Nos Ta “Habitante Temporal”

1, 2. Na ken Pedro a referí ora el a usa e ekspreshon “esnan skohí,” i dikon el a yama nan “habitante temporal”?

MAS o ménos 30 aña despues ku Hesus a bai shelu, apòstel Pedro a dirigí un karta na e “habitantenan temporal plamá na Ponto, Galasia, Kapadosia, Asia i Bitinia, esta, esnan skohí.” (1 Ped. 1:1) Pedro a usa e ekspreshon “esnan skohí” pa referí na personanan ku, meskos kuné, a ser ungí ku spiritu santu i ku a “nase di nobo pa un speransa bibu,” esta, pa goberná huntu ku Kristu den shelu. (Lesa 1 Pedro 1:3, 4.) Pero dikon mas despues el a yama e personanan skohí akí “stranhero i habitante temporal”? (1 Ped. 2:11) I dikon e kontesta riba e pregunta akí mester interesá nos tur awe, siendo ku ta masha poko Testigu di Yehova ta bisa ku nan ta ungí, òf skohí?

² E ekspreshon “habitante temporal” tabata un bon deskripshon pa e kristiannan ungí den promé siglo. Dikon? Pasobra nan eksistensia riba tera no tabata pa semper, i esei ta konta tambe pa e restu di e grupo akí ku ta na bida awe. Apòstel Pablo, kende tambe ta un miembro di e “tou chikitu” di kristiannan ungí, a splika: “Nos siudadania ta den shelu, i ta for di einan nos ta spera ansiosamente riba un salbador, esta, Señor Hesukristu.” (Luk. 12:32; Flp. 3:20) Komo ku e “siudadania” di kristiannan ungí ta den shelu, ora nan muri, nan ta bandoná tera i ta haña bida inmortal den shelu. (Lesa Filipensenan 1:21-23.) Pues, literalmente nan ta “habitante temporal” di e mundu akí, ku ta bou di kontrol di Satanas.

 3. Ki pregunta ta surgi enkuanto e ‘otro karnénan’?

³ Awor kiko di e ‘otro karnénan’? (Huan 10:16) Beibel ta siña ku nan tin e speransa di bira habitante permanente riba tera. Sí, nan lo biba riba tera pa semper. No opstante, nan tambe por ser konsiderá komo habitante temporal. Den ki sentido?

 4. Kiko lidernan di mundu no por logra?

⁴ Tanten ku Yehova ta permití Satanas su sistema malbado sigui eksistí, tur hende, inkluso kristiannan berdadero, lo sigui sufri di e konsekuensianan di Satanas su rebelion kontra Yehova. Na Romanonan 8:22, nos ta lesa: “Nos sa ku te ku awor henter kreashon huntu ta sigui keña i ta keda den doló.” Maske kuantu esfuerso sinsero lidernan di mundu, sientífikonan òf hende ku plaka ta hasi pa kaba ku sufrimentu, nan no por logra esei.

 5. Ki desishon miónes di hende a tuma desde 1914, i dikon?

⁵ Desde 1914, miónes di hende a skohe boluntariamente pa bira súpdito di Kristu Hesus, kende Yehova a nombra komo Rei. Nan no ke ta parti di e sistema di kos malbado di Satanas, p’esei nan no ta apoyá su mundu. Mas bien, nan ta usa nan bida i tur loke nan tin pa apoyá e Reino di Dios.—Rom. 14:7, 8.

 6. Den ki sentido nos por bisa ku tur Testigu di Yehova ta stranhero?

⁶ Sí, Testigunan di Yehova ta siudadanonan ehemplar ku ta biba den mas ku 200 pais. Pero unda ku nan ta biba, den sierto sentido nan ta stranhero, òf habitante temporal. Kon asina? Wèl, nan no ta mete den polítika òf problemanan sosial di nan pais; nan ta keda neutral. For di awor nan ta konsiderá nan mes komo siudadano di e mundu nobo ku Dios lo trese. Nan ta kontentu ku nan estadia temporal den e mundu imperfekto akí lo no dura mashá.

 7. Na ki tempu sirbidónan di Dios por bira habitante permanente, i na unda?

⁷ Pronto Kristu lo ehersé su outoridat pa destruí Satanas su sistema di kos malbado. Anto Kristu su gobièrnu perfekto lo eliminá piká i sufrimentu for di riba tera. Lo e eliminá tur rastro, tantu visibel komo invisibel, di e rebelion kontra Yehova su derecho di goberná. E ora ei, Dios su sirbidónan leal por bira habitante permanente di Paradeis riba tera. (Lesa Revelashon 21:1-5.) Kreashon lo ta kompletamente “librá di sklabitut na un kurpa ku ta kaba na nada i lo tin e glorioso libertat di e yunan di Dios.”—Rom. 8:21.

8, 9. Splika kiko Pedro tabata ke men ora el a bisa pa kristiannan ‘apstené di deseonan karnal.’

⁸ Pedro a splika kon kristiannan tin ku komportá nan mes ora el a bisa mas despues den su karta: “Rumannan stimá, mi ta hasi un yamada urgente riba boso komo stranhero i habitante temporal den e mundu akí: sigui apstené boso mes di deseonan karnal ku ta bringa kontra e alma.” (1 Ped. 2:11) Na promé instante, e konseho ei tabata pa kristiannan ungí, pero e ta konta pa Hesus su otro karnénan tambe.

⁹ Tin deseonan ku riba nan mes no ta malu si nos satisfasé nan manera e Kreador ta manda. Bon mirá, nan ta hasi bida asta mas dushi. Algun ehèmpel di esakinan ta e deseo di kome òf bebe algu dushi, di partisipá den aktividatnan plasentero òf di disfrutá di kompania agradabel. Asta e deseo di disfrutá di relashon seksual ku bo kasá ta un deseo normal ku tin su lugá. (1 Kor. 7:3-5) Pero Pedro a papia di “deseonan karnal ku ta bringa kontra e alma.” Esakinan ta deseonan robes; p’esei algun tradukshon di Beibel ta papia di “pashonnan baho” (BPK) òf “deseonan pekaminoso” (New International Version). Pues anto, nos tin ku apstené nos mes di kualke deseo ku ta na konflikto ku Yehova su boluntat i ku por daña nos relashon kuné. Si nos no hasi esei, nos ta kore riesgo di pèrdè nos alma, òf bida.

10. Menshoná algun trampa ku Satanas ta usa pa pone kristiannan bira parti di mundu.

¹⁰ Satanas ke pa nos lubidá ku nos ta “habitante temporal” den e mundu akí. I pa logra su meta, e ta usa vários trampa, manera por ehèmpel, materialismo, inmoralidat, patriotismo, e deseo pa prominensia òf pa ta na promé lugá den tur kos. Pero si nos ta determiná pa apstené nos mes di e deseonan karnal robes akí, nos ta demostrá bon kla ku nos no ke ta parti di e mundu malbado di Satanas. Asina nos ta duna prueba ku nos ta habitante temporal. Sí, loke nos ta deseá sinseramente ta pa bira habitante permanente di Dios su mundu nobo, unda hustisia lo reina. P’esei, nos ta traha duru pa logra esei.

11, 12. Kon algun hende sa trata stranhero, i kiko hende sa bisa di Testigunan di Yehova?

¹¹ Den versíkulo 12, Pedro a sigui splika kon kristiannan tin ku komportá nan mes komo “habitante temporal”; el a bisa: “Mantené un kondukta ekselente meimei di hende di e nashonnan, pa ora nan ta akusá boso di ta malechor, nan por mira boso obranan ekselente ku nan mes wowo i, komo resultado di esei, glorifiká Dios riba e dia ku e bini pa hasi su inspekshon.” Un habitante temporal ta un stranhero, òf un persona ku temporalmente ta biba den un pais ku no ta dje. Tin biaha, hende ta kritiká nan òf asta ta pensa ku nan ta mal hende djis pasobra nan ta diferente. Podisé nan manera di papia, bisti, di hasi kosnan òf asta nan aparensia por ta un poko diferente for di e hendenan di e pais. Pero nan bon obranan, esta, nan kondukta ekselente, ta demostrá ku komentarionan negativo asina no ta na nan lugá.

¹² Di mes manera, kristiannan berdadero ta distinto for di hopi otro hende den sierto kosnan tal komo nan rekreo i manera di papia. Ademas, hopi hende ta rekonosé nan na nan manera di bisti. E diferensianan akí por pone algun hende, ku ta mal informá, papia malu di kristiannan berdadero. Sinembargo, tin otro hende sí ku ta elogiá nan pa nan ekselente kondukta.

13, 14. Kon “sabiduria ta demostrá pa medio di su obranan ku e ta hustu”? Duna algun ehèmpel.

¹³ Sí, un ekselente kondukta por kontrarestá krítika inhustifiká. Laga nos tuma Hesus komo ehèmpel: E tabata e úniko hende ku a obedesé Dios perfektamente den tur kos; tòg algun hende a akus’é falsamente; nan a yam’é “un hòmber haragan i bisiá na biña, amigu di kobradó di belasting i pekadó.” Pero su kondukta ekselente a demostrá ku e no tabata un malechor. Hesus a bisa: “Sabiduria ta demostrá pa medio di su obranan ku e ta hustu.” (Mat. 11:19) Esei ta e kaso awe tambe. At’akí un ehèmpel: Algun bisiña di Bètel na Selters, Alemania, ta pensa ku e kristiannan ku ta traha einan ta masha straño. Pero e alkalde di e pueblo a defendé e Testigunan i a bisa: “Ta bèrdat ku e Testigunan ku ta sirbi einan tin nan propio estilo di bida, pero nan no ta molestiá ningun hende.”

¹⁴ Un otro ehèmpel tin di haber ku Testigunan di Yehova na Moskú, Rusia. Ta asina ku hende tabata akusá nan di vários kos malu. Por ehèmpel, nan tabata bisa ku e Testigunan ta nenga tratamentu médiko, ta kibra famia i ta pone hende kometé suisidio. Pero na yüni 2010, Korte Europeo di Derechonan Humano na Strasburgo, Fransia, a dikta lo siguiente: ‘Korte ta haña ku e echo ku [Moskú] a stroba e Testigunan di ehersé nan derecho di rindi adorashon i tene nan reunionnan libremente no ta hustifiká. E kortenan na Rusia no por a proba ku e Testigunan di Yehova ta kulpabel di e kosnan ku ta akusá nan di dje. Nan a usa leinan estrikto di Moskú na un manera inhustu kontra e Testigunan. Pues, e sanshon ku Rusia a pone tabata demasiado severo.’

15. Ki prinsipio bíbliko tur kristian berdadero ta sigui?

¹⁵ Pedro a menshoná un rekisito mas pa kristiannan ku Testigunan na Moskú i tur otro kaminda ta kumpli kuné. El a skirbi: “Pa kousa di Señor, someté boso na tur outoridat establesé pa hende: sea na un rei komo superior òf na gobernadornan.” (1 Ped. 2:13, 14) Pues, aunke kristiannan berdadero no ta parti di e mundu malbado di Satanas, nan ta dispuesto pa someté nan na outoridatnan gubernamental, pero, manera Pablo a indiká, basta nan leinan no ta na konflikto ku esnan di Yehova.—Lesa Romanonan 13:1, 5-7.

16, 17. (a) Kiko ta demostrá ku nos no ta kontra gobièrnu? (b) Kiko algun polítiko sa atmití?

¹⁶ E echo ku Testigunan di Yehova ta komportá nan mes komo “habitante temporal” den e sistema aktual no ta pasobra nan ke oponé gobièrnu òf kritiká otro hende. Nan ta komprondé ku kada hende por tin nan mes idea enkuanto polítika i e manera pa solushoná problemanan den komunidat. P’esei, distinto for di otro gruponan religioso, Testigunan di Yehova no ta mete den polítika. Nunka nan ta trata di dikta kiko outoridatnan tin ku hasi. P’esei, hamas nan lo stroba órden públiko, rebeldiá kontra gobièrnu òf instigá otro hende pa hasi esei.

¹⁷ Mas bien, di akuerdo ku e konseho di Pedro pa “onra rei,” kristiannan berdadero ta obedesé gobernantenan, demostrando asina ku nan ta respetá nan funshon. (1 Ped. 2:17) I gobernantenan sa atmití ku nan no tin motibu bálido pa preokupá ku Testigunan di Yehova por forma un peliger pa komunidat. Por ehèmpel, Steffen Reiche, un polítiko aleman, eks-minister di e estado di Brandenburg kende despues tabata un miembro di parlamento aleman, a bisa ku ‘Testigunan di Yehova a komportá nan masha bon durante e persekushon Nazi. Nan a para firme apesar di persekushon i a trata nan kompañeronan di prizòn ku bondat. El a bisa ku e bon kualidatnan akí ta masha importante pa un pais manera Alemania, spesialmente awor ku mas i mas hende ta trata otronan malu djis pasobra nan ta di un otro pais òf pasobra nan tin un otro kreensia religioso òf opinion polítiko.’

18. (a) Dikon ta masha normal ku nos ta stima “henter e hermandat”? (b) Kiko hende sa bisa di Testigunan di Yehova?

¹⁸ Apòstel Pedro a skirbi: “Onra tur sorto di hende, stima henter e hermandat, teme Dios.” (1 Ped. 2:17) Testigunan di Yehova ta teme Dios den e sentido ku nan no ke hasi nada ku ta desagrad’é. E tipo di rèspèt akí ta motivá nan pa hasi su boluntat. Nan ta kontentu ku nan ta forma parti di un organisashon mundial di ruman hòmber i ruman muhé ku ta sirbi Yehova. P’esei, ta masha normal ku nan ta “stima henter e hermandat.” Pero komo ku den e mundu egoista akí no ta usual ku hende ta stima otro, e amor entre Testigunan di Yehova por sorprendé un persona ku no ta Testigu. Tuma por ehèmpel un guia di turista ku tabata traha pa un agente di biahe merikano. Na 2009, el a keda asombrá ora el a mira e amor ku e Testigunan na Alemania tabatin pa nan rumannan ku a bini di otro pais pa asistí na e kongreso internashonal. Ora el a mira kon e Testigunan na Alemania tabata yuda nan rumannan, el a keda enkantá i a bisa ku den tur e añanan ku e ta sirbi komo guia di turista, ta promé biaha ku el a mira algu asina. Abo a yega di tende hende ekspresá nan mes asina despues ku nan a opservá un grupo di Testigu di Yehova na kongreso?

19. Kiko mester ta nos determinashon, i dikon?

¹⁹ Manera e artíkulo akí a mustra, tin hopi manera ku Testigunan di Yehova ta demostrá ku nan realmente ta “habitante temporal” den e mundu di Satanas akí. I ku goso nan ta determiná pa sigui hasi esei. Nan tin e speransa firme i bon fundá ku pronto nan lo bira habitante permanente di Dios su mundu nobo, unda hustisia lo reina. Abo tambe ta anhelá pa biba den e mundu nobo ei?