Jehova Ta un Dios di Gran Pacenshi

“Jehova, un Dios misericordioso i yen di gracia, cu ta tarda pa rabia i ta abundante den bondad amoroso.”—ÉXODO 34:6.

 1, 2. (a) Ken a yega di beneficiá di Jehova su gran pacenshi den pasado? (b) Kico e expresion “gran pacenshi” ta nificá?

E HENDENAN den tempu di Noe, e israelitanan cu a pasa dor di desierto cu Moises, e hudiunan cu tabata na bida tempu cu Jesus a cana riba tera—cada un dje gruponan aki a biba den circunstancia diferente. Pero nan tur a beneficiá dje mésun cualidad bondadoso di Jehova: gran pacenshi. Pa algun di nan el a nificá bida mes. I Jehova su gran pacenshi por nificá bida pa nos tambe.

² Kico gran pacenshi ta? Ki ora Jehova ta demostr’é, i pakico? Un definicion di “gran pacenshi” ta: “Soportá malecho of provocacion cu pacenshi, i nenga di perde speransa cu e relacion dañá por drecha.” Pues, e cualidad aki tin un propósito su tras. E ta busca bienestar di net esun cu ta ocasioná e situacion desagradabel. Pero mustra gran pacenshi no kier men tolerá malecho. Una bes cu e gran pacenshi a cumpli cu su meta, of ora ya no tin sentido mas pa sigui soportá e situacion, gran pacenshi ta caba.

 3. Kico ta e propósito tras di Jehova su gran pacenshi, i kico ta su límite?

³ Hende por tin gran pacenshi sí, pero ta Jehova ta e ehempel supremo dje cualidad aki. Den tur e añanan for di ora cu picá a afectá e relacion entre Jehova i su creacion humano, nos Creador a wanta cu pacenshi i a duna hende arepentí e medio pa nan por drecha nan relacion cuné. (2 Pedro 3:9; 1 Juan 4:10) Pero ora su gran pacenshi logra su meta, Dios lo tuma accion contra hende cu ta haci malu deliberadamente i trece e mal sistema actual na su fin.—2 Pedro 3:7.

Na Armonia cu Dios Su Atributonan Principal

 4. (a) Con e concepto di gran pacenshi ta ser expresá den Scritura Hebreo? (Mira nota na pia di página tambe.) (b) Con profeta Nahum ta describí Jehova, i kico esei ta revelá tocante Jehova su gran pacenshi?

⁴ Den Scritura Hebreo e concepto di gran pacenshi ta ser expresá dor di dos palabra hebreo cu literalmente ta nificá “largura di buracu di nanishi.” Den Traduccion di Mundu Nobo e ta ser traducí como “tarda pa rabia.”a Papiando di Dios su gran pacenshi, profeta Nahum a bisa: “Jehova ta tarda pa rabia i ta grandi den poder, i di ningun manera Jehova lo retené su mes di castigá.” (Nahum 1:3) Pues, Jehova su gran pacenshi no ta un señal di debilidad, i e no ta sin límite. E echo cu Dios Todopoderoso ta tarda pa rabia maske e ta grandi den poder, ta mustra cu su gran pacenshi kier men cu e ta frena su mes cu un propósito na bista. E tin poder pa castigá, pero e ta frena su mes deliberadamente di castigá mesora, p’e duna e malechor chens pa cambia. (Ezekiel 18:31, 32) Pues, Jehova su gran pacenshi ta un expresion di su amor, i e ta mustra su sabiduria den e manera cu e ta usa su poder.

 5. Con Jehova su gran pacenshi ta na armonia cu su husticia?

⁵ Jehova su gran pacenshi ta na armonia cu su husticia tambe. El a revelá su mes na Moises como “un Dios misericordioso i yen di gracia, cu ta tarda pa rabia [“ku pasenshi,” Beibel na papiamentu koriente] i ta abundante den bondad amoroso i berdad.” (Éxodo 34:6) Hopi aña despues, Moises a canta lo siguiente pa alabá Jehova: “Tur su camindanan ta husticia. Un Dios di fieldad, cu ken no tin inhusticia; hustu i recto e ta.” (Deuteronomio 32:4) Sí, Jehova su misericordia, gran pacenshi, husticia i rectitud ta traha huntu armoniosamente.

Jehova Su Gran Pacenshi Promé cu Diluvio

 6. Ki evidencia remarcabel di gran pacenshi Jehova a mustra n’e desendientenan di Adam cu Eva?

⁶ E rebelion di Adam cu Eva den Eden a kibra nan relacion precioso cu nan Creador amoroso, Jehova, pa semper. (Génesis 3:8-13, 23, 24) E alehamentu aki a afectá nan yunan, kendenan a heredá picá, imperfeccion i morto. (Romanonan 5:17-19) Maske e promé pareha humano a peca deliberadamente, Jehova a permití nan producí yu. Despues, amorosamente el a percurá e medio p’e desendientenan di Adam cu Eva por reconciliá cuné. (Juan 3:16, 36) Apostel Pablo a splica: “Dios ta recomendá su mes amor na nos den e echo cu, miéntras nos tabata pecadó ainda, Cristo a muri pa nos. P’esei, mas ainda, desde cu nos a ser declará hustu awor pa medio di su sanger, nos lo ser salbá mediante dje for di rabia. Pasobra si ora nos tabata enemigu, nos a bira reconciliá cu Dios mediante e morto di su Yu, muchu mas awor cu nos a bira reconciliá, nos lo ser salbá pa medio di su bida.”—Romanonan 5:8-10.

 7. Con Jehova a mustra gran pacenshi promé cu e Diluvio, i di con destruccion dje generacion promé cu e Diluvio tabata hustificá?

⁷ Den tempu di Noe Jehova su gran pacenshi tabata bisto. Mas cu un siglo promé cu e Diluvio, “Dios a wak e tera i, mira! e tabata ruiná, pasobra tur carni a ruiná nan caminda riba e tera.” (Génesis 6:12) Apesar di esei, durante un tempu limitá Jehova a mustra humanidad gran pacenshi. El a bisa: “Mi spiritu lo no obra pa cu hende pa tempu indefiní, ya cu e tambe ta carni. Consecuentemente su dianan lo yega di ta shentibinti aña.” (Génesis 6:3) E 120 añanan ei a duna fiel Noe tempu pa cria un famia i, ora Dios a bis’é kico El a decretá, e por a traha un arca i spierta su contemporáneonan dje Diluvio cu tabata na caminda. Apostel Pedro a skirbi: “E pacenshi di Dios tabata spera den e dianan di Noe, miéntras cu e arca tabata ser construí, den cua poco hende, esta ocho alma, a ser salbá atrabes dje awa.” (1 Pedro 3:20) Ta berdad cu niun hende cu no a forma parti di Noe su famia di cas “no a haci caso” di su predicacion. (Mateo 24:38, 39) Pero dor cu Jehova a laga Noe traha e arca i sirbi como “un predicadó di husticia,” kisas durante vários década, el a duna Noe su contemporáneonan suficiente chens pa repentí di nan proceder violento i bira sirbidó di djE. (2 Pedro 2:5; Hebreonan 11:7) Ora cu finalmente e generacion malbado ei a ser destruí, esei tabata totalmente hustificá.

Bon Ehempel di Gran Pacenshi cu Israel

 8. Con Jehova a manifestá su gran pacenshi n’e nacion di Israel?

⁸ Jehova su gran pacenshi cu Israel a dura hopi mas cu 120 aña. Atrabes di mas cu 1.500 aña di nan historia como pueblo scogí di Dios, tabatin relativamente tiki temporada ora cu e israelitanan no a pone Dios su gran pacenshi na prueba te na extremo. Apénas un par di siman despues cu nan a ser librá milagrosamente for di Egipto, nan a cai den adoracion di ídolo, mustrando un gran falta di respet pa nan Salbador. (Éxodo 32:4; Salmo 106:21) Durante e décadanan cu a sigui, e israelitanan a keha tocante e cuminda cu Jehova a duna nan milagrosamente den desierto, nan a murmurá contra Moises cu Aron, nan a papia contra Jehova, nan a cometé fornicacion cu pagano i asta a participá den adoracion di Baal. (Númeronan 11:4-6; 14:2-4; 21:5; 25:1-3; 1 Corintionan 10:6-11) Jehova tabatin tur derecho di exterminá su pueblo. Pero na lugá di esei el a ehercé gran pacenshi.—Númeronan 14:11-21.

 9. Con Jehova a resultá di ta un Dios di gran pacenshi den tempu dje huesnan i durante e periodo dje reynan?

⁹ Den tempu dje huesnan, e israelitanan a cai den idolatria bes tras bes. Ora nan a haci asina, Jehova tabata bandoná nan den man di nan enemigunan. Pero ora nan tabata repentí i pidié yudansa, e tabata ehercé gran pacenshi i lanta huesnan pa libra nan. (Huesnan 2:17, 18) Durante e periodo largu dje reynan, poco di nan a mustra debocion exclusivo na Jehova. Asta durante reinado dje reynan fiel, hopi bes e pueblo tabata mescla adoracion berdadero cu adoracion falsu. Ora Jehova tabata lanta profeta pa spierta e pueblo tocante nan infieldad, hopi bes nan a preferá di scucha sacerdote corupto i profeta falsu. (Jeremías 5:31; 25:4-7) Sí, e israelitanan tabata persiguí Jehova su profetanan fiel, i nan a asta mata algun di nan. (2 Crónicanan 24:20, 21; Echonan 7:51, 52) Apesar di esei, Jehova a sigui mustra gran pacenshi.—2 Crónicanan 36:15.

Jehova Su Gran Pacenshi No A Caba

10. Ki ora Jehova su gran pacenshi a yega su límite?

¹⁰ Sin embargo, historia ta mustra cu Dios su gran pacenshi tin límite. Na aña 740 P.E.C. el a permití Asiria tumba e reino di dies tribu di Israel, i bai cu su habitantenan den exilio. (2 Reynan 17:5, 6) I na fin dje siguiente siglo el a permití e babilonionan invadí e reino di dos tribu di Huda, i destruí Jerusalem cu su tempel.—2 Crónicanan 36:16-19.

11. Con Jehova a demostrá gran pacenshi asta ora el a ehecutá huicio?

¹¹ Pero asta ora el a ehecutá su huicio contra Israel cu Huda, Jehova no a lubidá di mustra gran pacenshi. Pa medio di su profeta Jeremías, Jehova a predicí cu su pueblo scogí lo ser restorá. El a bisa: “Despues cu boso cumpli setenta aña den Babilonia lo mi dirigí mi atencion na boso, i en coneccion cu boso lo mi establecé mi bon palabra treciendo boso bek n’e lugá aki. I lo mi laga boso haña mi . . . I lo mi recogé boso grupo di catibu i reuní boso for di tur nacion i for di tur lugá na cua mi a plama boso.”—Jeremías 29:10, 14.

12. Cu e binida dje Mesías na mente, con e regreso di un resto hudiu na Huda a resultá di ta un percuracion di Jehova?

¹² En berdad un resto dje hudiunan exiliá a bolbe Huda i a rebibá adoracion di Jehova na e tempel reconstruí na Jerusalem. Den e realisacion di Jehova su propósito, e resto aki lo a bira manera “serena for di Jehova,” cu ta trece refrescamentu i prosperidad. Tambe nan lo tabata balente i fuerte manera ‘un leon meimei dje bestianan di mondi.’ (Mikéas 5:7, 8) Kisas e último expresion aki a cumpli den e periodo macabeo, ora cu e hudiunan bou dje famia dje macabeonan a saca nan enemigunan for dje Tera Primintí, i a rededicá e tempel contaminá. Asina e tera i e tempel a ser preservá pa un otro resto fiel por a duna bon biní na e Yu di Dios ora el a aparecé ei como e Mesías.—Daniel 9:25; Lucas 1:13-17, 67-79; 3:15, 21, 22.

13. Asta despues cu e hudiunan a mata su Yu, con Jehova a sigui mustra gran pacenshi na nan?

¹³ Asta despues cu e hudiunan a mata su Yu, Jehova a sigui mustra gran pacenshi na nan pa tres aña i mei mas, dor di duna nan so e chens di ser yamá pa bira parti dje simia spiritual di Abraham. (Daniel 9:27)b Promé i despues di aña 36 E.C., algun hudiu a aceptá e invitacion aki, i asina, manera Pablo a expres’é, “un resto a presentá segun un scogementu debí na bondad inmerecí.”—Romanonan 11:5.

14. (a) Ken a ricibí e invitacion pa bin forma parti di Abraham su simia spiritual na aña 36 E.C? (b) Con Pablo a expresá loke el a sinti tocante e manera cu Jehova ta scoge e miembronan di Israel spiritual?

¹⁴ Na aña 36 E.C., pa di promé bes a duna hende cu no tabata ni hudiu ni prosélito, e privilegio di bira parti di Abraham su simia spiritual. Tur esnan cu a haci caso tambe a ricibí Jehova su bondad inmerecí i su gran pacenshi. (Galationan 3:26-29; Efesionan 2:4-7) Ta pa medio di Jehova su misericordioso gran pacenshi el a reuní e cantidad total di hende cu ta ricibí e invitacion pa bin completá e Israel spiritual. Pablo a expresá aprecio profundo pa e sabiduria i e propósito tras di e gran pacenshi aki dor di sclama: “O e profundidad dje rikesa i sabiduria i conocimentu di Dios! Ki ininvestigabel su huicionan ta i ki fuera di averiguacion su camindanan ta!”—Romanonan 11:25, 26, 33; Galationan 6:15, 16.

Gran Pacenshi pa Causa di Su Nomber

15. Kico ta e motibu principal cu Dios ta mustra gran pacenshi, i cua cuestion a tuma tempu pa por atendé?

¹⁵ Pakico Jehova ta ehercé gran pacenshi? Na promé lugá pa engrandecé su nomber santu i vindicá su soberania. (1 Samuel 12:20-22) E cuestion moral cu Satanas a lanta tocante e manera cu Jehova ta usa Su soberania a exigí tempu pa por a atend’é satisfactoriamente dilanti henter creacion. (Job 1:9-11; 42:2, 5, 6) P’esei, ora su pueblo tabata sufri opresion na Egipto, Jehova a bisa Fárao: “P’e motibu aki mi a mantené bo na existencia, pa mi mustra bo mi poder i pa mi nomber ser declará den henter e tera.”—Éxodo 9:16.

16. (a) Con Jehova su gran pacenshi a haci posibel pa el a prepará un pueblo pa su nomber? (b) Con Jehova su nomber lo ser santificá, i su soberania vindicá?

¹⁶ Ora apostel Pablo a splica e papel cu Dios su gran pacenshi ta hunga den glorificacion di Su nomber santu, el a cita e palabranan ei cu Jehova a bisa Fárao. Despues di esei, Pablo a skirbi: “P’esei, si Dios, aunke e tin e boluntad pa demostrá su rabia i pa duna di conocé su poder, a tolerá cu masha gran pacenshi weanan di rabia trahá p’e propósito di destruccion, p’e por a duna di conocé e rikesanan di su gloria riba weanan di misericordia, cu el a prepará di antemano pa gloria, esta, nos, cu el a yama no solamente di entre hudiunan sino tambe di entre e nacionnan, kico anto? Ta manera e ta bisa tambe den Oséas: ‘Esnan cu no ta mi pueblo lo mi yama “mi pueblo.”’” (Romanonan 9:17, 22-25) Debí cu Jehova a mustra gran pacenshi, e por a saca “un pueblo pa su nomber” for dje nacionnan. (Echonan 15:14) Bou di nan Cabesante Jesucristo, e “santunan” aki ta heredero dje Reino cu Jehova ta bai usa pa santificá Su gran nomber i vindicá Su soberania.—Daniel 2:44; 7:13, 14, 27; Revelacion 4:9-11; 5:9, 10.

Jehova Su Gran Pacenshi Ta Obra pa Salbacion

17, 18. (a) Con, sin cu nos sa, nos lo por ta criticando Jehova pa e gran pacenshi cu e ta mustra? (b) Ki punto di bista Bijbel ta animá pa nos tin tocante Jehova su gran pacenshi?

¹⁷ For di momento cu humanidad originalmente a cai den picá, te awor, Jehova a demostrá di ta un Dios cu gran pacenshi. Su gran pacenshi promé cu e Diluvio a permití tempu pa duna hende suficiente advertencia, i pa construí un medio di salbacion. Pero su pacenshi a yega su límite, i e Diluvio a bini. Mescos awe, Jehova ta mustra hopi gran pacenshi, i esaki a dura mas largu cu algun hende por a kere. Pero esei no ta motibu pa entregá. Si nos entregá, ta como si fuera nos ta criticá Dios pa su gran pacenshi. Pablo a puntra: “Bo ta despreciá e rikesanan di su bondad i soportamentu i gran pacenshi, pasobra bo no sa cu e cualidad bondadoso di Dios ta purba guia bo na repentimentu?”—Romanonan 2:4.

¹⁸ Ningun di nos no por sa te con leu nos tin mester di Dios su gran pacenshi pa ta sigur di ricibí su aprobacion i haña salbacion. Pablo ta consehá nos pa “sigui traha pa alcansá [nos] mes salbacion cu temor i temblamentu.” (Filipensenan 2:12) Apostel Pedro a skirbi su compañeronan cristian: “Jehova no ta lento en cuanto su promesa, manera algun hende ta considerá lentitud, pero e tin pacenshi cu boso pasobra e no ta deseá pa ningun hende ser destruí, sino ta deseá pa tur alcansá repentimentu.”—2 Pedro 3:9.

19. Di ki manera nos por saca beneficio di Jehova su gran pacenshi?

¹⁹ P’esei, laga nos no falta pacenshi tocante Jehova su manera di trata asuntunan. Mas bien, laga nos sigui e conseho cu Pedro a duna siguientemente, i “considerá e pacenshi di nos Señor como salbacion.” Salbacion di ken? Di nos mes, i den un sentido mas amplio, di un cantidad incontabel di otro hende cu ainda mester tende e ‘bon nobo dje reino.’ (2 Pedro 3:15; Mateo 24:14) Esaki lo yuda nos apreciá con generoso Jehova ta den mustra gran pacenshi, i motivá nos pa mustra gran pacenshi den nos trato cu otro hende.

[Nota]

Bo Por Splica?

• Kico e expresion “gran pacenshi” ta nificá den Bijbel?

• Con Jehova a mustra su gran pacenshi promé cu e Diluvio, despues dje cautiverio na Babilonia i den promé siglo di era comun?

• Pa ki motibunan importante Jehova a mustra gran pacenshi?

• Ki punto di bista nos mester tin tocante Jehova su gran pacenshi?

[Plachi na página 9]

Jehova su gran pacenshi promé cu e Diluvio a duna hende oportunidad amplio pa repentí

[Plachi na página 10]

Despues dje caida di Babilonia, e hudiunan a beneficiá di Jehova su gran pacenshi

[Plachi na página 11]

Den promé siglo, tantu hudiu como no-hudiu a beneficiá di Jehova su gran pacenshi

[Plachinan na página 12]

Awe, cristiannan ta beneficiá bon di Jehova su gran pacenshi