Bo A Drenta den e Descanso di Dios?
“E hende cu a drenta den e descanso di Dios, e mes tambe a descansá di su mes obranan.”—HEBREONAN 4:10.
1. Pakico descanso ta asina deseabel?
DESCANSO. Ki un palabra dushi i agradabel! Bibando den e mundu druk i anshá djawe, mayoria di nos lo ta di acuerdo cu un tiki sosiegu ta masha bon biní. Sea nos ta hóben of bieu, casá of soltero, nos por sinti nos anshá i agotá djis dje bida di tur dia. Pa esnan cu tin limitacion físico of enfermedad, cada dia ta un reto. Manera e Scritura ta bisa: “Henter e creacion ta sigui suspirá huntu i keda den dolor huntu te awor.” (Romanonan 8:22) Un persona cu ta descansá no necesariamente ta floho. Descanso ta un necesidad humano cu nos tin cu satisfacé.
2. Desde ki tempu Jehova ta descansando?
2 Jehova Dios mes ta descansando. Den e buki di Génesis, nos ta lesa: “Shelu i tera i tur nan ehército a ser completá. I pa e di shete dia Dios a completá su obra cu el a traha, i el a pasa na descansá riba e di shete dia for di tur su obra cu el a traha.” Jehova a duna “e di shete dia” un nificacion special, pasobra e registro inspirá ta sigui bisa: “Dios a pasa na bendicioná e di shete dia i hacié sagrado.”—Génesis 2:1-3.
Dios A Sosegá di Su Obra
3. Kico no por tabata e motibunan pakico Dios a descansá?
3 Pakico Dios a descansá riba “e di shete dia”? Naturalmente, e no a descansá debí cu e tabata cansá. Jehova tin un “abundancia di energia dinámico” i “no ta cansa ni fatigá.” (Isaías 40:26, 28) Dios no a pasa na descansá tampoco debí cu e tabatin mester di un pausa of un cambio di ritmo, pasobra Jesus a bisa nos: “Mi Tata a sigui traha te awor, i ami ta sigui traha.” (Juan 5:17) En todo caso, “Dios ta un Spiritu” i no ta mará na ciclo i necesidadnan di curpa cu criaturanan físico tin.—Juan 4:24.
4. Den ki manera “e di shete dia” tabata diferente for dje seis ‘dianan’ anterior?
4 Con nos por haña un comprendimentu penetrante di pakico Dios a descansá riba “e di shete dia”? Dor di ripará cu, aunke Dios tabata masha satisfecho cu loke el a logra durante e periodo largu di seis “dia” di creacion anterior, el a bendicioná specíficamente “e di shete dia” i a declar’é “sagrado.” Concise Oxford Dictionary ta definí “sagrado” como “dedicá of destiná exclusivamente (na un dios of na un ke otro propósito religioso).” Pues, e echo cu Jehova a bendicioná “e di shete dia” i a declar’é sagrado ta indicá cu e dia ei i Dios su “descanso” mester tin un coneccion cu su boluntad i propósito sagrado i no cu ningun necesidad di su parti. Kico e coneccion ei ta?
5. Kico Dios a pone den movecion durante e promé seis ‘dianan’ di creacion?
5 Durante e seis ‘dianan’ anterior di creacion, Dios a crea i a pone den movecion tur e ciclonan i leynan cu ta dirigí funcionamentu dje tera i tur cos rond di dje. Científiconan ta siñando awor con maraviyosamente diseñá esakinan ta. Yegando na fin dje di “seis dia,” Dios a crea e promé pareha humano i a pone nan den “un hofi di Eden, parti oost.” Finalmente, Dios a declará su propósito relacioná cu e famia humano i e tera cu e palabranan profético aki: “Sea fructífero i bira hopi i yena e tera i domin’é, i tene dominio riba piscá di laman i riba criatura bulador di shelu i riba tur criatura bibiente cu ta move riba tera.”—Génesis 1:28, 31; 2:8.
6. (a) Na fin dje “di seis dia,” con Dios a sinti tocante tur loke el a crea? (b) Den ki sentido “e di shete dia” ta sagrado?
6 Ora e di “seis dia” di creacion a yega na su fin, e relato ta bisa nos: “Dios a mira tur cos cu el a traha i, mira! e tabata hopi bon.” (Génesis 1:31) Dios tabata satisfecho cu tur loke el a traha. E ora ei el a descansá, of a stop cu mas trabou di creacion respecto e tera. Sin embargo, pa perfecto i bunita cu e hofi paradísico tabata e tempu ei, el a cubri solamente un área chikitu, i tabatin apénas dos criatura humano riba tera. Lo a tuma tempu p’e tera i p’e famia humano alcansá e estado cu Dios a proponé. P’e motibu aki, el a fiha un di “shete dia” cu lo a permití tur loke el a crea den e seis ‘dianan’ anterior desaroyá na armonia cu su boluntad sagrado. (Compará cu Efesionan 1:11.) Segun cu “e di shete dia” ta yega na su fin, e tera lo a bira un paradijs mundial habitá eternamente pa un famia di hende perfecto. (Isaías 45:18) “E di shete dia” ta ser apartá pa, of dedicá na, e realisacion i cumplimentu dje boluntad di Dios relacioná cu e tera i humanidad. Den e sentido ei e ta “sagrado.”
7. (a) Den ki sentido Dios a descansá riba “e di shete dia”? (b) Con tur cos lo resultá pa tempu cu “e di shete dia” yega na su fin?
7 Pues Dios a descansá for di su obra di creacion riba “e di shete dia.” Ta como si fuera el a para un ratu pa permití tur loke el a pone den movecion finalisá nan curso. E tin pleno confiansa cu pa fin di “e di shete dia,” tur cos lo a resultá exactamente manera tabata su propósito. Asta si tabatin obstáculo, nan lo a ser vencé. Tur hende obediente lo beneficiá ora e boluntad di Dios bira un realidad completo. Nada lo prevení esaki pasobra e bendicion di Dios ta riba “e di shete dia,” i el a hacié “sagrado.” Ki un prospecto glorioso pa humanidad obediente!
Israel A Keda Sin Drenta den e Descanso di Dios
8. Na ki tempu i con e israelitanan a cuminsá warda e sabat?
8 E nacion di Israel a beneficiá di Jehova su areglo pa trabou i descanso. Asta promé cu Dios a duna e israelitanan e Ley na Ceru di Sínai, el a bisa nan mediante Moises: “Tuma nota dje echo cu Jehova a duna boso e sabat. P’esei e ta duna boso riba e di seis dia e pan pa dos dia. Cada un keda sinta den su mes lugá. No laga ningun hende sali for di su localidad riba e di shete dia.” E resultado tabata cu “e pueblo a pasa na warda e sabat riba e di shete dia.”—Exodo 16:22-30.
9. Pakico e ley di sabat tabata sin duda un bon cambio p’e israelitanan?
9 E areglo aki tabata nobo p’e israelitanan, cu a caba di ser librá for di sclabitud den Egipto. Aunke e egipcionan i otro nacionnan a midi tempu den periodonan di cincu pa dies dia, no ta probabel cu e israelitanan sclabisá tabatin un dia di sosiegu. (Compará cu Exodo 5:1-9.) P’esei ta razonabel pa concluí cu e pueblo di Israel a haña esaki un bon cambio. En bes di mira e rekisito di sabat como un carga of restriccion, nan lo mester tabata contentu pa siguié. De facto, mas despues Dios a bisa nan cu e sabat mester a sirbi como un recordatorio di nan sclabitud den Egipto i dje echo cu el a libra nan.—Deuteronomio 5:15.
10, 11. (a) Si nan a keda obediente, kico e israelitanan lo por a anticipá di disfrutá di dje? (b) Pakico e israelitanan a keda sin drenta den e descanso di Dios?
10 Si e israelitanan cu a sali for di Egipto cu Moises tabata obediente, nan lo tabatin e privilegio di drenta den e tera primintí “cu ta abundá cu lechi i miel.” (Exodo 3:8) Aya nan lo a disfrutá di descanso genuino, no solamente riba sabat, sino tambe atrabes di henter nan bida. (Deuteronomio 12:9, 10) Sin embargo, esei no a resultá di ta e caso. Relacioná cu nan, apostel Pablo a skirbi: “Ken tabata esnan cu a tende i tog a provocá rabia amargo? Realmente, no ta tur esnan cu a sali for di Egipto bou di Moises a hacié? Ademas, cu ken Dios tabata disgustá pa cuarenta aña? No tabata cu esnan cu a peca, kende nan cadaver a cai den desierto? Pero na ken el a hura cu nan lo no drenta den su descanso, cu no ta esnan cu a actua desobedientemente? Pues, nos ta mira cu nan no por a drenta debí na falta di fe.”—Hebreonan 3:16-19.
11 Ki un les poderoso pa nos! Pa motibu di nan falta di fe den Jehova, e generacion ei no a haña e descanso cu el a primintí nan. En bes di esei, nan a perecé den e desierto. Nan no a percibí cu como desendiente di Abraham, nan tabata estrechamente conectá cu e boluntad di Dios den percurá bendicion pa tur e nacionnan dje tera. (Génesis 17:7, 8; 22:18) En bes di traha na armonia cu e boluntad divino, nan deseonan mundano i egoista a distraí nan completamente. Laga nos nunca cai den un curso asina!—1 Corintionan 10:6, 10.
Ta Keda un Descanso
12. Ki prospecto tabata existí ainda p’e cristiannan di promé siglo, i con nan lo por a alcans’é?
12 Despues cu Pablo a mustra riba e echo cu Israel a keda sin drenta den e descanso di Dios debí na falta di fe, el a dirigí su atencion na su compañeronan creyente. Manera tin skirbí na Hebreonan 4:1-5, el a trankilisá nan cu “ta keda un promesa di drenta den [Dios] su descanso.” Pablo a urgi nan pa ehercé fe den e “bon nobo,” pasobra “nos cu a ehercé fe sí ta drenta den e descanso.” Siendo cu e Ley a ser eliminá caba dor di Jesus su sacrificio di rescate, Pablo no tabata refiriendo aki n’e descanso físico cu e sabat a percurá p’e. (Colosensenan 2:13, 14) Dor di cita Génesis 2:2 i Salmo 95:11, Pablo tabata urgiendo e cristiannan hebreo pa drenta den e descanso di Dios.
13. Ora Pablo a cita Salmo 95, pakico el a hala atencion n’e palabra “awe”?
13 E posibilidad di drenta den e descanso di Dios lo mester tabata “bon nobo” p’e cristiannan hebreo, mescos cu e descanso sabático lo mester tabata “bon nobo” p’e israelitanan promé cu nan. P’esei, Pablo a urgi su compañeronan creyente pa no haci e mésun eror cu Israel a haci den e desierto. Citando loke awor ta Salmo 95:7, 8, el a hala atencion n’e palabra “awe,” aunke hopi tempu a pasa caba desde cu Dios a descansá di su creacion. (Hebreonan 4:6, 7) Kico tabata Pablo su punto? Esei tabata cu “e di shete dia,” cu Dios a apartá pa permití su propósito relacioná cu e tera i humanidad cumpli completamente, tabata transcuriendo ainda. P’esei, tabata urgente pa su compañeronan cristian traha na armonia cu e propósito ei en bes di preocupá cu empeñonan egoista. Un biaha mas el a resoná e spiertamentu: “No haci boso curason duru.”
14. Con Pablo a mustra cu e “descanso” di Dios tabat’ei ainda?
14 Ademas, Pablo a mustra cu e “descanso” primintí no tabata djis un asuntu di establecé nan mes den e Tera Primintí bou dje liderato di Hosué. (Hosué 21:44) “Pasobra si Hosué a hiba nan den un lugá di descanso,” Pablo a argumentá, “Dios lo no a papia di un otro dia despues.” En bista di esei, Pablo a agregá: “Ta keda un descanso di sabat p’e pueblo di Dios.” (Hebreonan 4:8, 9) Kico e “descanso di sabat” ei ta?
Drenta den e Descanso di Dios
15, 16. (a) Kico ta e nificacion dje término “descanso di sabat”? (b) Kico kier men ‘descansá for di bo mes obranan’?
15 E expresion “descanso di sabat” ta traducí for di un palabra griego cu ta nificá “warda sabat.” (Kingdom Interlinear) Profesor William Lane ta declará: “E término a ricibí su matis particular for dje instruccion riba sabat cu a desaroyá den hudaismo a base di Exodo 20:8-10, caminda a enfatisá cu descanso i alabansa mester bai huntu . . . [E] ta enfatisá e aspecto special di festividad i goso, expresá den e adoracion i alabansa di Dios.” Pues anto, e descanso primintí no ta djis un alivio for di trabou. E ta un cambio for di labor fastioso i sin propósito, pa sirbishi gososo cu ta onra Dios.
16 E siguiente palabranan di Pablo ta confirmá esaki: “Pasobra e hende cu a drenta den e descanso di Dios, e mes tambe a descansá di su mes obranan, mescos cu Dios a haci for di esnan di dje.” (Hebreonan 4:10) Dios no a descansá riba e di shete dia di creacion dor cu e tabata cansá. Mas bien, el a para su trabou di creacion terenal afin di laga su obra desaroyá i yega na pleno gloria, na su onor i alabansa. Como parti di Dios su creacion, nos tambe mester cuadra den e areglo ei. Nos mester ‘descansá for di nos mes obranan,’ esta, nos mester stop di purba hustificá nos mes dilanti Dios den un esfuerso pa gana salbacion. Mas bien, nos mester tin fe cu nos salbacion ta dependé dje sacrificio di rescate di Jesucristo, mediante cua tur cos lo ser trecé atrobe na armonia cu e propósito di Dios.—Efesionan 1:8-14; Colosensenan 1:19, 20.
E Palabra di Dios Ta Ehercé Poder
17. Cua curso cu Israel carnal a sigui nos tin cu evitá?
17 E israelitanan a keda sin drenta den Dios su descanso primintí debí na nan desobedencia i falta di fe. Consecuentemente, Pablo a urgi e cristiannan hebreo: “P’esei, laga nos haci nos sumo posibel pa drenta den e descanso ei, pa ningun hende no cai den e mésun modelo di desobedencia.” (Hebreonan 4:11) Mayoria hudiu di promé siglo a keda sin ehercé fe den Jesus, i hopi di nan a sufri mashá ora e sistema di cosnan hudiu a yega na su fin na 70 E.C. Ta ki importante pa nos awe tin fe den Dios su promesa!
18. (a) Ki motibunan Pablo a duna pa ehercé fe den e palabra di Dios? (b) Den ki manera e palabra di Dios ta “mas skerpi cu cualkier spada di dos fila”?
18 Nos tin motibu válido pa ehercé fe den e palabra di Jehova. Pablo a skirbi: “E palabra di Dios ta bibu i ta ehercé poder i ta mas skerpi cu cualkier spada di dos fila i ta penetrá asta pa separá alma i spiritu, i djoint i nan tuti, i por dicerní pensamentunan i intencionnan di e curason.” (Hebreonan 4:12) Sí, e palabra, of mensahe di Dios, ta “mas skerpi cu cualkier spada di dos fila.” E cristiannan hebreo tabatin cu corda loke a sosodé cu nan antepasadonan. Ignorando Jehova su huicio cu nan lo a perecé den e desierto, nan a purba drenta e Tera Primintí. Pero Moises a spierta nan: “E amalekitanan i e cananeonan ta ei dilanti boso; i sigur boso lo cai pa spada.” Ora e israelitanan a avansá obstinadamente, “e amalekitanan i e cananeonan cu tabata biba den e ceru ei a baha i a cuminsá atacá nan i a plama nan te na Horma.” (Númeronan 14:39-45) Jehova su palabra ta mas skerpi cu cualkier spada di dos fila, i ken cu ignor’é deliberadamente lo cosechá e consecuencia sigur.—Galationan 6:7-9.
19. Cu ki poder e palabra di Dios ta “penetrá,” i pakico nos mester reconocé cu nos tin cu rindi cuenta na Dios?
19 Cu ki un poder e palabra di Dios “ta penetrá asta pa separá alma i spiritu, i djoint i nan tuti”! E ta penetrá dor dje pensamentu i motivacionnan di hende, yegando figurativamente te n’e tuti den e parti mas interior dje wesunan! Aunke e israelitanan librá for di sclabitud na Egipto a bai di acuerdo pa warda e Ley, Jehova tabata sa cu den nan curason nan no a apreciá su percuracion i rekisitonan. (Salmo 95:7-11) En bes di haci su boluntad, nan tabata preocupá pa satisfacé nan deseonan carnal. P’esei, nan no a drenta den e descanso primintí di Dios, sino a perecé den e desierto. Nos tin cu tuma e les ei na pechu, pasobra “no tin un creacion cu no ta manifestá dilanti [Dios] su bista, pero tur cos ta sunú i abiertamente exponí dilanti wowo di esun na ken nos tin cu rindi cuenta.” (Hebreonan 4:13) P’esei, laga nos cumpli cu nos dedicacion na Jehova i no “hala atras te na destruccion.”—Hebreonan 10:39.
20. Kico tin den futuro, i kico nos tin cu haci awor pa drenta den e descanso di Dios?
20 Aunke “e di shete dia”—Dios su dia di descanso—ta den progreso ainda, Jehova ta pendiente pa realisá su propósito relacioná cu e tera i humanidad. Masha pronto, e Rey Mesiánico, Jesucristo, lo tuma accion pa eliminá for di tera tur oponente dje boluntad di Dios, incluyendo Satanas e Diabel. Durante Cristo su Reinado di Mil Aña, Jesus i su 144.000 co-gobernantenan lo trece tera i humanidad n’e estado cu tabata Dios su propósito p’e. (Revelacion 14:1; 20:1-6) Awor ta e tempu pa nos proba cu nos bida ta drei rond dje boluntad di Jehova Dios. En bes di busca pa hustificá nos mes dilanti Dios i promové nos mes interesnan, awor ta tempu pa nos ‘descansá for di nos mes obranan’ i sirbi interesnan di Reino di henter curason. Dor di haci esei i dor di keda fiel na nos Tata celestial, Jehova, nos lo tin e privilegio di disfrutá dje beneficionan dje descanso di Dios awor i pa semper.
Bo Por Splica?
◻ Cu ki propósito Dios a descansá riba “e di shete dia”?
◻ Ki descanso e israelitanan por a disfrutá di dje, pero pakico nan a keda sin drenta den dje?
◻ Kico nos tin cu haci pa drenta den e descanso di Dios?
◻ Den ki manera e palabra di Dios ta bibu, poderoso i mas skerpi cu cualkier spada di dos fila?
[Plachi na página 16, 17]
E israelitanan a warda sabat, pero tog nan no a drenta den e descanso di Dios. Bo sa pakico?