“Hiba un Lucha Duru pa e Fe”!

“Hiba un lucha duru pa e fe cu una bes pa semper a ser entregá n’e santunan.”—HUDAS 3.

 1. Den ki sentido cristiannan berdadero awe ta den un guera?

SEMPER soldánan den guera tabatin un bida duru. Imaginá cu bo tin cu bisti un ekipo completo di guera i cu bo tin cu marcha un cantidad grandi di kilometer den tur tipo di weer, pasando den entrenamentu agotante den uso di arma, of cu bo tin cu defendé bo mes contra vários situacion peligroso cu lo por causa morto of herida. Sin embargo, cristiannan berdadero no ta participá den e gueranan dje nacionnan. (Isaías 2:2-4; Juan 17:14) Tog, nos no mester lubidá nunca cu den un sentido nos tur ta den guera. Satanas ta yen di odio contra Jesucristo i su siguidónan riba tera. (Revelacion 12:17) Tur hende cu dicidí di sirbi Jehova Dios, de facto, ta meldu nan mes como soldá pa bringa un guera spiritual.—2 Corintionan 10:4.

 2. Con Hudas ta describí e guera cristian, i con su carta por yuda nos want’é?

² Apropiadamente, Jesus su mitar ruman Hudas ta skirbi: “Stimánan, aunke mi tabata haci tur esfuerso pa skirbi boso tocante e salbacion cu nos tin en comun, mi a haña cu ta necesario pa skirbi boso pa consehá boso pa hiba un lucha duru pa e fe cu una bes pa semper a ser entregá n’e santunan.” (Hudas 3) Ora Hudas a urgi cristiannan pa “hiba un lucha duru,” el a usa e expresion conectá cu e palabra pa “agonia.” Sí, e lucha aki por ta difícil, asta agonisante! Bo ta haña cu tin bes ta difícil pa wanta den e guera aki? Hudas su carta corticu pero poderoso por yuda nos. E ta urgi nos pa resistí inmoralidad, pa respetá autoridad cu Dios a establecé, i pa tene nos mes den Dios su amor. Laga nos mira con pa aplicá e conseho aki.

Resistí Inmoralidad

 3. Ki situacion di emergencia e congregacion cristian den tempu di Hudas a hañ’é confrontá cuné?

³ Hudas por a mira cu no ta tur su compañeronan cristian tabata ganando e guera contra Satanas. Un situacion di emergencia a enfrentá e tou. Hudas ta skirbi cu hendenan corupto a “drenta na scondí.” E hendenan aki sutilmente tabata promové inmoralidad. I di un manera astuto nan tabata hustificá nan echonan, ‘cambiando e bondad inmerecí di nos Dios den un excuus pa libertinahe.’ (Hudas 4) Tal bes, mescos cu algun gnóstico di antigwedad, nan tabata razoná cu mas un hende peca, mas e por a ricibí e gracia di Dios—pues, de facto, tabata mihó pa peca mas tantu! Of tal bes nan a haña cu un Dios bondadoso nunca lo castigá nan. Sea cual sea e caso, nan tabata robes.—1 Corintionan 3:19.

 4. Ki tres ehempel bíblico di Jehova su huicionan di pasado Hudas ta cita?

⁴ Hudas ta refutá nan razonamentunan malbado dor di cita tres ehempel di Jehova su huicionan den pasado: contra e israelitanan cu “no a mustra fe”; contra “angel cu . . . a bandoná nan propio i debido lugá di biba” pa por a peca cu hende muher; i contra e habitantenan di Sódoma i Gomora, cu “a cometé fornicacion en exceso i a bai tras di carni pa uso innatural.” (Hudas 5-7; Génesis 6:2-4; 19:4-25; Númeronan 14:35) Den cada caso Jehova a trece un huicio resonante contra e pecadónan.

 5. For di cua profeta di antigwedad Hudas ta cita, i con e profecia ei a mustra cu su cumplimentu ta absolutamente sigur?

⁵ Mas despues, Hudas ta referí na un huicio di un alcanse asta mas largu. E ta cita un profecia di Enoc—un pasashi cu no ta ser hañá ningun otro caminda den e Scritura inspirá.a (Hudas 14, 15) Enoc a profetisá di un tempu ora Jehova lo a husga tur e malbadonan i nan obranan malbado. Interesantemente, Enoc a papia usando e verbo pasado, pasobra e huicionan di Dios tabata asina sigur cu ta como si fuera nan a tuma lugá caba. E hendenan kisas a haci bofon di Enoc i despues di Noe, pero tur e mofadónan ei a hoga den e Diluvio mundial.

 6. (a) Di kico mester a recordá e cristiannan den Hudas su tempu? (b) Pakico nos tin cu tuma e recordatorionan di Hudas na pechu?

⁶ Pakico Hudas a skirbi dje huicionan divino aki? Pasobra e tabata sa cu algun di esnan cu a asociá cu e congregacionnan cristian den su mes tempu tabata cometé picá mes repugnante i reprensibel cu esnan cu a provocá e huicionan ei di pasado. P’esei, Hudas ta skirbi cu mester recordá congregacionnan di algun berdad spiritual básico. (Hudas 5) Ta evidente cu nan a lubidá cu Jehova Dios a mira loke nan tabata haci. Sí, ora su sirbidónan violá su leynan deliberadamente, contaminando nan mes i otronan, e ta mira. (Proverbionan 15:3) Actonan asina ta ofendé Dios profundamente. (Génesis 6:6; Salmo 78:40) E idea cu nos como simpel hende por afectá e sintimentunan dje Señor Soberano di universo ta inspirá temor. E ta vigilá nos tur dia, i ora nos haci nos máximo esfuerso pa sigui e pasonan di su Yu, Jesucristo, e ora ei nos conducta ta alegrá su curason. P’esei, laga nos nunca sinti nos ofendí p’e recordatorionan cu Hudas ta duna, sino tuma nan na pechu.—Proverbionan 27:11; 1 Pedro 2:21.

 7. (a) Pakico ta masha importante pa esnan enbolbí den malecho serio busca yudansa mesora? (b) Con nos tur por evitá inmoralidad?

⁷ Jehova no ta mira so pero e ta actua tambe. Como un Dios di husticia, tardi of trempan e ta trece castigu riba e malbadonan. (1 Timoteo 5:24) Hende cu ta razoná cu su huicionan ta djis historia antiguo i cu e no ta preocupá cu e maldad cu nan ta haci, ta simplemente gañando nan mes. Ta masha importante pa cualkier hende awe cu ta enbolbí den inmoralidad busca yudansa mesora cerca ancianonan cristian! (Santiago 5:14, 15) E menasa cu inmoralidad ta presentá den nos guera spiritual mester pone nos pensa seriamente. Tur aña tin víctima—personanan cu ta ser expulsá for di nos seno, di cua e mayoria ta pa motibu cu nan a cometé actonan inmoral sin repentí. Nos mester ta firmemente determiná pa resistí cualkier tentacion so caba cu ta cuminsá hiba nos den un direccion asina.—Compará cu Mateo 26:41.

Respetá Autoridad cu Dios A Establecé

 8. Ken tabata “esnan glorioso” mencioná na Hudas 8?

⁸ Un otro problema cu Hudas ta trata ta e falta di respet pa autoridad cu Dios a establecé. Por ehempel, den versículo 8 e ta acusá e mésun hendenan malbado di “ta papia ofensivamente di esnan glorioso.” Ken tabata “esnan glorioso” aki? Nan tabata hombernan imperfecto, pero Jehova a otorgá responsabilidadnan na nan pa medio di su spiritu santu. Por ehempel, e congregacionnan tabatin ancianonan cu tabatin e encargo di pastoreá e tou di Dios. (1 Pedro 5:2) Tambe tabatin superintendentenan biahero, manera apostel Pablo. I e cuerpo di anciano na Jerusalem a actua como un cuerpo gobernante, tumando decisionnan cu tabatin efecto riba henter e congregacion cristian. (Echonan 15:6) Hudas tabata profundamente preocupá cu algun persona den e congregacionnan tabata papia ofensivamente di e hombernan ei, of blasfemando nan.

 9. Ki ehempelnan relacioná cu falta di respet pa autoridad Hudas ta cita?

⁹ Pa denunciá tal abla sin respet, den versículo 11, Hudas ta cita tres ehempel mas como recordatorio: Cain, Balam i Core. Cain a ignorá Jehova su conseho amoroso i boluntariamente a sigui su mes curso di asesinato yen di odio. (Génesis 4:4-8) Balam a ricibí diferente spiertamentu cu indudablemente a bini for di un fuente sobrenatural—asta su mes buricu hembra a papia cuné! Pero Balam egoistamente a sigui trama su complot contra e pueblo di Dios. (Númeronan 22:28, 32-34; Deuteronomio 23:5) Core tabatin su mes posicion di responsabilidad, pero esei no tabata suficiente. El a fomentá rebelion contra e homber mas mansu riba tera, Moises.—Númeronan 12:3; 16:1-3, 32.

10. Con algun persona awe por cai den e trampa di “papia ofensivamente di esnan glorioso,” i pakico mester evitá di papia asina?

¹⁰ Ki bibu e ehempelnan aki ta siña nos pa scucha conseho i respetá esnan cu Jehova ta usa den posicionnan di responsabilidad! (Hebreonan 13:17) Ta masha fácil pa haña falta den e ancianonan nombrá, pasobra nan ta imperfecto, mescos cu nos tur ta imperfecto. Pero si nos ta keda teima riba nan faltanan i debilitá otronan su respet pa nan, nos lo no ta ‘ta papiando ofensivamente di esnan glorioso’? Den versículo 10, Hudas ta mencioná esnan cu “ta papia ofensivamente di tur loke nan realmente no conocé.” Algun tin biaha lo criticá un decision cu e cuerpo di anciano of un comité hudicial tuma. Sin embargo, nan no ta na haltura di tur e detayenan cu e ancianonan tabatin cu considerá pa por a yega na un decision. Pues pakico papia ofensivamente di cosnan cu nan realmente no sa? (Proverbionan 18:13) Esnan cu ta persistí den tal papiamentu negativo por causa division den e congregacion i tal bes asta ser compará cu “barancanan scondí bou di awa” na reunionnan di compañeronan creyente. (Hudas 12, 16, 19) Hamas nos lo kier ta un peliger spiritual pa otronan. Mas bien, laga cada un di nos keda determiná pa apreciá hombernan responsabel pa nan trabou duru i debocion n’e tou di Dios.—1 Timoteo 5:17.

11. Pakico Miguel a abstené di trece un huicio cu palabranan ofensivo contra Satanas?

¹¹ Hudas ta cita un ehempel di un persona cu a respetá autoridad debidamente establecí. E ta skirbi: “Ora Miguel e arcangel tabatin un diferencia cu e Diabel i tabata discutí tocante e curpa di Moises, e no a tribi trece un huicio contra dje cu palabranan ofensivo, sino a bisa: ‘Jehova censurá bo.’” (Hudas 9) E relato fasinante aki, cu ta Hudas so a registrá den e Scritura inspirá, ta siña nos dos les distinto. Na un banda, e ta siña nos pa laga husgamentu den man di Jehova. Ta bisto cu Satanas kier a malusá e curpa dje homber fiel Moises pa por a promové adoracion falsu. Esta malbado! Tog, Miguel humildemente a abstené di trece un huicio, pasobra ta Jehova so tabatin e autoridad ei. Cuantu mas anto, nos mester abstené di husga hombernan fiel cu ta purba sirbi Jehova.

12. Kico esnan den posicion di responsabilidad den e congregacion cristian por siña for dje ehempel di Miguel?

¹² Di otro banda, esnan cu tin un midí di autoridad den e congregacion tambe por siña un les for di Miguel. Al fin i al cabo, aunke Miguel tabata e “arcangel,” hefe di tur angel, e no a abusá di su posicion di poder, ni ora el a ser provocá. Ancianonan fiel ta sigui e ehempel ei estrechamente, reconociendo cu abusu di nan autoridad ta un falta di respet pa Jehova su soberania. Hudas su carta tabatin hopi di bisa tocante hombernan cu tabatin posicionnan di respet den e congregacionnan pero cu a bin ta abusá di nan poder despues. Por ehempel, den versículonan 12 pa 14, Hudas ta skirbi un denunciacion fuerte contra “wardadó cu ta come sin miedu.” (Compará cu Ezekiel 34:7-10.) Cu otro palabra, nan promé interes tabata den beneficiá nan mes, no e tou di Jehova. Awe ancianonan por siña hopi for dje ehempelnan negativo ei. Realmente, aki Hudas su palabranan ta pinta un cuadro bibu di loke nos no kier bira. Ora nos sucumbí na egoismo, nos no por ta soldá di Cristo; nos ta muchu ocupá bringando pa nos interesnan personal. Mas bien, laga nos tur biba segun e palabranan di Jesus: “Tin mas felicidad den duna cu tin den ricibí.”—Echonan 20:35.

“Mantené Boso den e Amor di Dios”

13. Pakico nos tur mester tin e deseo sincero pa permanecé den e amor di Dios?

¹³ Yegando na fin di su carta, Hudas ta duna e conseho conmovedor aki: “Mantené boso den e amor di Dios.” (Hudas 21) Nada lo yuda nos bringa e guera cristian mihó cu e solo cos aki, esta, keda e obheto di Jehova Dios su amor. Al fin i al cabo, amor ta Jehova su cualidad dominante. (1 Juan 4:8) Pablo a skirbi n’e cristiannan na Roma: “Mi ta convencí cu ni morto ni bida ni angel ni gobiernu ni cosnan aki awor ni cosnan pa bini ni podernan ni haltura ni profundidad ni ningun otro creacion lo por separá nos for di e amor di Dios cu ta den Cristo Jesus nos Señor.” (Romanonan 8:38, 39) Pero, con nos ta permanecé den e amor ei? Tuma nota di tres dje medidanan cu nos por tuma, segun Hudas.

14, 15. (a) Kico kier men edificá nos mes riba nos “santísimo fe”? (b) Con nos lo por examiná e condicion di nos armadura spiritual?

¹⁴ Di promé, Hudas ta bisa nos pa sigui edificá nos mes riba nos “santísimo fe.” (Hudas 20) Manera nos a mira den e artículo anterior, esaki ta un proceso continuo. Nos ta manera edificionan cu mester di mas i mas fortificacion contra e mal tempu cu ta suta cada bes mas pisá contra nos. (Compará cu Mateo 7:24, 25.) P’esei laga nos nunca bira demasiado confiá. Mas bien, laga nos wak unda nos por edificá nos mes riba e fundeshi di nos fe, birando soldánan mas fuerte i mas fiel di Cristo. Por ehempel, kisas nos por considerá e partinan dje armadura spiritual describí na Efesionan 6:11-18.

¹⁵ Kico ta e condicion di nos mes armadura spiritual? Nos “escudo grandi di fe” ta mes fuerte cu e mester ta? Ora nos wak bek riba añanan recien, nos ta mira señalnan di a slèk, manera baha den asistencia na reunion, perde celo p’e ministerio, of ménos entusiasmo pa studio personal? Señalnan asina ta indicacion di peliger! Nos tin cu actua awor pa edificá i fortalecé nos mes den e berdad.—1 Timoteo 4:15; 2 Timoteo 4:2; Hebreonan 10:24, 25.

16. Kico kier men haci oracion cu spiritu santu, i kico ta un cos cu nos mester pidi Jehova p’e regularmente?

¹⁶ Un di dos manera pa permanecé den e amor di Dios ta pa sigui ‘haci oracion cu spiritu santu.’ (Hudas 20) Esei ta nificá haci oracion bou dje influencia dje spiritu di Jehova i na armonia cu su Palabra inspirá pa spiritu. Oracion ta un medio vital pa personalmente hala cerca Jehova i expresá nos debocion na dje. Hamas nos mester neglishá e privilegio maraviyoso aki! I ora nos ta haci oracion, nos por pidi—eigenlijk, sigui pidi—spiritu santu. (Lucas 11:13) Esei ta e forsa di mas poderoso disponibel pa nos. Cu e yudansa ei, semper nos por permanecé den e amor di Dios i perseverá como soldá di Cristo.

17. (a) Pakico Hudas su ehempel den e asuntu di misericordia ta asina remarcabel? (b) Con cada un di nos por sigui mustra misericordia?

¹⁷ Di tres, Hudas ta urgi nos pa sigui mustra misericordia. (Hudas 22) Su mes ehempel relacioná cu esaki ta remarcabel. Al fin i al cabo, e tabatin rason pa sinti su mes molestiá p’e corupcion, inmoralidad i apostasia cu tabata sluip drenta e congregacion cristian. No obstante, e no a sucumbí na pánico, adoptando e punto di bista di cu e condicionnan tabata tog demasiado peligroso pa demostrá un cualidad “suave” manera misericordia. No, el a urgi su rumannan pa sigui mustra misericordia ki ora cu tabata posibel, razonando bondadosamente cu esnan cu tabata sufri di duda i asta ‘ranca for di candela’ esnan cu a desviá i yega na rand di cometé picá serio. (Hudas 23; Galationan 6:1) Ki un conseho excelente pa ancianonan den e tempu difícil aki! Nan tambe ta haci esfuerso pa mustra misericordia unda cu tin un base pa esei, aunke tog nan ta keda firme ora ta necesario. Di mes manera nos tur kier mustra misericordia na otro. Por ehempel, en bes di tene otro hende na curason pa co’i kens, nos por ta generoso den pordoná nan.—Colosensenan 3:13.

18. Con nos por ta sigur di victoria den nos guera spiritual?

¹⁸ E guera cu nos ta bringa no ta unu fácil. Manera Hudas ta bisa, e ta “un lucha duru.” (Hudas 3) Nos enemigunan ta poderoso. No ta Satanas so, sino tambe su mundu malbado i nos mes imperfeccionnan ta pará cla pa atacá nos. Tog, nos por ta completamente sigur di victoria! Pakico? Pasobra nos ta n’e banda di Jehova. Hudas ta terminá su carta cu un recordatorio cu Jehova merecé pa ser atribuí cu “gloria, mahestad, poder i autoridad pa tur eternidad di pasado i pa awor i den tur eternidad.” (Hudas 25) Esei no ta un pensamentu cu ta inspirá temor? Por tin cualkier duda, anto, cu e mésun Dios aki “por warda boso di trompecá”? (Hudas 24) Sigur cu no! Laga cada un di nos sea determiná pa sigui resistí inmoralidad, pa respetá autoridad cu Dios a establecé, i pa mantené nos mes den e amor di Dios. Den e manera ei, nos lo disfrutá di un glorioso victoria huntu.

[Nota]

Preguntanan di Repaso

◻ Con Hudas su carta ta siña nos resistí inmoralidad?

◻ Pakico ta asina importante pa respetá autoridad cu Dios a establecé?

◻ Pakico ta algu masha serio pa malusá autoridad di congregacion?

◻ Kico nos por haci pa permanecé den e amor di Dios?

[Plachi na página 15]

Distinto di soldánan romano, cristiannan ta bringa un guera spiritual

[Plachi na página 18]

Wardadónan cristian ta sirbi impulsá pa amor i no pa egoismo