Referensia pa Material i Tarea pa Reunion Nos Bida i Sirbishi Kristian

7-13 DI ÒKTOBER

SEA DILIGENTE DEN SIRBISHI

w10-S 1/9 23-24

Na Ken Mester Konfesá Piká?

Dios no a outorisá hende pa pordoná piká kontra dje; e so por hasi esaki. Beibel ta bisa bon kla: “Si nos konfesá nos pikánan, Dios lo pordoná nos nos pikánan i limpia nos di tur inhustisia, pasobra e ta fiel i hustu.” (1 Huan 1:9) Pero, na ken nos tin ku konfesá piká grave, òf, piká kontra Dios?

Siendo ku pordon ta bini di Dios, nos mester konfesá na dje. Esei ta loke David a hasi, manera nos por a mira. Sinembargo, kiko mas ta nesesario? Beibel ta bisa: ‘Pues, arepentí, i bira bèk for di boso kaminda pa Yehova por pordoná boso pikánan i refreská boso.’ (Echonan 3:19) Pues, no solamente nos mester rekonosé i konfesá nos pikánan, pero nos mester ta dispuesto tambe pa bira bèk òf kita for di e mal kaminda. Tin biaha ta difísil pa dal e paso akí. Pero nos tin yudansa.

Kòrda riba e palabranan di disipel Santiago ku nos a menshoná anteriormente: “Konfesá boso pikánan abiertamente na otro i hasi orashon pa otro, pa boso por kura.” Santiago a agregá: “Súplika di un hende hustu tin hopi poder i ta masha efektivo.” (Santiago 5:16) E “hende hustu” por ta un di “e ansianonan di kongregashon” ku Santiago a menshoná den versíkulo 14. Den e kongregashon kristian tin ruman hòmber spiritualmente kapasitá, òf ansiano, ku a ser nombrá pa yuda esnan ku ke haña Dios su pordon. Ta bèrdat ku e ansianonan no por kita e pikánan ku un hende a kometé, pasobra niun ser humano no tin e outoridat akí. Sinembargo, nan ta spiritualmente kualifiká pa korigí i disipliná un persona kulpabel di un piká grave, yudando e rekonosé e seriedat di su piká i e importansia pa arepentí.—Galationan 6:1.

Pakiko Konfesá Piká?

Sea ku e piká ta grave òf nò, e persona ku a kometé e piká ei a daña su relashon ku su próhimo i ku Dios. Komo resultado, lo e por sintié preokupá òf asta malu. Esaki ta debí ku nos Kreador a duna nos un konsenshi. (Romanonan 2:14, 15) Kiko nos por hasi si nos konsenshi ta molestiá nos?

Si nos bai bèk na e buki di Santiago, nos ta haña e siguiente palabranan animante: “Tin un hende den boso ku ta [spiritualmente] malu? Lag’é manda yama e ansianonan di kongregashon, i laga nan hasi orashon p’e i hunt’é ku zeta den nòmber di Yehova. I e orashon hasí ku fe lo kura esun ku ta malu, i Yehova lo lant’é. Ademas, si el a kometé piká, lo e ser pordoná.”—Santiago 5:14, 15.

E teksto akí ta mustra ku e hòmbernan kapasitá akí, esta, e ansianonan, ta responsabel pa atendé e nesesidatnan di e tou. Di ki manera? Nan no ta djis skucha un konfeshon. Siendo ku e persona ta spiritualmente malu, mester hasi algu pa “kura esun ku ta malu.” Santiago a menshoná dos kos ku por hasi.

Promé, el a menshoná ‘huntamentu ku zeta.’ Esei ta referí na e poder di kura ku e Palabra di Dios tin. Apòstel Pablo a splika ku “e palabra di Dios ta bibu i poderoso, . . . i e por saka pensamentu i intenshon di kurason na kla,” es desir, penetrá den un hende su mente i kurason. (Hebreonan 4:12) E ansianonan ta usa Beibel na un manera ábil pa por yuda esnan ku ta spiritualmente malu identifiká e kousa di nan problema i tuma medida nesesario pa drecha e asuntu den bista di Dios.

Di dos, el a menshoná “orashon hasí ku fe.” Aunke ku orashon di e ansianonan lo no kambia e forma ku Dios ta ehersé su hustisia, e orashonnan akí ta importante pa Dios, kende ta kla pa pordoná piká a base di e sakrifisio di reskate di Kristu. (1 Huan 2:2) Dios ta kla pa yuda kualke pekadó ku arepentí di kurason i ku ta hasi ‘obra ku ta mustra arepentimentu.’—Echonan 26:20.

E motibu prinsipal pa atmití un piká—kometé sea kontra nos próhimo òf kontra Dios—ta pa haña aprobashon di Dios. Hesukristu a indiká ku si nos ke adorá Dios ku un konsenshi limpi, nos mester resolvé promé kualke desakuerdo ku nos tin ku nos próhimo i hasi pas kuné. (Mateo 5:23, 24) Proverbionan 28:13 ta bisa: “Esun ku skonde su pikánan lo no prosperá, ma esun ku konfesá i laga nan lo haña miserikòrdia.” Ora nos humiá nos mes den bista di Yehova Dios i pidié pordon, nos lo haña su aprobashon i ser halsá na e debido tempu.—1 Pedro 5:6.

14-20 DI ÒKTOBER

TESORONAN DI E PALABRA DI DIOS | 1 PEDRO 1-2

Buska Hoyanan Spiritual

it-2-S 1075 §1

Superintendente

Superintendente Supremo. Evidentemente na 1 Pedro 2:25, Pedro ta sita Isaías 53:6 ora el a papia di hende ku tabata “manera karné ku a dual,” i despues el a agregá: “Pero awor boso a bolbe serka e wardadó i superintendente di boso alma.” E palabranan akí mester ta referí na Yehova Dios, ya ku esnan na kendenan Pedro a skirbi no a desviá for di Kristu Hesus. Mas bien, mediante Kristu Hesus, nan a ser dirigí atrobe na Yehova Dios, kende ta e Gran Wardadó di su pueblo. (Sl 23:1; 80:1; Yer 23:3; Eze 34:12) Yehova ta un superintendente tambe, esun ku ta inspekshoná hende. (Sl 17:3, NW) E inspekshon (griego, episkopé) por ta relashoná ku huisio desfaborabel. Por ehèmpel, esaki tabata e kaso den promé siglo despues di Kristu ora ku Herúsalèm no a diserní e tempu ku e tabata ser “inspekshoná [griego, episkopés].” (Luk 19:44) Di otro banda, e inspekshon por tin bon efekto i benefisio, manera ta e kaso ku hende ku ta glorifiká Dios riba e dia ku e bini “pa hasi su inspekshon [griego, episkopés].”—1Pe 2:12.

28 DI ÒKTOBER–3 DI NOVÈMBER

TESORONAN DI E PALABRA DI DIOS | 2 PEDRO 1-3

Buska Hoyanan Spiritual

w08-S 15/11 22 §3

Punto Sobresaliente di e Kartanan di Santiago i Pedro

2:4—Kiko “Tártaro” ta, i na ki tempu a tira e angelnan rebelde den dje? Tártaro ta un kondishon ku por ser kompará ku prizòn. Solamente spiritu—no hende—ta kondená na e kondishon akí. Ademas, e ta un kondishon di skuridat mental profundo relashoná ku e propósito briante di Dios. E angelnan ku ta den Tártaro no tin speransa pa futuro. Den tempu di Noe, Dios a tira e angelnan desobediente den Tártaro, i nan lo keda den e kondishon degradá akí te dia ku nan ser destruí.