“Pastoriá e Tou di Dios Ku Ta Bou di Boso Kuido”

“Pastoriá e tou di Dios ku ta bou di boso kuido, no obligá, sino di buena gana.”​—1 PED. 5:2, NW.

 1. Den ki situashon e kristiannan tabata tempu Pedro a skirbi su promé karta?

POKO tempu promé ku Nero a lansa su persekushon kontra e kristiannan na Roma, apòstel Pedro a skirbi su promé karta. Su meta tabata pa fortalesé su rumannan den fe. Diabel tabata “kana rònt,” buskando manera pa devorá e kristiannan. Pa nan por a para firme kontra dje, nan mester a ‘keda sobrio’ i ‘humiá nan mes bou di e man poderoso di Dios.’ (1 Ped. 5:​6, 8) Ademas, nan mester a keda uní. Lo no a kumbiní nan pa ‘morde otro i devorá otro,’ pasobra esei lo a nifiká ku nan mes lo a “destruí” òf kaba ku otro.​—Gal. 5:15.

2, 3. Kontra ken nos mester lucha, i kiko nos ta bai trata den e último dos artíkulonan akí?

² Awe, nos ta den un situashon similar. Diabel ta buska tur manera pa devorá nos. (Rev. 12:12) I pronto un “gran tribulashon, manera nunka tabatin for di prinsipio di mundu,” lo dal aden. (Mat. 24:21) Meskos ku e kristiannan di promé siglo tabatin ku evitá di bringa otro, nos tambe tin ku evitá esei. Pa logra esaki, tin biaha nos mester di yudansa di ansianonan kompetente.

³ Promé, laga nos wak kon ansianonan por haña mas apresio pa e privilegio di pastoriá ‘e tou di Dios ku ta bou di nan kuido.’ (1 Ped. 5:2, NW) Despues, nos lo para un ratu ketu na e manera apropiá ku nan tin ku hasi e trabou di pastoriá. Den e siguiente artíkulo, nos lo analisá kon e kongregashon por mustra ‘apresio pa esnan ku ta traha diligentemente i ku ta guia’ e tou. (1 Tes. 5:12) Tur ta asuntunan ku lo yuda nos para firme kontra nos Atversario prinsipal i rekonosé ku ta kontra dje nos tin ku hiba un lucha.​—Efe. 6:12.

Pastoriá e Tou di Dios

4, 5. Kon ansianonan mester mira e tou? Ilustrá.

⁴ Pedro a animá e ansianonan den promé siglo pa mira e tou konfiá na nan for di e punto di bista di Dios. (Lesa 1 Pedro 5:​1 i 2.a) Aunke Pedro tabata un ‘pilá’ di kongregashon, e no a dirigí su mes ku menospresio na e ansianonan, komo si fuera el a sinti su mes superior na nan. Mas bien, el a spièrta nan komo kompañero ansiano. (Gal. 2:9) Awe, ku e mesun spiritu ei, e Kuerpo Gobernante ta animá ansianonan pa hasi esfuerso pa kumpli ku e responsabilidat di peso ku nan tin di pastoriá e tou di Dios.

⁵ E apòstel a skirbi ku ansianonan mester ‘pastoriá e tou di Dios ku ta bou di nan kuido.’ Ta masha importante pa nan rekonosé ku e tou ta pertenesé na Yehova i Hesukristu. Ansianonan mester duna kuenta i rason pa e manera ku nan ta kuida e karnénan di Dios. Imaginá bo ku un bon amigu di bo ta bai afó, anto e ta pidi bo pa kuida su yunan p’e. Lo bo no sòru bon pa nan i duna nan di kome? Si un di nan bira malu, lo bo no perkurá pa e haña atenshon médiko? Meskos tambe, ansianonan mester “pastoriá e kongregashon di Dios, ku el a kumpra ku sanger di su Yu.” (Echo. 20:28, NW) Nan ta tene na mente ku Yehova a kumpra kada karné ku e sanger presioso di Kristu Hesus. Pues, komo ku ansianonan ta responsabel pa e karnénan, nan ta alimentá, protehá i kuida e tou.

 6. Ki responsabilidat e wardadónan di karné di ántes tabatin?

⁶ Pensa riba e vários responsabilidatnan ku un wardadó di karné tabatin den tempu di Beibel. E mester a soportá kalor di dia i frialdat di anochi pa e por a kuida e tou, i asta e tabatin ku riska su bida pa e karnénan. (Gén. 31:40) Tempu ku e hóben David tabata kuida karné, el a reskatá su tou for di bestia salbahe, inkluso un leon i un ber. Di ámbos insidente, David a bisa ku el a “gara [e animal] na su barba i dal e mata.” (1 Sam. 17:​34, 35) E tabatin hopi kurashi! Lo e mester a yega hopi serka di kakumbein di e animalnan akí! Ma esei no a strob’é di salba e karnénan.

 7. Kon ansianonan por, na moda di papia, ranka e karnénan for di kakumbein di Satanas?

⁷ Awe, ansianonan tin ku protehá e tou di Dios kontra e atakenan di Diabel ku ta manera di leon. Esaki ta eksigí kurashi di nan parti, ya ku nan por haña nan ta ranka e karnénan, na moda di papia, for di kakumbein di Diabel. Ta komo si fuera nan ta gara e bestia salbahe na su barba i asina reskatá e karnénan. Nan por haña nan ta rasoná ku un ruman inatento ku ta kore peliger di kai den trampa di Satanas. (Lesa Hudas 22 i 23.) Klaru ku ansianonan no por hasi esaki sin yudansa di Yehova. Nan ta atendé un karné heridá ku ternura, mara su heridanan i hunta esakinan ku e ungwento suavisante di e Palabra di Dios.

 8. Na unda ansianonan ta dirigí e tou, i kon nan ta hasi esei?

⁸ Ántes un wardadó di karné tabata guia su tou tambe na un lugá apropiá kaminda tabatin yerba i lugá di bebe awa. Meskos tambe, ansianonan ta dirigí e tou na e kongregashon; nan ta animá e rumannan pa asistí regularmente na e reunionnan di manera ku nan por keda bon alimentá i risibí “nan kuminda na su debido tempu.” (Mat. 24:45) Kisas e ansianonan tin ku dediká tempu adishonal pa yuda esnan ku ta spiritualmente enfermo aseptá alimento di e Palabra di Dios. Podisé un karné ku a dual ta hasiendo esfuerso pa bolbe bèk na e tou. En bes di intimid’é, ku ternura e ansianonan ta splik’é prinsipionan di Beibel i mustr’é kon e por apliká esakinan den su bida.

9, 10. Kon ansianonan mester kuida karné ku ta spiritualmente enfermo?

⁹ Ora bo ta malu, ki tipo di dòkter bo ta preferá? Un ku kasi no tin tempu pa tende bo, ku ta despachá bo lihé-lihé ku un resèpt pa e atendé e siguiente pashènt? Òf bo ta preferá di bai un dòkter ku ta tuma su tempu pa tend’é bo, splika bo kiko por ta bo problema i kiko ta e posibel tratamentunan?

¹⁰ Di e mesun manera, ansianonan por skucha un ruman ku ta spiritualmente enfermo i yuda kura su herida, na moda di papia ‘huntando e ku zeta den e nòmber di SEÑOR.’ (Lesa Santiago 5:​14 i 15.) Meskos ku ungwento di Galaad, e Palabra di Dios por aliviá e karné ku ta malu. (Jer. 8:22; Eze. 34:16) Aplikashon di prinsipio di Beibel por yuda un ruman spiritualmente débil rekobrá su ekilibrio spiritual. Sí, ora ansianonan tuma tempu pa tende e preokupashonnan di un karné enfermo i hasi orashon kuné, nan atenshon por surti un bon efekto.

No Obligá, Sino di Buena Gana

11. Kiko ta motivá ansianonan pa pastoriá e tou di Dios di buena gana?

¹¹ Siguientemente, Pedro ta kòrda e ansianonan kon nan tin ku hasi e trabou di pastoreo i kiko nan tin ku evitá. Ansianonan mester pastoriá e tou di Dios “no obligá, sino di buena gana.” Kiko ta motivá ansianonan pa sirbi nan rumannan di buena gana? Wèl, kiko a motivá Pedro pa pastoriá i alimentá e karnénan di Hesus? Un faktor klave tabata e amor i kariño ku e tabatin pa su Señor. (Juan 21:​15-17) Amor ta motivá ansianonan pa ‘no biba mas pa nan mes, ma pa esun ku a muri pa nan motibu.’ (2 Kor. 5:​14, 15) E amor akí, kombiná ku nan amor pa Dios i pa nan rumannan, ta impulsá nan pa sirbi e tou, usando nan tempu, rekurso i energia pa hasi esei. (Mat. 22:​37-39) Ansianonan ta duna di nan mes, no kontra nan smak, sino di buena gana.

12. Te na ki grado apòstel Pablo a duna di su mes?

¹² Te na ki grado ansianonan tin ku duna di nan mes? Den e trabou di kuida e karnénan, nan ta imitá apòstel Pablo, meskos ku Pablo a imitá Hesus. (1 Kor. 11:1) Debí na e amor ku Pablo i su kompañeronan tabatin pa e rumannan di Tesalónika, nan a kompartí gustosamente ‘no solamente e evangelio di Dios ku nan, ma tambe nan mes bida.’ I hasiendo esei, nan a bira kariñoso ku nan, “manera un mènchi ta kuida su mes yunan ku ternura.” (1 Tes. 2:​7, 8) Pablo tabata sa kiko un mènchi òf mama ta sinti pa su yunan. Lo e hasi tur loke ta nesesario pa nan; si mester, lanta meianochi mes pa duna nan lechi.

13. Ki balansa ansianonan tin ku mantené?

¹³ Un kos sí, ansianonan mester sòru di mantené un balansa entre nan responsabilidatnan komo wardadó i nan obligashonnan di famia. (1 Tim. 5:8) E tempu ku un ansiano ta dediká na kongregashon ta tempu balioso ku lo e por pasa ku su famia. Kon e por haña un balansa entre e dos responsabilidatnan akí? Por ehèmpel, e por invitá otro rumannan de bes en kuando na nan Adorashon Komo Famia. Pa hopi aña, Masanao, un ansiano di Hapon, tabata invitá rumannan soltero i famianan sin tata den sentido spiritual na su estudio di famia. Ku tempu, algun di e rumannan ku Masanao a yuda mes a bira ansiano i a imitá su ekselente ehèmpel.

Pastoriá e Tou ku Entusiasmo ​—No pa Ganashi Desonesto

14, 15. Pakiko ansianonan mester tene kuidou ku “amor pa ganashi desonesto,” i kon nan por imitá Pablo den esaki?

¹⁴ Pedro a animá e ansianonan tambe pa pastoriá e tou “no pa amor pa ganashi desonesto, sino ku entusiasmo.” Trabou di ansiano ta tuma hopi tempu, pero nan no ta ferwagt ningun pago. Pedro a mira e nesesidat pa spièrta su kompañeronan ansiano kontra e peliger di pastoriá e tou pa “amor pa ganashi desonesto.” E fenómeno ei ta bisto den e bida di luho ku lider religioso di ‘Babilonia e Grandi’ ta hiba miéntras ku hopi di nan siguidónan ta haña nan fòrsá ta biba den pobresa. (Rev. 18:​2, 3) Awe ansianonan tin bon motibu pa tene kuidou ku kualke tendensia ku ta bai den e direkshon ei.

¹⁵ Pablo a pone un bon ehèmpel pa ansiano kristian. Aunke e tabata un apòstel i por a bira “un karga” pa e kristiannan na Tesalónika, e “no a kome pan di ningun hende sin paga.” Al kontrario, el ‘a traha di dia i anochi.’ (2 Tes. 3:8) Hopi ansiano djawe, inkluso esnan ku ta den e trabou biahero, ta pone un ekselente ehèmpel den esaki. Aunke nan ta aseptá e hospitalidat di nan rumannan den fe, nan no ta pone “un karga” riba ningun di nan.​—1 Tes. 2:9.

16. Kiko ta nifiká pastoriá e tou “ku entusiasmo”?

¹⁶ Ansianonan ta pastoriá e tou “ku entusiasmo.” Nan entusiasmo ta bisto den e manera ku nan ta sakrifiká nan mes pa yuda e tou. Sinembargo, esei no ke men ku nan ta obligá e rumannan pa sirbi Yehova; ni nan no ta animá otro hende pa sirbi Dios ku un spiritu di kompetensia. (Gal. 5:26, NW) Ansianonan ta komprondé ku kada karné ta úniko. Ku amor i entusiasmo nan ta yuda nan rumannan sirbi Yehova ku goso.

Sea un Bon Ehèmpel i No Manda Riba e Tou

17, 18. (a) Dikon algun biaha e apòstelnan tabatin problema pa komprondé e siñansa di Hesus tokante humildat? (b) Den ki situashon similar nos por haña nos mes?

¹⁷ Manera nos a mira kaba, ansianonan mester kòrda ku e tou ku nan ta pastoriá ta di Dios, no di nan. Nan ta tene masha kuidou pa ‘no bira manera hende ku ta manda riba esnan ku ta propiedat di Dios.’ (Lesa 1 Pedro 5:3.b) E apòstelnan di Hesus mes a yega di hasi esfuerso pa sirbi otro, pero ku un motivashon inkorekto. Nan tabata aspirá un puesto di prominensia meskos ku e gobernantenan di e nashonnan.​—Lesa Marko 10:​42-45.

¹⁸ Awe, ta bon pa rumannan ku ta “aspirá na e puesto di ansiano” saminá nan mes pa wak ta kiko ta motivá nan pa hasi esfuerso pa sirbi. (1 Tim. 3:1) Esnan ku ta sirbiendo aktualmente komo ansiano tin ku puntra nan mes frankamente si tal bes nan deseo di sirbi ta pa haña outoridat òf prominensia manera algun di e apòstelnan tabata ke. Si e apòstelnan mes tabatin difikultat ku e punto akí, ansianonan por komprondé anto pakiko nan tin ku traha duru pa evitá kualke tendensia mundano di ke tin outoridat riba otro ruman.

19. Asta ora ansianonan tin ku tuma medida pa protehá e tou, kiko nan tin ku kòrda?

¹⁹ Ta bèrdat ku tin biaha ansianonan mester ta firme, por ehèmpel na momento ku nan tin ku protehá e tou kontra “lobo brabu.” (Echo. 20:​28-30) Pablo a bisa Tito pa sigui “ekshortá i reprendé ku tur outoridat.” (Tito 2:15) Ma asta ora nan tin ku tuma un medida asina kontra un ruman, nan ta hasi esfuerso pa trat’é ku dignidat. En bes di skual e, nan ta komprondé ku por lo general nan lo tin mas chèns di alkansá su kurason i motiv’é pa sigui un rumbo korekto ora nan ta papia kuné na un manera suave i konvinsente.

20. Kon ansianonan por imitá Hesus su bon ehèmpel?

²⁰ E bon ehèmpel di Kristu ta motivá ansianonan pa stima e tou. (Juan 13:​12-15) Ora nos lesa kon el a instruí su disipelnan den e trabou di prediká i hasi disipel, nos kurason ta yena di emoshon. Su ehèmpel di humildat a konmové su disipelnan i a motivá nan pa imit’é ku ‘humildat, konsiderando otronan mas importante ku nan mes.’ (Fil. 2:3) Meskos tambe, awe ansianonan ta sinti nan motivá pa sigui Hesus su ehèmpel, i nan, na nan turno, kier ta “ehèmpel pa e tou.”

21. Ki rekompensa ansianonan por spera di risibí?

²¹ Pedro a konkluí su spièrtamentu na e ansianonan halando atenshon na un promesa pa futuro. (Lesa 1 Pedro 5:4.) Ansianonan ungí “lo risibí e korona di gloria” huntu ku Kristu den shelu. Ansianonan ku ta pertenesé na e “otro karnénan” lo tin e privilegio di pastoriá e tou di Dios riba tera bou di gobernashon di “e wardador prinsipal.” (Juan 10:16) E siguiente artíkulo lo mustra nos kon miembronan di kongregashon por apoyá e rumannan nombrá pa dirigí e tou.

[Nota]

Komo Repaso

• Pakiko tabata na su lugá pa Pedro spièrta su kompañeronan ansiano pa pastoriá e tou di Dios ku ta bou di nan kuido?

• Kon ansianonan mester pastoriá e rumannan ku ta spiritualmente enfermo?

• Kiko ta motivá ansianonan pa pastoriá e tou di Dios ku ta bou di nan kuido?

[Plachi na página 25]

Meskos ku wardadó di karné di antigwedat, awe ansianonan mester protehá e “karnénan” ku ta bou di nan kuido