kla pa pasa den kualke difikultat pa nan por a keda leal na Dios.

 7. Kiko Yehova ta proveé ku ta yuda nos kultivá un fe fuerte, i kiko nos tin ku hasi?

⁷ Yehova a duna nos su Palabra, Beibel, pa yuda nos mantené nos fe fuerte. Pa nos por ta felis i haña éksito, nos mester lesa Beibel riba un base regular; si ta posibel, tur dia. (Sal. 1:1-3; lesa Echonan 17:11.) Meskos ku e sirbidónan di Yehova ku a biba promé ku Kristu, awe nos tambe tin ku sigui meditá riba e promesanan di Dios i kumpli ku su rekisitonan. Ademas, Yehova ta bendishoná nos ku kuminda spiritual na abundansia mediante “e esklabo fiel i prudente.” (Mat. 24:45) Pues, ora nos ta balorá loke Yehova ta siña nos mediante e kuminda spiritual ku e ta proveé, nos lo ta manera su sirbidónan di pasado ku tabatin un fe fuerte, kendenan tabatin un “konfiansa firme” den e speransa di e Reino.

 8. Kon orashon por fortalesé nos fe?

⁸ Otro kos ku tambe a yuda e sirbidónan di Dios ku a biba promé ku Kristu mantené nan fe fuerte ta orashon. Nan fe a bira mas fuerte segun ku nan tabata mira kon Dios tabata kontestá nan orashonnan. (Neh. 1:4, 11; Sal. 34:4, 15, 17; Dan. 9:19-21) Nos tambe por papia ku Yehova tokante nos preokupashonnan, sabiendo ku lo e skucha nos i fortalesé nos pa nos por perseverá ku goso. I ora Dios kontestá nos orashonnan, nos fe ta bira mas fuerte. (Lesa 1 Huan 5:14, 15.) Komo ku fe ta un aspekto di e fruta di spiritu, nos tin ku “sigui pidi” Dios pa su spiritu santu, manera Hesus a urgi nos pa hasi.—Luk. 11:9, 13.

 9. Ademas di resa pa nos mes, ken mas nos mester inkluí den nos orashonnan?

⁹ Ora nos ta hasi orashon, nos no mester keda pidi pidi so. Tur dia nos por gradisí i alabá Yehova pa su “maravianan” ku ta “muchu hopi pa konta.” (Sal. 40:5) Ademas, den nos orashonnan, nos mester “kòrda riba esnan ku ta den prizòn komo si fuera [nos] ta den prizòn huntu ku nan.” Anto nos mester resa pa nos hermandat mundial, spesialmente pa “esnan ku ta dirigí [nos].” Ora nos mira kon Yehova ta kontestá nos orashonnan, nos ta keda mashá konmoví!—Heb. 13:3, 7.

10. (a) Duna ehèmpel di sirbidónan di Dios ku a nenga di kibra nan integridat. (b) Kiko a duna nan e forsa pa hasi esei?

¹⁰ Na Hebreonan kapítulo 11, apòstel Pablo a deskribí e pruebanan ku hopi sirbidó di Dios a enfrentá. Aunke e apòstel no a menshoná nan nòmber, el a papia por ehèmpel di muhénan di fe ku a pèrdè nan yunan den morto pero ku despues a risibí nan bèk mediante resurekshon. Despues el a menshoná otro hende ku “no kier a aseptá liberashon pa medio di un òf otro reskate. Nan a hasi esaki pa nan por alkansá un mihó resurekshon.” (Heb. 11: 35) Nos no tin sigur na ken Pablo tabata referí, pero sirbidónan di Dios manera Nabot i Zakarías a muri un morto kruel na man di hende ku a piedra nan mata pasobra nan a obedesé Dios i a kumpli ku su boluntat. (1 Rei. 21:3, 15; 2 Kró. 24:20, 21) Otro ehèmpel ta di Daniel i su tres amigunan. Nan tabatin e oportunidat pa “aseptá liberashon” a kambio di nan integridat. En bes di hasi esei, nan fe den Yehova su poder a yuda nan pa, na moda di papia, “sera boka di leon” i “para e forsa di kandela.”—Heb. 11:33, 34; Dan. 3:16-18, 20, 28; 6:13, 16, 21-23.

11. Ki pruebanan algun profeta a enfrentá debí na nan fe?

¹¹ Profetanan manera Mikaias i Yeremías “a risibí nan prueba pa medio di bofon . . . i prizòn” pa motibu di nan fe. Otronan, manera Elías, “a kana rònt den lugá desolá i seru, i nan a biba den kueba i buraku.” Nan tur a perseverá pasobra nan tabatin ‘e konfiansa firme ku loke nan a spera ariba lo keda realisá.’—Heb. 11:1, 36-38; 1 Rei. 18:13; 22:24-27; Yer. 20:1, 2; 28:10, 11; 32:2.

12. Ken a pone e mihó ehèmpel di soportá prueba, i kiko a yud’é perseverá?

¹² Despues ku Pablo a menshoná vários hòmber i muhé di fe, el a resaltá e mihó ehèmpel di fe, esta, nos Señor Hesukristu. Hebreonan 12:2 ta bisa: “Pa motibu di e goso ku tabata sper’é, el a soportá morto na un staka di tormento, sin preokupá ku e bèrgwensa ku esei a trese kuné, i a sinta na man drechi di e trono di Dios.” Sí, nos mester “konsiderá ku sumo atenshon” e ehèmpel di fe di Hesus ora nos ta pasa den e prueba di mas severo. (Lesa Hebreonan 12:3.) Meskos ku Hesus, hopi kristian di promé siglo ku a muri pa motibu di nan fe, manera disipel Antipas, a nenga di kibra nan integridat. (Rev. 2:13) Komo rekompensa, Dios a resusitá nan pa bida den shelu, un resurekshon ku ta surpasá e “mihó resurekshon” ku hende di fe di antigwedat tabata spera ariba. (Heb. 11:35) Poko tempu despues ku Hesus a bira Rei na 1914, tur e fiel sirbidónan ungí ei ku tabata drumí den morto a resusitá komo spiritu pa bai shelu pa reina huntu ku Hesus riba humanidat.—Rev. 20:4.

13, 14. Ki pruebanan Rudolf Graichen a pasa aden, i kiko a yud’é perseverá?

¹³ Miónes di sirbidó di Dios di nos tempu ta siguiendo e ehèmpel di Hesus i ta keda enfoká riba nan speransa, i no ta laga prueba debilitá nan fe. Wak e ehèmpel di Rudolf Graichen, kende a nase na Alemania na aña 1925. El a kòrda riba e kuadronan di esenanan deskribí den Beibel ku tabata kologá na muraya di su kas. El a skirbi: “Un di e kuadronan tabatin pintura di e wòlf i e lamchi, e mucha i e leopardo, e bisé i e leon. Nan tur tabata na pas ku otro i un mucha chikitu tabata guia nan. . . . E pinturanan ei a hasi un impakto riba mi.” (Isa. 11:6-9) Pa hopi aña Rudolf a pasa den persekushon kruel, promé na man di Gestapo nazi i despues na man di polis komunista di Ost Alemania. Apesar di esei, el a mantené su fe fuerte den un paradeis riba tera.

¹⁴ Otro pruebanan severo ku Rudolf a pasa aden tabata ora su mama stimá a fayesé di tífùs den e kampo di konsentrashon Ravensbrück, i ora el a mira e fe di su tata debilitá asina tantu ku el a firma un dokumento ku a bisa ku e no ke tabata un Testigu di Yehova mas. Despues ku Rudolf a sali for di prizòn, e tabatin e privilegio di sirbi komo un superintendente di sirkuito, i mas despues el a haña invitashon pa asistí na e Skol di Galaad. Despues di e skol, nan a mand’é bai sirbi komo misionero na Chile, kaminda el a bolbe sirbi komo superintendente di sirkuito. Pero su pruebanan no a kaba ei. Un aña despues ku el a kasa ku un misionero ku yama Patsy, nan bebi a fayesé. Mas despues, su kasá stimá, kende tabatin apénas 43 aña di edat, tambe a fayesé. Rudolf a soportá tur e pruebanan akí, i apesar ku e tabata di edat i malu di salú, e tabata sirbi komo pionero regular i ansiano tempu ku su historia di bida a sali den E Toren di Vigilansia di 1 di ougùstùs 1997, página 20-25.^[1]

15. Menshoná ehèmpel di Testigunan di Yehova di nos tempu ku ta soportando persekushon ku goso.

¹⁵ Testigunan di Yehova ta sigui alegrá den nan speransa apesar di persekushon kontinuo i intenso. Por ehèmpel, hopi di nos ruman hòmber- i muhénan ta enkarselá na Eritrea, Singapur i Surkorea, mayoria di biaha pasobra nan a kumpli ku Hesus su palabranan pa no usa spada. (Mat. 26:52) Entre e sientos di prezunan akí tin Isaac, Negede i Paulos, kendenan tin mas ku 20 aña den un kampamentu di prizòn na Eritrea. Aunke nan no tin e libertat pa bai kuida nan mayornan ku ta birando grandi òf pa kasa, e rumannan akí a keda fiel apesar di maltrato severo. Manera nos por mira riba nos website, jw.org, e sonrisa riba nan kara ta mustra ku nan ta mantené nan fe fuerte. Asta e wardadónan di prezu ta respetá nan.

16. Kon un fe fuerte por protehá nos?

¹⁶ Mayoria di Yehova su sirbidónan no a haña nan ta soportá persekushon severo. Nan ta haña otro tipo di prueba di fe. Hopi ruman ta pasa den pobresa, ta sufri durante guera sivil òf desaster natural. Otronan ta manera Moises i e patriarkanan den sentido ku nan a bai laga un mundu di fama i rikesa. Nan ta lucha duru pa nan no kai den e tentashon di hiba un bida materialista i egoista. Kiko ta yuda nan? Esei ta nan amor pa Yehova i nan fe fuerte den e promesa ku lo e kaba ku tur inhustisia i rekompensá su fiel sirbidónan ku bida eterno den un hustu mundu nobo.—Lesa Salmo 37:5, 7, 9, 29.

17. Kiko bo ta determiná pa hasi, i kiko nos lo analisá den e siguiente artíkulo?

¹⁷ Den e artíkulo akí nos a siña ku ora nos hasi orashon riba un base regular i meditá riba e promesanan di Dios, nos lo mantené nos fe fuerte. Esei na su turno lo yuda nos soportá prueba di fe segun ku nos ta enfoká riba nos speransa kristian ku un “konfiansa firme.” Pero Beibel su deskripshon di fe ta enserá mas ku loke nos a kaba di siña. E siguiente artíkulo lo trata esei.