Ora Bo Dicerní e Principio Bo Ta Mustra Madures
MAL asociacion ta daña custumbernan útil. Bo ta cosechá loke bo ta sembra. (1 Corintionan 15:33; Galationan 6:7) Tur dos declaracion, sea den sentido físico of spiritual, ta un ehempel di un berdad fundamental—un principio—i cada un ta percurá un base pa leynan. Sin embargo, leynan ta bini i ta bai i hopi biaha nan sa ta specífico. Di otro banda, principionan ta amplio i nan por dura pa semper. P’esei, e Palabra di Dios ta animá nos pa pensa den término di e principionan enbolbí tur caminda cu esei ta posibel.
Webster’s Third New International Dictionary ta definí un principio como “un berdad general of fundamental: un ley, doctrina of suposicion extenso i fundamental, riba cua otronan ta basá of for di cua otronan ta derivá.” Por ehempel, na un mucha bo por duna e regla: “Bo no mag mishi cu e stoof.” Pero na un adulto e declaracion: “E stoof ta cayente” lo ta suficiente. Ripará cu e último ta un declaracion mas fundamental. Pa motibu cu lo e afectá loke nos lo haci—tal bes cushiná, horna of paga e stoof—e ta bira den un sentido un principio.
Naturalmente, e principionan clave di bida ta spiritual; nan ta dirigí nos adoracion na Dios i nos felicidad. Sin embargo, algun hende ta legumai haci e esfuerso necesario pa razoná riba principionan. Nan ta preferá di djis sigui un regla ora nan haña nan enfrentá cu un decision. Esaki ta imprudente i ta contrali n’e ehempel cu hombernan fiel di pasado den tempunan bíblico a pone.—Romanonan 15:4.
Hombernan di Principio Divino
Entre hende imperfecto, Abel por ser yamá e promé promé homber di principio divino. Probablemente el a pensa hopi riba e promesa tocante e “simia” i a percibí cu liberacion for di picá lo a enbolbé un sacrificio di sanger. (Génesis 3:15) P’esei el a ofrecé Dios “algun primogénito di su tou.” E frase “asta nan partinan yen di sebu” ta mustra cu Abel a duna Jehova lo mihó. Sin embargo, ta te despues di mas cu dos mil aña despues di morto di Abel cu pa promé biaha Dios lo a splica en detaye e rekisitonan relacioná cu sacrificionan. Na contraste cu Abel, un homber di principio i temeroso di Dios, su ruman Cain tabata haci sacrificio na Dios den un forma rutinario. Pero su actitud a laga hopi di deseá, i tabatin algu tocante su ofrenda cu a indicá un curason cu tabata falta principio.—Génesis 4:3-5.
Noe tambe tabata un homber di principio divino. Aunke e registro di Bijbel ta mustra cu Dios a mand’é specíficamente pa construí un arca, nos no ta lesa di un mandamentu p’e predicá na otronan. Tog, Noe ta ser yamá “un predicadó di husticia.” (2 Pedro 2:5) Maske ta probabel cu Dios a instruí Noe p’e predicá, no tin duda cu su sentido di principio i su amor pa próhimo tambe a impuls’é p’e haci esei. Siendo cu nos ta biba den un tempu mescos cu di Noe, laga nos imitá su actitud i ehempel excelente.
Distinto for di clero di su tempu, Jesus a siña e hendenan pensa den término di principionan. Su Sermon Riba Ceru ta un ehempel. Henter su tenor ta un apelacion na principio. (Mateo, capítulo 5-7) Jesus a siña e manera aki pasobra, mescos cu Abel i Noe promé cuné, e di berdad tabata conocé Dios. Asta como hóben, el a onra e berdad fundamental: “No ta di pan so . . . sino di tur expresion di Jehova su boca hende ta biba.” (Deuteronomio 8:3; Lucas 2:41-47) Sí, e clave pa ser un persona di principio divino realmente ta: conocé Jehova, sa kico ta agrad’é, kico ta desagrad’é, i conocé su propósitonan. Ora e principionan aki tocante Dios ta dirigí nos bida, nan ta bira, en efecto, principionan bibu.—Jeremías 22:16; Hebreonan 4:12.
Principionan i Curason
Ta posibel pa obedecé un ley solamente di mala gana, tal bes debí na miedu di un castigu pa desobedencia. Sin embargo, pa bo cumpli cu un principio, bo no por tin un actitud asina, pasobra e esencia mes di principionan ta pone cu si bo laga nan dirigí bo bida, bo ta obedecé di curason. Considerá Josef cu, mescos cu Abel i Noe, a biba promé cu e pacto di Ley di Moises a ser establecí. Ora esposa di Pótifar a purba seducié, Josef a contestá: “Con mi por cometé e gran maldad aki i realmente peca contra Dios?” Sí, Josef tabata conocé e principio cu esposo i esposa ta “un solo carni.”—Génesis 2:24; 39:9.
Awe mundu falta principionan hustu. Hende mundano ta alimentá nan mes di un manera golos cu violencia i inmoralidad. E peliger ta cu un cristian lo por ser tentá pa dal hap chikitu, tal bes secretamente di e mésun ‘junk food’—película, video of buki. Ta ki encomendabel, anto, ora nos, mescos cu Josef, ta rechasá loke ta malu pasobra en principio nos ta odia loke ta malu, cordando cu Dios lo preservá solamente esnan leal atrabes dje binidero “tribulacion grandi.” (Mateo 24:21) Sí, principalmente loke nos ta den privá, i no den público, ta revelá loke nos berdaderamente ta di paden.—Salmo 11:4; Proverbionan 15:3.
Consecuentemente, si nos laga principionan di Bijbel guia nos, nos lo no busca supuesto buracu den e leynan di Dios; ni nos lo no purba wak con leu nos por bai sin realmente kibra un cierto ley. Un pensamentu asina ta malu pa nos mes; e ta perhudicá nos finalmente.
Busca e Principio Tras dje Ley
Naturalmente, leynan ta hunga un papel vital den bida di un cristian. Nan ta manera guardianan cu ta yuda protehá nos, i nan ta fundá riba hopi principio importante. Si nos keda sin percibí e principionan aki, nos amor pa e leynan relacioná cu nan por mengua. E antiguo nacion di Israel a demostrá esaki.
Dios a duna Israel e Dies Mandamentu, di cua e promé a taha e adoracion di cualkier otro dios cu no ta Jehova. Un berdad fundamental tras dje ley aki ta cu Jehova a crea tur cos. (Exodo 20:3-5) Pero e nacion a cumpli cu e principio aki? Jehova mes ta contestá: “‘Abo ta nos tata’ [e israelitanan a bisa] un pida palu i [nan a sclama] ‘Mama’ na un piedra. Pero pa mi [Jehova] nan a bira lomba i a kita cara for di mi.” (Jeremías 2:27, The New English Bible) Ki un bobedad sin heful i sin principio! I cuantu dolor esei a causa n’e curason di Jehova!—Salmo 78:40, 41; Isaías 63:9, 10.
Cristiannan tambe tin leynan cu ta bini di Dios. Por ehempel, nan tin cu keda leu di idolatria, inmoralidad sexual i maluso di sanger. (Echonan 15:28, 29) Ora bo pensa riba nan, nos por mira principionan fundamental, manera: Dios ta merecé nos debocion exclusivo; nos mester ta fiel na nos casá; i Jehova ta nos Dunador di Bida. (Génesis 2:24; Exodo 20:5; Salmo 36:9) Si nos ta percibí i tambe apreciá profundamente e principionan tras dje instruccionnan aki, nos ta mira cu nan ta pa nos mes bon. (Isaías 48:17) Pa nos, Dios su “mandamentunan no ta un carga pisá.”—1 Juan 5:3.
Aunke e israelitanan a ignorá e mandamentunan di Dios den pasado, p’e tempu di Jesus nan “doktornan di ley,” e escribanan, a bai n’e otro extremo. Nan a formulá un monton di regla i tradicion cu a obstaculisá adoracion puru i a sconde principionan divino. (Mateo 23:2, NEB) Hende a sinti cu nan mester a conformá nan cu fracaso, desesperacion of hipocresia. (Mateo 15:3-9) I hopi dje reglanan trahá dor di hende tabata inhumano. Net promé cu Jesus a cura un homber cu un man secu, el a puntra e fariseonan presente: “Ta legal pa riba sabat haci un bon obra?” Nan silencio a grita cu no, loke a pone Jesus sinti su mes “completamente tristu debí na nan curason sin heful.” (Marco 3:1-6) E fariseonan kisas lo a sali yuda un animal doméstico (un inversion financiero) cu a keda pegá of heridá riba sabat, pero nunca un homber of un muher—no a ménos cu e tabata un asuntu di bida of morto. Sí, nan tabata asina obsesioná cu regla di hende i detayenan legal cu mescos cu vruminga loco ta keda core bai bin riba un pintura, asina nan a faya na mira e cuadro completo—e principionan divino.—Mateo 23:23, 24.
Sin embargo, asta esnan yong, ora nan curason ta sincero, por trece onor na Jehova ora nan comprendé principionan di Bijbel. E maestro di Rebecca, di diestres aña, a puntra e klas ken lo hunga wega di placa. Mayoria a bisa cu nan lo no hacié. Tog, ora vários situacion a ser mencioná, tur cu excepcion di Rebecca a admití cu nan lo hunga placa den un manera of otro. E maestro a puntra Rebecca si lo e cumpra un lot di 35 cen riba un rifa pa recaudá fondo pa un bon causa. Rebecca a bisa no i a duna e motibunan bíblico pakico esei lo tabata un forma di wega di placa. E ora ei su maestro a bisa henter e klas: ‘Den mi opinion, Rebecca ta e único mucha aki cu tin loke ami ta yama “principio” den e berdadero sentido dje palabra.’ Sí, Rebecca lo por a djis contestá: “Esei ta contra mi religion,” pero el a pensa mas leu cu esei; e por a contestá pakico wega di placa ta robes i pakico el a nenga di participá den dje.
Ehempelnan manera Abel, Noe, Josef i Jesus ta mustra nos con nos ta saca beneficio dor di usa nos “capacidad di pensa” i nos “facultad di razoná” den adorá Dios. (Proverbionan 2:11; Romanonan 12:1) Ancianonan cristian ta haci bon di imitá Jesus den nan trabou di “pastoreá e tou di Dios bou di [nan] cuido.” (1 Pedro 5:2) Manera e ehempel di Jesus a mustra bon cla, amantenan di principionan divino ta esnan cu ta prosperá bou dje soberania di Jehova.—Isaías 65:14.