Apreciá “Donnan den Hende”

“Respetá esnan cu ta traha duru entre boso i . . . duna nan mas cu consideracion extraordinario den amor debí na nan trabou.”—1 TESALONICENSENAN 5:12, 13.

 1. Segun Echonan 20:35, ki poder dunamentu tin? Ilustr’é.

“TIN mas felicidad den duna cu tin den ricibí.” (Echonan 20:35) Bo por corda e último biaha cu bo a experenciá e berdad dje palabranan ei di Jesus? Tal bes tabata un regalo cu bo a duna un hende masha kerí. Bo a scoge e regalo cuidadosamente, pasobra bo tabata kier p’e ta algu cu bo ser kerí lo apreciá. Cuantu e mirada di alegria riba cara di bo ser kerí a yena bo curason cu goso! Ora tin motivacion corecto tras di dunamentu, e ta un expresion di amor, i expresá amor tin e poder di duna nos felicidad.

 2, 3. (a) Pakico nos por bisa cu no tin ningun persona mas felis cu Jehova, i con e percuracion di “donnan den hende” por haci su curason contentu? (b) Kico nos lo no kier haci cu un regalo di Dios?

² Ken anto, lo por ta mas felis cu Jehova, e Dunador di ‘tur bon regalo’? (Santiago 1:17; 1 Timoteo 1:11) Tur regalo cu e duna ta motivá pa amor. (1 Juan 4:8) Esei sigur ta e caso dje regalo cu Dios a duna e congregacion mediante Cristo—“donnan den hende.” (Efesionan 4:8) E percuracion di ancianonan pa cuida e tou ta un expresion di Dios su amor profundo pa su pueblo. Ta scoge e hombernan aki cuidadosamente i nan tin cu cumpli cu rekisitonan bíblico. (1 Timoteo 3:1-7; Tito 1:5-9) Nan sa cu nan tin cu “trata e tou cu ternura,” pasobra e ora ei e carnénan lo tin motibu pa sinti nan gradicidu p’e wardadónan amoroso ei. (Echonan 20:29; Salmo 100:3) Ora Jehova mira cu su carnénan tin curason yen di tal gratitud, sigur su mes curason mester alegrá!—Proverbionan 27:11.

³ Nos sigur lo no kier baha balor di un regalo for di Dios; ni nos lo no kier keda sin mustra aprecio pa su regalonan. Pues dos pregunta ta lanta: Con ancianonan mester mira nan papel den e congregacion? I con e resto dje tou por mustra cu nan ta apreciá “donnan den hende”?

‘Nos Ta Boso Colaboradónan’

 4, 5. (a) Cu kico Pablo ta compará e congregacion, i pakico esei ta un bon ilustracion? (b) Kico Pablo su ilustracion ta mustra pa loke ta e manera cu nos un mester mira i trata otro?

⁴ Jehova a confia e “donnan den hende” cu un midí di autoridad den e congregacion. Claro cu ancianonan no kier haci mal uso di nan autoridad, pero nan sa cu ta masha fácil pa hende imperfecto haci esei. Con anto, nan mester mira nan mes en relacion cu e resto dje tou? Analisá e ilustracion cu apostel Pablo a usa. Despues cu el a considerá pakico Dios a duna “donnan den hende,” Pablo a skirbi: “Laga nos mediante amor crece den tur cos te na esun cu ta cabes, Cristo. For di dje tur e curpa, dor di ser armoniosamente uní huntu i trahá pa cooperá mediante tur djoint cu ta duna loke ta necesario, segun e funcionamentu di cada miembro respectivo n’e debido midí, ta contribuí n’e crecementu dje curpa p’e edificacion di su mes den amor.” (Efesionan 4:15, 16) Asina Pablo ta compará e congregacion, cu ta incluí anciano i otro miembronan, cu un curpa humano. Pakico esaki ta un bon ilustracion?

⁵ Un curpa humano ta consistí di hopi miembro diferente pero tin un solo cabes. Sin embargo, nada den e curpa—ni un músculo, ni un nervio, ni un bena—ta sin balor. Cada miembro ta balioso i ta contribuí algu n’e salú i bunitesa dje totalidad. Di igual manera, e congregacion ta consistí di hopi miembro diferente, pero cada miembro, sea hóben of bieu, fuerte of débil, por contribuí algu n’e salú spiritual i bunitesa general dje congregacion. (1 Corintionan 12:14-26) Ningun persona no tin nodi sinti cu e ta muchu insignificante p’e conta. N’e otro extremo, ningun hende mester sinti su mes superior, pasobra nos tur—wardadó i carné—ta parti dje curpa, i tin un solo cabes, cu ta Cristo. Asina Pablo ta pinta un cuadro caluroso dje amor, interes i respet cu nos mester tin pa otro. Reconociendo esaki ta yuda ancianonan tene un punto di bista humilde i balansá di nan papel den e congregacion.

 6. Aunke Pablo tabatin autoridad como apostel, con el a desplegá un spiritu humilde?

⁶ E “donnan den hende” aki no ta busca pa controlá e bida of fe di nan compañeronan di adoracion. Aunke Pablo tabatin autoridad como apostel, el a bisa e corintionan humildemente: “No cu nos ta doño riba boso fe, sino nos ta colaboradónan pa boso goso, pasobra ta dor di boso fe boso ta para.” (2 Corintionan 1:24) Pablo no a deseá di controlá e fe i moda di biba di su rumannan. Eigenlijk, e no a mira necesidad pa haci esei, pasobra el a expresá confiansa cu ya nan tabata homber i muhernan fiel cu tabata den e organisacion di Jehova, pasobra nan kier a haci loke tabata corecto. P’esei, papiando di su mes i di su compañero di biahe, Timoteo, en efecto, Pablo tabata bisando: ‘Ta nos tarea pa traha cu boso pa sirbi Dios cu goso.’ (2 Corintionan 1:1) Esta un spiritu humilde!

 7. Kico ancianonan humilde ta realisá tocante nan papel den e congregacion, i ki confiansa nan tin den nan colaboradónan?

⁷ Awe “donnan den hende” tin e mésun tarea. Nan ta ‘colaboradó pa nos goso.’ Ancianonan humilde ta realisá cu no ta na nan pa dicidí cuantu mas otronan por haci den sirbishi na Dios. Nan sa cu aunke nan por animá otronan pa expandé of mehorá nan ministerio, sirbishi na Dios mester sali for di un curason boluntario. (Compará cu 2 Corintionan 9:7.) Nan tin confiansa cu si nan colaboradónan ta gososo, nan lo haci tur loke nan por. Pues ta nan deseo di curason pa yuda nan rumannan “sirbi Jehova cu alegria.”—Salmo 100:2.

Yuda Tur Sirbi cu Goso

 8. Den ki maneranan ancianonan por yuda nan rumannan sirbi Jehova cu goso?

⁸ Ancianonan, con boso por yuda boso rumannan sirbi cu goso? Bo por animá nan cu bo ehempel. (1 Pedro 5:3) Demostrá bo celo i goso den e ministerio, i esei lo por animá otronan pa imitá bo ehempel. Encomendá otro hende pa nan esfuersonan di henter alma. (Efesionan 4:29) Encomendacion caluroso i genuino ta yuda otro hende sinti nan mes útil i balioso. Esei ta animá e carnénan pa deseá di haci nan best pa sirbi Dios. Evitá comparacionnan desfaborabel. (Galationan 6:4) Comparacionnan asina tin tendencia di desanimá en bes di motivá otronan pa mehorá. Ademas, Jehova su carnénan ta hende individual cu diferente circunstancia i abilidad. Mescos cu Pablo, expresá confiansa den bo rumannan. Amor “ta kere tur cos,” pues nos ta haci bon di kere cu nos rumannan ta stima Dios i kier agrad’é. (1 Corintionan 13:7) Ora bo ‘mustra onor na otro,’ bo ta saca lo mihó den nan. (Romanonan 12:10) Bo por ta sigur cu ora e carnénan ta animá i refrescá, mayoria lo haci tur loke nan por den sirbi Dios, i nan lo haña goso den e sirbishi ei.—Mateo 11:28-30.

 9. Ki manera di mira e otro ancianonan lo yuda cada anciano sirbi cu goso?

⁹ Si bo mira bo mes humildemente como un ‘colaboradó,’ esei lo yuda abo sirbi cu goso i apreciá e donnan special cu bo co-ancianonan tin. Cada anciano tin su mes talento i abilidadnan cu e por usa p’e beneficio dje congregacion. (1 Pedro 4:10) Unu por tin un don den siña otro. Un otro por ta bon den organisá cosnan. Un otro por ta excepcionalmente acercabel debí na su calor i compasion. Echo ta cu ningun anciano tin tur don n’e mésun grado. E echo cu un anciano tin un don special—laga nos bisa, e don di siña otro—ta hacié superior cu un otro anciano? Di ningun manera! (1 Corintionan 4:7) Di otro banda, no tin nodi envidiá e don cu un otro tin, ni sinti bo mes inferior ora otro hende ta encomendá un anciano p’e abilidad cu e tin. Corda, abo mes tin donnan cu Jehova ta mira den bo. I e por yuda bo cultivá e donnan ei i usa nan p’e beneficio di bo rumannan.—Filipensenan 4:13.

‘Sea Obediente i Sea Sumiso’

10. Pakico ta na su lugá pa nos expresá aprecio p’e “donnan den hende”?

¹⁰ Ora nos ricibí un regalo, ta na su lugá pa expresá aprecio. “Mustra cu boso ta gradicidu,” segun Colosensenan 3:15. Kico anto dje “donnan den hende,” e regalo precioso cu Jehova a duna nos? Claro cu na promé lugá nos ta gradicidu na Jehova, e Dunador di Regalo generoso. Pero kico dje “donnan den hende” mes? Con nos por mustra cu nos ta apreciá nan?

11. (a) Con nos por demostrá nos aprecio pa “donnan den hende”? (b) Kico e expresionnan “sea obediente” i “sea sumiso” ta nificá?

¹¹ Nos por demostrá nos aprecio p’e “donnan den hende” dor di ta lihé pa sigui nan conseho i decisionnan basá riba Bijbel. Bijbel ta consehá nos: “Sea obediente na esnan cu ta hiba delantera den boso i sea sumiso, pasobra nan ta vigilá riba boso alma como esnan cu lo rindi cuenta, pa nan haci esaki cu goso i no cu suspiro, pasobra esei lo ta severamente dañoso pa boso.” (Hebreonan 13:17) Tuma nota cu nos mester ta no solamente “obediente,” sino tambe “sumiso” na esnan cu ta hiba delantera. E palabra griego pa “sea sumiso” ta nificá literalmente “cede.” Comentando riba e expresionnan “sea obediente” i “sea sumiso,” R. C. H. Lenski, erudito di Bijbel, ta bisa: “Un hende ta obedecé ora e ta di acuerdo cu loke hende a bis’é p’e haci, ora e ta convencí cu esei ta corecto i pa su probecho; un hende ta cede . . . ora e tin un opinion contrario.” Ora nos ta comprendé i ta di acuerdo cu e guia di esnan cu ta hiba delantera, nos por obedecé di buena gana. Pero kico di ora nos no ta comprendé e motibu tras di un cierto decision?

12. Pakico nos mester ta sumiso, of mester cede, asta ora nos no ta comprendé completamente e motibu tras di un cierto decision?

¹² Aki ta caminda kisas nos mester ta sumiso, of mester cede. Pakico? Na promé lugá, nos tin cu confia cu e hombernan spiritualmente cualificá aki tin nos mihó interesnan na pechu. Al fin i al cabo, nan sa bon cu nan tin cu rindi cuenta na Jehova p’e carnénan cu el a confia na nan cuido. (Santiago 3:1) Ademas, nos ta haci bon di corda cu podisé nos no sa tur e detayenan confidencial cu a hiba na un decision basá riba conocimentu.—Proverbionan 18:13.

13. Kico por yuda nos ser sumiso ora ta trata di decisionnan hudicial dje ancianonan?

¹³ Kico di ser sumiso ora ta trata di decisionnan hudicial? Ta berdad cu esaki tal bes no ta fácil, foral si un decision a cai pa expulsá un persona cu nos ta stima, por ta un famia of un amigu cerá. Aki atrobe, ta mihó cede n’e huicio dje “donnan den hende.” Nan ta den un posicion pa ta mas obhetivo cu nos, i kisas nan ta na altura di mas detaye. Hopi bes ta costa e rumannan aki pa tuma decisionnan asina; ‘husga pa Jehova’ ta un responsabilidad serio. (2 Crónicanan 19:6) Nan ta haci tur esfuerso pa ta misericordioso, pasobra nan ta tene na mente cu Dios ta “cla pa pordoná.” (Salmo 86:5) Pero tambe nan tin cu tene e congregacion limpi, i Bijbel ta manda nan expulsá malechornan no-repentí. (1 Corintionan 5:11-13) Den hopi caso e malechor mes ta aceptá e decision. E disiplina por ta net loke e mester pa bolbe na su sano huicio. Si nos, como su sernan kerí, ta sumiso ora ta trata dje decision, nos por ta yudand’e dje manera ei saca beneficio dje disiplina.—Hebreonan 12:11.

“Duna Nan Mas cu Consideracion Extraordinario”

14, 15. (a) Segun 1 Tesalonicensenan 5:12, 13, pakico e ancianonan ta merecé nos consideracion? (b) Di con nos por bisa cu e ancianonan ta ‘traha duru entre nos’?

¹⁴ Tambe nos por demostrá nos aprecio p’e “donnan den hende” dor di mustra consideracion na nan. Ora Pablo a skirbi e congregacion na Tesalónica, el a spierta su miembronan: “Respetá esnan cu ta traha duru entre boso i cu ta presidí riba boso den Señor i ta amonestá boso; i . . . duna nan mas cu consideracion extraordinario den amor debí na nan trabou.” (1 Tesalonicensenan 5:12, 13) “Traha duru” no ta un bon descripcion dje ancianonan dedicá cu di un manera inegoista ta duna di nan mes na nos fabor? Considerá un ratu e carga pisá cu e rumannan stimá aki tin.

¹⁵ Den hopi caso nan ta hombernan di famia cu tin cu traha pa percurá pa nan famia. (1 Timoteo 5:8) Si e anciano tin yu, e chikitinnan aki tin mester di tempu i atencion di nan tata. Tal bes e tin cu yuda nan cu nan huiswerk, i tambe apartá un tiki tempu pa nan usa nan energia hubenil den recreo sano. (Eclesiástes 3:1, 4) Mas importante, e ta percurá p’e necesidadnan spiritual di su famia dor di conducí un studio di Bijbel regularmente cu e famia, traha cu nan den e ministerio di veld i hiba nan reunionnan cristian. (Deuteronomio 6:4-7; Efesionan 6:4) Laga nos no lubidá cu ademas dje responsabilidadnan aki cu ta comun pa hopi di nos, ancianonan tin tareanan adicional: prepará partinan pa reunion, haci bishita di pastoreo, percurá p’e bienestar spiritual dje congregacion i, ora ta necesario, atendé casonan hudicial. Algun tin responsabilidad adicional en coneccion cu asamblea di circuito, congreso di distrito, construccion di Salon di Reino i Comité di Contacto cu Hospital. Di berdad e rumannan aki ta “traha duru”!

16. Describí maneranan den cua nos por mustra consideracion n’e ancianonan.

¹⁶ Con nos por mustra consideracion na nan? Un proverbio bíblico ta bisa: “Un palabra na su tempu apropiado, o ki bon esei ta!” (Proverbionan 15:23; 25:11) Pues palabranan di aprecio sincero i di animacion por mustra nan cu nos no ta considerá nan trabou duru como algu gewoon. Tambe, nos mester ta razonabel den loke nos ta spera di nan. Di un banda, nos mester sinti nos liber pa acercá nan pa yudansa. Por tin biaha cu ‘nos curason mes ta cu dolor fuerte’ i nos tin mester di animacion, guia of conseho bíblico for di esnan cu ta “capacitá pa siña” e Palabra di Dios. (Salmo 55:4; 1 Timoteo 3:2) Na mésun tempu, nos tin cu corda cu ta un cantidad limitá di tempu un anciano por duna nos, pasobra e no por neglishá e necesidadnan di su mes famia of di otronan den e congregacion. Si nos tin “sintimentu di compañero” p’e rumannan trahadó aki, nos lo no kier bira demasiado exigente di nan. (1 Pedro 3:8) Mas bien, laga nos apreciá e tempu i atencion cu nan razonablemente por duna nos.—Filipensenan 4:5.

17, 18. Ki sacrificionan hopi esposa di anciano ta haci, i con nos por mustra cu nos no ta considerá e sacrificio dje ruman muhernan fiel aki como algu gewoon?

¹⁷ Kico di esposa dje ancianonan? Nan tambe no ta merecé nos consideracion? Al fin i al cabo, nan ta compartí nan esposo cu e congregacion. Hopi bes esaki ta exigí sacrificio di nan parti. De bes en cuando, ancianonan tin cu dedicá oranan di anochi pa atendé asuntunan di congregacion siendo cu nan lo por a dedicá e tempu ei na nan famia. Den hopi congregacion ruman muhernan cristian fiel di buena gana ta haci e sacrificionan ei di manera cu nan esposo por cuida e carnénan di Jehova.—Compará cu 2 Corintionan 12:15.

¹⁸ Con nos por mustra cu nos no ta considerá e sacrificio dje ruman muhernan cristian fiel aki como algu gewoon? Sigur dor di no exigí demasiado di nan esposo. Pero laga nos no lubidá tampoco e poder di palabranan simpel di aprecio. Proverbionan 16:24 ta bisa: “Dichonan agradabel ta un panal di honing, dushi pa e alma i un curacion p’e wesunan.” Wak un experencia aki. Despues di un reunion cristian, un pareha casá a acercá un anciano i a pidi pa papia cuné tocante nan yu homber tiener. Miéntras cu e anciano tabata papia cu e pareha, su esposa a warda cu pacenshi. Despues, e mama a acercá esposa dje anciano i bis’é: “Mi kier gradicí bo p’e tempu cu bo casá a tuma pa yuda mi famia.” Tal palabranan simpel i agradabel di aprecio a ègt toca curason dje esposa dje anciano ei.

19. (a) Ancianonan, como grupo, ta cumpliendo fielmente cu ki metanan? (b) Kico nos tur mester ta determiná pa haci?

¹⁹ E ancianonan cu Jehova a percurá pa cuida su carnénan ta un di su ‘bon regalonan.’ (Santiago 1:17) No, e hombernan aki no ta perfecto; mescos cu nos tur, nan ta haci fout. (1 Reynan 8:46) Tog, como grupo, ancianonan den e congregacionnan rond mundu ta cumpli fielmente cu e metanan cu Jehova tabatin na mente pa nan, esta, pa reahustá, edificá, unificá i protehá e tou. Laga cada anciano determiná pa sigui cuida e carnénan di Jehova tiernamente, i asina mustra cu e ta un don, of bendicion, pa su rumannan. I laga nos tur ta determiná pa mustra nos aprecio pa “donnan den hende” dor di ta obediente i sumiso na nan i dor di mustra consideracion na nan pa nan trabou duru. Ki gradicidu nos por ta cu Jehova amorosamente a percurá hombernan cu, en efecto, ta bisa su carnénan: ‘Ta nos tarea pa yuda boso sirbi Dios cu goso’!

Con Lo Bo Respondé?

◻ Pakico por compará e congregacion apropiadamente cu un curpa?

◻ Con ancianonan por yuda nan rumannan sirbi Jehova cu goso?

◻ Pakico nos mester ta tantu obediente como sumiso na esnan cu ta hiba delantera?

◻ Den ki maneranan nos por mustra consideracion n’e ancianonan?

[Plachi na página 16]

Ancianonan, encomendá otronan pa nan esfuersonan di henter alma

[Plachi na página 17]

Dor di nan ehempel celoso den e ministerio, ancianonan por yuda miembronan di famia i otronan sirbi cu goso

[Plachi na página 18]

Nos ta apreciá nos ancianonan cu ta traha duru!