Cuidou cu Mofadónan!

Awendia tin pronósticonan na abundancia, i e negoshi di studia of pronosticá futuro ta floreciendo. The Daily Telegraph di Londen ta comentá: “Segun cu aña 2000 ta yega mas cerca, algu straño i tog no totalmente inesperá ta sosodiendo. Miles di hende rond mundu ta hañando visionnan straño i hopi biaha spantoso di futuro.” Pa hopi observadó, e interes intenso aki den futuro ta djis un ripiticion di cambionan sperá anteriormente cu no a materialisá.

SEGUN cu tráfico halá pa cabai tabata aumentá den siglo 19, un homber a predicí cu stadnan europeo cu tempu lo a sofocá den sushi di cabai. Naturalmente, su pronóstico no a resultá di ta corecto. Pues, pa enfatisá e manera cu prediccionnan ta faya hopi bes, The Times di Londen a declará: “Futuro ta djis un carga di sushi di cabai.”

Otronan ta haci mofa di esnan cu ta mira peliger den futuro. Por ehempel, un profesor dje facultad di comercio na un universidad mericano a reta esnan cu ta duna spiertamentu contra degradacion ambiental, pa pusta si e tendencia lo empeorá. Manera e revista New Scientist a informá, e profesor ta pretendé cu “nos calidad di bida ta mehorando i lo sigui mehorá pa tempu indefiní.”

Meimei dje confusion di pretension i contrapretensionnan, hopi hende ta kere cu tur cos básicamente lo keda mescos. Haciendo mofa di cualkier idea di intervencion divino, den asuntunan humano, nan ta mustra e mésun actitud cu e mofadónan di e promé siglo E.C.

Tur Cos Ta Mescos Ainda?

E di dos carta inspirá dje apostel cristian Pedro, skirbí rond di 64 E.C., a spierta: “Den e último dianan lo bini mofadónan cu nan mofa, i lo procedé segun nan mes deseonan.”—2 Pedro 3:3.

Mofadónan ta busca manera pa haci e obheto di nan mofa parce algu ridículo. Ya cu e mofadó hopi biaha kier pa esnan cu ta scuch’é adoptá su punto di bista, e persona cu sucumbí debí na mofa por ta cayendo den un trampa egoista. Tal bes algun dje mofadónan contra ken Pedro a duna spiertamentu tabata asina, i nan a “procedé segun nan mes deseonan.” Alertando su lectornan, e apostel a usa un forma di expresion enfático. El a spierta contra e binida di “mofadónan cu nan mofa.”

E mofadónan ei di promé siglo a cuestioná e realidad di Cristo su “presencia primintí,” bisando: “Unda e presencia primintí di dje ta? Sí, desde e dia cu nos antepasadonan a bai drumi den morto, tur cos ta siguiendo exactamente manera desde e principio di creacion.” (2 Pedro 3:4) A parce nan asina. Tog, aya na aña 33 E.C., Jesus a pronosticá catástrofe p’e stad di Jerusalem. El a declará: “E dianan lo yega riba bo ora bo enemigunan lo traha rond di bo un fortificacion cu stacanan puntá i lo rondoná bo i afligí bo di tur banda, i nan lo tira abo i bo yunan den bo, na suela, i nan lo no laga piedra riba piedra den bo.” Ki ekibocá esnan cu a haci mofa dje spiertamentu ei tabata! Na 70 E.C., ora e ehércitonan romano a sitia Jerusalem i a destruí e stad, hopi di su habitantenan a perde nan bida. Pakico mayoria habitante dje stad no tabata prepará p’e desaster aki? Pasobra nan no a dicerní cu Dios a inspeccioná nan mediante su Yu, Jesus.—Lucas 19:43, 44.

Apostel Pedro ta referí na un futuro intervencion di parti di Dios Todopoderoso. Pedro ta spierta: “E dia di Jehova lo bini manera ladron.” (2 Pedro 3:10) N’e tempu ei, Dios lo eliminá e malbadonan for di henter e tera i spar esnan cu ta ser husgá como hustu. Manera e revista aki a splica frecuentemente, Cristo Jesus su “presencia” a cuminsá na 1914. Pero su tumamentu di accion como Ehecutor di Dios pa eliminá maldad, ta den futuro ainda. Consecuentemente, e apostel su spiertamentu pa tene cuidou cu mofadónan ta aplicá awor cu mayor urgencia.

Kisas bo ta sperando pa hopi tempu caba riba intervencion divino den asuntunan humano. Kico lo yudá bo sigui spera cu pacenshi sin bira víctima di mofadónan? Por fabor, sigui lesa.

[Komentario na página 4]

“Dianan lo yega riba bo ora bo enemigunan lo . . . rondoná bo i afligí bo di tur banda, . . . i nan lo no laga piedra riba piedra den bo.” Esei no tabata un spiertamentu pa tene mofa di dje. E ehércitonan romano a destruí Jerusalem, i hopi hende a perde nan bida.