Dios No Ta Lento En Cuanto Su Promesa

“PA CUANTU tempu, o Jehova, mi tin cu grita pa yudansa, sin cu bo ta tende?” Eseinan ta palabranan dje profeta hebreo Habacuc, kende a biba den siglo 7 P.E.C. Pero nan ta zona conocí, no ta berdad? Di naturalesa, e cosnan cu nos ta anhelá, nos kier haña nan mesora, of mas pronto posibel. I esaki ta specialmente e caso den nos era di kier haña satisfaccion mesora.—Habacuc 1:2.

Den e promé siglo, tabatin algun persona cu aparentemente a haña cu Dios mester a cumpli cu su promesanan mas lihé. Nan a bira asina impaciente cu nan a asta haña cu Dios ta lento of lat. Debí na esaki, apostel Pedro tabatin cu corda nan cu Dios su punto di bista di tempu ta basta diferente for di esun di nos. Pedro ta skirbi: “No laga e echo aki scapa boso, stimánan, cu un dia pa Jehova ta manera mil aña i mil aña ta manera un dia.”—2 Pedro 3:8.

Segun e manera aki di calculá tempu, un persona di 80 aña a biba apénas un dos ora asina, i henter historia di humanidad a dura apénas seis dia. Ora nos mira cosnan for dje perspectiva aki, ta bira mas fácil pa nos comprendé Dios su manera di trata cu nos.

Pero, Dios no ta indiferente pa cu tempu. Al contrario, e ta masha conciente di tempu. (Echonan 1:7) P’esei, Pedro ta sigui bisa: “Jehova no ta lento en cuanto su promesa, manera algun hende ta considerá lentitud, pero e tin pacenshi cu boso pasobra e no ta deseá pa ningun hende ser destruí, sino ta deseá pa tur alcansá repentimentu.” (2 Pedro 3:9) Distinto di hende, Dios no tin e preshon pa haci cosnan lihé, como si fuera tempu ta core bai lagu’é. Como e “Rey di eternidad,” e tin un bista completo di tur cos i e por determiná na ki momento den e coriente di tempu su accionnan lo resultá mihó pa tur persona enbolbí.—1 Timoteo 1:17.

Despues di splica e motibu pa Dios su aparente lentitud, Pedro ta duna e spiertamentu aki: “E dia di Jehova lo bini manera ladron.” Esei ta nificá cu e dia di rindi cuenta lo bini net ora hende no ta sper’é. Anto, den e siguiente versículonan, Pedro ta señalá n’e prospecto maraviyoso pa esnan cu ta manifestá “actonan santu di conducta i echonan di debocion na Dios,” i esei ta cu nan por keda na bida i drenta e “shelu nobo i un tera nobo” cu Dios a primintí.—2 Pedro 3:10-13.

Esaki mester aumentá nos aprecio p’e echo cu e huicio di Dios no a bini ainda. Su pacenshi a haci posibel pa nos yega na conocé su propósito i cambia nos bida pa por ricibí su bendicionnan primintí. Nos no mester mira “e pacenshi di nos Señor como salbacion,” manera Pedro ta boga p’e? (2 Pedro 3:15) Pero tin un factor mas den e pacenshi di Dios.

Mester Completá un Midí di Eror

Ora nos studia Dios su trato cu humanidad den pasado, nos ta ripará cu hopi bes el a wanta su huicio te ora no tabatin ningun speransa mas pa cos drecha. Por ehempel, en coneccion cu Dios su huicio riba e cananeonan, el a papia cu Abraham tocante nan picánan hopi tempu di antemano. Pero e tempu pa ehecutá su huicio no a yega e ora ei ainda. Pakico no? Bijbel ta bisa: “Pasobra e eror dje amoreonan [cananeonan] no a ser completá ainda,” of manera e version di Knox ta bis’é: “E maldad dje amoreonan no a yega su periodo completo.”—Génesis 15:16.a

Sin embargo, rond di 400 aña despues, Dios su huicio a bini, i Abraham su desendientenan, e israelitanan, a tuma posesion dje tera. Algun dje cananeonan, manera Rahab i e gabaonitanan, a scapa pa motibu di nan actitud i accionnan, pero mayoria a alcansá un nivel extremo di impuresa, manera cobamentu arkeológico moderno a revelá. Nan a adorá e símbolo di órgano sexual masculino, a practicá prostitucion di tempel i sacrificio di mucha. Halley’s Bible Handbook ta declará: “Arkeólogonan cu ta coba den e ruinanan di stadnan cananeo ta haña straño cu Dios no a destruí nan mas promé.” Finalmente, e cananeonan su ‘midí di picá tabata completo’; nan maldad “a yega su periodo completo.” Ningun hende por a acusá Dios, cu rason, di ta inhustu ora el a laga haci e tera limpi, i a spar esnan cu a mustra un actitud corecto.

Nos ta haña un cuadro similar den tempu di Noe. Apesar dje echo cu e hendenan promé cu Diluvio tabata malbado, cu misericordia Dios a dicidí cu nan tempu lo a dura 120 aña mas. Durante parti dje tempu ei, Noe a sirbi como “un predicadó di husticia.” (2 Pedro 2:5) Segun cu tempu a pasa, aparentemente nan maldad a hecha. “Dios a wak e tera i, mira! e tabata ruiná, pasobra tur carni a ruiná nan caminda riba e tera.” (Génesis 6:3, 12) Nan ‘midí di picá tabata completo’; pasamentu di tempu a hiba nan inclinacionnan incorecto na un culminacion. Ora Dios a actua e tabata completamente hustificá. Ocho persona so a resultá di ta hustu den bista di Dios, i el a salba nan.

Nos por mira e mésun patronchi den Dios su trato cu Israel. Apesar cu nan a comportá nan den un manera infiel i inmoral, Dios tabatin pacenshi cu nan pa cientos di aña. E registro ta bisa: “Jehova . . . a sigui manda . . . su mensaheronan, mandando [nan] bes tras bes, pasobra el a sinti compasion pa su pueblo . . . Pero continuamente nan tabata . . . despreciá su palabranan i haci mofa di su profetanan, te ora e furia di Jehova a subi contra su pueblo, te ora cu no tabatin curacion.” (2 Crónicanan 36:15, 16) E pueblo a yega na un punto caminda cos no por a drecha mas. Ta Jeremías i algun otro persona so por a ser salbá. Ora Dios finalmente a trece huicio riba e sobránan, ningun hende por a califik’é como inhustu.

Dios Su Tempu pa Actua A Yega

For dje ehempelnan aki nos por mira cu Dios ta wantando su huicio contra e sistema di cosnan actual solamente te ora e tempu ta hechu. Nos por mira esaki den e ordu duná na Dios su ehecutor simbólico: “‘Hinca bo sikkel skerpi i recogé e troshi di wijndruif dje tera, pasobra su druifnan a hecha.’ I e angel a hinca su sikkel den e tera i a cosechá wijndruif dje tera, i el a tir’é den e baki grandi di pers biña dje rabia di Dios.” Tuma nota cu e maldad di humanidad “a hecha,” esta, el a yega na un punto caminda cos no por drecha mas. Ora Dios ehecutá huicio, lo no tin ningun duda cu su intervencion ta hustificá.—Revelacion 14:18, 19.

Ora nos considerá lo anterior, ta bisto cu Dios su huicio contra mundu mester ta cerca pasobra mundu a adkerí e característicanan cu a hustificá Dios su huicio den pasado. Tur caminda cu nos wak, e tera ta yen di violencia, mescos cu e tabata promé cu Diluvio dje tempu di Noe. Actitud di hende ta birando mas i mas manera loke Génesis 6:5 ta describí: “Tur inclinacion dje pensamentunan di [hende] su curason tabata solamente malu tur ora.” Asta e picánan serio cu a hiba n’e huicio di Dios contra e cananeonan ta comun i coriente awe.

Foral desde Guera Mundial I, humanidad a experenciá cambionan spantoso. El a mira con e tera a keda papa muhá cu sanger di miyones di hende. Guera, genocidio, terorismo, crímen i maldad a lanta cabes rond mundu. Hamber, enfermedad i inmoralidad a atacá nos planeta. Tur evidencia ta indicá cu nos ta biba awor den e generacion malbado di cua Jesus a bisa: “E generacion aki lo no pasa bai di ningun manera te ora tur e cosnan aki sosodé.” (Mateo 24:34) Actualmente mundu ta yenando su “midí di picá.” “E troshi di wijndruif dje tera” ta birando hechu p’e cosecha.

Tempu pa Abo Actua

E angel a bisa apostel Juan cu segun e tempu di huicio ta yega cerca, dos tipo di hechamentu lo tuma lugá. Di un banda, “esun cu ta haci inhusticia, lagu’é haci inhusticia ainda; i laga esun sushi ser sushá ainda.” Pero di otro banda, “laga hende hustu haci husticia ainda, i laga hende santu ser hací santu ainda.” (Revelacion 22:10, 11) E último desaroyo aki ta tumando lugá en coneccion cu e trabou mundial di educacion bíblico cu Testigonan di Jehova ta efectuá. Meta dje trabou ei ta pa siña hende loke Dios ta rekerí di nan, di manera cu nan por ser contá digno pa ricibí bida eterno. Awor e actividad aki a plama yega 233 tera atrabes di mas o ménos 87.000 congregacion.

Dios no ta lento. Cu pacenshi el a permití individuonan e tempu necesario pa “bisti e personalidad nobo” pa por ta den fila pa ricibí su promesanan. (Efesionan 4:24) Awe, ainda Dios ta warda, apesar cu condicionnan di mundu ta empeorá constantemente. Testigonan di Jehova rond mundu ta haciendo tur loke ta razonablemente na nan alcanse pa compartí cu nan próhimo e conocimentu cu ta hiba na bida eterno. (Juan 17:3, 17) Afortunadamente, tur aña mas cu 300.000 hende ta respondé i ta ser bautisá.

Cu mira riba bida eterno, awor ta e tempu pa actua, no pa warda. Pasobra denter di poco, nos lo mira e cumplimentu di Jesus su promesa: “Tur cu ta bibu i ta ehercé fe den mi lo no muri hamas.”—Juan 11:26.

[Nota]

[Plachi na página 6]

Dios a manda su ehecutor hinca e sikkel ora wijndruif dje tera a hecha

[Plachi na página 7]

Rond mundu Testigonan di Jehova ta yuda hende drenta e fila pa ricibí Dios su bendicionnan eterno