Laga Nos Tene Duru na Nos Fe Precioso!
“Na esnan cu a obtené un fe, como un privilegio igual cu esun di nos.”—2 PEDRO 1:1.
1. Kico Jesus a bisa como spiertamentu na su apostelnan, sin embargo, kico Pedro a bisa cu un confiansa exagerá?
RIBA e anochi promé cu Jesus su morto, el a bisa cu tur su apostelnan lo a bandon’é. Un di nan, Pedro, a bisa cu un confiansa exagerá: “Maske tur e otronan trompecá en coneccion cu bo, ami nunca lo trompecá!” (Mateo 26:33) Pero Jesus tabata sa mihó. P’e motibu ei el a bisa Pedro n’e ocasion ei mes: “Mi a haci súplica na bo fabor pa bo fe no faya; i abo, una bes cu bo bolbe, fortalecé bo rumannan.”—Lucas 22:32.
2. Apesar cu Pedro tabata muchu sigur di su mes, kico el a haci cu a revelá cu su fe tabata débil?
2 Pedro, cu tabata demasiado confiá tocante su fe, a nenga Jesus e anochi ei mes. Tres bes el a nenga cu e tabata conocé Cristo mes! (Mateo 26:69-75) Ora el a “bolbe,” e palabranan di su Doño, “fortalecé bo rumannan,” lo mester a resoná cla-cla den su oreanan. E spiertamentu ei a afectá e resto di Pedro su bida profundamente, manera e dos cartanan cu el a skirbi, cu ta conserbá den Bijbel, ta mustra.
Pakico Pedro A Skirbi Su Cartanan
3. Pakico Pedro a skirbi su promé carta?
3 Rond di 30 aña despues di Jesus su morto, Pedro a skirbi su promé carta, dirigiend’e na su rumannan na Ponto, Galacia, Capadocia, Asia i Bitinia, áreanan cu awor ta forma e parti nort i west di Turkia. (1 Pedro 1:1) Sin duda, tabatin hudiunan entre esnan na ken Pedro a skirbi, di cua algun kisas a bira cristian na Pentecoste di 33 E.C. (Echonan 2:1, 7-9) Hopi tabata gentil cu a pasa den pruebanan severo na man di opositornan. (1 Pedro 1:6, 7; 2:12, 19, 20; 3:13-17; 4:12-14) P’esei Pedro a skirbi e rumannan aki pa animá nan. Su meta tabata pa yuda nan ricibí “e fin di [nan] fe, e salbacion di [nan] alma.” Pues, el a terminá su carta cu e spiertamentu: “Tuma boso posicion contra [e Diabel], sólido den fe.”—1 Pedro 1:9; 5:8-10.
4. Pakico Pedro a skirbi su di dos carta?
4 Mas despues, Pedro a skirbi un di dos carta n’e cristiannan aki. (2 Pedro 3:1) Pakico? Pa motibu cu a existí un menasa asta mas grandi. Individuonan inmoral tabata trata na promové nan conducta corumpí entre creyentenan i a engañá algun! (2 Pedro 2:1-3) Ademas, Pedro a spierta contra mofadónan. El a skirbi den su promé carta cu “e fin di tur cos a yega cerca,” i awor aparentemente algun tabata haci mofa di un idea asina. (1 Pedro 4:7; 2 Pedro 3:3, 4) Laga nos examiná e di dos carta di Pedro i mira con el a fortalecé e rumannan pa permanecé firme den fe. Den e promé artículo aki, nos lo considerá 2 Pedro capítulo 1.
E Propósito di Capítulo 1
5. Con Pedro ta prepará su lectornan pa un consideracion di problemanan?
5 Pedro no ta pasa mesora na trata e problemanan serio. Mas bien, e ta prepará e caminda p’e consideracion dje problemanan aki dor di aumentá e aprecio di su lectornan pa loke nan a ricibí ora nan a bira cristian. E ta recordá nan dje promesanan maraviyoso di Dios i dje confiabilidad di profecianan di Bijbel. E ta haci esaki contando nan tocante e transfiguracion, e vision cu el a haña personalmente di Cristo den poder di Reino.—Mateo 17:1-8; 2 Pedro 1:3, 4, 11, 16-21.
6, 7. (a) Ki les nos por siña for dje introduccion dje carta di Pedro? (b) Si nos ta duna conseho, kico ta bon pa nos admití tin biaha?
6 Nos por siña un les for di Pedro su introduccion? No ta asina cu conseho ta mas aceptabel ora nos repasá promé cu e oyentenan rasgonan dje magnífico speransa di Reino cu nos tin en comun? I ki tal usa un experencia personal? Probablemente, despues di Jesus su morto, hopi biaha Pedro a papia tocante e vision ei cu el a mira di Cristo den gloria di Reino.—Mateo 17:9.
7 Corda tambe cu, cu tur probabilidad, p’e tempu cu Pedro a skirbi su di dos carta, e Evangelio di Mateo i e carta di apostel Pablo n’e galationan a ser distribuí ampliamente. Pues tantu Pedro su imperfeccionnan como su registro di fe por tabata bon conocí entre su contemporáneonan. (Mateo 16:21-23; Galationan 2:11-14) Sin embargo, esaki no a kita su frankesa di expresion. En realidad, esei por a haci su carta mas atractivo pa esnan cu tabata conciente di nan propio debilidadnan. P’esei, ora nos ta yuda esnan cu tin problema, lo no ta eficas pa admití cu nos tambe ta imperfecto?—Romanonan 3:23; Galationan 6:1.
Un Saludo Fortalecedor
8. Probablemente den ki sentido Pedro a usa e palabra “fe”?
8 Considerá awor Pedro su saludo. Mesora e ta mencioná e tópico di fe, dirigiendo su mes na su lectornan como “esnan cu a obtené un fe, como un privilegio igual cu esun di nos.” (2 Pedro 1:1) Aki e expresion “un fe” probablemente ta nificá “conviccion firme” i ta referí n’e totalidad dje creencianan of siñansanan cristian, cu den e Scritura sa ser yamá “e berdad.” (Galationan 5:7; 2 Pedro 2:2; 2 Juan 1) Hopi biaha e palabra “fe” ta ser usá den e sentido aki mas bien cu den e sentido general di confiansa cu bo ta pone den un persona of cos.—Echonan 6:7; 2 Corintionan 13:5; Galationan 6:10; Efesionan 4:5; Hudas 3.
9. Pakico Pedro su saludo lo mester a zona specialmente caluroso p’e gentilnan?
9 Pedro su saludo lo mester a zona specialmente caluroso pa lectornan gentil. Hudiu no tabatin trato cu gentil i asta a despreciá nan. Ademas, prehuicio contra gentilnan ainda tabata existí entre hudiunan cu a bira cristian. (Lucas 10:29-37; Juan 4:9; Echonan 10:28) Sin embargo, Pedro, hudiu di nacementu i apostel di Jesucristo, a bisa cu su lectornan—hudiu i gentil—a compartí e mésun fe i a disfrutá dje mésun privilegio cuné.
10. Ki lesnan nos por siña for di Pedro su saludo?
10 Pensa riba e lesnan excelente cu Pedro su saludo ta siña nos awe. Dios no ta haci distincion di persona; e no ta faborecé un rasa of nacionalidad riba un otro. (Echonan 10:34, 35; 11:1, 17; 15:3-9) Manera Jesus mes a siña, tur cristian ta ruman, i ningun di nos mester sinti su mes superior. Ademas, Pedro su saludo ta enfatisá cu nos en berdad ta un hermandad mundial, cu tin “como un privilegio igual” e fe cu Pedro i e otro apostelnan tabatin.—Mateo 23:8; 1 Pedro 5:9.
Conocimentu i e Promesanan di Dios
11. Despues di su saludo, ki cosnan vital Pedro ta enfatisá?
11 Despues di su saludo, Pedro ta skirbi: “Laga bondad inmerecí i pas sea aumentá na boso.” Con bondad inmerecí i pas mester ser aumentá na nos? “Dor di un conocimentu exacto di Dios i di Jesus nos Señor,” Pedro ta contestá. Anto e ta bisa: “Poder divino a duna nos libremente tur e cosnan cu ta di interes pa bida i debocion piadoso.” Pero con nos ta ricibí e cosnan vital aki? “Pa medio dje conocimentu exacto di esun cu a yama nos mediante gloria i birtud.” Asina Pedro ta enfatisá dos bes cu un conocimentu exacto di Dios i di su Yu ta esencial.—2 Pedro 1:2, 3; Juan 17:3.
12. (a) Pakico Pedro ta enfatisá e importancia di conocimentu exacto? (b) Pa disfrutá dje promesanan di Dios, kico nos mester a haci promé?
12 E “maestronan falsu” contra ken Pedro ta spierta den capítulo 2 ta usa “palabranan falsu” pa engañá cristiannan. Den e manera aki nan ta trata na seducí e cristiannan pa haci nan cai bek den e inmoralidad for di cua nan a ser librá. E resultadonan pa cualkier persona cu a ser salbá pa medio di un “conocimentu exacto dje Señor i Salbador Jesucristo” i cu despues ta sucumbí na engaño asina ta desastroso. (2 Pedro 2:1-3, 20) Evidentemente, anticipando un consideracion dje problema aki mas despues, Pedro ta enfatisá for di den e introduccion di su carta e papel di conocimentu exacto pa mantené un posicion limpi cerca Dios. Pedro ta comentá cu Dios “a duna nos libremente e promesanan precioso i masha grandioso, pa cu dor di esakinan boso por bira participante dje naturalesa divino.” Sin embargo, pa disfrutá dje promesanan aki, cu ta un parti integral di nos fe, segun Pedro, promé nos tin cu “scapa for dje corupcion cu ta den e mundu debí na mal deseo.”—2 Pedro 1:4.
13. Na kico tantu cristiannan ungí como “otro carnénan” ta determiná pa tene duru?
13 Con abo ta mira e promesanan di Dios? Mescos cu e resto di cristiannan ungí ta mira nan? Na 1991, Frederick Franz, e tempu ei presidente di Watch Tower Bible and Tract Society, kende tabata den e ministerio di tempu completo pa mas cu 75 aña, a resumí e sintimentunan di esnan cu ta spera di reina cu Cristo: “Nos ta teniendo duru te cu awor aki mes, i nos lo sigui tene duru te ora Dios en berdad a duna prueba cu e ta fiel na su ‘promesanan precioso i masha grandioso.’” Ruman Franz a keda sigur dje promesa di Dios di un resureccion celestial, i el a tene duru n’e fe te na su morto cu 99 aña di edad. (1 Corintionan 15:42-44; Filipensenan 3:13, 14; 2 Timoteo 2:10-12) Di manera similar, miyones di hende ta teniendo duru n’e fe, manteniendo nan bista enfocá riba Dios su promesa di un paradijs terenal den cua hende lo biba pa semper den felicidad. Abo ta un di nan?—Lucas 23:43; 2 Pedro 3:13; Revelacion 21:3, 4.
Reaccion Riba e Promesanan di Dios
14. Pakico Pedro ta mencioná birtud como e promé cualidad pa agregá na fe?
14 Nos ta gradicidu na Dios pa loke el a primintí? Si ta asina, Pedro ta razoná, nos mester demostrá esei. “Sí, p’e motibu aki mes” (pa motibu cu Dios a duna nos promesanan masha precioso), nos mester haci un esfuerso real pa actua. Nos no por contentá nos mes cu djis ser den e fe of cu djis conocé e berdad di Bijbel. Esei no ta suficiente! Tal bes den tempu di Pedro algun hende den e congregacionnan tabata papia hopi tocante fe, pero a enbolbé nan mes den conducta inmoral. Nan comportacion mester tabata birtuoso, p’esei Pedro ta insta: “Agregá na boso fe birtud.”—2 Pedro 1:5; Santiago 2:14-17.
15. (a) Pakico conocimentu ta ser mencioná despues di birtud como un cualidad pa agregá na fe? (b) Ki otro cualidadnan lo ekipá nos pa tene duru n’e fe?
15 Despues di a mencioná birtud, Pedro ta mencioná seis cualidad mas cu nos tin cu agregá na nos fe. Cada un di esakinan ta necesario si nos kier “para firme den e fe.” (1 Corintionan 16:13) Debí cu apóstatanan tabata ‘troce e Scritura’ i promové “siñansanan engañoso,” Pedro ta pasa na mencioná conocimentu como vital, bisando: “Na boso birtud, [agregá] conocimentu.” Anto e ta continuá: “Na boso conocimentu, [agregá] dominio propio, na boso dominio propio, awante, na boso awante, debocion piadoso, na boso debocion piadoso, cariño fraternal, na boso cariño fraternal, amor.”—2 Pedro 1:5-7; 2:12, 13; 3:16.
16. Kico lo sosodé si e cualidadnan cu Pedro ta mencioná ta ser agregá na fe, pero kico lo sosodé si esei no tuma lugá?
16 Kico lo sosodé si e shete cosnan aki ser agregá na nos fe? “Si e cosnan aki ta existí den boso i ta pasa over,” Pedro ta contestá, “nan lo prevení boso di bira sea inactivo of infructífero relacioná cu e conocimentu exacto di nos Señor Jesucristo.” (2 Pedro 1:8) Di otro banda, Pedro ta bisa: “Si e cosnan aki no ta presente den un hende, e ta ciegu, cerando su wowo p’e lus, i a lubidá cu su picánan di hopi tempu pasá a ser limpiá.” (2 Pedro 1:9) Ripará cu Pedro ta cambia for dje uso di “boso” i “nos” pa “un hende,” “e,” i “su.” Aunke, lamentablemente, algun ta ciegu, lubidadó i impuru, Pedro bondadosamente no ta implicá cu e lector ta un di nan.—2 Pedro 2:2.
E Ta Fortalecé Su Rumannan
17. Kico lo por a impulsá Pedro su apelacion tierno pa practicá “e cosnan aki”?
17 Kisas reconociendo cu particularmente esnan nobo por ser engañá fácilmente, Pedro ta animá nan tiernamente: “Rumannan, haci boso sumo posibel mas ainda pa haci boso yamamentu i scogementu sigur pa boso mes; pasobra si boso sigui haci e cosnan aki boso siguramente lo no fracasá nunca.” (2 Pedro 1:10; 2:18) Cristiannan ungí cu ta agregá e shete cosnan aki na nan fe lo disfrutá di un magnífico recompensa, manera Pedro ta bisa: “E entrada den e reino eterno di nos Señor i Salbador Jesucristo lo ser suministrá na boso ricamente.” (2 Pedro 1:11) E “otro carnénan” lo ricibí un herencia eterno den e dominio terenal dje Reino di Dios.—Juan 10:16; Mateo 25:33, 34.
18. Pakico Pedro ta dispuesto pa “semper recordá” su rumannan?
18 Pedro ta deseá sinceramente un recompensa magnífico asina pa su rumannan. E ta skirbi: “P’e motibu aki lo mi keda dispuesto pa semper recordá boso e cosnan aki, aunke boso conocé nan i ta firmemente establecí den e berdad.” (2 Pedro 1:12) Pedro ta usa e palabra griego ste·riʹzo, traducí aki como “ta firmemente establecí,” pero traducí como “fortalecé” den Jesus su spiertamentu anterior na Pedro: “Fortalecé bo rumannan.” (Lucas 22:32) E uso dje palabra ei por indicá cu Pedro ta corda e spiertamentu poderoso cu el a ricibí for di su Señor. Pedro ta bisa awor: “Mi ta considerá cu ta corecto, tanten cu mi ta den e tabernáculo [curpa humano] aki, pa stimulá boso haciendo boso corda, ya cu mi sa cu e kitamentu di mi tabernáculo lo yega pronto.”—2 Pedro 1:13, 14.
19. Ki yudansanan nos mester di dje awe?
19 Aunke Pedro ta bisa bondadosamente cu su lectornan ta “firmemente establecí den e berdad,” e ta realisá cu nan fe por a sufri naufragio. (1 Timoteo 1:19) Siendo cu e sa cu e tin cu muri pronto, e ta fortalecé su rumannan dor di mencioná cosnan cu despues nan por corda pa mantené nan mes spiritualmente fuerte. (2 Pedro 1:15; 3:12, 13) Di manera similar, awe nos tin mester di recordatorionan constante pa permanecé firme den e fe. Sin importá ken nos ta of cuantu tempu nos tin den e berdad, nos no por neglishá lesamentu regular di Bijbel, studio personal i asistencia na reunionnan di congregacion. Algun ta bin cu excuus pa no asistí, bisando cu nan ta muchu cansá of cu e reunionnan ta ripití mésun cos of no ta ser bon presentá, pero Pedro tabata sa con lihé cualkier un di nos por perde fe si nos bira muchu sigur di nos mes.—Marco 14:66-72; 1 Corintionan 10:12; Hebreonan 10:25.
Base Firme pa Nos Fe
20, 21. Con e transfiguracion a fortalecé e fe di Pedro i di lectornan di su cartanan, incluyendo nos awe?
20 Nos fe ta basá simplemente riba mitonan inventá astutamente? “No,” Pedro ta respondé enfáticamente, “no tabata dor di sigui cuentanan falsu mañosamente inventá cu nos a haci boso conocé e poder i presencia di nos Señor Jesucristo, sino tabata dor di a bira testigo ocular di su magnificencia.” Pedro, Santiago i Juan tabata huntu cu Jesus ora nan a mira un vision di dje den poder di Reino. Pedro ta splica: “El a ricibí di Dios e Tata onor i gloria, ora palabranan manera esakinan a ser dirigí na dje mediante e gloria magnífico: ‘Esaki ta mi yu, mi stimá, kende mi mes a aprobá.’ Sí, nos a tende e palabranan aki dirigí for di shelu miéntras nos tabata cuné riba e ceru santu.”—2 Pedro 1:16-18.
21 Ora Pedro, Santiago i Juan a mira e vision ei, e Reino siguramente a bira real pa nan! “Consecuentemente,” Pedro ta remarcá, “nos tin e palabra profético hací mas sigur; i boso ta haci bon di presta atencion na dje.” Sí, lectornan di Pedro su carta, incluyendo nos awe, tin motibu poderoso pa presta atencion na profecianan tocante e Reino di Dios. Den ki manera nos tin cu presta atencion? Pedro ta contestá: “Manera na un lampi cu ta briya den un lugá scur, te ora di dia habri i lanta un strea di dia, den boso curason.”—2 Pedro 1:19; Daniel 7:13, 14; Isaías 9:6, 7.
22. (a) Na kico nos curason tin cu keda alerto? (b) Con nos ta presta atencion n’e palabra profético?
22 Nos curason lo ta scur sin e iluminacion dje palabra profético. Pero dor di presta atencion na dje, e curason di cristiannan a keda alerto pa e dia cu a habri ora e “strea di dia,” Jesucristo, ta lanta den gloria di Reino. (Revelacion 22:16) Con nos awe ta presta atencion n’e palabra profético? Dor di studia Bijbel, dor di prepará pa i participá den e reunionnan, i dor di ‘refleccioná riba e cosnan aki, i ser intensamente ocupá den nan.’ (1 Timoteo 4:15) Pa e palabra profético por ta manera un lampi cu ta briya den un “lugá scur” (nos curason), nos tin cu permitié afectá nos profundamente—nos deseonan, emocionnan, motivacionnan i metanan. Nos mester ta studiantenan di Bijbel, pasobra Pedro ta concluí capítulo 1: “Ningun profecia di Scritura ta nace for di ningun interpretacion privá. Pasobra profecia no a ser trecé na ningun tempu pa boluntad di hende, sino cu hende a papia di parti di Dios segun cu nan a ser hibá pa spiritu santu.”—2 Pedro 1:20, 21.
23. Pa kico e promé capítulo di 2 Pedro a prepará lectornan?
23 Den e promé capítulo di su di dos carta, Pedro a duna motivacion poderoso pa nos tene duru na nos fe precioso. Awor nos ta prepará pa un consideracion dje asuntunan serio cu ta sigui. E siguiente artículo lo considerá capítulo 2 di 2 Pedro, caminda e apostel ta trata cu e desafio di influencianan inmoral cu a infiltrá den e congregacionnan.
Bo Ta Corda?
◻ Pakico Pedro ta enfatisá e importancia di conocimentu exacto?
◻ Kico por ta e motibu cu birtud ta ser mencioná como e promé cualidad pa ser agregá na fe?
◻ Pakico Pedro ta dispuesto pa semper duna su rumannan recordatorionan?
◻ Ki base firme Pedro ta percurá pa nos fe?
[Plachi na página 9]
Pedro su faltanan no a pon’é bandoná su fe