Pregunta di Lektor

Kiko ta pone “e kosnan deseabel di tur e nashonnan” drenta den e “kas” di adorashon berdadero?—Hageo 2:7, NW.

Mediante profeta Hageo, Yehova a profetisá: “Lo mi sagudí tur e nashonnan, i e kosnan deseabel di tur e nashonnan tin ku drenta paden; i lo mi yena e kas aki ku gloria.” (Hageo 2:7, NW) Ta e sagudimentu di “tur e nashonnan” ta pone “e kosnan deseabel” di e nashonnan, esta, personanan di kurason onrado, aseptá adorashon berdadero? E kontesta ta nò.

Konsiderá un ratu ta kiko ta sagudí e nashonnan i na kiko e sagudimentu aki ta hiba. Beibel ta bisa ku “e nashonnan ta reboltiá . . . i e pueblonan ta plania un kos bano.” (Salmo 2:1) E “kos bano” ku nan ta “plania,” òf meditá riba dje, ta kon pa sigurá kontinuashon di nan propio soberania. Loke mas ta sagudí nan ta kualke kos ku ta menasá nan gobernashon.

E predikashon mundial ku Testigunan di Yehova ta hasi tokante Dios su Reino establesí, a bira presis e tipo di menasa ei pa e nashonnan. De echo, e Reino Mesiániko di Dios den man di Hesukristu ta bai “garna i pone un fin na tur e reinonan aki [kreá pa hende].” (Daniel 2:44) E mensahe di huisio ku ta forma parti di nos trabou di prediká ta kousando un sagudimentu den e nashonnan. (Isaias 61:2) I e sagudimentu ta bira mas pisá segun ku e trabou di prediká ta bira mas i mas intenso i ekstenso. E sagudimentu profetisá na Hageo 2:7 ta un señal di kiko?

Na Hageo 2:6 nos ta lesa: “Pasobra asina e SEÑOR di ehérsitonan ta bisa: ‘Den poko tempu mi ta bai sagudí un biaha mas e shelunan i e tera, e laman i e tera seku.’” Apòstel Pablo, sitando for di e versíkulo aki, a skirbi: “El a primintí, bisando: ‘Un biaha mas lo mi sagudí no tera so, sino shelu tambe.’ I e ekspreshon aki: ‘Un biaha mas,’ ta indiká e kitamentu di e kosnan ei ku por wòrdu sagudí, esta, kosnan ku a wòrdu kreá, pa e kosnan ku no por wòrdu sagudí [esta, e Reino] por keda.” (Hebreonan 12:26, 27) Sí, henter e sistema aktual di kosnan lo ser destruí pa traha lugá pa Dios su mundu nobo.

Personanan di kurason onrado ta ser atraí na adorashon berdadero, pero no pasobra e nashonnan ta ser sagudí. E loke ku ta atraé nan na Yehova i su adorashon ta e mesun akshon ku ta pone e nashonnan sagudí, esta, e predikashon mundial tokante Dios su Reino establesí. Proklamashon di e bon notisia di e “evangelio eterno” ta atraé personanan ku tin e disposishon korekto na e adorashon di e Dios berdadero.—Revelashon 14:6, 7.

E mensahe di Reino ta un mensahe di huisio i di salbashon. (Isaias 61:1, 2) E predikashon mundial di e mensahe ei tin dos resultado: e ta sagudí e nashonnan i e ta pone ku e kosnan deseabel di e nashonnan ta drenta paden pa e gloria di Yehova.