E Ley di Cristo
“Mi ta . . . bou di ley pa cu Cristo.”—1 CORINTIONAN 9:21.
1, 2. (a) Con hopi dje erornan di humanidad lo por a ser prevení? (b) Kico cristiandad no a siña for dje historia di hudaismo?
“PUEBLONAN i gobiernunan nunca no a siña nada for di historia, ni a actua riba principionan deducí for di dje.” Asina un filósofo aleman di siglo 19 a bisa. En berdad, e curso di historia humano a ser describí como un “marcha di disparate,” un seri di erornan i crísisnan sumamente desagradabel, hopi di cua lo por a ser prevení si humanidad solamente tabata dispuesto pa siña for di su erornan di pasado.
2 E mésun rechaso pa siña for di erornan di pasado ta destacá den e consideracion aki di ley divino. Jehova Dios a reemplasá e Ley di Moises cu unu asta mas mihó—e ley di Cristo. Sin embargo, e lidernan di cristiandad, cu ta afirmá di siña i biba segun e ley aki, no a siña for dje disparatenan extremo dje fariseonan. Pues cristiandad a troce i a malusá e ley di Cristo mescos cu hudaismo a haci cu e Ley di Moises. Con esei por ta? Di promé, laga nos considerá e ley riba su mes—kico e ta, ken e ta dirigí i con, i kico ta diferenci’é for dje Ley di Moises. Despues nos lo examiná con cristiandad a malus’é. Laga nos siña asina for di historia i saca beneficio for di dje!
E Pacto Nobo
3. Ki promesa Jehova a haci relacioná cu un pacto nobo?
3 Ken excepto Jehova Dios lo por a mehorá un Ley perfecto? E pacto dje Ley di Moises tabata perfecto. (Salmo 19:7) Apesar di esei, Jehova a primintí: “Mira! Ta bini dianan, . . . i lo mi cera cu e cas di Israel i cu e cas di Huda un pacto nobo; no unu manera e pacto cu mi a cera cu nan antepasadonan.” E Dies Mandamentunan—e núcleo dje Ley di Moises—a ser skirbí riba tablanan di piedra. Pero Jehova a bisa dje pacto nobo: “Lo mi pone mi ley den nan, i den nan curason lo mi skirbié.”—Jeremías 31:31-34.
4. (a) Cua Israel ta enbolbí den e pacto nobo? (b) Ademas di israelita spiritual, ken mas ta bou dje ley di Cristo?
4 Ken lo a ser incluí den e pacto nobo aki? Siguramente no e “cas di Israel” literal, cu a rechasá e Mediador dje pacto aki. (Hebreonan 9:15) No, e “Israel” nobo aki lo ta e “Israel di Dios,” un nacion di israelita spiritual. (Galationan 6:16; Romanonan 2:28, 29) Mas despues “un multitud grandi” for di tur nacion cu tambe lo a busca pa adorá Jehova, lo a uni cu e grupo chikitu aki di cristiannan ungí cu spiritu. (Revelacion 7:9, 10; Zacarías 8:23) Aunke nan no ta participá den e pacto nobo, esakinan tambe lo ta bou di obligacion di ley. (Compará cu Levítico 24:22; Númeronan 15:15.) Como “un solo tou” bou di “un solo wardador,” tur lo ta “bou di ley pa cu Cristo,” manera apostel Pablo a skirbi. (Juan 10:16; 1 Corintionan 9:21) Pablo a yama e pacto nobo aki un “mihó pacto.” Pakico? Entre otro cosnan, e ta basá riba promesanan cu a ser cumplí mas bien cu riba sombra di cosnan pa bini.—Hebreonan 8:6; 9:11-14.
5. Kico ta e propósito dje pacto nobo, i pakico lo e tin éxito?
5 Kico ta e propósito dje pacto aki? Esei ta di producí un nacion di reynan i sacerdotenan pa bendicioná henter humanidad. (Exodo 19:6; 1 Pedro 2:9; Revelacion 5:10) E pacto di Ley di Moises nunca a producí e nacion aki den e sentido di mas completo, pasobra Israel como totalidad a rebelá i a perde nan oportunidad. (Compará cu Romanonan 11:17-21.) Sin embargo, e pacto nobo lo tin éxito sigur, pasobra e ta asociá cu un clase di ley masha diferente. Diferente den ki maneranan?
E Ley cu Ta Pertenecé na Libertad
6, 7. Con e ley di Cristo ta ofrecé mayor libertad cu e Ley di Moises?
6 E ley di Cristo ta ser asociá bes tras bes cu libertad. (Juan 8:31, 32) E ta ser yamá “e ley di un pueblo liber” i “e ley perfecto cu ta pertenecé na libertad.” (Santiago 1:25; 2:12) Naturalmente, tur libertad entre hende ta relativo. No obstante, e ley aki ta ofrecé muchu mas libertad cu su predecesor, e Ley di Moises. Con asina?
7 Como un ehempel, ningun hende ta nace bou di e ley di Cristo. Factornan manera rasa i lugá di nacementu ta irelevante. Esnan cu ta bira cristian berdadero ta scoge libremente den nan curason pa aceptá e yugo di obedencia n’e ley aki. Haciendo esei, nan ta haña cu e ta un yugo suave, un carga leve. (Mateo 11:28-30) Si bo ta corda, e Ley di Moises tambe tabata diseñá pa siña hende cu e ta pecaminoso i den necesidad urgente di un sacrificio di rescate pa salb’é. (Galationan 3:19) Sin embargo, e ley di Cristo ta siña cu e Mesías a bini, a paga e prijs di rescate cu su bida, i a habri e caminda pa nos ser librá for dje opresion teribel di picá i morto! (Romanonan 5:20, 21) Pa nos por saca beneficio, nos tin cu “ehercé fe” den e sacrificio ei.—Juan 3:16.
8. Kico e ley di Cristo ta incluí, pero pakico biba segun e ley no ta rekerí pa nos memorisá cientos di statutonan legal?
8 “Ehercé fe” ta enbolbé biba segun e ley di Cristo. Esei ta incluí obedecé tur e mandamentunan di Cristo. Esaki ta nificá memorisá cientos di ley i statuto? No. Miéntras Moises, mediador dje pacto bieu, a skirbi e Ley di Moises, Jesus, e Mediador dje pacto nobo, nunca a skirbi un solo ley. Mas bien, el a biba segun e ley aki. Pa medio di su curso perfecto di bida, el a establecé un patronchi pa tur hende sigui. (1 Pedro 2:21) Kisas ta p’e motibu ei e adoracion dje cristiannan di promé a ser yamá “E Caminda.” (Echonan 9:2; 19:9, 23; 22:4; 24:22) Pa nan, e bida di Cristo a sirbi como ehempel dje ley di Cristo. Imitá Jesus a nificá obedecé e ley aki. Nan amor intenso p’e a nificá cu e ley aki en berdad a ser skirbí riba nan curason, manera a ser profetisá. (Jeremías 31:33; 1 Pedro 4:8) I un persona cu ta obediente pa motibu di amor nunca ta sinti su mes oprimí—un motibu mas pakico e ley di Cristo por ser yamá “e ley di un pueblo liber.”
9. Kico ta e esencia mes dje ley di Cristo, i den ki manera e ley aki ta enbolbé un mandamentu nobo?
9 Si amor tabata importante den e Ley di Moises, e ta e esencia mes di ley cristian. Den e caso aki e ley di Cristo ta incluí un mandamentu nobo—cristiannan mester tin amor di sacrificio propio pa otro. Nan tin cu stima manera Jesus a stima; boluntariamente el a entregá su bida na fabor di su rumannan. (Juan 13:34, 35; 15:13) Pues ta apropiado pa bisa cu e ley di Cristo ta un expresion asta mas haltu di teocracia cu e Ley di Moises tabata. Manera e revista aki a mustra anteriormente: “Teocracia ta gobernacion dor di Dios; Dios ta amor; p’esei teocracia ta gobernacion mediante amor.”
Jesus i e Fariseonan
10. Con e siñansa di Jesus tabata na contraste cu esun dje fariseonan?
10 No ta un sorpresa anto cu Jesus a haña su mes den conflicto cu e lidernan religioso hudiu di su tempu. Un “ley perfecto cu ta pertenecé na libertad” nunca a drenta mente dje escribanan i e fariseonan. Nan a purba dominá e pueblo mediante regulacionnan cu hende a traha. Nan siñansa a bira opresivo, condenatorio, negativo. Na contraste skerpi, Jesus su siñansa tabata completamente edificante i positivo! E tabata práctico i a toca e berdadero necesidadnan i preocupacionnan dje pueblo. El a siña cu senciyes i cu sintimentu genuino, usando ilustracionnan di bida di tur dia i a basa su mes riba e autoridad dje Palabra di Dios. Di moda cu “e multitudnan tabata asombrá cu su manera di siña.” (Mateo 7:28) Sí, Jesus su siñansa a alcansá nan curason!
11. Con Jesus a demostrá cu e Ley di Moises mester a ser aplicá cu razonabilidad i misericordia?
11 En bes di agregá mas regulacion n’e Ley di Moises, Jesus a mustra con e hudiunan mester tabata aplicando e Ley, esta cu razonabilidad i misericordia. Corda, por ehempel, e ocasion ora un muher cu tabata sufri di un fluho di sanger a acerk’é. Segun e Ley di Moises, cualkier persona cu un muher asina a mishi cuné lo a bira impuru, di manera cu e siguramente no mester a mescla su mes den un multitud di hende! (Levítico 15:25-27) Pero e tabata asina desesperá pa ser curá cu el a pasa dor dje multitud i a mishi cu Jesus su bistí exterior. E sangramentu a stop mesora. Jesus a reprendé e muher pa a violá e Ley? No; mas bien, el a comprendé su circunstancia di desesperacion i a demostrá e precepto di mas grandi dje Ley—amor. El a bis’é di un manera compasivo: “Yu muher, bo fe a saná bo. Bai na pas, i keda den bon salú for di bo enfermedad penoso.”—Marco 5:25-34.
E Ley di Cristo Ta Permisivo?
12. (a) Pakico nos no mester asumí cu Cristo ta permisivo? (b) Kico ta mustra cu creamentu di hopi ley ta hiba na creamentu di hopi buracu?
12 Nos mester concluí anto cu pa motibu cu e ley di Cristo ta “pertenecé na libertad,” e ta permisivo, miéntras cu e fariseonan, cu tur nan tradicionnan oral, por lo ménos a mantené e conducta di hende dentro di límitenan estricto? No. Sistemanan legal djawe ta ilustrá cu hopi biaha mas ley tin, mas buracu hende ta haña den nan.a Den Jesus su tempu e echo cu e fariseonan tabatin múltiple reglanan a animá hende pa busca buracu, pa efectuá obranan den un forma rutinario sin ser motivá pa amor, i pa cultivá un aparencia hustu den nan mes bista pa sconde corupcion interior.—Mateo 23:23, 24.
13. Pakico e ley di Cristo ta resultá den un norma di conducta mas haltu cu cualkier código skirbí di ley?
13 Na contraste cu esei, e ley di Cristo no ta fomentá e actitudnan ei. En realidad, obedecé un ley cu ta basá riba amor pa Jehova i cu ta ser obedecé dor di imitá Cristo su amor di sacrificio propio pa otronan, ta resultá den un norma di conducta muchu mas haltu cu sigui un código formal di ley. Amor no ta busca buracu den ley; e ta prevení nos di haci cosnan perhudicial cu kisas un código di ley no ta prohibí explícitamente. (Mira Mateo 5:27, 28.) Pues, e ley di Cristo lo impulsá nos pa haci cosnan pa otro hende—pa mustra generosidad, hospitalidad i amor—den maneranan cu ningun ley formal por manda nos haci.—Echonan 20:35; 2 Corintionan 9:7; Hebreonan 13:16.
14. Biba segun e ley di Cristo tabatin ki efecto riba e congregacion cristian di promé siglo?
14 N’e grado cu su miembronan a biba segun e ley di Cristo, e congregacion cristian di promé a disfrutá di un ambiente amoroso, relativamente liber dje actitudnan rígido, condenatorio i hipócrita asina prevalente den e snoanan dje tempu ei. Miembronan dje congregacionnan nobo aki berdaderamente mester a sinti cu nan tabata biba segun “e ley di un pueblo liber”!
15. Cua tabata algun di Satanas su promé esfuersonan pa corumpí e congregacion cristian?
15 Sin embargo, Satanas tabata ansioso pa corumpí e congregacion cristian for di paden, net manera el a corumpí e nacion di Israel. Apostel Pablo a spierta contra hombernan semehante na lobo cu lo a “papia cosnan trocí” i oprimí e tou di Dios. (Echonan 20:29, 30) E tabatin cu lucha cu hudaistanan, kendenan a busca pa cambia e libertad relativo dje ley di Cristo pa sclabitud n’e Ley di Moises, cu a ser cumplí den Cristo. (Mateo 5:17; Echonan 15:1; Romanonan 10:4) Despues cu e último apostelnan a muri, no tabatin mas freno contra tal apostasia. Di manera cu corupcion a plama na tur parti.—2 Tesalonicensenan 2:6, 7.
Cristiandad Ta Contaminá e Ley di Cristo
16, 17. (a) Ki formanan corupcion a tuma den cristiandad? (b) Con e leynan di Iglesia Católico a promové un punto di bista trocí di sex?
16 Mescos cu hudaismo, corupcion a tuma mas cu un forma den cristiandad. Cristiandad tambe a bira víctima di doctrinanan falsu i moralidad degradá. I su esfuersonan pa protehá su tou contra influencianan djafó hopi biaha a contaminá tur loke a sobra di adoracion puru. Leynan rígido i no-bíblico a plama rápidamente.
17 Iglesia Católico a hiba delantera den crea un gran cantidad di ley di iglesia. E leynan aki tabata particularmente trocí riba cosnan cu tin di haber cu sex. Segun e buki Sexuality and Catholicism, e iglesia a absorbá e filosofia griego di stoicismo, cu a cuestioná tur forma di placer. E iglesia a bin siña cu tur placer sexual, incluyendo esun di relacionnan matrimonial normal, tabata pecaminoso. (Haci contraste cu Proverbionan 5:18, 19.) Nan a pretendé cu sex ta solamente pa procreacion, no pa placer sexual. Dje manera ei ley di iglesia a condená cualkier forma di anti-conceptivo como un picá masha serio, algun biaha rekiriendo hopi aña di penitencia. Ademas, pastornan a ser prohibí pa casa, un ley cu a conducí na hopi relacion sexual ilícito, incluyendo abusu sexual di mucha.—1 Timoteo 4:1-3.
18. Kico a resultá dje multiplicacion di leynan di iglesia?
18 Segun cu leynan di iglesia a multiplicá, nan a ser compilá den bukinan. E bukinan aki a cuminsá tapa i reemplasá Bijbel. (Compará cu Mateo 15:3, 9.) Mescos cu hudaismo, catolicismo a desconfiá skirbimentunan seglar i a considerá gran parti di dje como un menasa. Pronto e punto di bista aki a bai hopi mas aleu cu e spiertamentu huicioso di Bijbel riba e asuntu. (Eclesiástes 12:12; Colosensenan 2:8) Jerome, un escritor di iglesia di siglo cuater E.C., a sclama: “O Señor, si un dia mi bolbe poseé bukinan mundano of lesa nan, ami a nengá bo.” Cu tempu, e iglesia a cuminsá cu e tarea di censurá bukinan—asta esnan riba temanan seglar. Asina, e astrónomo di siglo 17, Galileo, a ser censurá dor cu el a skirbi cu e tera ta drei rond di solo. E insistencia di iglesia pa ser e autoridad final riba tur cos—asta riba cuestionnan di astronomia—cu tempu a debilitá hende su fe den Bijbel.
19. Con e monasterionan a promové sumision rígido i ciegu na autoridad?
19 E iglesia su trahamentu di regla a florecé den monasterionan, unda móniknan a separá nan mes for dje mundu aki pa biba restringí di nan propio interesnan. Mayoria monasterio católico a pega na “E Regla di San Benedicto.” E abad (un término derivá for dje palabra arameo pa “tata”) a goberná cu autoridad absoluto. (Compará cu Mateo 23:9.) Si un mónik a ricibí un regalo di su mayornan, e abad lo a dicidí si e mónik ei of un otro lo mester a ricibié. Ademas di condená cosnan vulgar, un regla a prohibí tur papiamentu casual i chiste, bisando: “Ningun disipel lo papia cosnan asina.”
20. Kico ta mustra cu protestantismo tambe a fomentá sumision no-bíblico i ciegu na autoridad?
20 Protestantismo, cu a busca pa reformá e excesonan no-bíblico di catolicismo, pronto a bira mes experto den trahamentu di reglanan autoritativo sin base den e ley di Cristo. Por ehempel, e reformador principal Johannes Calvijn a yega di ser yamá “e legislador dje Iglesia renobá.” El a goberná e iglesia protestant na Ginebra cu un multitud di reglanan severo aplicá dor di “Ancianonan” kende nan “funcion,” Calvijn a mencioná, “ta pa tene supervision riba e bida di tur hende.” (Haci contraste cu 2 Corintionan 1:24.) E iglesia a controlá e posadanan i a regulá ki tópiconan di combersacion tabata permití. Tabatin castigunan severo pa ofensanan manera cantamentu di canticanan cu no ta serio of bailamentu.b
Siñando for di e Erornan di Cristiandad
21. Kico tabata e efectonan total dje tendencia di cristiandad pa “bai mas ayá cu e cosnan skirbí”?
21 Tur e reglanan i leynan aki a contribuí na protehá cristiandad for di corupcion? Net contrario! Awe cristiandad a split den cientos di secta, variando for di esnan sumamente estricto te na esnan claramente permisivo. Nan tur, den un manera of otro, a “bai mas ayá cu e cosnan skirbí,” permitiendo pensamentu humano dirigí e tou i interferí cu ley divino.—1 Corintionan 4:6.
22. Pakico cristiandad su apostasia no a nificá fin dje ley di Cristo?
22 Sin embargo, e historia dje ley di Cristo no ta un tragedia. Jehova Dios nunca lo permití simpel hende eliminá ley divino. Ley cristian siguramente ta na vigor awe entre cristiannan berdadero, i esakinan tin e privilegio grandi di aplik’é den nan bida. Pero despues di a examiná loke hudaismo i cristiandad a haci cu ley divino, nos por wel puntra, ‘Con nos ta aplicá e ley di Cristo i na mésun tempu evitá e trampa di contaminá e Palabra di Dios cu razonamentu i reglanan humano cu ta debilitá net e spiritu di ley divino? Ki punto di bista balansá e ley di Cristo mester inspirá den nos awe?’ E siguiente artículo lo contestá e preguntanan aki.
[Nota]
a E fariseonan tabata pa gran parti responsabel p’e forma di hudaismo cu ta existí awe, di manera cu no ta un sorpresa cu hudaismo ainda ta busca buracu den su hopi restriccionnan adicional di sabat. Por ehempel, un bishitante na un hospital hudiu ortodox riba dia di sabat por haña cu e lift ta stop automáticamente na cada piso di manera cu e pasaheronan por evitá di haci e “trabou” pecaminoso di primi un konopi dje lift. Algun dokter ortodox ta skirbi recept cu ink cu lo disparcé den un par di dia. Pakico? E Mishna ta clasificá skirbimentu como “trabou,” pero e ta definí “skirbimentu” como lagando un marca duradero.
b Servetus, kende a cuestioná algun di Calvijn su puntonan di bista teológico, a ser kimá na staca como un herehe.
Con Lo Bo Contestá?
◻ Kico ta e esencia mes dje ley di Cristo?
◻ Den ki manera Jesus su estilo di siña tabata distinto for di esun dje fariseonan?
◻ Con Satanas a usa un inclinacion rígido di traha regla pa corumpí cristiandad?
◻ Cua ta algun efecto positivo di biba segun e ley di Cristo?
[Plachi na página 16]
Jesus a aplicá e Ley di Moises den un manera razonabel i misericordioso