“Apresiá Esnan Ku Ta Traha Diligentemente Meimei di Boso”

“Apresiá esnan ku ta traha diligentemente meimei di boso, i ku ta guia boso den Señor i ta spièrta boso.”​—1 TES. 5:12.

1, 2. (a) Tempu ku Pablo a skirbi su promé karta na e kongregashon di Tesalónika, den ki situashon nan tabata? (b) Kiko Pablo a animá e tesalonisensenan pa hasi?

IMAGINÁ ku bo ta pertenesé na e kongregashon di Tesalónika di promé siglo, un di e proménan ku a keda establesé na Europa. Apòstel Pablo a dediká hopi tempu na animá i fortalesé e rumannan ei. Probablemente, el a nombra algun di nan komo ansiano pa dirigí e kongregashon, meskos ku el a hasi otro kaminda. (Echo. 14:23) Pero despues ku e kongregashon a ser formá, e hudiunan a instigá un multitut pa kore ku Pablo i Silas for di e stat. E kristiannan ku a keda atras lo a sinti nan desampará, kisas asta yen di miedu.

² Ta di komprondé ku Pablo lo mester a keda preokupá pa e kongregashon resien formá despues ku el a bandoná Tesalónika. El a purba di bai bèk, pero ‘Satanas a strob’é.’ P’esei el a manda Timoteo pa enkurashá e kongregashon. (1 Tes. 2:18; 3:2) E bon informe ku Timoteo a trese bèk despues tabata motibu pa Pablo skirbi e tesalonisensenan un karta. Entre otro, Pablo a animá nan pa ‘apresiá esnan ku tabata guia nan.’​—Lesa 1 Tesalonisensenan 5:​12 i 13.

 3. Ki motibu e kristiannan di Tesalónika tabatin pa mustra hopi apresio pa nan ansianonan?

³ E ansianonan di Tesalónika no tabatin mes tantu eksperensia ku Pablo i su kompañeronan di biahe ni e trayektoria largu di sirbishi kristian di e ansianonan di Yerusalèm. Al fin i al kabo, e kongregashon no tabatin ni un aña ainda! Tòg e miembronan di kongregashon por tabata gradisidu pa nan ansianonan, kendenan tabata ‘traha ku diligensia,’ ‘guia’ e kongregashon i “spièrta” e rumannan. Sí, nan tabatin bon motibu pa mustra amor i “hopi apresio” pa e ansianonan. Tambe Pablo a konsehá e rumannan pa “biba na pas ku otro.” Si abo tabata na Tesalónika, lo bo a mustra apresio profundo pa e trabou ku e ansianonan tabata hasi? Kon bo ta mira e “donnan” den forma di hende akí ku Dios a duna boso kongregashon pa medio di Kristu?​—Efe. 4:8.

Nan Ta “Traha Diligentemente”

4, 5. Ki trabou diligente e ansianonan den tempu di Pablo tabata hasi pa siña e kongregashon, i kon esei ta e kaso awe tambe?

⁴ Despues ku Pablo i Silas a haña nan ta bai Berea, kon e ansianonan na Tesalónika tabata “traha diligentemente”? Sin duda, nan a imitá Pablo su manera di siña e kongregashon, usando e Skritura. Kisas bo ta puntra bo mes si e tesalonisensenan tabatin apresio pa e Palabra di Dios, ya ku segun Beibel e kristiannan di Berea tabatin un “mentalidat mas noble ku esnan na Tesalónika . . . i tabata skudriñá e Skrituranan tur dia.” (Echo. 17:11) Ma aki Pablo tabata referí na e hudiunan di Tesalónika en general, no na e kristiannan. Esnan ku a bira kreyente a ‘aseptá e palabra di Dios no komo palabra di hende, sino pa loke e ta, esta, e palabra di Dios.’ (1 Tes. 2:13) E ansianonan lo mester a traha duru pa alimentá e rumannan ei spiritualmente.

⁵ Awe, e esklabo fiel i prudente ta perkurá “kuminda na su debido tempu” pa e pueblo di Dios. (Mat. 24:45) Bou di direkshon di e esklabo, ansianonan lokal ta traha ku diligensia pa alimentá nan rumannan spiritualmente. Kisas nan tin un abundansia di literatura bíbliko na nan disposishon i den algun idioma asta hèrmènt manera Indèks di Publikashonnan Watch Tower i Watchtower Library riba CD-ROM. Ku yudansa di esakinan, ansianonan ta dediká hopi ora pa prepará nan partinan di manera ku nan por presentá e informashon asigná na un manera efikas i asina satisfasé e nesesidatnan spiritual di e kongregashon. Abo a yega di pensa riba kuantu tempu ansianonan ta dediká na prepará nan partinan pa reunion, asamblea i kongreso?

6, 7. (a) Ki ehèmpel Pablo a pone pa e ansianonan na Tesalónika? (b) Pakiko kisas no ta fásil pa ansianonan djawe imitá Pablo?

⁶ E ansianonan na Tesalónika a kòrda e bon ehèmpel ku Pablo a pone den pastoriá e tou. E no tabata hasi su bishitanan di pastoreo den un forma seku ni djis pa kumpli ku un obligashon. Manera nos a mira den e artíkulo anterior, Pablo tabata “kariñoso” ku e rumannan, ‘manera un mènchi ku ta kuida su mes yunan ku ternura.’ (Lesa 1 Tesalonisensenan 2:​7 i 8.) E tabata dispuesto asta ‘pa kompartí su mes bida’! E ansianonan di Tesalónika mester a imit’é den nan trabou di pastoreo.

⁷ Ansianonan djawe, meskos ku Pablo, ta kuida e tou ku ternura. Kisas algun ruman, di naturalesa, no ta muchu amigabel i kariñoso. Ma e ansianonan ta purba komprondé pakiko e rumannan akí ta asina i ta konsentrá mas bien riba nan bon kualidatnan. Ta bèrdat ku, komo hende imperfekto, kisas no ta fásil pa un ansiano mira kada ruman for di un punto di bista positivo. Sinembargo, segun ku e ta hasi su bèst pa ser kariñoso ku tur ruman, su esfuerso pa ta un bon wardadó bou di direkshon di Kristu no ta digno di elogio?

8, 9. Menshoná algun manera den kua ansianonan djawe ta ‘tene warda riba nos alma.’

⁸ Nos tin tur motibu pa ta ‘sumiso’ na e ansianonan. Manera Pablo a skirbi, ‘nan ta tene warda riba nos alma.’ (Heb. 13:17) E palabranan ei ta pone nos kòrda riba e wardadó di karné ku ta pèrdè soño pa e protehá su tou. Ansianonan djawe tambe por haña nan ta sakrifiká nan soño pa atendé e nesesidatnan di rumannan ku ta enfermo, ku tin problema emoshonal òf ku ta débil spiritualmente. Por ehèmpel, tin biaha e ansianonan ku ta sirbi den Komité di Kontakto ku Hospital tin ku lanta meianochi pa atendé un emergensia médiko. Ora nos haña nos den un situashon asina, sigur nos lo keda masha gradisidu ku nan yudansa!

⁹ Ansianonan ku ta sirbi den Komité Regional di Konstrukshon i komité di ousilio ta traha duru pa yuda e rumannan. Nan meresé tur nos apoyo! Tuma por ehèmpel e esfuersonan pa yuda e rumannan despues ku e siklon Nargis a asotá Myanmar na 2008. Pa por a alkansá e kongregashon di Bothingone den e region di delta di Irrawaddy, e rumannan ku a bai pa duna ousilio mester a pasa dor di un área destrosá kankan di kadaver. Ora e rumannan lokal a mira ku den e promé grupo di ousilio ku a yega Bothingone tabatin nan eks superintendente di sirkuito, nan a grita: “Ata! Ta nos superintendente di sirkuito! Yehova a reskatá nos!” Bo ta apresiá e trabou diligente ku ansianonan ta hasi di dia i anochi? Nos no mester lubidá tampoko esnan ku ta sirbi den komiténan spesial pa atendé problemanan hudisial kompliká. Aunke e ansianonan akí no ta broma ku loke nan ta hasi, esnan ku ta benefisiá di nan servisio sí ta berdaderamente gradisidu.​—Mat. 6:​2-4.

10. Ki trabounan tras di kortina ansianonan ta hasi?

¹⁰ Hopi ansiano djawe ta hasi diferente trabou atministrativo tambe. Por ehèmpel, e koordinadó di e kuerpo di ansiano ta traha programa pa e reunionnan di tur siman. E sekretario di kongregashon ta kompilá e rapòrtnan di sirbishi mensual i anual. E superintendente di skol ta tuma su tempu pa hinka e programa di skol den otro. Kada tres luna mester kontrolá e kuentanan di kongregashon. Ansianonan ta lesa karta ku nan ta risibí for di sukursal i ta apliká e instrukshon afin di promové “unidat di fe.” (Efe. 4:​3, 13) Ku esfuerso di e ansianonan diligente akí, “tur kos [ta] sosodé korektamente i na un manera ordená.”​—1 Kor. 14:40.

Nan Ta “Guia Boso”

11, 12. Ken ta dirigí e kongregashon, i kiko esei ta enserá?

¹¹ Pablo a bisa ku e ansianonan di Tesalónika tabata “guia” e kongregashon. Den e idioma original di Beibel e palabra akí ta nifiká “para dilanti” i por ser tradusí tambe komo “dirigí.” (1 Tes. 5:12) Di e mesun ansianonan akí tambe Pablo a bisa ku nan tabata “traha diligentemente;” pues, el a referí na henter e kuerpo di ansiano. Awe, mayoria di ansiano ta para dilanti di e kongregashon i ta dirigí e reunionnan. E kambio resien pa yama e superintendente presidente “koordinadó di e kuerpo di ansiano” ta yuda nos mira tur ansiano komo miembro di un kuerpo uní.

¹² E trabou di “guia” òf dirigí e kongregashon ta enserá mas ku djis siña for di plataforma. Nos ta haña e mesun ekspreshon na 1 Timoteo 3:4 (NW). Ei Pablo a bisa ku un superintendente ta un “hòmber ku ta dirigí su kas na un manera ekselente, kende su yunan ta sumiso i respetuoso.” Opviamente, aki e ekspreshon “dirigí” ta enserá no solamente siña e yunan sino tambe guia e famia i sòru pa e “yunan ta sumiso.” Sí, ansianonan ta dirigí e kongregashon i yuda tur miembro keda sumiso na Yehova.​—1 Tim. 3:5.

13. Pakiko ansianonan kisas tin ku tuma tempu pa yega na un desishon na un reunion di ansiano?

¹³ Pa ansianonan por dirigí e tou bon, nan ta deliberá ku otro kon pa atendé e nesesidatnan di kongregashon. Aunke kisas ta mas efisiente pa un ansiano so tuma tur desishon, kuerponan di ansiano di nos tempu ta sigui e ehèmpel di e kuerpo gobernante di promé siglo. Huntu nan ta buska e guia di e Skritura i ta skucha opinion di otro ku e meta di apliká prinsipio di Beibel na e nesesidatnan di nan kongregashon. Reunionnan di ansiano lo duna mihó resultado ora kada ansiano prepará pa esakinan, analisando e Skritura i e instrukshonnan di e esklabo fiel i prudente. Klaru ku esaki ta tuma su tempu sí. I si tin diferensia di opinion entre nan, manera a sosodé ora ku e kuerpo gobernante di promé siglo a trata e asuntu di sirkunsishon, kisas mas tempu i investigashon ta nesesario pa por yega na un konsenso basá riba e Skritura.​—Echo. 15:​2, 6, 7, 12-14, 28.

14. Abo ta apresiá ku bo ansianonan ta traha huntu komo un kuerpo uní? Pakiko bo ta pensa asina?

¹⁴ Kiko si un ansiano insistí riba su punto òf purba promové su propio ideanan, òf pió ainda, sembra simia di diskordia manera Diótrefes a hasi den promé siglo? (3 Juan 9, 10) Sin duda, henter e kongregashon lo sufri. Si Satanas a purba di desbaratá e pas di e kongregashon di promé siglo, nos por ta sigur ku lo e sigui purba hasi esei awe. Lo e buska tur manera di probechá di hende su tendensianan egoista, manera e deseo di haña prominensia. P’esei ansianonan mester keda humilde i traha huntu komo un kuerpo uní. Sin duda, e kongregashon lo apresiá esei mashá!

Nan Ta “Spièrta Boso”

15. Kiko ta motivá un ansiano pa spièrta un ruman?

¹⁵ Siguientemente, Pablo a hala atenshon na un tarea difísil pero importante ku ansianonan tin, esta, di spièrta e tou. Den e Skritura Griego Kristian, ta Pablo so a usa e palabra griego tradusí komo “spièrta.” E por nifiká duna konseho firme, pero sin papia malu ku e rumannan. (Echo. 20:31; 2 Tes. 3:15) Por ehèmpel, Pablo a skirbi e korintionan: “Mi no ta skirbi e kosnan akí pa brongosá boso, ma pa spièrta boso komo mi yunan stimá.” (1 Kor. 4:14) El a hasi esaki pasobra e tabata stima e rumannan i tabatin interes den nan.

16. Kiko ansianonan ta hasi bon di kòrda ora nan ta spièrta e rumannan?

¹⁶ Ansianonan ta kòrda ku e manera ku nan ta spièrta e rumannan por hasi un gran diferensia. Nan ta hasi esfuerso pa ta amabel, amoroso i servisial, meskos ku Pablo. (Lesa 1 Tesalonisensenan 2:​11 i 12.) Naturalmente, ansianonan ta ‘tene firme na e palabra fiel pa nan por ekshortá ku doktrina sano.’​—Tito 1:​5-9.

17, 18. Ora un ansiano spièrta bo di un peliger, kiko bo tin ku kòrda?

¹⁷ Klaru ku ansianonan tambe ta hende, i p’esei nan por bisa kosnan ku despues ta duel nan. (1 Rei. 8:46; Sant. 3:8) Ademas, nan sa ku por lo general no ta dushi pa haña korekshon; esei por kousa ‘doló i no goso.’ (Heb. 12:11) Pues, promé ku un ansiano aserká un ruman ku e intenshon di spièrt’é, lo e pensa bon riba e asuntu i hasi orashon tokante esaki. P’esei, si un ansiano spièrta bo tokante un asuntu, bo ta mira esei komo un muestra di su amor i interes den bo?

¹⁸ Suponé ku bo tin un problema di salú, i bo no sa kiko ta kous’é. Anto un dòkter ta saka afó eksaktamente kiko ta e problema, ma bo no ta gusta su diagnóstiko. Lo bo keda karga renkor kontra e dòkter ei? Nò, tòg! Asta si e rekomendá bo hasi un operashon, probablemente lo bo bai di akuerdo kuné, pasobra bo sa ku esei ta pa bo mes bon. Bo por laga di keda kontentu ku e forma ku e dòkter ta informá bo un ke otro, pero bo ta laga esei determiná kiko bo ta bai hasi? Klaru ku nò. Meskos tambe, no laga e manera ku un ansiano ta spièrta bo di un peliger stroba bo di skucha esnan ku Yehova i Hesus ta usa pa laga bo komprondé kon bo por protehá bo mes spiritualmente.

Apresiá e Ansianonan Ku Yehova A Duna Nos

19, 20. Kon bo por mustra bo apresio pa e “donnan” akí den forma di hende?

¹⁹ Kiko lo bo hasi ora bo haña un regalo trahá spesialmente pa bo? Lo bo no hasi bon uso di dje i asina demostrá bo apresio? Yehova, pa medio di Hesukristu, a duna nos “donnan” den forma di hende. Awor kon nos por demostrá nos apresio pa esei? Un manera ta di skucha ku sumo atenshon e diskursonan ku ansianonan ta duna i purba apliká e puntonan ku nan ta trese dilanti. Tambe bo por mustra bo apresio pa medio di bo komentarionan signifikativo na e reunionnan. Apoyá e trabou ku nan ta dirigí, manera sirbishi di vèlt. Si un ansiano a duna bo un konseho ku a yuda bo bon, pakiko no gradisié? Ademas, pakiko bo no ta mustra bo apresio na su famia ku tambe ta hasi sakrifisio? Kòrda ku pa un ansiano por traha duru den kongregashon, esei ta bai a kosto di e tempu ku e por pasa ku nan.

²⁰ Sí, nos tin motibu de sobra pa mustra nos gratitut pa e ansianonan: nan ta traha diligentemente, nan ta guia nos i ta spièrta nos. Sin duda, e “donnan” den forma di hende akí ta un provishon amoroso di Yehova!

Bo Ta Kòrda?

• Ki motibu e kristiannan na Tesalónika tabatin pa apresiá nan ansianonan?

• Ki trabou duru e ansianonan di bo kongregashon ta hasi?

• Kon nos ta benefisiá di guia di ansiano?

• Si un ansiano spièrta bo tokante algu, kiko bo mester kòrda semper?

[Plachi na página 31]

Bo ta balorá loke e ansianonan ta hasi pa e kongregashon?