E Calidad di Boso Fe—Probá Awor

“Consider’é tur goso, mi rumannan, ora boso ta topa cu vários prueba, ya cu boso sa cu e calidad probá aki di boso fe ta obra awante.”—SANTIAGO 1:2, 3.

 1. Pakico cristiannan mester verwagt cu nan fe lo ser poní na prueba?

CRISTIANNAN berdadero no kier sufri, ni nan no ta haña placer den dolor of humiyacion. Tog, nan ta tene na mente e palabranan mencioná ariba cu Jesus su mitar ruman Santiago a skirbi. Cristo a mustra su disipelnan claramente cu nan por verwagt persecucion i otro dificultadnan pa motibu cu nan ta pega n’e normanan di Dios. (Mateo 10:34; 24:9-13; Juan 16:33) No obstante, nan por derivá goso for dje pruebanan ei. Con asina?

 2. (a) Con prueba riba nos fe por resultá den goso? (b) Con awante por completá su obra den nos caso?

² Un motibu clave pakico nos ta haña goso ora nos ta bou di prueba di fe ta cu esakinan por producí bon fruta. Manera Santiago ta bisa, cobrando ánimo bou di prueba of dificultad “ta obra awante.” Nos por saca beneficio dor di desaroyá e balioso cualidad cristian ei. Santiago a skirbi: “Laga awante completá su obra, pa boso por ta completo i sano den tur sentido, sin tin deficiencia den nada.” (Santiago 1:4) Awante tin un trabou, un “obra,” di haci Su asignacion ta pa haci nos completo den tur sentido, yudando nos pa ta cristiannan balansá i maduro. P’esei, dor di laga prueba sigui su curso sin ningun intento pa usa medionan no-bíblico pa trece un fin rápido na dje, nos fe ta ser probá i refiná. Si nos ta falta pacenshi, compasion, amabilidad of amor ora di trata cu situacionnan of cu nos próhimo, awante por haci nos mas completo. Sí, e secuencia ta: Prueba ta producí awante, awante ta mehorá cualidadnan cristian, i esakinan ta un causa di goso.—1 Pedro 4:14; 2 Pedro 1:5-8.

 3. Pakico nos no mester hala atras debí na miedu di prueba of test di fe?

³ Apostel Pedro tambe a resaltá pakico nos no tin nodi teme of hala atras for di prueba riba nos fe. El a skirbi: “Boso ta alegrá mashá den e echo aki, aunke actualmente pa un poco tempu so, si mester ta asina, boso ta ser afligí dor di vários prueba, p’e calidad probá di boso fe, di hopi mas balor cu oro cu ta perecé apesar di ser probá pa candela, sea hañá un causa pa alabansa i gloria i onor n’e revelacion di Jesucristo.” (1 Pedro 1:6, 7) E palabranan aki ta specialmente animador awor pasobra e “tribulacion grandi”—e tempu di alabansa, gloria, onor i sobrebibencia—ta muchu mas cerca di loke algun hende ta kere i muchu mas cerca cu tempu nos a bira creyente.—Mateo 24:21; Romanonan 13:11, 12.

 4. Con un ruman a sinti tocante e pruebanan cu e i otro cristiannan ungí a pasa aden?

⁴ Den e artículo anterior, nos a considerá pruebanan cu e resto ungí a enfrentá for di 1914 padilanti. Esakinan tabata un base pa goso? A. H. Macmillan, mirando bek, a duna e punto di bista aki: “Mi a mira hopi prueba severo bini riba e organisacion i testnan riba e fe di esnan den dje. Cu yudansa di Dios su spiritu e organisacion a sobrebibí i a sigui florecé. Mi a mira e sabiduria di spera cu pacenshi riba Jehova pa clara nos comprendimentu di cosnan bíblico en bes di laga un pensamentu nobo molestiá bo. . . . Sin importá ki ahustenan nos lo tin cu haci tempu-tempu den nos punto di bista, esei lo no cambia e percuracion misericordioso dje rescate i Dios su promesa di bida eterno. Pues no tabata necesario pa nos laga nos fe debilitá dor cu expectativanan no a cumpli of dor cu tabatin cambionan den punto di bista.”—The Watchtower di 15 di augustus, 1966, página 504.

 5. (a) Ki beneficionan a resultá for dje echo cu e resto a pasa den prueba? (b) Pakico e asuntu di prueba mester interesá nos awor?

⁵ Cristiannan ungí cu a sobrebibí e periodo di prueba di 1914-19 a ser librá for dje influencia dominante dje mundu i for di hopi práctica religioso babilónico. E resto a sigui padilanti como un pueblo limpi i refiná, ofreciendo boluntariamente sacrificionan di alabansa na Dios i teniendo e siguransa cu como pueblo nan tabata aceptabel p’e. (Isaías 52:11; 2 Corintionan 6:14-18) Huicio a cuminsá cu e cas di Dios, pero lo e no a ser completá den un solo periodo determiná. E testmentu i e seftamentu dje pueblo di Dios ta sigui. E fe di esnan cu ta spera di sobrebibí e binidero “tribulacion grandi” como parti dje “multitud grandi” tambe ta ser probá. (Revelacion 7:9, 14) Esaki ta ser hací den maneranan similar na loke e resto ungí a experenciá i tambe den otro maneranan.

Con Lo Bo Por Ser Probá?

 6. Cua ta un tipo di prueba severo cu hopi ruman a experenciá?

⁶ Hopi cristian a pensa riba e desafio di enfrentá prueba den e forma di atakenan frontal directo. Nan ta corda e informe aki: “[E lidernan hudiu] a manda yama e apostelnan, a suta nan, i a ordená nan pa stop di papia riba base dje nomber di Jesus, i a laga nan bai. P’esei, esakinan a sali for di dilanti dje Sanedrin, alegrando pasobra nan a ser considerá digno di ser desonrá pa causa di su nomber.” (Echonan 5:40, 41) I e historia moderno dje pueblo di Dios, specialmente durante e gueranan mundial, ta mustra cla cu hopi Testigo di Jehova en berdad a experenciá maltrato, i tin biaha cos muchu mas pió, na man di persiguidónan.

 7. Con leu algun cristian di tempu moderno a bai den desplegá fe?

⁷ Pa loke ta persecucion di cristiannan, mundu no ta haci distincion entre e resto ungí i e multitud grandi di ‘otro carné.’ (Juan 10:16) Atrabes di añanan, miembronan di tur dos grupo a ser probá severamente dor di encarcelacion i asta a muri como mártir debí na nan amor pa Dios i nan fe den dje. Tur dos grupo tabatin mester dje spiritu di Dios, sea cual sea nan speransa. (Compará cu E Toren di Vigilancia di 15 di juni, 1996, página 31.) Durante añanan ’30 i ’40 den Alemania nazi, hopi sirbidó di Jehova, incluyendo mucha, a desplegá fe extraordinario, i hopi a ser probá te n’e límite. Den añanan mas recien, Jehova su pueblo a enfrentá e prueba di persecucion den paisnan manera Burundi, Eritrea, Etiopia, Malawi, Mozambique, Ruanda, Singapur i Zaire. I ainda e tipo di pruebanan aki ta sosodé.

 8. Con e comentarionan di un ruman africano ta mustra cu e testmentu di nos fe ta bai mas leu cu solamente wanta persecucion den forma di maltrato?

⁸ Sin embargo, manera a ser mencioná caba, nos fe ta ser di test tambe den maneranan mas sutil. Algun dje pruebanan no ta asina directo i fácil pa reconocé. Pensa con lo bo reaccioná riba algun dje siguientenan. Un ruman homber na Angola cu dies yu tabata den un congregacion cu pa un tempu tabata cortá for di comunicacion cu e rumannan responsabel p’e region ei. Despues a bira posibel pa otro rumannan bishitá e congregacion. A puntr’é con e tabata logra alimentá su famia. No tabata fácil p’e contestá, i tur loke el a bisa tabata cu e situacion tabata difícil. E por a alimentá su yunan por lo ménos un cuminda pa dia? El a contestá: “Wel, apénas. Nos a siña lora cu loke nos tin.” Anto cu un bos yen di conviccion, e di: “Pero esaki no ta loke nos ta verwagt den e último dianan aki?” Un fe asina ta remarcabel den mundu, pero e no ta algu straño entre cristiannan leal, kendenan tin pleno confiansa cu e promesanan di Reino lo ser realisá.

 9. Con nos ta ser di test en coneccion cu 1 Corintionan 11:3?

⁹ E multitud grandi ta ser probá tambe en coneccion cu proceduranan teocrático. E congregacion cristian mundial ta ser dirigí segun principionan divino i normanan teocrático. Esaki ta nificá, na promé lugá, reconocé Jesus como e Lider, esun nombrá como Cabes dje congregacion. (1 Corintionan 11:3) Sumision di buena gana na dje i na su Tata ta ser manifestá mediante nos fe den nombramentu i decisionnan teocrático relacioná cu nos hacimentu dje boluntad di Jehova den un manera uní. Ademas, den tur congregacion local, tin hombernan nombrá pa hiba delantera. Nan ta hende imperfecto kende nan fayonan nos por mira mesora; tog Bijbel ta urgi nos pa respetá e superintendentenan ei i ser sumiso. (Hebreonan 13:7, 17) Bo ta haña esei difícil tin biaha? Esaki realmente ta un prueba pa bo? Si ta asina, bo ta beneficiando for dje prueba aki di bo fe?

10. Ki prueba nos ta enfrentá relacioná cu e sirbishi di veld?

¹⁰ Nos ta ser probá tambe en coneccion cu e privilegio i rekisito di participá regularmente den e ministerio di veld. Pa nos pasa e prueba aki, nos tin cu realisá cu un participacion completo den e ministerio ta enbolbé mas cu predicá lo mínimo, of djis pa formalidad. Corda Jesus su comentario di aprobacion tocante e biuda pober cu a duna tur loke e tabatin. (Marco 12:41-44) Nos por puntra nos mes: ‘Relacioná cu mi ministerio di veld, mi tambe ta dunando di mi mes?’ Nos tur mester ta Testigo di Jehova binticuater ora pa dia, cla na tur oportunidad pa laga nos lus briya.—Mateo 5:16.

11. Con cambionan den comprendimentu of conseho riba conducta por ta un prueba?

¹¹ Un otro prueba cu nos por haña nos cuné ta relacioná cu e grado di nos aprecio p’e creciente lus riba e berdad bíblico i pa e conseho cu e clase di esclabo fiel ta percurá. (Mateo 24:45) Tin biaha esaki ta exigí ahustenan den conducta personal, manera ora a bira claro cu esnan cu ta usa tabaco lo tabatin di stop si nan kier a keda den e congregacion.a (2 Corintionan 7:1) Of e prueba por tin di haber cu si nos ta aceptá cu ta necesario pa cambia e tipo di música cu nos gusta of cierto otro forma di entretenimentu.b Nos lo cuestioná e sabiduria dje conseho ofrecé? Of nos lo laga e spiritu di Dios moldea nos moda di pensa i yuda nos bisti e personalidad cristian?—Efesionan 4:20-24; 5:3-5.

12. Kico ta necesario pa fortalecé e fe di un persona despues cu e bautisá?

¹² Pa décadanan caba, e cantidad di esnan dje multitud grandi ta aumentando, i despues di nan bautismo nan ta sigui fortalecé nan relacion cu Jehova. Esaki ta enbolbé mas cu asistí na un asamblea cristian, bai algun reunion na Salon di Reino, of participá de bes en cuando den sirbishi di veld. Pa ilustrá: Un persona por ta físicamente pafó di Babilonia e Grandi, e imperio mundial di religion falsu, pero di berdad el a lagu’é atras? Ainda e ta pega na e cosnan cu ta reflehá e spiritu di Babilonia e Grandi—un spiritu cu ta menospreciá e normanan hustu di Dios? E ta considerá moralidad i fieldad matrimonial di poco importancia? E ta enfatisá interesnan personal i material mas cu interesnan spiritual? Sí, el a keda sin mancha dje mundu?—Santiago 1:27.

Beneficio for di Fe Probá

13, 14. Kico algun ruman a haci despues cu nan a cuminsá cana riba e caminda di adoracion berdadero?

¹³ Si di berdad nos a hui for di Babilonia e Grandi i tambe a sali for dje mundu, laga nos no wak na e cosnan cu a keda atras. Na armonia cu e principio hañá na Lucas 9:62, si cualkier un di nos wak patras, esei lo por nificá perde e oportunidad di ta súbdito dje Reino di Dios. Jesus a bisa: “Ningun hende cu a pone su man na un ploeg i ta wak na e cosnan patras ta masha apto p’e reino di Dios.”

¹⁴ Pero algun persona cu a bira cristian añanan pasá, awor a permití e sistema di cosnan aki forma nan. Nan no a resistí e spiritu di mundu. (2 Pedro 2:20-22) Distraicionnan mundano a absorbá nan interes i tempu, strobando asina nan progreso. En bes di mantené nan mente i curason firmemente fihá riba e Reino di Dios i su husticia, poniendo cosnan asina na promé lugá den bida, nan a desviá pa sigui metanan materialista. A ménos cu nan ser motivá pa admití nan fe débil i condicion tibio, i a ménos cu nan cambia nan curso dor di busca conseho divino, nan ta den peliger di perde nan relacion precioso cu Jehova i cu su organisacion.—Revelacion 3:15-19.

15. Kico ta necesario pa keda aceptabel pa Dios?

¹⁵ Pa nos por ser hañá den un condicion aprobá i den fila pa sobrebibí e tribulacion grandi cu ta acercando rápidamente, nos tin cu keda limpi, teniendo nos pañanan largu ‘labá den e sanger dje Lamchi.’ (Revelacion 7:9-14; 1 Corintionan 6:11) Si nos no mantené un posicion limpi i hustu dilanti Dios, nos sirbishi sagrado lo no ta aceptabel. Sigur, cada un di nos mester realisá cu e calidad probá di fe lo yuda nos perseverá i evitá cu Dios ta bira malcontentu cu nos.

16. Den ki maneranan mentira por resultá di ta un prueba riba nos fe?

¹⁶ Tin biaha, medionan di noticia i autoridadnan seglar ta duna declaracionnan falsu i di menosprecio tocante e pueblo di Dios, dunando un malrepresentacion di nos creencianan cristian i nos moda di biba. Esaki no mester sorprendé nos, pasobra Jesus ta mustra claramente cu e ‘mundu lo odia nos pasobra nos no ta parti di dje.’ (Juan 17:14) Nos lo permití esnan ciegá dor di Satanas intimidá nos i descurashá nos i laga nos sinti bergwensa dje bon nobo? Nos lo permití mentiranan tocante e berdad afectá nos asistencia regular na reunion i nos actividad di predicá? Of nos lo para firme i tene curashi i ser mas dicididu cu nunca pa sigui declará e berdad tocante Jehova i su Reino?

17. Kico por stimulá nos sigur pa sigui mustra fe?

¹⁷ Segun cumplimentu di profecia di Bijbel, nos ta bibando awor leu den e tempu di fin. Ta sigur cu nos expectativanan basá riba Bijbel di un mundu nobo di husticia lo bira un realidad encantador. Tanten cu e dia ei no yega, laga nos tur ehercé fe firme den e Palabra di Dios i demostrá nos fe dor di no baha man den predicá e bon nobo di Reino rond mundu. Pensa dje miles di disipelnan nobo cu ta bautisá tur siman. Esei no ta suficiente motibu pa nos apreciá cu Jehova su pacenshi relacioná cu e ehecucion di huicio por resultá den e salbacion di hopi hende mas? Nos no ta contentu cu Dios a permití e actividad salbador-di-bida di predicá e Reino continuá? I nos no ta encantá cu miyones di hende a aceptá e berdad i ta demostrando nan fe?

18. Kico ta bo determinacion pa loke ta sirbishi na Jehova?

¹⁸ Nos no por bisa pa cuantu tempu mas e testmentu actual di nos fe lo dura. Pero un cos ta sigur: Jehova a fiha un dia di regla cuenta cu e shelu i tera malbado actual. Miéntras tantu, laga nos keda dicididu pa imitá e calidad haltu di fe probá cu e Perfeccionador di nos fe, Jesus, a manifestá. I laga nos sigui e ehempel di e resto ungí riba tera cu ya ta birando bieu i e ehempel di otronan cu yen di curashi ta sirbiendo meimei di nos.

19. Kico bo por ta sigur cu lo vence e mundu aki?

¹⁹ En cooperacion cu e angel cu ta bulando meimei di shelu, nos mester ta dicididu pa declará sin stop e bon nobo eterno na tur nacion, tribu, lenga i pueblo. Laga nan tende e declaracion angelical: “Teme Dios i dun’é gloria, pasobra e ora di huicio di dje a yega.” (Revelacion 14:6, 7) Ora e huicio divino ei ser ehecutá, kico lo ta e resultado pa loke ta e calidad probá di nos fe? Lo e no ta un triunfo glorioso—liberacion for dje sistema di cosnan actual i drenta Dios su mundu nobo di husticia? Dor di wanta e pruebanan riba nos fe, nos lo por bisa, mescos cu apostel Juan: “Esaki ta e victoria cu a vence e mundu, nos fe.”—1 Juan 5:4.

[Nota]

Bo Ta Corda?

◻ Den ki sentido pruebanan riba nos por ta un causa di goso?

◻ Cua ta algun test riba nos fe cu bo no ta reconocé fácil?

◻ Con nos por beneficiá di wanta pruebanan riba nos fe cu éxito?

[Plachinan na página 17]

A. H. Macmillan (man robes dilanti) rond dje tempu cu e i oficialnan di Sociedad Watch Tower a ser encarcelá inhustamente

E tabata un delegado n’e congreso na Detroit, Michigan, 1928

Den su último añanan, Ruman Macmillan tabata desplegá fe ainda

[Plachi na página 18]

Mescos cu e famia aki, hopi cristian na Africa a desplegá un calidad di fe probá