Bo Realmente Tin cu Pidi Dispensa?

‘MI NUNCA ta pidi dispensa,’ George Bernard Shaw a skirbi. ‘Loke a pasa, a pasa caba,’ otronan por bisa.

Tal bes nos mes no ta masha incliná pa admití un falta pa miedu di perde cara. Por sosodé cu nos ta hustificá nos mes cu e problema ta sinta cerca e otro persona. Of kisas nos ta intentá na pidi dispensa pero ta posponé esei te ora nos pensa cu e asuntu finalmente a ser pasá por haltu.

Pues, anto, pidimentu di dispensa ta esencial? E realmente por logra algu?

Amor Ta Obligá Nos pa Pidi Dispensa

Amor fraternal ta un marca di identificacion di Jesucristo su siguidornan berdadero. El a bisa: “Den esaki tur lo sa cu boso ta mi disipelnan, si boso tin amor entre boso.” (Juan 13:35) E Scritura ta urgi cristiannan pa “stima otro intensamente di curason.” (1 Pedro 1:22) Amor intenso ta obligá nos pa pidi dispensa. Pakico? Pasobra imperfeccion humano inevitablemente ta causa ofensanan cu ta reprimí amor si nan no ser curá.

Por ehempel, debí na diferencianan personal cu un persona den e congregacion cristian, nos por preferá di no papia cuné. Si ta nos a causa ofensa, con nos por restorá un relacion amoroso? Den mayoria caso, dor di pidi dispensa i despues haci e esfuerso pa combersá den un forma afectuoso. Nos debe nos compañeronan creyente amor, i ora nos bisa cu ta duel nos di a causa ofensa, nos ta paga algu dje debe ei.—Romanonan 13:8.

Pa ilustrá: Mari Carmen i Paqui ta dos señora cristian cu tabatin un amistad pa basta tempu. Sin embargo, pa motibu cu Mari Carmen a kere un of otro redu perhudicial, su amistad cu Paqui a fria. Sin splicacion, el a alehá completamente for di Paqui. Casi un aña despues Mari Carmen a haña sa cu e redu tabata falsu. Kico tabata su reaccion? Amor a conmov’é pa bai cerca Paqui i expresá humildemente cu e tabatin masha duele di a actua asina malu. Tur dos a cuminsá yora cuater-cuater, i nan ta fiel amiga desde e tempu ei.

Aunke nos kisas no ta sinti cu nos a haci algu malu, un dispensa por resolvé un malcomprendimentu. Manuel ta corda: “Hopi aña pasá ami i mi esposa e keda den e cas di un di nos rumannan muher spiritual miéntras cu e tabata den hospital. Nos a haci nos máximo esfuerso pa yuda e i su yunan durante su malesa. Pero despues cu el a regresá cas, el a reclamá cerca un amigu cu nos no a atendé su gastunan di cas corectamente.

“Nos a bishitá e ruman i a splik’é cu tal bes pa motibu cu nos ta yong i ta falta experencia, nos no a atendé cosnan manera e lo a haci. Mesora el a respondé bisando cu é tabata esun cu tabata debe nos i cu e tabata berdaderamente gradicidu pa tur loke nos a haci p’e. E problema a ser resolvé. E experencia ei a siñá mi e importancia di pidi pordon humildemente ora surgi malcomprendimentu.”

Jehova a bendicioná e pareha aki pa a mustra amor i ‘sigui tras di loke ta contribuí na pas.’ (Romanonan 14:19) Tambe amor ta enbolbé ser conciente dje sintimentunan di otro hende. Pedro ta consehá nos pa mustra “sintimentu di compañero.” (1 Pedro 3:8) Si nos tin sintimentu di compañero, ta mas probabel cu nos ta dicerní e dolor cu nos a causa dor di un palabra of accion sin pensa i nos lo ser impulsá pa pidi dispensa.

“Faha Boso Mes cu Humildad di Mente”

Asta fiel ancianonan cristian por tin un explosion di rabia de bes en cuando. (Compará cu Echonan 15:37-39.) Esakinan ta ocasionnan ora un dispensa lo ta masha beneficioso. Pero kico lo yuda un anciano of cualkier otro cristian cu ta haña ta difícil pa pidi dispensa?

Humildad ta e clave. Apostel Pedro a consehá: “Faha boso mes cu humildad di mente un pa cu otro.” (1 Pedro 5:5) Aunke ta cierto cu den mayoria disputa ámbos partido ta carga e culpa, e cristian humilde ta preocupá pa su mes fayonan i ta dispuesto pa admití nan.—Proverbionan 6:1-5.

Esun cu ta ricibí un dispensa mester aceptá esei den un forma humilde. Como ilustracion, laga nos suponé cu dos hende cu tin cu comunicá cu otro ta pará riba top di dos diferente ceru. Combersacion di un banda pa otro dje profundidad cu ta dividí nan ta resultá imposibel. Sin embargo, ora esun ta baha n’e vaye abou i e otro ta sigui su ehempel, nan por combersá cu otro fácilmente. Di igual manera, si dos cristian tin cu resolvé un desacuerdo entre nan, laga cada un topa e otro humildemente den e vaye, na moda di papia, i pidi dispensa apropiado.—1 Pedro 5:6.

Dispensa Ta Nificá Hopi den Matrimonio

Un matrimonio di dos hende imperfecto inevitablemente ta duna oportunidad pa pidi dispensa. I si tantu esposo como esposa tin sintimentu di compañero, esei lo impulsá nan pa pidi dispensa si nan a papia of actua cu falta di consideracion. Proverbionan 12:18 ta indicá: “Ta existí esun cu ta papia sin pensa manera e hincánan di un spada, pero e lenga dje sabínan ta un curacion.” ‘Hincánan sin pensa’ no por ser deshací, pero sí nan por ser curá dor di un dispensa sincero. Naturalmente, esaki ta rekerí pa continuamente nos ta conciente i haci esfuerso.

Papiando di su matrimonio, Susana ta bisa: “Ami cu Jackb tin 24 aña casá, pero ainda nos ta siña cosnan nobo tocante otro. Lamentablemente, algun tempu pasá, nos a separá i a biba for di otro pa algun siman. Sin embargo, nos a scucha n’e conseho bíblico for dje ancianonan i a bini huntu atrobe. Awor nos ta realisá cu ya cu nos tin personalidadnan masha diferente, conflictonan por presentá. Ora esaki sosodé, unbes nos ta pidi otro dispensa i realmente ta purba comprendé otro su punto di bista. Mi ta contentu pa bisa cu nos matrimonio a mehorá considerablemente.” Jack ta agregá: “Tambe nos a siña identificá e momentonan ora nos ta incliná pa rabia. Na oranan asina nos ta trata otro cu extra delicadesa.”—Proverbionan 16:23.

Bo mester pidi dispensa si bo pensa cu no ta abo tin falta? Ora sintimentunan profundo ta enbolbí, ta difícil pa ser obhetivo tocante na unda e culpa ta sinta. Pero e cos importante ta pas den e matrimonio. Tuma Abigail por ehempel, un muher israelita kende su esposo a trata David malu. Aunke e no por a ser culpá p’e stupides di su esposo, el a pidi dispensa. “Pordoná, por fabor e picá di bo esclaba,” el a roga. David a respondé dor di trat’é cu consideracion, admitiendo humildemente cu si no tabata pa Abigail, lo el a drama sanger inocente.—1 Samuel 25:24-28, 32-35.

Di igual manera, un muher cristian yamá June, cu tin 45 aña casá, ta sinti cu un matrimonio exitoso ta rekerí un buena gana pa ta e promé pa pidi dispensa. E ta bisa: “Mi ta bisa mi mes cu nos matrimonio ta mas importante cu mi sintimentunan como individuo. Pues ora mi pidi dispensa, mi ta sinti cu mi ta contribuyendo n’e matrimonio.” Un homber di edad yamá Jim ta declará: “Mi ta pidi mi casá dispensa asta pa cosnan insignificante. For di tempu cu el a haci un operacion serio, e ta pena masha lihé. Di manera cu regularmente mi ta pone mi brasa rond di dje i bisa, ‘Dispensá mi, dushi. No tabata mi intencion di poné bo rabia.’ Manera un mata cu a ser muhá, e ta haña bida inmediatamente.”

Si nos a ofendé e persona cu mas nos ta stima, un dispensa mesora ta masha eficas. Milagros ta totalmente di acuerdo, bisando: “Mi ta sufri di un falta di confiansa propio, i un palabra skerpi for di mi esposo ta molestiá mi. Pero ora e pidi dispensa, mi ta sintí mi mihó mesora.” E Scritura ta bisa nos apropiadamente: “Dichonan agradabel ta manera un panal di honing, dushi p’e alma i un curacion p’e wesunan.”—Proverbionan 16:24.

Practicá e Arte di Pidi Dispensa

Si nos hacié un custumber pa pidi dispensa ora ta necesario, probablemente nos lo haña cu hende lo respondé faborablemente. I tal bes nan asta lo pidi dispensa nan mes. Ora nos ta sospechá cu nos a pone un persona rabia, pakico no hacié un custumber pa pidi dispensa en bes di dedicá hopi tempu i esfuerso pa evitá di admití cualkier falta? E mundu por kere cu un dispensa ta un señal di debilidad, pero esei realmente ta duna evidencia di madures cristian. Naturalmente, nos lo no kier ta manera esnan cu ta reconocé un of otro fout pero ta minimisá nan responsabilidad. Por ehempel, nos sa pidi dispensa sin men e? Si nos ta yega lat i ta pidi masha dispensa, nos ta determiná pa mehorá nos puntualidad?

Pues, anto, nos realmente tin cu pidi dispensa? Sí, nos mester. Nos ta debe esei na nos mes i na otronan pa hacié. Un dispensa por yuda aliviá e dolor causá dor di imperfeccion, i e por cura relacionnan tenso. Cada dispensa cu nos pidi ta un les den humildad i ta entrená nos pa bira mas sensibel p’e sintimentunan di otro hende. Como resultado, compañeronan creyente, casánan i otronan lo mira nos como hende cu ta merecé nan cariño i confiansa. Nos lo tin pas mental i Jehova Dios lo bendicioná nos.

[Nota]

[Plachi na página 23]

Dispensa sincero ta promové amor cristian