Laga Bo Dominio Propio Existi i Pasa Over

“Suministrá na boso fe . . . dominio propio.”—2 PEDRO 1:5, 6.

 1. Den cua situacion no-comun un cristian kisas por duna testimonio?

JESUS a bisa: “Boso lo ser hibá dilanti gobernador i rey pa mi causa, pa un testimonio na nan.” (Mateo 10:18) Si bo a ser yamá dilanti un gobernador, un hues of un presidente, tocante kico lo bo papia? Kisas promé tocante e motibu pakico bo ta einan, e acusacion contra bo. E spiritu di Dios lo yudá bo haci esei. (Lucas 12:11, 12) Pero bo por imaginá bo papiando di dominio propio? Bo ta considerá esei un parti importante di nos mensahe cristian?

2, 3. (a) Di ki manera Pablo por a duna testimonio na Felix i Drusila? (b) Pakico dominio propio tabata un tema apropiado pa Pablo papia riba den tal situacion?

² Considerá un ehempel di bida real. Un Testigo di Jehova a ser arestá i hibá corte. Ora el a haña un oportunidad pa papia, e kier a splica su creencianan como cristian, como un testigo. Bo por examiná e registro i lo bo haña cu el a duna un testimonio apropiado pa corte “tocante husticia i dominio propio i e huicio pa bini.” Nos ta refiriendo na un experencia di apostel Pablo na Cesarea. Tabatin un interogacion inicial. “Algun dia despues Felix a yega cu Drusila su casá, kende tabata un hudiu, i el a manda yama Pablo i a scucha na dje tocante creencia den Cristo Jesus.” (Echo 24:24) Historia ta mustra cu Felix “a practicá tur sorto di crueldad i cudishi, manehando e poder di rey cu tur e instintonan di un catibu.” E tabata dos biaha casá caba ora el a persuadí Drusila pa divorciá di su casá (violando ley di Dios) i bira su di tres casá. Kisas tabata Drusila cu kier a tende dje religion nobo, cristianismo.

³ Pablo a pasa na papia “tocante husticia i dominio propio i e huicio pa bini.” (Echo 24:25) Esaki lo a haci bisto e contraste entre e normanan di Dios di rectitud i e crueldad i inhusticia cu Felix i Drusila tabata parti di dje. Kisas Pablo a spera di impulsá Felix pa manifestá husticia den su caso. Pero pakico trece “dominio propio i e huicio pa bini” padilanti? E pareha inmoral aki tabata busca pa sa kico “creencia den Cristo Jesus” a encerá. Pues nan mester a haña sa cu siguimentu di dje ta rekerí restriccion di pensamentu, abla i accion, loke dominio propio ta nificá. Tur hende mester duna cuenta na Dios pa nan pensamentu, palabra i echonan. Pues, mas importante cu cualkier huicio di Felix den e caso di Pablo tabata e huicio cu e gobernador i su casá a enfrentá dilanti Dios. (Echo 17:30, 31; Romano 14:10-12) Ta di comprendé cu ora el a tende e mensahe di Pablo, “Felix a spanta.”

E Ta Importante pero No Fácil

 4. Pakico dominio propio ta un parti importante di berdadero cristianismo?

⁴ Apostel Pablo a reconocé cu dominio propio ta un parti vital di cristianismo. Apostel Pedro, un dje socionan íntimo di Jesus, a confirmá esaki. Ora el a skirbi na esnan cu lo a “bira participante den naturalesa divino” den cielu, Pedro a insta pa manifestá cierto cualidadnan cu tabata esencial, manera fe, amor i dominio propio. P’esei, dominio propio tabata enbolbí den e siguransa aki: “Si e cosnan aki ta existí den boso i ta pasa over, nan lo prevení boso di bira sea inactivo of infructífero tocante e conocimentu exacto di nos Señor Jesucristo.”—2 Pedro 1:1, 4-8.

 5. Pakico nos mester ta specialmente interesá den dominio propio?

⁵ Sin embargo, bo sa cu ta mas fácil pa bisa cu nos mester manifestá dominio propio cu e realmente ta pa practik’é den nos bida diario. Un motibu ta cu dominio propio ta un cualidad relativamente scars. Na 2 Timoteo 3:1-5 Pablo a describí e actitudnan cu lo a prevalecé den nos tempu, den “e último dianan.” Un rasgo cu lo a caracterisá nos periodo ta cu hopi hende lo ta “sin dominio propio.” Nos ta mira esaki resultando cierto tur rond di nos, no ta berdad?

 6. Con falta di dominio propio ta ser manifestá awe?

⁶ Hopi hende ta kere cu ta básicamente saludabel pa expresá sintimentu sin restriccion of pa expresá emocion fuerte enérgicamente. Nan punto di bista ta ser reforsá dor di modelonan di conducta bon-conocí cu ta parce di ignorá tur sorto di dominio propio, cu simplemente ta duna rienda liber na nan impulsonan. Pa ilustrá: Hopi hende cu ta gusta deporte profesional a custumbrá cu manifestacion salbahe di emocion, asta rabia violento. Bo por corda, por lo ménos for di prensa, ehempelnan caminda tabatin explosion di pelea brutal of esena di desordu na eventonan deportivo? Tog, no ta necesario pa dedicá muchu tempu pa repasá ehempelnan di falta di dominio propio. Lo bo por mencioná hopi área den cua nos mester mustra dominio propio—nos consumo di cuminda i bebida, nos conducta cu e sexo opuesto i e tempu i placa cu nos ta dedicá na hobi. Pero en bes di pasa superficialmente riba hopi área asina, laga nos examiná un área principal den cua nos mester manifestá dominio propio.

Dominio Propio Relacioná cu Nos Emocionnan

 7. Ki aspecto di dominio propio ta merecé atencion special?

⁷ Hopi di nos ta razonablemente exitoso den controlá of dominá nos accionnan. Nos no ta horta, sucumbí na inmoralidad of cometé asesinato; nos sa kico e ley di Dios ta bisa tocante tal malecho. Sin embargo, con exitoso nos ta den controlá nos emocionnan? Cu tempu, esnan cu ta keda sin cultivá dominio propio emocional hopi biaha ta perde dominio propio relacioná cu nan accionnan. Pues laga nos enfocá riba nos emocionnan.

 8. Kico Jehova ta spera di nos relacioná cu nos emocionnan?

⁸ Jehova Dios no ta verwagt cu nos ta robot, cu nos no tin ni ta mustra cualkier emocion. N’e graf di Lazaro, Jesus “a keha den spiritu i a bira perturbá.” Despues “Jesus a cede na lágrima.” (Juan 11:32-38) El a demostrá un emocion basta diferente ora, cu control perfecto riba su accionnan, el a core cu e cambiadónan di placa for dje tempel. (Mateo 21:12, 13; Juan 2:14-17) Su disipelnan leal tambe a desplegá emocion profundo. (Lucas 10:17; 24:41; Juan 16:20-22; Echo 11:23; 12:12-14; 20:36-38; 3 Juan 4) Sin embargo, nan a mira e necesidad pa dominio propio pa asina nan emocionnan no hiba nan na picá. Efesio 4:26 ta haci esaki masha cla: “Rabia, i tog no peca; no laga solo baha cu boso den un estado provocá.”

 9. Pakico dominio riba nos emocionnan ta asina importante?

⁹ Tin un peliger cu un cristian por parce di ta manifestá dominio propio, miéntras, en realidad, su emocionnan ta sali for di control. Corda e reaccion ora Dios a aprobá di Abel su sacrificio: “Cain a cushi di gran rabia, i su aparencia a cuminsá decaí. Na esaki Jehova a bisa Cain: ‘Pakico bo ta cushi di rabia i pakico bo aparencia a decaí? Si bo bira pa haci loke ta bon, lo no tin un exaltacion? Pero si bo no bira pa haci loke ta bon, picá ta loer n’e entrada, i su deseo ta pa bo.’” (Génesis 4:5-7) Cain no a controlá su emocionnan, cu a hib’é na asesiná Abel. Emocion descontrolá a hiba na un echo descontrolá.

10. Kico bo ta siña for dje ehempel di Haman?

¹⁰ Considerá, tambe, un ehempel for dje dianan di Mardokeo i Ester. E oficial yamá Haman a rabia pasobra Mardokeo lo no a buig p’e. Despues Haman eróneamente a pensa cu e lo a wordu faborecí. “Haman a sali e dia ei gososo i alegre di curason; pero asina cu Haman a mira Mardokeo den porta dje rey i cu esaki no a lanta i no a tembla pa causa di dje, Haman inmediatamente a yena cu rabia contra Mardokeo. Sin embargo, Haman a controlá su mes i a drenta den su cas.” (Ester 5:9, 10) E tabata lihé pa sinti e emocion di goso. Sin embargo e tabata lihé tambe pa sinti rabia n’e solo bista di un persona contra ken el a warda rencor. Ora Bijbel ta bisa cu Haman “a controlá su mes,” bo ta kere cu esei a nificá cu e tabata ehemplar den dominio propio? Apénas. Pa un tempu, Haman a controlá su accionnan i cualkier demostracion di emocion, pero el a keda sin controlá su rabia yalurs. Su emocionnan a hib’é na traha complot pa asesinato.

11. Den e congregacion di Filipos, cua problema a existí i kico por a hiba na dje?

¹¹ Di igual manera, falta di control di emocion awe por perhudicá cristiannan mashá. Algun por pensa, ‘O, esei lo no ta un problema den e congregacion.’ Pero e tabata. Dos cristian ungí na Filipos tabatin un desacuerdo serio cu otro, cu Bijbel no ta describí ta kico. Imaginá esaki como un posibilidad: Evodia a invitá algun ruman pa un comementu of un reunion placentero. Síntike no a ser invitá i a sinti su mes ofendí. Kisas el a reaccioná dor di no invitá Evodia na un ocasion mas despues. Anto tur dos a cuminsá busca otro su faltanan; cu tempu, nan apénas a papia cu otro. Den un senario asina, e problema básico lo tabata e falta di un invitacion pa un comementu? No. Esei lo tabata djis e chispa. Ora e dos rumannan ungí aki a keda sin controlá nan emocionnan, e chispa a bira un candela di mondi. E problema a persistí i crece te ora un apostel mester a intervení.—Filipense 4:2, 3.

Bo Emocionnan i Bo Rumannan

12. Pakico Dios ta duna nos e conseho hañá na Eclesiastés 7:9?

¹² Nos ta admití cu no ta fácil pa un hende controlá su emocionnan ora e sinti su mes menospreciá, ofendí of tratá cu prehuicio. Jehova sa esei, pasobra el a observá relacionnan humano for di principio di humanidad. Dios ta consehá nos: “No sea lihé den bo spiritu pa sintí bo ofendí, pasobra tumamentu di ofensa ta loke ta descansá den scochi di esnan estúpido.” (Eclesiastés 7:9) Nota cu Dios ta duna atencion promé na emocion, no na accion. (Proverbio 14:17; 16:32; Santiago 1:19) Puntra bo mes, ‘Mi mester duna mas atencion na controlá mi emocionnan?’

13, 14. (a) Den e mundu, generalmente kico ta desaroyá ora hende keda sin controlá emocionnan? (b) Cua ta e cosnan cu por pone cristiannan warda rencor?

¹³ Hopi hende den e mundu cu ta keda sin controlá nan emocionnan ta cuminsá pleitu grandi di famia—peleanan amargo i asta violento riba un malecho berdadero of imaginario contra nan mes of un pariente. Una bes cu emocion sali fo’i control, nan por ehercé nan influencia perhudicial pa un tempu largu. (Compará cu Génesis 34:1-7, 25-27; 49:5-7; 2 Samuel 2:17-23; 3:23-30 Proverbio 26:24-26.) Siguramente cristiannan, sin importá nan antecedencia nacional of cultural, mester mira tal hostilidad i rencor amargo como incorecto, malu, pa evitá. (Levítico 19:17) Bo ta mira evitá rencor como parti di bo dominio propio relacioná cu emocion?

¹⁴ Mescos cu tabata den e caso di Evodia i Síntike, keda sin controlá emocion por hiba na problema awor. Un ruman muhé por sinti su mes menospreciá dor cu e no a ser invitá na un fiesta di casamentu. Of kisas tabata su yu of su primo cu no a ser incluí. Of talbes un ruman homber a cumpra un auto segunda mano di un compañé cristian i poco tempu despues el a daña. Sea cual sea e motibu, esaki a causa ofensa, emocionnan a sali fo’i control i esnan enbolbí a bira molestiá. Kico por pasa e ora ei?

15. (a) Ki consecuencianan tristu a resultá for di rencor entre cristiannan? (b) Cua conseho bíblico ta aplicá na un tendencia pa warda rencor?

¹⁵ Si un persona agitá no traha pa controlá su emocionnan i haci pas cu su ruman, rencor por desaroyá. Tabatin caso caminda un Testigo a pidi p’e no ser asigná na un cierto Studio di Buki di Congregacion debí cu e no a gusta algun ruman cristian of famia cu tabata asistí ei. Tristu! Bijbel ta bisa cu lo ta un derota pa cristiannan hiba otro dilanti corte mundano, pero lo no ta igualmente un derota si nos evitá un ruman pasobra el a menospreciá nos of algun pariente den pasado? Nos emocionnan ta revelá cu nos ta pone relacionnan di famia riba pas cu nos rumannan? Nos ta bisa cu nos lo ta dispuesto pa muri pa nos ruman muhé, pero nos emocionnan ta impulsá nos asina leu cu nos apénas ta papia cuné awor? (Compará cu Juan 15:13.) Dios ta bisa nos categóricamente: “No paga malu cu malu na ningun hende. . . . Si ta posibel, cuantu cu ta dependé di boso, sea pacífico cu tur hende. No venga boso mes, stimánan, sino duna lugá na rabia.”—Romano 12:17-19; 1 Corintio 6:7.

16. Abraham a pone cua bon ehempel ora di trata cu emocion?

¹⁶ Un paso den direccion di recobrá control di nos emocionnan ta pa haci pas of resolvé e causa di keho, en bes di laga hostilidad persistí. Corda ora e tera no por a sostené e tounan grandi di Abraham huntu cu esnan di Lot i nan trahadornan pagá a cuminsá pleita p’esei. Abraham a laga su emocionnan domin’é? Of el a manifestá dominio propio? Encomendablemente, el a sugerí un solucion pacífico p’e conflicto di negoshi; laga cada un haña un teritorio separá. I el a duna Lot e promé chens di scoge. Como prueba cu Abraham no tabatin amargura ni rencor, mas despues el a bai den bataya na fabor di Lot.—Génesis 13:5-12; 14:13-16.

17. Con Pablo i Barnabas a faya na un ocasion, pero kico a sigui despues di esei?

¹⁷ Nos por siña tocante dominio propio tambe for di un incidente cu a enbolbé Pablo i Barnabas. Despues cu nan tabata partner pa añanan, tabatin un desacuerdo entre nan encuanto baimentu cu Marco riba un biahe. “A sosodé un explosion di rabiamentu intenso, di manera cu nan a separá for di otro; i Barnabas a bai cu Marco i a nabegá bai Chipre.” (Echo 15:39) Cu e hombernan maduro aki a keda sin controlá nan emocionnan na tal ocasion mester sirbi como un spiertamentu pa nos. Si esei por a sosodé cu nan, e por sosodé cu nos. Tog, nan no permití un separacion duradero desaroyá of un pleitu di famia crece. E registro ta proba cu e rumannan enbolbí a recobrá control riba nan emocionnan i despues a traha huntu den pas.—Colosense 4:10; 2 Timoteo 4:11.

18. Ora tin sintimentu di ofensa, kico e cristian maduro por haci?

¹⁸ Nos por spera cu lo tin sintimentu di ofensa, asta rencor, entre e pueblo di Dios. Nan tabata presente den tempu hebreo i den dia dje apostelnan. Tambe nan a sosodé entre e sirbidornan di Jehova di nos tempu, pasobra nos tur ta imperfecto. (Santiago 3:2) Jesus a insta su siguidornan pa actua lihé pa resolvé problema asina entre rumannan. (Mateo 5:23-25) Pero ta asta mihó pa prevení nan na promé lugá dor di mehorá nos dominio propio. Si bo ta sintí bo menospreciá of ofendí dor di algu relativamente chikitu cu bo ruman a bisa of haci, pakico no djis controlá bo emocionnan i simplemente lubid’é? Ta realmente necesario pa confrontá e otro persona, como si fuera lo bo no keda satisfecho te ora cu e admití cu e tabata robes? Simplemente cuantu control bo tin riba bo emocionnan?

E Ta Posibel!

19. Pakico ta apropiado cu nos a basa nos consideracion riba dominio di nos emocionnan?

¹⁹ Nos a trata principalmente cu un dje aspectonan di dominio propio, controlando nos emocionnan. I esei ta un área clave pasobra keda sin controlá nos emocionnan por hiba na perde control di nos lenga, nos impulsonan sexual, nos custumbernan di come i hopi otro aspecto di bida caminda nos mester desplegá dominio propio. (1 Corintio 7:8, 9; Santiago 3:5-10) Sin embargo, cobra ánimo pasobra bo por mehorá den mantené dominio propio.

20. Con nos por ta sigur cu mehoransa ta posibel?

²⁰ Jehova ta dispuesto pa yuda nos. Con nos por ta sigur? Wel, dominio propio ta un dje frutanan di spiritu. (Galatio 5:22, 23) Pues, te n’e grado cu nos ta traha pa cualificá i pa ricibí spiritu santu for di Jehova i pa manifestá su fruta, te n’e grado ei nos por spera di tin mas control riba nos mes. Nunca lubidá e siguransa di Jesus: “E Tata den cielu [lo] duna spiritu santu na esnan cu ta pidi’é!”—Lucas 11:13; 1 Juan 5:14, 15.

21. Kico bo ta determiná pa haci den futuro tocante dominio propio i bo emocionnan?

²¹ No imaginá cu esei lo ta fácil. I esei por ta mas difícil pa algun cu a crece meimei di hende cu a duna rienda liber na nan emocion, pa algun cu un temperamentu mas haltu of pa algun cu simplemente nunca a purba di manifestá dominio propio. Pa un cristian asina, pa laga dominio propio existí i pasa over por ta un berdadero desafio. Tog, e ta posibel. (1 Corintio 9:24-27) Segun cu nos ta yega mas i mas cerca dje fin dje sistema di cosnan actual, tension i presion lo aumentá. Nos ta bai tin mester no ménos dominio propio, sino mas, hopi mas! Examiná bo mes pa loke ta bo dominio propio. Si bo mira área den cua bo mester mehorá, traha riba dje. (Salmo 139:23, 24) Pidi Dios pa mas di su spiritu. Lo e tendé bo i lo yudá bo pa bo dominio propio existí i pasa over.—2 Pedro 1:5-8.

Puntonan pa Refleccion

◻ Pakico control riba bo emocionnan ta asina importante?

◻ Kico bo a siña for di ehempel di Haman, Evodia i Síntike?

◻ Kico lo bo purba haci onestamente si sosodé un causa pa ofensa?

◻ Con dominio propio por yudá bo evitá di warda cualkier rencor?

[Plachi na página 18]

Ora Pablo tabata dilanti Felix cu Drusila, el a papia tocante husticia i dominio propio