Kico Jehova Ta Pidi di Nos Awe?
“Un bos for dje nubia [a bisa]: ‘Esaki ta mi Yu, esun stimá, cu mi a aprobá; scuch’é.’”—MATEO 17:5.
1. Na ki tempu e Ley a cumpli cu su propósito?
JEHOVA a duna e nacion di Israel e Ley, cu su hopi rasgonan. Apostel Pablo a skirbi di nan: “Nan tabata rekisitonan legal cu tabatin di haber cu e carni i a ser imponé te cu e tempu señalá pa rectificá cosnan.” (Hebreonan 9:10) Ora e Ley a guia un resto dje israelitanan pa aceptá Jesus como e Mesías, of Cristo, el a cumpli cu su propósito. P’esei, Pablo a declará: “Cristo ta fin di e Ley.”—Romanonan 10:4; Galationan 3:19-25; 4:4, 5.
2. Ken tabata bou dje Ley, i na ki tempu a libra nan for di dje?
2 Esaki ta nificá cu e Ley no ta obligatorio pa nos awe? Eigenlijk, e gran mayoria di humanidad nunca no tabata bou dje Ley, manera e salmista a splica: “[Jehova] ta anunciá su palabra na Jacob, su regulacionnan i su decisionnan hudicial na Israel. E no a haci asina cu ningun otro nacion; i en cuanto su decisionnan hudicial, nan no a conocé nan.” (Salmo 147:19, 20) Ora Dios a establecé e pacto nobo a base di Jesus su sacrificio, ni e nacion di Israel no tabata bou di obligacion mas pa obedecé e Ley. (Galationan 3:13; Efesionan 2:15; Colosensenan 2:13, 14, 16) Pues, si e Ley no ta obligatorio mas, kico Jehova ta pidi di esnan cu ta deseá di sirbié awe?
Loke Jehova Ta Pidi di Hende
3, 4. (a) Básicamente, kico Jehova ta pidi di nos awe? (b) Pakico nos tin cu sigui Jesus su pasonan cu sumo cuidou i atencion?
3 Durante e último aña di Jesus su ministerio, su apostelnan Pedro, Santiago i Juan a compañ’é na un ceru haltu, posiblemente un extension di ceru Hermon. Ei nan a mira un vision profético di Jesus den un gloria magnífico i a tende e propio bos di Dios declará: “Esaki ta mi Yu, esun stimá, cu mi a aprobá; scuch’é.” (Mateo 17:1-5) Básicamente, esei ta loke Jehova ta pidi di nos: scucha su Yu i sigui su ehempel i siñansanan. (Mateo 16:24) P’esei, apostel Pedro a skirbi: “Cristo a sufri pa boso, lagando un modelo pa boso sigui su pasonan cu sumo cuidou i atencion.”—1 Pedro 2:21.
4 Pakico nos tin cu sigui Jesus su pasonan cu sumo cuidou i atencion? Pasobra dor di imit’é, nos ta imitá Jehova Dios. Jesus conocé e Tata íntimamente ya cu el a pasa miles di miyones di aña incontabel cuné den shelu promé cu el a bini na tera. (Proverbionan 8:22-31; Juan 8:23; 17:5; Colosensenan 1:15-17) Tempu cu Jesus tabata riba tera, el a representá su Tata lealmente. El a splica: “Mescos cu e Tata a siña mi, mi ta papia e cosnan aki.” De facto, Jesus a imitá Jehova asina bon cu e por a bisa: “Ken cu a mira mi a mira e Tata tambe.”—Juan 8:28; 14:9.
5. Bou di ki ley cristiannan ta, i na ki tempu e ley ei a drenta na vigor?
5 Kico ta encerá scucha Jesus i imit’é? Esei kier men cu nos ta bou di un ley? Pablo a skirbi: “Mi mes no ta bou di ley.” Aki e tabata referí n’e “pacto bieu,” e pacto di Ley cerá cu Israel. Pero sí Pablo a reconocé cu e tabata “bou di ley pa cu Cristo.” (1 Corintionan 9:20, 21; 2 Corintionan 3:14) Cu e fin dje pacto bieu di Ley, un “pacto nobo” a drenta na vigor cu su “ley di e Cristo,” cu tur sirbidó di Jehova awe ta obligá na obedecé.—Lucas 22:20; Galationan 6:2; Hebreonan 8:7-13.
6. Con nos por describí “e ley di e Cristo,” i den ki manera nos ta obedec’é?
6 Jehova no a laga skirbi “e ley di e Cristo” den un código ni a organis’é den vários categoria, manera tabata e caso cu e pacto bieu di Ley. E ley nobo aki pa Cristo su siguidónan no ta encerá un lista largu di kico mag i kico no mag. Pero, den su Palabra, Jehova a conserbá cuater relato amplio dje bida i siñansanan di su Yu. Ademas, Dios a inspirá algun di Jesus su promé siguidónan pa percurá instruccion por escrito relacioná cu comportacion personal, asuntunan di congregacion, conducta den famia i otro cosnan. (1 Corintionan 6:18; 14:26-35; Efesionan 5:21-33; Hebreonan 10:24, 25) Ora nos armonisá nos bida cu e ehempel i siñansanan di Jesucristo i haci caso dje conseho di escritornan inspirá di Bijbel di promé siglo, nos ta obedeciendo “e ley di e Cristo.” Esaki Jehova ta pidi di su sirbidónan awe.
E Importancia di Amor
7. Con Jesus a enfatisá e idea principal di su ley durante e último Pascu hudiu cu su apostelnan?
7 Aunke amor tabata importante bou dje Ley, e ta e curason, of esencia mes, dje ley di e Cristo. Jesus a enfatisá e echo aki ora el a reuní cu su apostelnan pa celebrá e Pascu hudiu di aña 33 E.C. Segun e resúmen di apostel Juan di loke a tuma lugá e anochi ei, Jesus su palabranan sincero a incluí 28 referencia na amor. Esaki a enfatisá na su apostelnan e idea principal, of spiritu, di su ley. Ta significativo cu Juan a introducí su relato dje sucesonan dje anochi trasedental ei bisando: “Dor cu e tabata sa promé cu e fiesta di pascu cu su ora a yega p’e sali for dje mundu aki pa bai n’e Tata, Jesus, ya cu el a stima esnan di dje cu tabata den mundu, a stima nan te na fin.”—Juan 13:1.
8. (a) Kico ta indicá cu tabatin un pleitu continuo entre e apostelnan? (b) Con Jesus a siña su apostelnan un les den humildad?
8 Jesus a stima su apostelnan, maske el a purba yuda nan, aparentemente sin éxito, pa vence nan deseo excesivo pa poder i posicion. Lunanan promé cu nan a yega Jerusalem, “nan a discutí entre nan mes ken tabata mas importante.” I djis promé cu nan a yega n’e stad p’e Pascu hudiu, e discusion tocante posicion a bolbe lanta cabes. (Marco 9:33-37; 10:35-45) Loke a sosodé djis despues cu e apostelnan a drenta e sala djariba pa participá den loke lo tabata nan último Pascu huntu, a indicá cu esaki tabata un problema continuo. N’e ocasion ei, ningun di nan a probechá dje oportunidad pa rindi e servicio acustumbrá di hospitalidad di laba pia dje otronan. Pa siña nan un les den humildad, Jesus mes a laba nan pia.—Juan 13:2-15; 1 Timoteo 5:9, 10.
9. Con Jesus a trata cu e situacion cu a presentá despues dje último Pascu hudiu?
9 Apesar dje les ei, despues cu nan a celebrá e Pascu hudiu i cu Jesus a instituí e Memorial di su morto cu tabata acercando, tuma nota loke a sosodé atrobe. E Evangelio di Lucas ta bisa: “Tambe a lanta un pleitu cayente entre nan riba cua di nan a parce di ta mas importante.” En bes di rabia cu e apostelnan i zundra nan, Jesus bondadosamente a consehá nan tocante e necesidad pa ta diferente for dje gobernantenan di mundu cu tin sed pa poder. (Lucas 22:24-27) Anto el a duna nan loke nos por yama e piedra di skina dje ley di e Cristo, bisando: “Mi ta duna boso un mandamentu nobo, pa boso un stima otro; mescos cu ami a stima boso, pa boso tambe un stima otro.”—Juan 13:34.
10. Ki mandamentu Jesus a duna su disipelnan, i kico esaki a encerá?
10 Mas despues e anochi ei Jesus a mustra con leu e amor manera esun di Cristo mester bai. El a bisa: “Esaki ta mi mandamentu, pa boso un stima otro mescos cu ami a stima boso. Ningun hende tin amor mas grandi cu esaki, cu un hende entregá su alma na fabor di su amigunan.” (Juan 15:12, 13) Jesus tabata bisando cu su siguidónan mester ta dispuesto pa muri na fabor di nan compañeronan creyente si e ocasion a exigí esaki? Esei ta loke Juan, testigo ocular dje ocasion ei, a comprendé, pasobra despues el a skirbi: “Dor di esaki nos a yega di conocé amor, pasobra esun ei [Jesucristo] a entregá su alma pa nos; i nos ta bou di obligacion di entregá nos alma pa nos rumannan.”—1 Juan 3:16.
11. (a) Con nos ta cumpli cu e ley di e Cristo? (b) Ki ehempel Jesus a duna?
11 Pues anto, nos no ta cumpli cu e ley di e Cristo djis dor di siña otro hende tocante dje. Tambe nos tin cu biba i comportá nos mes manera Jesus. Ta cierto cu Jesus a usa palabra bunita i bon scogí den su discursonan. Pero tambe el a siña cu su ehempel. Aunke Jesus tabata un criatura spiritual poderoso den shelu, el a gara e oportunidad pa sirbi interesnan di su Tata riba tera i pa mustra con nos mester biba. E tabata humilde, amabel i compasivo, i a yuda esnan abatí i oprimí. (Mateo 11:28-30; 20:28; Filipensenan 2:5-8; 1 Juan 3:8) I Jesus a urgi su siguidónan pa stima otro, mescos cu e a stima nan.
12. Pakico nos por bisa cu e ley di e Cristo no ta minimisá e necesidad pa stima Jehova?
12 Ki lugá amor pa Jehova—e mandamentu mas grandi dje Ley—tin den e ley di e Cristo? (Mateo 22:37, 38; Galationan 6:2) Di dos lugá? Di ningun manera! Amor pa Jehova i amor pa nos compañeronan cristian ta inseparablemente ligá na otro. Bo no por ègt stima Jehova sin stima bo ruman tambe, pasobra apostel Juan a bisa: “Si un hende haci e declaracion: ‘Mi ta stima Dios,’ i tog ta odia su ruman, e ta un mentiroso. Pasobra esun cu no ta stima su ruman, cu el a mira, no por stima Dios, cu e no a mira.”—1 Juan 4:20; compará cu 1 Juan 3:17, 18.
13. Kico tabata e efecto dje echo cu e disipelnan a obedecé Jesus su mandamentu nobo?
13 Ora Jesus a duna su disipelnan e mandamentu nobo pa stima otro mescos cu el a stima nan, el a describí e efecto cu esaki lo tin. “Dor di esaki tur lo sa cu boso ta mi disipelnan,” el a bisa, “si boso tin amor entre boso.” (Juan 13:35) Segun Tertuliano, kende a biba mas cu shen aña despues di Jesus su morto, e amor fraternal dje promé cristiannan tabatin hustamente e efecto ei. Tertuliano a cita hende no-cristian cu a bisa di Cristo su siguidónan: ‘Mira con nan ta stima otro i con nan ta asta cla pa muri pa otro.’ Nos lo por puntra nos mes: ‘Mi ta mustra un amor asina pa compañeronan cristian i duna prueba cu mi ta un disipel di Jesus?’
Con Nos Ta Duna Prueba di Nos Amor
14, 15. Kico por haci difícil pa obedecé e ley di e Cristo, pero kico por yuda nos hacié?
14 Ta vital pa Jehova su sirbidónan manifestá un amor manera esun di Cristo. Pero bo ta haña cu ta difícil pa stima otro cristiannan cu ta desplegá característicanan egoista? Wel, manera nos a mira, asta e apostelnan a pleita i a purba promové nan mes interesnan. (Mateo 20:20-24) E galationan tambe a pleita cu otro. Despues cu Pablo a mustra nan cu amor pa próhimo ta cumplimentu di e Ley, el a spierta nan: “Pero, si boso ta sigui morde i devorá otro, wak pa boso no eliminá otro.” Despues cu el a mustra e contraste entre e obranan di carni i e fruta di Dios su spiritu, Pablo a agregá e spiertamentu: “Laga nos no bira egoista, instigando competencia un cu otro, envidiando otro.” Anto e apostel a urgi: “Sigui wanta e carganan di otro, i cumpli asina cu e ley di e Cristo.”—Galationan 5:14–6:2.
15 Dor di rekerí obedencia n’e ley di e Cristo, Jehova ta pidi demasiado di nos? Aunke kisas ta difícil pa ta amabel cu esnan cu, den un sentido, a rous nos i kibra nos emocionalmente, nos ta obligá pa “bira imitadónan di Dios, manera yunan stimá, i sigui cana den amor.” (Efesionan 5:1, 2) Nos tin cu sigui mira riba e ehempel di Dios, kende “ta recomendá su mes amor na nos den e echo cu, miéntras nos tabata pecadó ainda, Cristo a muri pa nos.” (Romanonan 5:8) Dor di tuma e iniciativa pa yuda otro hende, incluso esnan cu a trata nos malu, nos por gosa dje satisfaccion di sa cu nos ta imitando Dios i ta obediente n’e ley di e Cristo.
16. Con nos ta duna prueba di nos amor pa Dios i pa Cristo?
16 Nos mester corda cu nos ta duna prueba di nos amor dor di loke nos ta haci, no djis dor di loke nos ta bisa. Un biaha asta Jesus a haña un aspecto di Dios su boluntad difícil pa aceptá pa motibu di tur loke esei a encerá. “Tata, si bo ta deseá, kita e copa aki for di mi,” Jesus a pidi den oracion. Pero mesora el a añadí: “No obstante, laga, no mi boluntad, sino di bo tuma lugá.” (Lucas 22:42) Apesar di tur e sufrimentu cu Jesus a pasa aden, el a haci e boluntad di Dios. (Hebreonan 5:7, 8) Obedencia ta un prueba di nos amor i ta mustra cu nos ta reconocé cu e caminda di Dios ta mihó. Bijbel ta bisa: “Esaki ta loke e amor di Dios ta nificá, cu nos ta warda su mandamentunan.” (1 Juan 5:3) I Jesus a bisa su apostelnan: “Si boso ta stima mi, boso lo warda mi mandamentunan.”—Juan 14:15.
17. Ki mandamentu special Jesus a duna su siguidónan, i con nos sa cu e ta aplicá na nos awe?
17 Ademas di manda su siguidónan stima otro, ki mandamentu special Cristo a duna nan? El a manda nan haci e trabou di predicá cu el a entrená nan p’e. Pedro a bisa: “El a manda pa nos predicá na e pueblo i pa duna un testimonio cabal.” (Echonan 10:42) Specíficamente, Jesus a manda: “Bai, pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.” (Mateo 28:19, 20; Echonan 1:8) Jesus a revelá cu e instruccionnan ei lo a aplicá tambe na su siguidónan djawor den “e tempu di fin,” pasobra el a bisa: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Daniel 12:4; Mateo 24:14) Claro cu Dios su boluntad ta pa nos predicá. Pero, algun persona por pensa cu e exigencia di predicá sí ta muchu pidi. Pero ta asina realmente?
Pakico E Por Parce Difícil
18. Kico nos mester corda ora nos ta sufri dor cu nos ta haci loke Jehova ta pidi di nos?
18 Manera nos a mira, atrabes di historia Jehova a pidi di su pueblo pa nan cumpli cu vários rekisito. I mescos cu loke Dios a pidi di nan a varia, asina tambe e caracter dje pruebanan cu nan a pasa aden a varia. Dios su Yu stimá a pasa den e pruebanan di mas difícil, i por último, nan a mat’é den e manera di mas cruel dor cu el a haci loke Dios a pidi di dje. Pero ora nos ta sufri dor cu nos ta haci loke Jehova ta pidi di nos, nos mester corda cu no ta e ta responsabel pa nos pruebanan. (Juan 15:18-20; Santiago 1:13-15) Satanas su rebelion a introducí picá, sufrimentu i morto i é ta esun cu a crea e circunstancianan cu hopi bes ta dificultá Jehova su sirbidónan di haci loke e ta pidi di nan.—Job 1:6-19; 2:1-8.
19. Pakico ta un privilegio pa haci loke Dios a pidi di nos mediante su Yu?
19 Mediante su Yu, Jehova a manda pa den e tempu di fin aki Su sirbidónan haci un proclamacion mundial di cu e único remedi pa tur sufrimentu humano ta e gobernacion di Reino. E gobiernu di Dios aki lo eliminá tur problema riba tera, manera guera, crímen, pobresa, behes, enfermedad i morto. Tambe e Reino lo introducí un glorioso paradijs terenal, den cua asta e mortonan lo ser resucitá. (Mateo 6:9, 10; Lucas 23:43; Echonan 24:15; Revelacion 21:3, 4) Ta ki un privilegio pa declará e bon nobo di cosnan asina! Ta keda claro anto cu no tin problema cu loke Jehova ta pidi nos haci. Nos ta topa cu oposicion, pero ta Satanas e Diabel i su mundu ta responsabel pa esaki.
20. Con nos por enfrentá cualkier desafio cu e Diabel presentá?
20 Con nos por enfrentá cualkier desafio cu Satanas presentá cu éxito? Dor di tene e palabranan aki na mente: “Sea sabí, mi yu, i alegrá mi curason, pa mi por contestá esun cu ta desafiá mi cu desprecio.” (Proverbionan 27:11) Jesus a duna Jehova un contesta riba Satanas su desafio dor di bandoná e siguridad di bida celestial pa haci e boluntad di su Tata riba tera. (Isaías 53:12; Hebreonan 10:7) Como hende, Jesus a wanta tur prueba mandá riba dje, asta morto riba un staca di tormento. Si nos siguié como nos Modelo, nos tambe por wanta sufrimentu i haci loke Jehova ta pidi di nos.—Hebreonan 12:1-3.
21. Con abo ta sinti tocante e amor cu Jehova i su Yu a demostrá?
21 Esta un amor Dios i su Yu a mustra pa nos! Dor dje sacrificio di Jesus, humanidad obediente tin e prospecto di biba pa semper den Paradijs. Pues no laga nada nubla nos speransa. Mas bien, mescos cu Pablo, laga nos personalmente tuma na pechu loke Jesus a haci posibel pa nos. Pablo a bisa di dje: “E Yu di Dios . . . a stima mi i a entregá su mes pa mi.” (Galationan 2:20) I laga nos mustra gratitud di curason na nos Dios amoroso, Jehova, kende nunca ta pidi demasiado di nos.
Con Lo Bo Contestá?
◻ Kico Jehova ta pidi di nos awe?
◻ Durante su último anochi cu su apostelnan, con Cristo a enfatisá e importancia di amor?
◻ Con nos por duna prueba cu nos ta stima Dios?
◻ Pakico ta un privilegio pa haci loke Jehova ta pidi di nos?
[Plachi na página 23]
Ki les Jesus a duna dor di laba pia di su apostelnan?
[Plachi na página 25]
Apesar di oposicion, ta un dushi privilegio pa compartí e bon nobo