Onesiforo—Un Consoladó cu Curashi

“TENE presente esnan den cadena di prizon como si fuera boso ta mará cu nan, i esnan cu ta ser maltratá.” (Hebreonan 13:3) Ora apostel Pablo a skirbi e palabranan aki rond di 61 E.C., e mes ya caba a yega di ser encarcelá na mas cu un ocasion i mester a pasa den mésun experencia atrobe promé cu el a muri como mártir. (Echonan 16:23, 24; 22:24; 23:35; 24:27; 2 Corintionan 6:5; 2 Timoteo 2:9; Filemon 1) Mescos cu awendia, e tempu ei tabata urgente pa congregacionnan percurá pa compañeronan creyente cu ta pasa prueba di nan fe.

Un disipel di promé siglo cu tabata specialmente atento n’e necesidad ei tabata Onesíforo. El a bishitá Pablo durante su di dos encarcelacion na Roma. Relacioná cuné, e apostel a skirbi: “Señor tene misericordia dje famia di cas di Onesíforo, pasobra hopi bes el a trece refrescamentu pa mi, i e no a tene bergwensa di mi cadenanan. Al contrario, ora el a resultá di ta na Roma, el a buscá mi cu diligencia i a hañá mi.” (2 Timoteo 1:16, 17) Bo a yega di saca tempu pa meditá riba loke e par di palabranan ei realmente ta nificá? Si bo haci esei, probablemente bo aprecio pa Onesíforo lo aumentá. Lo bo mira cu e tabata un consoladó cu curashi.

Pablo Su di Dos Encarcelacion

Despues cu el a ser librá for di su promé encarcelacion, atrobe Pablo tabata den un prizon romano, pero bou di condicionnan diferente. Durante su promé encarcelacion, Pablo su amigunan por a bini cerca dje den su mes cas di huur, i el a parce di tabatin confiansa cu pronto lo el a ser librá. Awor cu mayoria hende a bandon’é, el a enfrentá martirio.—Echonan 28:30; 2 Timoteo 4:6-8, 16; Filemon 22.

N’e ocasion aki Pablo tabata den prizon rond di 65 E.C. Aproximadamente un aña promé—den juli 64 E.C.—Roma tabata tur na candela, causando daño extenso na 10 dje 14 regionnan dje stad. Segun e historiadó romano Tácito, Emperador Nero tabata incapas pa “saca for di mente di hende e creencia siniestro cu e candela grandi tabata e resultado di un ordu di dje mes. P’esei pa deshací dje mal publicidad tocante su mes, Nero a pone e culpa i a causa e torturanan mas doloroso riba un clase odiá pa nan abominacionnan, cu e poblacion a yama cristiannan. . . . Nan mortonan a ser ehecutá den un manera masha despreciabel. Cubrí cu cueru di bestia, cachó a sker nan i nan a perecé, of nan a ser clabá na crus, of condená na candela i kimá, pa sirbi como un iluminacion di anochi, ora lus di dia a expirá.”

Den un ambiente manera esaki i cu prospectonan similar, Pablo a haña su mes den prizon. Nada straño cu e tabata masha gradicidu p’e bishitanan di su amigu Onesíforo! Pero laga nos mira e mésun situacion for dje punto di bista di Onesíforo.

Bishitando Pablo e Prezu

Aparentemente, Onesíforo su famia tabata biba na Efeso. (2 Timoteo 1:18; 4:19) No ta conocí si Onesíforo a bini n’e capital dje imperio pa su mes asuntunan of specíficamente pa bishitá Pablo. En todo caso, e apostel a remarcá: ‘Ora Onesíforo a resultá di ta na Roma, el a trece refrescamentu pa mi.’ (2 Timoteo 1:16, 17) Ki clase di refrescamentu? Aunke ta posibel cu e asistencia di Onesíforo a incluí yudansa material, ta evidente cu su presencia tambe a sirbi como un estímulo pa fortalecé i animá Pablo. De facto, algun traduccion ta bisa: “Hopi biaha el a lanta mi spiritu,” of “hopi biaha el a consolá mi.”

E tempu ei, tabata difícil pa cumpli cu un deseo di bishitá un prezu cristian na Roma. Distinto for dje tempu di Pablo su promé encarcelacion, ta parce cu e cristiannan romano a perde contacto cuné. Den un stad grandi manera Roma, no tabata un tarea fácil pa haña un prezu scondí entre e gran cantidad di hendenan cu tabata encarcelá pa vários delitu. P’esei, un búskeda diligente tabata necesario. E erudito Giovanni Rostagno ta describí e asuntu of situacion asina aki: “Por tabatin vários tipo di dificultad. Riba tur cos, prudencia excepcional tabata necesario den e búskeda. Recogé informacion aki i aya i duna e impresion di tabata ansioso pa localisá e prizon den cua tabatin un prezu fanático, bieu i implicá den numeroso crímen, por a lanta indebido sospecho.”

E escritor P. N. Harrison ta describí e mésun situacion di un manera bibu, bisando: “Ta parce cu nos ta capta imágennan di un cara dicididu entre e multitud di hende cu ta cana bai bini, i cu masha interes ta sigui e stranhero aki cu a bini dje costanan leu di Egeo, segun cu e ta bira p’aki p’aya den e laberinto di cayanan desconocí, batiendo na hopi porta, siguiendo tur pista, i cu aunke e ta spiertá p’e riesgonan cu e ta tumando, e ta determiná pa no bandoná su búskeda; te ora cu den un of otro cas-prizon scondí un bos conocí ta salud’é, i e ta descubrí Pablo mará na cadena na un soldat romano.” Si e lugá ei tabata algu manera otro prizon romano, probablemente e tabata un lugá friu, scur i sushi, unda cadenanan i tur sorto di afliccion a abundá.

Tabata peligroso pa hende reconocé bo como amigu di un prezu manera Pablo. Tabata asta mas peligroso pa sigui bishit’é. Pa identificá bo mes abiertamente como un cristian a nificá core e riesgo di ser arestá i ehecutá cu tortura. Pero Onesíforo no a keda contentu pa bishitá Pablo un of dos biaha so. Tampoco e tabatin bergwensa ni miedu pa haci esei “hopi bes.” Di berdad Onesíforo a cumpli cu e nificacion di su nomber, “Cargadó di Probecho,” percurando yudansa amoroso cu curashi apesar di peliger.

Pakico Onesíforo a haci tur esaki? Brian Rapske a declará: “Prizon no tabata un lugá di sufrimentu físico so, sino un lugá di ansiedad profundo debí n’e tensionnan cu el a trece riba e prezu. Den un contexto asina, e presencia físico i animacionnan verbal di yudantenan por tabata un gran estímulo emocional p’e prezu.” Evidentemente Onesíforo a realisá esei i cu curashi a apoyá su amigu lealmente. Cuantu Pablo mester a apreciá un yudansa asina!

Kico A Para di Onesíforo?

Den su di dos carta na Timoteo, Pablo a manda saludo p’e famia di cas di Onesíforo i a bisa di dje: “Señor permitié haña misericordia di Jehova den e dia ei.” (2 Timoteo 1:18; 4:19) Hopi hende ta pensa cu e palabranan “den e dia ei” ta referí na Dios su dia di huicio i ta concluí asina cu Onesíforo a muri. Si esei tabata e caso, kisas “Onesíforo a risca drenta e cuartel peligroso aki un biaha di mas, i a paga . . . e castigu cu su bida,” segun P. N. Harrison. Naturalmente, Onesíforo simplemente por tabata for di cas ora e carta a yega, of Pablo por a incluyé den e saludonan cu el a manda pa henter su famia di cas en bes di mencion’é personalmente.

Algun hende ta kere cu tin un nificacion special den e declaracion: “Señor permitié haña misericordia di Jehova den e dia ei.” Nan ta haña cu e palabranan aki ta hustificá oracionnan pa intercedé na fabor di alma di defuntunan cu ta biba i tal bes sufri den un region spiritual. Sin embargo, un idea asina ta na conflicto cu e siñansa bíblico di cu e mortonan no ta conciente di nada. (Eclesiástes 9:5, 10) Asta si Onesíforo a muri, Pablo simplemente tabata expresando un deseo pa su amigu haña misericordia di Dios. “Nos tin derecho di expresá e deseo ei pa tur hende,” R. F. Horton ta bisa. “Pero ta masha improbabel cu e [apostel] tabatin na mente pa resa p’e mortonan i haci Misa pa nan.”

Laga Nos Sea Consoladónan Leal

Sea cu Onesíforo realmente a perde su bida ora e tabata yudando Pablo of no, un cos ta sigur: el a risca su bida p’e haña e apostel i bishit’é den prizon. I no por tin ningun duda cu Pablo a apreciá e apoyo i animacion sumamente necesario cu el a haña for di Onesíforo.

Ora compañeronan cristian ta experenciá prueba, persecucion of encarcelacion, nos lo por ta den un posicion pa consolá i animá nan. P’esei laga nos haci oracion na nan fabor i amorosamente haci tur loke nos por pa yuda nan. (Juan 13:35; 1 Tesalonicensenan 5:25) Mescos cu Onesíforo, laga nos sea consoladónan cu curashi.

[Plachi na página 31]

Cu curashi Onesíforo a consolá apostel Pablo den prizon