Anciano, Huzga cu Husticia

“Ora boso ta tene un verhoring entre boso rumanan, boso mester huzga cu husticia.”—DEUTERONOMIO 1:16.

 1. Den e asunto di huzgamento, cua delegacion di autoridad a sosode, i kico esei ta indica pa huez humano?

COMO Huez supremo, Jehova Dios a delega autoridad hudicial na su Yiu. (Juan 5:27) En buelta, como Cabez dje congregacion cristian, Cristo ta usa e grupo di esclabo fiel i prudente i su Cuerpo Gobernante pa nombra anciano, cu aveces tin cu sirbi como huez. (Mateo 24:45-47; 1 Corintio 5:12, 13; Tito 1:5, 9) Como huez sustituto, eseinan ta bao di obligacion di sigi cu sumo cuidao ehempel dje Hueznan celestial, Jehova Dios i Cristo Jesús.

Cristo—Huez Ehemplar

2, 3. (a) Cua profecía mesiánico ta revela calidad di Cristo como Huez? (b) Cua punto specialmente ta merece atencion?

² E sigiente profecía tabata skirbí tocante Cristo como Huez: “E spiritu di Jehova mester baha riba dje, e spiritu di sabiduría i di comprendimento, e spiritu di conseho i di fortaleza, e spiritu di conocimento i dje temor di Jehova; i lo tin disfrute via dje den e temor di Jehova. I lo e no huzga via gewoon aparencia di cosnan na su wowo, ni reprende simplemente segun loke su orea ta tende. I cu husticia e mester huzga hende humilde, i cu rectitud e mester duna reprendimento na fabor di hende manso dje tera.”—Isaías 11:2-4.

³ Ripara calidad den e profecía cu ta capacita Cristo pa “huzga e tera habitá den husticia.” (Echo 17:31) E ta huzga di acuerdo cu e spiritu, sabiduría divino, comprendimento, conseho, i conocimento di Jehova Dios. Ripara, també, cu e ta huzga den temor di Jehova. Pues, e “tribunal di Cristo” ta representa e “tribunal di Dios.” (2 Corintio 5:10; Romano 14:10) E ta percura cuidadosamente pa huzga asuntonan di igual manera cu Dios ta húzganan. (Juan 8:16) E no ta huzga simplemente via aparencia ni via simplemente rumor. E ta huzga cu rectitud na fabor di hende manso i humilde. Ki un Huez maraviyoso! I ki un ehempel maraviyoso pa hende imperfecto cu ta ser yamá pa sirbi den un capacidad hudicial den e dia djawe!

Huez terrenal

 4. (a) Menciona un funcion dje 144.000 durante e Reino di mil aña di Cristo. (b) Cua profecía ta mustra cu algun cristian ungí lo ser nombrá como huez mientras cu nan ta riba tera ainda?

⁴ E Scritura ta indica cu e grupo basta chikito di cristian ungí, cuminzando cu e 12 apóstol, lo ser huez asociá cu Cristo Jesús durante e mil aña. (Lucas 22:28-30; 1 Corintio 6:2; Revelacion 20:4) Asta un resto di miembro ungí di Israel spiritual riba tera tabata huzgá i restorá na 1918-1919. (Malaquías 3:2-4) Tabata profetizá tocante tal restoracion di Israel spiritual: “Lo mi trece huez bek atrobé pa boso mescos cu na principio, i consehero pa boso mescos cu na comienzo.” (Isaías 1:26) Asina, mescos cu “na comienzo” di Israel carnal, Jehova a duna huez i consehero husto ne resto restorá.

 5. (a) Ken tabata “poní como huez” despues di restoracion di Israel spiritual, i con nan ta ser pintá den e buki di Revelacion? (b) Ken ta yuda superintendente ungí awor den e trabao hudicial, i di ki manera eseinan ta ser entrená pa ser mihor huez?

⁵ Na principio, tur ‘sabí’ cu tabata “poní como huez” tabata homber di mayor edad, of anciano ungí. (1 Corintio 6:4, 5) Superintendente ungí, fiel i respetá, ta ser pintá den e buki di Revelacion como tení den e man drechi di Jesús, es decir, bao di su control i direccion. (Revelacion 1:16, 20; 2:1) Desde 1935 e ungínan a recibi e apoyo leal di un semper aumentante “multitud grandi,” cu tin e speranza di sobrebiba e “tribulacion grandi” i biba pa semper riba un tera paradísico. (Revelacion 7:9, 10, 14-17) Mientras cu e “casamento dje Lamchi” ta yega cerca, mas i mas di eseinan ta ser nombrá pe Cuerpo Gobernante ungí pa sirbi como anciano i huez den mas cu 66.000 congregacion di Testigo di Jehova den tur e mundo.a (Revelacion 19:7-9) Pa medio di scol special, nan ta ser entrená pa cumpli cu responsabilidad den e sociedad dje “tera nobo.” (2 Pedro 3:13) E Scol di Ministerio di Reino, celebrá cerca e fin di 1991 den hopi país, a duna énfasis na huzgamento correcto di caso hudicial. Anciano cu ta sirbi como huez tin e deber di imita Jehova Dios i Cristo Jesús, kende nan huicio ta husto i berdadero.—Juan 5:30; 8:16; Revelacion 19:1, 2.

Huez cu ta ‘Comportánan cu Temor’

 6. Pakico anciano cu ta sirbi den comité hudicial mester ‘comportánan cu temor’?

⁶ Si Cristo mes ta huzga den temor di Jehova i cu e yudanza di Su spiritu, cuanto mas anciano imperfecto mester haci esei! Ora nan ta ser asigná pa sirbi den un comité hudicial, nan tin cu ‘comportánan cu temor,’ inbocando e “Tata cu ta huzga sin distincion” pa yúdanan huzga cu rectitud. (1 Pedro 1:17) Nan mester corda cu nan ta trata cu e bida di hende, cu nan “alma,”manera esnan cu “tin cu rindi cuenta.” (Hebreo 13:17) Den bista di esei, siguramente nan també ta keda responsabel dilanti Jehova Dios pa cualkier equibocacion hudicial evitable cu nan por haci. Den su comentario riba Hebreo 13:17, J. H. A. Ebrard a skirbi: “E deber di wardador ta di vigila alma confiá na nan cuido, i . . . nan mester rindi cuenta di nan tur, di esnan també cu a ser perdí debí na nan falta. Esei ta un palabra solem. Laga cada predicador dje palabra tuma na cuenta, cu nan boluntariamente a acepta tal puesto di responsabilidad [formidable].”—Compara cu Juan 17:12; Santiago 3:1.

 7. (a) Kico huez djawe mester corda, i kico mester ta nan doel? (b) Cua les anciano mester saca for di Mateo 18:18-20?

⁷ Anciano cu ta sirbi den puesto hudicial mester corda cu e berdadero Huez di cada caso ta Jehova Dios i Cristo Jesús. Corda loke tabata bisá na huez di Israel: “No ta pa hende cu boso ta huzga sino ta pa Jehova; i e ta cu boso den e asunto di huzga. I awor laga e temor di Jehova yega di ser riba boso. . . . Asina boso mester haci pa boso no bira culpable.” (2 Crónica 19:6-10) Cu temor reverencial, anciano huzgando un caso mester haci nan posibel pa keda sigur cu Jehova realmente ta ‘cu nan den e asunto di huzgamento.’ Nan decision mester refleha cu exactitud e manera cu Jehova i Cristo ta considera e asunto. Loke nan simbólicamente ta ‘mara’ (haya culpable) of ‘los’ (haya inocente) riba tera mester ta loke a ser mará of gelós caba den cielo—cu ta ser revelá den loke ta pará skirbí den e Palabra inspirá di Dios. Si nan ta pidi Jehova den e nomber di Jesús, Jesús lo ser “hunto cu nan” pa yúdanan. (Mateo 18:18-20, nota; E Toren di Vigilancia, Juli, 1991, bladji 9) E ambiente den verhoring hudicial mester mustra cu Cristo en berdad ta hunto cu nan.

Wardador di Tempo Completo

 8. Cua ta e mayor responsabilidad di anciano en cuanto e tao, segun ehempel di Jehova i Jesucristo? (Isaías 40:10, 11; Juan 10:11, 27-29)

⁸ Anciano no ta huzga tur ora. Nan sí ta wardador tur ora. Nan ta curador, i no castigador. (Santiago 5:13-16) E idea básico dje palabra griego pa superintendente ­(e·piʹsko·pos) kier men cuido protectivo. E diccionario, Theological Dictionary of the New Testament, ta bisa: “Complementando wardador [den 1 Pedro 2:25], e palabra [e·piʹsko·pos] ta sugeri e trabao di pastoreá of vigila of warda.” Sí, nan responsabilidad primario ta di vigila e carnénan i wárdanan, mantenénan den e tao.

9, 10. (a) Con Pablo a enfatizá e promé deber di anciano, pues cua pregunta por ta wel hací? (b) Kico e palabra di Pablo den Echo 20:29 ta indica, pues con anciano por purba di reduci e cantidad di caso hudicial?

⁹ Papiando cu anciano dje congregacion di Efeso, apóstol Pablo a pone énfasis unda e mester tá: “Presta atencion na boso mes i na tur e tao, den locual e spiritu santo a nombra boso superintendente, pa pastoreá e congregacion di Dios, cu el a cumpra cu e sanger di su mes Yiu.” (Echo 20:28) Pablo a enfatiza pastoreamento, i no castigamento. Ta bon pa algun anciano medita riba e sigiente pregunta: ‘Nos por spaar e gran cantidad di tempo necesario pa investiga i huzga caso hudicial si nos ta dedica mas tempo i esfuerzo na pastoreamento?’

¹⁰ Ta cierto cu Pablo a duna spiertamento contra “lobo opresivo.” Pero, e no a reprende eseinan pasobra nan ‘no a trata e tao cu ternura’? (Echo 20:29) I ora el a indica cu fiel superintendente mester expulsa tal “lobo,” su palabra no ta mustra cu anciano mester trata otro miembro dje tao “cu ternura”? Ora un carné ta bira swak spiritualmente i ta cai cant’i camina, kico e mester—un zota of curacion, un castigo of pastoreamento? (Santiago 5:14, 15) P’sei anciano mester aparta tempo regularmente pe trabao di pastoreá. Esei por duna e resultado feliz di dedica menos tempo na caso hudicial cu ta ocupa hopi tempo enbolbiendo hende cristian cu picá a alcanza. Siguramente, e interés principal di anciano mester ta pa percura un fuente di alivio i refrescamento, i asina promove paz, trankilidad, i siguridad den e pueblo di Jehova Dios.—Isaías 32:1, 2.

Sirbiendo como wardador i huez beneficioso

11. Pakico anciano cu ta sirbi den comité hudicial tin mester di imparcialidad i e “sabiduría djariba”?

¹¹ Mas pastoreamento intensivo promé cu un cristian ta dal un paso falso por wel reduci e cantidad di caso hudicial den e pueblo di Jehova Dios. (Compara cu Galatio 6:1.) No obstante, debí na picá i imperfeccion humano, superintendente cristian de bez en cuando por tin cu trata cu caso di malecho. Cua principio mester guíanan? Eseinan no a cambia desde e tempo di Moisés ni e tempo di cristian di promé. E palabra di Moisés dirigí na huez di Israel ta válido ainda: “Ora boso ta tene un verhoring entre boso rumanan, boso mester huzga cu husticia . . . Boso no mag haci distincion den huzgamento.” (Deuteronomio 1:16, 17) Imparcialidad ta un característica dje “sabiduría djariba,” e sabiduría cu ta tanto vital pa anciano cu ta sirbi den comité hudicial. (Santiago 3:17; Proverbio 24:23) Tal sabiduría por yúdanan distingi e diferencia entre debilidad i maldad.

12. Den cua sentido huez tin cu ser no solamente homber husto sino també bon hende?

¹² Anciano “mester huzga cu husticia,” di acuerdo cu norma di Jehova di loke ta bon i malu. (Salmo 19:9) Sin embargo, mientras cu anciano ta haci esfuerzo di ser hende husto, nan també mester purba di ser bon hende, den e sentido dje distincion cu Pablo a haci den Romano 5:7, 8. Comentando riba e texto den su artículo tocante “Husticia,” e buki Insight on the Scriptures ta bisa: “Uso dje palabra griego ta mustra cu hende notable pa nan bondad, of cu tin e distincion di ser bondadoso, ta un persona bondadoso (dispuesto pa haci bon of ser beneficioso pa otro hende) i caritativo (activamente expresando tal bondad). Nan no ta simplemente interesá den hacimento di loke husticia ta exigi sino ta bai mas ayá cu esei, siendo motivá pa un consideracion saludable pa otro hende i un deseo pa beneficiánan i yúdanan.” (Volumen 2, bladji 809) Anciano cu no ta solamente husto sino també ta bon, ta trata malechor cu consideracion bondadoso. (Romano 2:4) Nan tin cu deseá di mustra misericordia i compasion. Nan mester haci loke nan por pa yuda malechor mira e necesidad di arrepenti, aunque na principio ta parce cu nan no ta reacciona na nan esfuerzo.

Actitud correcto durante verhoring

13. (a) Ora anciano ta sirbi como huez, nan no ta kita di ser kico? (b) Cua conseho di Pablo ta aplica també den verhoring hudicial?

¹³ Ora un situacion ta exigi un verhoring hudicial, anciano no mag lubida cu nan ta wardador ainda, tratando cu carné di Jehova, bao dje “wardador excelente.” (Juan 10:11) E conseho di Pablo pa duna yudanza regularmente ne carnénan cu ta den dificultad ta aplica cu e mesun forza den verhoring hudicial. El a skirbi: “Rumanan, aunque un homber ta dal un paso falso promé cu e sa, boso cu tin e debida calidad spiritual purba di reahusta homber asina cu un spiritu di suavidad, vigilando bo mes, pa miedu cu bo mes lo ser tentá. Sigi hiba e carga un di otro, i asina cumpli cu e ley di Cristo.”—Galatio 6:1, 2.b

14. Con superintendente mester considera verhoring hudicial, i cua actitud nan mester tene en cuanto malechor?

¹⁴ En bez di considera nan mes di ser huez superior cu ta reuni pa duna castigo, anciano cu ta sirbi den comité hudicial mester considera e verhoring como un otro aspecto di nan trabao di pastoreá. Un carné di Jehova Dios ta den dificultad. Kico nan por haci pa scapé? Ta mucho laat pa yuda e ­carné cu a dwal for dje tao? Nos ta spera cu no. Anciano mester mantene un punto di bista positivo respecto demonstracion di misericordia unda cu esei ta apropiado. Esei no kier men cu nan mester rebaha norma di Jehova si tabatin comision di un picá serio. Pero, nan cordamento di circunstancia debilitador por yúdanan extende misericordia ora esei ta posibel. (Salmo 103:8-10; 130:3) Lastimamente, algun malechor ta asina obstiná den nan actitud cu anciano ta keda obligá di demonstra firmeza, pero nunca severidad.—1 Corintio 5:13.

E propósito di verhoring hudicial

15. Ora problema serio ta presenta entre hende, kico mester ta determiná promé?

¹⁵ Ora un problema serio ta presenta entre dos persona, anciano sabí ta determina promé si esnan enbolbí a purba di decidi e asunto na privá, cu e spiritu di Mateo 5:23, 24 of Mateo 18:15. Si esei no a logra, kizás e conseho di un of dos anciano ta suficiente. Accion hudicial ta necesario solamente si nan a comete un picá grosero cu por resulta den expulsion. (Mateo 18:17; 1 Corintio 5:11) Mester tin un base bíblico firme pa forma un comité hudicial. (Mira E Toren di Vigilancia di Mart, 1990, bladji 24.) Den e formacion dje comité, scoge anciano cu e mihor calificacion pe caso particular.

16. Kico anciano ta purba di logra via verhoring hudicial?

¹⁶ Kico anciano ta purba di logra durante verhoring hudicial? Promé, ta imposibel pa huzga cu husticia amenos cu nan ta conoce e berdad. Mescos cu den Israel, asunto serio mester ta ‘investigá cabalmente.’ (Deuteronomio 13:14; 17:4) Pues, un doel di verhoring ta di conoce echo dje caso. Nan por haci esei i mester hacié cu amor. (1 Corintio 13:4, 6, 7) Despues di conoce tur echo, anciano por haci tur loke ta necesario pa proteha e congregacion i mantene den dje norma halto di Jehova Dios i e obramento liber di su spiritu. (1 Corintio 5:7, 8) Sin embargo, un propósito di verhoring ta di salba, si di cualkier manera posibel, un pecador den peliger.—Compara cu Lucas 15:8-10.

17. (a) Con un persona acusá mester ta tratá durante un verhoring, i pa ki propósito? (b) Esei ta exigi kico di parti di miembro dje comité hudicial?

¹⁷ Persona acusá mester ta semper tratá como un carné di Dios. Nan mester ta tratá cu ternura. Si nan a comete un picá (of picánan), e propósito di huez husto ta di yuda e pecador reahusta, comprende e error di su camina, arrepenti, i asina ser rancá for di “laz di Diabel.” Esei ta exigi e “arte di siña,” “instruyendo cu suavidad.” (2 Timoteo 2:24-26; 4:2) Kico nan ta haci si e pecador ta reconoce cu el a peca, tin berdadero duele den su curazón, i ta pidi pordón di Jehova? (Compara cu Echo 2:37.) Si e comité ta keda convencí di cu e sinceramente ta deseá yudanza, generalmente no tin mester di expulsé.—Mira E Toren di Vigilancia di Juli, 1983, bladji 31, paragraf 4.

18. (a) Na ki tempo un comité hudicial ta demonstra firmeza den e scomulgacion di malechor? (b) Den bista di cua situacion kibrador di curazón anciano mester haci esfuerzo na fabor di carné gedwal?

¹⁸ En cambio, ora miembro dje comité hudicial ta ser confrontá cu un caso claro di apostasía sin arrepentimento, rebelion boluntario contra e ley di Jehova Dios, of puro maldad, nan tin deber di proteha otro miembro dje congregacion, expulsando e ofensor cu no a arrepenti. E comité hudicial no ta keda obligá di reuni bez tras bez cu e malechor ni pone palabra den su boca, haciendo esfuerzo di obligué di arrepenti, si ta keda bisto cu e no ta sinti duele piadoso.c Den añanan reciente, scomulgacion mundialmente ta aproximadamente 1 porciento di publicadornan. Esei kier men cu di rond di cada cien carné cu ta permanece den e tao, uno ta bai perdí—por lo menos temporalmente. Tumando na cuenta e tempo i esfuerzo necesario pa trece un hende den e curá, no ta kibra bo curazón pa sa cu diez di miles ta ‘entregá na Satanás’ tur aña?—1 Corintio 5:5.

19. Kico anciano cu ta sirbi den comité hudicial no mag lubida nunca, pues, kico mester ta nan doel?

¹⁹ Anciano cu ta cuminza riba un caso hudicial mester corda cu casi tur caso di picá den e congregacion ta enbolbe debilidad, i no maldad. Nan no mester lubida nunca e comparacion di Jesús dje carné perdí, locual el a conclui cu e palabra: “Mi ta bisa boso cu asina lo tin mas gozo den cielo pa un pecador cu ta arrepenti cu pa nobentinuebe hustonan cu no tin mester di arrepentí.” (Lucas 15:7) Berdaderamente, “Jehova . . . no kier pa ningun ser destruí sino ta deseá pa tur alcanza arrepentimento.” (2 Pedro 3:9) Cu e yudanza di Jehova Dios, laga comité hudicial den tur e mundo haci nan posibel pa causa gozo den cielo, yudando malechor mira e necesidad di arrepenti i pone nan pia di nobo den e camina smal cu ta hiba na bida eterna.—Mateo 7:13, 14.

[Nota]

Pregunta di repaso

◻ Den sigimento di ehempel dje Gran Wardador i e Wardador Excelente, kico mester ta e interés principal di anciano?

◻ Di ki manera anciano por haci esfuerzo pa reduci e cantidad di caso hudicial?

◻ Den ki sentido huez mester ta no ­solamente husto sino també bon?

◻ Con malechor mester ta tratá durante verhoring, i pa cua propósito?

◻ Pakico scomulgacion ta e último recurso?

[Plachi na página 16]

Ta posibel pa evita hopi caso hudicial ora pastoreamento di antemano ta ser hací

[Plachi na página 18]

Asta durante un verhoring hudicial, anciano mester purba di reahusta un malechor cu un spiritu di suavidad