Ken Realmente Tin e Yamada Celestial?

JEHOVA DIOS ta stima e raza humano. Sí, su amor ta asina grandi cu el a duna su Yiu, Jesucristo, como rescate pa rescata loke nos antepasado Adam a perde! I kico esei tabata? Bida humano perfecto i eterno cu tur derecho i prospecto di dje. (Juan 3:16) E rescate també tabata un expresion dje amor di Jesús pa humanidad.—Mateo 20:28.

Amor divino a ser desplegá den e introduccion di dos speranza cu Dios a duna, fundá ariba e mérito dje sacrificio di rescate di Jesús. (1 Juan 2:1, 2) Promé cu Jesús a muri como hende, e único speranza disponibel pa hende cu tin e aprobacion divino tabata e speranza di bida den Paradijs riba e tera. (Lucas 23:43) Sin embargo, despues di Pentecoste di aña 33 EC, Jehova Dios a duna un speranza celestial na un “trupa chikito.” (Lucas 12:32) Pero, kico a pasa den tempo mas reciente? Desde 1931 e mensahe di Reino a enfoca mas atencion riba e “otro carnénan,” i desde 1935 padilanti Dios ta atraé “un multitud grandi” di tal hende semehante di carné na su mes mediante Cristo. (Juan 10:16; Revelacion 7:9) Dios a pone den nan curazón e speranza di bida eterna den un Paradijs terrenal. Nan kier come cuminda perfecto, tene dominio amoroso riba bestia, i disfruta di asociacion cu otro hende husto pa semper.

Sacerdote i Rey Compasivo

Siendo cu amor a conmove Jesús pa duna su bida como un rescate, siguramente lo e ser un Rey celestial compasivo. Pero, Jesús lo no ta so lantando humanidad te na perfeccion durante su Reino di mil aña. Jehova Dios a haci percuracion pa otro rey compasivo den cielo. Sí, “nan lo ser sacerdote di Dios i di Cristo, i lo reina como rey cuné pe mil aña.”—Revelacion 20:1-6.

Cuanto cogobernante Cristo lo tin, i con nan ta ser escogí pa un privilegio asombroso asina? Wel, apóstol Juan a mira 144.000 riba e Ceru di Sion celestial hunto cu e Lamchi, Jesucristo. Ya cu nan ta “cumprá for di den humanidad,” nan sa kico kier men experimenta prueba, wanta e carga di imperfeccion, sufri, i muri como hende. (Revelacion 14:1-5; Job 14:1) P’sei, ki rey i sacerdote compasivo nan por tá!

Testimonio dje Spiritu

E 144.000 “tin un ungimento dje santo,” Jehova Dios. (1 Juan 2:20) Esei ta un ungimento pa un speranza celestial. Dios a ‘pone su seyo riba nan i a dúnanan un muestra di loke lo bini, esta, e spiritu den nan curazón.’—2 Corintio 1:21, 22.

Sí, hende cu tin e yamada celestial tin e testimonio dje spiritu di Dios como evidencia. Pablo a skirbi tocante esei den Romano 8:15-17: “Boso no a recibi un spiritu di sclabitud cu ta causa miedu di nobo, sino boso a recibi un spiritu di adopcion como yiu, cu cua spiritu nos ta sclama: ‘Abba, Tata!’ E spiritu mes ta duna testimonio cu nos spiritu cu nos ta yiu di Dios. Pues, anto, si nos ta yiu, nos també ta heredero: heredero en berdad di Dios, pero coheredero cu Cristo, con tal cu nos ta sufri hunto pa nos també ser glorificá hunto.” Ta pa medio dje spiritu, of forza activo, di Dios cu esnan ungí ta sclama, “Abba, Tata!”

Evidencia principal di cu un persona a ser ungí pe yamada celestial ta un spiritu, of sintimento dominante di ser yiu. (Galatio 4:6, 7) Tal persona ta absolutamente sigur cu nan a ser engendrá pa Dios pa ser yiu spiritual como uno dje 144.000 coheredero dje Reino celestial. Nan por duna testimonio di cu nan speranza celestial no ta nan mes deseo of imaginacion cu nan a cultivá; mas bien, esei ta bini di Jehova Dios como resultado dje accion di e spiritu di Dios pa cu nan.—1 Pedro 1:3, 4.

Bao di influencia dje spiritu santo di Dios, e spiritu, of actitud dominante, di esnan ungí ta sirbi como un forza impulsivo. E ta impulsánan pa responde positivamente na loke e Palabra di Dios ta bisa tocante e speranza celestial. També, nan ta responde na moda positivo ne tratamento di Jehova Dios cu nan pa medio dje spiritu santo. Pues, nan ta keda sigur cu nan ta yiu i heredero spiritual di Dios.

Ora esnan ungí ta leza loke e Palabra di Dios ta bisa tocante su yiunan spiritual i nan speranza celestial, nan inclinacion espontáneo ta di bisa den nan mes , ‘Esei kier men ami!’ Sí, nan ta responde gozosamente ora e Palabra dje Tata ta priminti un recompensa celestial. Nan ta bisa, ‘Esei kier men ami!’ ora nan ta leza : “Stimánan, awor nos ta yiunan di Dios.” (1 Juan 3:2) I ora esnan ungí ta leza cu Dios a produci hende “pa ser cierto promé fruta di su criaturanan,” nan inclinacion mental ta di responde, ‘Sí, el a producími pa tal propósito.’ (Santiago 1:18) Nan sa cu nan a ser “bautizá den Cristo Jesús” i den su morto. (Romano 6:3) Pues, nan tin e conviccion firme di ser un parti dje curpa spiritual di Cristo i ta cultiva e speranza di experimenta un morto mescos cuné i ser resusitá na bida celestial.

Pe ungínan hereda e Reino celestial, nan mester ‘haci lo sumo posibel pa haci nan yamamento i scogimento sigur.’ (2 Pedro 1:5-11) Nan ta camna pa medio di fe i ta sigi crece spiritualmente, mescos cu hende cu e speranza terrenal. Pues, kico mas tin den e testimonio dje spiritu?

Pakico Nan ta Participa

Cristian ungí no kier bai cielo debí na un malcontentamento cu e bida terrenal actual. (Compara cu Hudas 3, 4, 16.) Mas bien, e spiritu santo ta duna testimonio cu nan spiritu cu nan ta yiu di Dios. Nan ta sigur també cu nan a ser aceptá den e pacto nobo. E dos partido den e pacto ta Jehova Dios i Israel spiritual. (Jeremías 31:31-34; Galatio 6:15, 16; Hebreo 12:22-24) E pacto, poní na vigor cu e sanger dramá di Jesús, ta saca un pueblo pe nomber di Jehova i ta haci tal cristian ungí un parti dje “simía” di Abraham. (Galatio 3:26-29; Echo 15:14) E pacto nobo ta sigi funciona te cu tur israelita spiritual ta ser resusitá na bida inmortal den cielo.

Además, esnan cu berdaderamente tin e yamada celestial no tin duda di cu nan també ta den e pacto pe Reino celestial. Jesús a referi ne pacto entre su mes i sigidor di dje ora el a bisa: “Boso ta esnan cu a permanece cu mi den mi prueba; i mi ta cera un pacto cu boso, net manera mi Tata a cera un pacto cu mi, pa un reino, pa boso come i bebe na mi mesa den mi reino, i sinta riba trono pa huzga e diesdos tribu di Israel.” (Lucas 22:28-30) E pacto tabata inaugurá pa cu disípel di Jesús ora nan tabata ungí cu e spiritu santo riba e dia di Pentecoste di aña 33 EC. E ta keda na vigor entre Cristo i rey socio di dje pa semper.—Revelacion 22:5.

Hende cu tin e yamada celestial ta positivo cu nan ta den e pacto nobo i e pacto pa un Reino. P’sei, nan ta participa correctamente di emblema dje pan i biña na conmemoracion anual dje Cena di Señor, of e Memorial dje morto di Jesucristo. E pan sin zuurdeeg ta simboliza e curpa humano di Jesús sin picá, i e biña ta su sanger perfecto dramá den morto i cu ta validá e pacto nobo.—1 Corintio 11:23-26.

Si Jehova Dios a cultiva den bo e speranza innengable dje bida celestial, bo ta conta riba esei. Bo ta ofrece oracion pa expresa tal speranza. Esei ta absorbébo, i bo no por kité for di bo pensamento. Bo tin aspiracion spiritual consumidor. Pero, si bo ta partí i insigur, anto siguramente bo no mester participa di emblema di Cena di Señor.

Pakico un Conclusion Incorrecto?

Algun por participa incorrectamente di emblema di Memorial pasobra nan realmente no ta reconoce cu ungimento “ta depende, no di esun cu kier ni di esun cu ta corre, sino di Dios.” (Romano 9:16) No ta pe persona decidi cu lo e gusta aceptacion den e pacto nobo i bira coheredero cu Cristo den e Reino celestial. Loke Jehova Dios ta scoge ta loke ta conta. Den Israel di antigua, Dios a scoge hende cu a sirbi como sacerdote di dje, i el a duna e castigo di morto na Coré pa su halzamento den buscamento dje sacerdocio establecí divinamente den e famía di Arón. (Éxodo 28:1; Número 16:4-11, 31-35; 2 Crónica 26:18; Hebreo 5:4, 5) Di igual manera, ta desagrada Jehova Dios si un persona ta presenta su mes como uno yamá pa ser hunto cu rey i sacerdote celestial ora Dios no a duné un yamada asina.—Compara cu 1 Timoteo 5:24, 25.

Un hende por haci equibocacion di sopone cu e tin e yamada celestial pa motibo di emocion fuerte presentando for di problema severo. E morto di su casá of un otro tragedia por haci un hende perde interés den bida riba tera. Of un socio íntimo por bisa cu e ta dje ungínan, i e persona por deseá e mesun destino. Tal factor por hacié kere cu bida den cielo ta pe. Pero, esei no ta e manera cu Dios ta duna hende e spiritu di ser yiu. Si un persona a deseá di bai cielo debí na situacion indeseabel of angustia emocional relacioná cu bida terrenal, esei ta mustra un falta di gratitud pe propósito di Dios pa cu e tera.

Punto di bista religioso di antes també por haci hende conclui incorrectamente cu nan tin e yamada celestial. Kizás na antes e tabata asociá cu un religion falso cu a ofrece bida celestial como e único speranza pa hende fiel. P’sei, hende cristian tin cu vigila contra influencia di emocion i punto di bista incorrecto di pasado.

Un Examinacion Cuidadoso ta Vital

Apóstol Pablo a siña un punto mashá significante ora el a skirbi: “Ken cu ta come e pan of ta bebe e copa di Señor indignamente lo ser culpable respecto e curpa i sanger di Señor. Promé, laga un hende aproba su mes despues di scudriñamento, i asina lagué come dje pan i bebe dje copa. Pasobra ken cu ta come i ta bebe ta come i ta bebe huicio contra su mes si e no ta distingi e curpa.” (1 Corintio 11:27-29) P’sei, un cristian bautizá cu den añanan reciente ta cuminza kere cu el a recibi e yamada celestial mester pensa e asunto mashá cuidadosamente i cu oracion.

Hende asina també por puntra su mes: ‘Otro hende a influenciámi pa mi cultiva e idea di bida celestial?’ Esei ta incorrecto, pasobra Dios no a asigna ningun hende pa recluta otronan pa tal privilegio. Un tendencia den direccion di fantasía no ta un indicacion di ungimento di Dios, ni e no ta ungi heredero di Reino haciendo nan tende boz cu mensahe tocante esei.

Algun hende por puntra nan mes: ‘Promé cu mi a bira cristian, mi tabata enbolbí den abuso di droga? Mi ta usa medicina cu ta afecta emocion? Mi a recibi tratamento pa problema mental of emocional?’ Algun hende a bisa cu na principio nan a bringa contra loke nan a kere tabata e speranza celestial. Otronan a bisa cu pa un tempo Dios a kita nan speranza terrenal i finalmente a dúnanan e speranza celestial. Pero, tal proceder ta contrario cu tratamento divino. Además, fe no ta insigur; e ta sigur.—Hebreo 11:6.

Hende por puntra nan mes també: ‘Mi ta deseá prominencia? Mi ta ambicioso pa un puesto di autoridad awor of como rey i sacerdote den asociacion cu Cristo?’ Den e promé siglo EC, ora un invitacion general a sali pa busca entrada den e Reino celestial, tur cristian ungí no a ocupa puesto di responsabilidad como miembro dje cuerpo gobernante ni como anciano of sirbidor ministerial. Hopi tabata hende muher, i nan no tabatin ningun autoridad special; ni ungimento cu e spiritu ta duna comprendimento extraordinario dje Palabra di Dios, pasobra Pablo a haya cu tabata necesario pa instrui i conseha cierto hende ungí. (1 Corintio 3:1-3; Hebreo 5:11-14) Esnan cu tin e yamada celestial no ta considera nan mes como hende prominente, ni no ta hala atencion na nan mes como hende ungí. Mas bien, nan ta manifesta e humildad sperá hustamente di esnan cu “tin e mente di Cristo.” (1 Corintio 2:16) També, nan ta comprende cu tur hende cristian mester cumpli cu tur requisito husto di Dios, sea cu nan speranza ta celestial of terrenal.

Bisando cu nan a haya un yamada celestial no ta resulta den revelacion special pa un persona. Dios tin un canal di comunicacion mediante locual e ta percura alimento spiritual pa su organizacion terrenal. (Mateo 24:45-47) Pues, ningun hende mester kere cu ya cu e ta un cristian ungí, esei ta duné sabiduría superior cu e sabiduría dje “multitud grandi” cu tin e speranza terrenal. (Revelacion 7:9) Ungimento cu e spiritu no ta ser indicá via dunamento di testimonio mas efectivo, contestá pregunta bíblico, of dunamento di discurso bíblico, pasobra hende cristian cu e speranza terrenal també ta haci mashá bon den tur esei. Mescos cu hende ungí, nan també ta hiba un bida cristian ehemplar. En cuanto esei, Samsón i otro hende di tempo pre-cristian tabatin e spiritu di Dios i tabata yená cu celo i comprendimento. Sin embargo, ningun hende dje ‘nubia grandi di testigonan’ tabatin e speranza celestial.—Hebreo 11:32-38; 12:1; Éxodo 35:30, 31; Huez 14:6, 19; 15:14; 1 Samuel 16:13; Ezekiel 2:2.

No Lubida ken ta Haci e Scogimento

Si un otro hende creyente ta puntra tocante e yamada celestial, un anciano nombrá of otro cristian maduro por considera e asunto cuné. Pero, un persona no por tuma tal decision pa un otro, i Jehova Dios mes ta esun cu ta duna e speranza celestial. Un persona cu berdaderamente tin e yamada celestial nunca tin cu puntra un otro cristian si e tin tal speranza. Esnan ungí “a wordu duná un nacimento nobo, no di simía corruptible, sino di simía reproductivo incorruptible, mediante e palabra di e Dios bibo i duradero.” (1 Pedro 1:23) Usando su spiritu i Palabra, Dios ta planta e “simía” cu ta haci hende un “creacion nobo,” cu un speranza celestial. (2 Corintio 5:17) Sí, Jehova Dios ta haci e scogimento.

Pues, ora nos ta studia e Bijbel cu hende nobo, no ta bon pa sugeri pa nan purba di decidi si nan tin e yamada celestial. Pero, kico ta pasa si un cristian ungí a resulta di ser infiel i un reemplazo ta necesario? Anto ta razonable pa conclui cu Dios lo duna e yamada celestial na un persona cu a ser ehemplar den e rindimento di fiel sirbishi na nos Tata celestial pa mashá hopi aña.

Awe, e forza principal dje mensahe di Dios no ta pa hende bira miembro dje bruid celestial di Cristo. Mas bien, “e spiritu i e bruid ta sigi bisa: ‘Bin!’” Esei ta un invitacion pa bida den un paradijs terrenal. (Revelacion 22:1, 2, 17) Mientras cu esnan ungí ta hiba delantera den tal actividad, nan ta desplega “humildad di mente” i ta traha ‘pa haci nan yamamento i scogimento sigur.’—Efesio 4:1-3; 2 Pedro 1:5-11.