Pregunta di Lector

Kico Bijbel ta indicá tocante pena capital, e castigu di morto, pa criminalnan?

Ta di comprendé cu cada un di nos por tin nos mes sintimentunan personal riba esaki, basá riba nos experencia of situacion den bida. Sin embargo, como Testigonan di Jehova, nos tin cu trata na armonisá cu e pensamentunan di Dios tocante pena capital, miéntras nos ta keda neutral relacioná cu e puntonan di bista político cu hopi hende ta asumí riba e asuntu aki.

Pa bis’é cu poco palabra, den su Palabra skirbí, Dios no ta indicá cu pena capital ta robes.

Trempan den historia humano, Jehova a expresá su pensamentunan riba e asuntu, manera nos ta lesa den Génesis capítulo 9. Esaki a enbolbé Noe i su famia, kendenan a bira antepasado di henter e famia humano. Despues cu nan a sali for dje arca, Dios a bisa cu nan por a come bestia—esta, hende por a mata bestia, drama su sanger i com’é. Anto, na Génesis 9:5, 6, Dios a bisa: “Ademas di esei, boso sanger di boso alma lo mi reclamá. For di man di tur criatura bibiente lo mi reclam’é; i for di man di hende, for di man di cada un cu ta su ruman, lo mi reclamá e alma di hende. Ken cu ta drama sanger di hende, pa hende, su propio sanger lo ser dramá, pasobra Dios a traha hende den su imágen.” Asina Jehova a autorisá pena capital den e caso di asesinonan.

Tempu Dios tabata trata cu Israel como su pueblo, vários otro ofensa serio contra ley divino tabata castigabel cu morto. Na Númeronan 15:30, nos ta lesa e declaracion amplio aki: “E alma cu ta haci algu deliberadamente, sea e ta un nativo of un residente stranhero, siendo cu e ta papia ofensivamente di Jehova, den tal caso e alma ei mester ser cortá di entre su pueblo.”

Pero kico di despues cu e congregacion cristian a ser establecí? Wel, nos sa cu Jehova a autorisá gobiernunan humano pa existí, i el a yama nan e autoridadnan superior. En realidad, despues di consehá cristiannan pa ta obediente na tal autoridadnan gubernamental, Bijbel ta bisa cu eseinan ta sirbi como “minister di Dios pa bo, pa bo bon. Pero si bo ta haciendo loke ta malu, teme: pasobra no ta sin propósito cu e ta carga e spada; pasobra e ta minister di Dios, un vengadó pa expresá rabia riba esun cu ta practicá loke ta malu.”—Romanonan 13:1-4.

Esei ta nificá cu gobiernunan ta autorisá pa asta kita bida di esnan cu ta cometé crímennan serio? For dje palabranan na 1 Pedro 4:15, nos lo tin cu concluí cu sí. Den e pasashi ei e apostel a spierta su rumannan: “No laga ningun di boso sufri como asesino of ladron of malechor of como entremetido den asuntu di otro hende.” Bo a ripará e palabranan, “no laga ningun di boso sufri como asesino”? Pedro no a duna di comprendé cu gobiernunan no tabatin derecho di laga un asesino sufri pa su crímen. Al contrario, el a indicá cu un asesino corectamente por a ricibí debido castigu. Esei lo a incluí castigu di morto?

Sí, e por a incluí esei. Esaki ta keda claro for di Pablo su palabranan hañá na Echonan capítulo 25. Hudiunan a acusá Pablo di ofensanan contra nan Ley. Ora e comandante militar a manda su prezu, Pablo, p’e gobernadó romano, e comandante a informá, manera Echonan 23:29 ta bisa: “Mi a hañ’é acusá tocante cuestionnan di nan Ley, pero no acusá di ni un solo cos cu ta merecé morto of cadena.” Despues di dos aña Pablo a haña su mes dilanti Gobernadó Festo. Nos ta lesa na Echonan 25:8: “Pablo a bisa den defensa: ‘Mi no a cometé ningun picá ni contra e Ley dje hudiunan ni contra e tempel ni contra César.’” Pero enfocá awor riba su remarkenan tocante castigu, asta pena capital. Nos ta lesa na Echonan 25:10, 11:

“Pablo a bisa: ‘Mi ta pará dilanti e asiento di tribunal di César, unda mi mester ser husgá. Mi no a haci nada malu contra e hudiunan, manera bo tambe ta descubriendo bastante bon. Si di un parti ami realmente ta un malechor i a cometé cualkier cos cu ta merecé morto, mi no ta pidi dispensacion di morto; di otro parti, si no ta existí ningun dje cosnan cu e hombernan aki ta acusá mi di dje, ningun hende por entregá mi na nan como fabor. Mi ta apelá na César!’”

Pablo, pará dilanti un autoridad debidamente nombrá, a admití cu César tabatin e derecho di castigá malechornan, asta ehecutá nan. E no a oponé castigu den su caso si e tabata culpabel. Ademas, e no a bisa cu César por a usa pena capital solamente pa asesinonan.

Ta cierto cu e sistema hudicial romano no tabata perfecto; ni e sistemanan di corte humano awe no ta. Algun hende inocente e tempu ayá i awe a ser condená i castigá. Asta Pilato a bisa tocante Jesus: “Mi no a haña nada den dje cu ta merecé morto; p’esei lo mi castigu’é i lagu’é liber.” Sí, maske e autoridadnan gubernamental a admití cu Jesus tabata inocente, tog e homber inocente aki a ser ehecutá.—Lucas 23:22-25.

E inhusticianan ei no a haci Pablo of Pedro debatí cu pena capital ta fundamentalmente inmoral. Mas bien, e pensamentu di Dios riba e asuntu ta cu tanten cu e autoridadnan superior di César ta existí, nan ta ‘carga e spada pa expresá rabia riba esnan cu ta practicá loke ta malu.’ Esei ta incluí aplicá e spada den e sentido di utilisá pena capital. Pero ora ta trata dje cuestion controversial di si cualkier gobiernu dje mundu aki mester ehercé su derecho pa ehecutá asesinonan, cristiannan berdadero ta soru pa nan keda neutral. Diferente for di clero di cristiandad, nan ta keda leu for di cualkier debate riba e tópico aki.