Skucha Loke e Spiritu Ta Bisa!

“Esun ku tin orea, lag’é tende loke e spiritu ta bisa e iglesianan.”—REVELASHON 3:22.

1, 2. Ki konseho nos ta bolbe haña relashoná ku e mensahenan ku Hesus tabatin p’e shete kongregashonnan menshoná den Revelashon?

YEHOVA su sirbidónan tin ku paga bon tinu na e palabranan inspirá pa spiritu ku Hesukristu a deklará na e shete kongregashonnan menshoná den e buki bíbliko di Revelashon. De echo, kada un di e mensahenan aki ta kontené e konseho aki: “Esun ku tin orea, lag’é tende loke e spiritu ta bisa e iglesianan [òf, e kongregashonnan].”—Revelashon 2:7, 11, 17, 29; 3:6, 13, 22.

² Nos a konsiderá kaba e mensahe ku Hesus tabatin pa e angelnan—òf superintendentenan—di Efeso, Smirna i Pérgamo. Kon nos por saka benefisio di loke el a bisa mediante spiritu santu na e kuater otro kongregashonnan?

Na e Angel di Tiatira

 3. Unda Tiatira tabata keda, i pa ki produkto e tabata spesialmente famoso?

³ “E Yu di Dios” ta elogiá plùs skual e kongregashon di Tiatira. (Lesa Revelashon 2:18-29.) Tiatira (awor Akhisar) a ser konstruí na oria di un taki di e Riu Gediz (ántes Hermus) den parti wèst di Asia Menor. E stat tabata renombrá pa vários fishi di su artesanonan. Su trahadónan di dai a usa e rais di e mata di rubia (meekrapwortel) pa saka nan famoso koló skarlata òf púrpura. Lidia, kende despues a bira un kristian durante Pablo su bishita na Filipos na Gresia, tabata ‘un bendedó di tela púrpura di e stat di Tiatira.’—Echonan 16:12-15.

 4. Pa kiko e kongregashon di Tiatira a haña elogio?

⁴ Hesus a elogiá e kongregashon di Tiatira pa su bon obranan, su amor, fe, perseveransia i sirbishi. De echo, ‘nan obranan di awor tabata mas grandi ku esunnan di promé.’ Sin embargo, asta si nos a traha un bon nòmber, nos nunka mester neglishá nos moralidat.

5-7. (a) Ken “e muhé Jezabel” tabata, i kiko mester a hasi ku su influensia? (b) Ku kiko Kristu su mensahe na e kongregashon di Tiatira ta yuda hende muhé deboto?

⁵ E kongregashon di Tiatira a tolerá idolatria, siñansa falsu i inmoralidat seksual. Den dje tabatin “e muhé Jezabel,” kisas un grupo di hende muhé ku karakterístikanan meskos ku e reina malbado Jezabel di e reino di dies tribu di Israel. Algun intelektual ta indiká ku posiblemente e “profeta” ei di Tiatira a purba hinka kristiannan den tentashon pa adorá e dios- i diosanan di e gremionan di artesano i pa partisipá den fiestanan ku a inkluí kuminda sakrifiká na ídolo. No laga ningun muhé ku ta proklamá su mes komo profeta, trata na manipulá otro rumannan den e kongregashon kristian djawe!

⁶ Kristu tabata bai ‘tir’é riba kama di malesa, i esnan ku a kometé adulterio kuné lo e tira den gran tribulashon, a ménos ku nan a repentí di su obranan.’ Superintendentenan nunka mester entregá na tal siñansa i influensia malbado, i ningun kristian tin nodi kometé fornikashon spiritual ni karnal òf partisipá den idolatria pa nan realisá ku e “kosnan profundo di Satanas” ta realmente baho. Si nos hasi kaso di Hesus su spièrtamentu, ‘nos lo tene firme na loke nos tin,’ i piká lo no dominá nos. Komo ku e ungínan resusitá a rechasá práktikanan, pashonnan i metanan malbado, nan ta risibí “outoridat riba e nashonnan” i nan lo djòin Kristu ora e ta kibra e nashonnan na pida-pida. E kongregashonnan djawe tin strea simbóliko, i e ungínan lo risibí “e strea briante di mardugá,” ku ta e Brùidehòm Hesukristu, ora nan ser resusitá pa bida den shelu.—Revelashon 22:16.

⁷ E kongregashon di Tiatira a haña e spièrtamentu pa no tolerá e influensia malbado di muhénan apóstata. Kristu su mensahe inspirá pa spiritu na e kongregashon ta yuda hende muhé deboto djawe mantené nan posishon ku Dios a asigná na hende muhé. Nan no ta purba ehersé outoridat riba hende hòmber ni nan no ta purba sedusí ningun ruman hòmber pa kometé fornikashon spiritual ni karnal. (1 Timoteo 2:12) Mas bien, tal hende muhé ta pone un bon ehèmpel den hasi obranan ekselente i di sirbi pa e alabansa di Dios. (Salmo 68:11, NW; 1 Pedro 3:1-6) Si e kongregashon protehá loke e tin—esta, su doktrina i kondukta puru i su presioso sirbishi di Reino—Kristu lo bini ku rekompensanan maravioso i no ku ehekushon.

Na e Angel di Sardis

 8. (a) Unda Sardis tabata situá, i kiko ta algun detaye di e stat ei? (b) Dikon e kongregashon di Sardis tabatin mester di yudansa?

⁸ E kongregashon di Sardis tabatin mester di yudansa urgente pasobra e tabata spiritualmente morto. (Lesa Revelashon 3:1-6.) Sardis tabata un stat próspero, situá rònt di 50 kilometer sùit di Tiatira. Komersio, e tereno fértil i e produkshon di tela i tapeit di lana a yuda hasié un stat riku ku na dado momentu tabatin alrededor di 50.000 habitante. Segun e historiadó Josefo, Sardis tabatin un komunidat hudiu grandi den siglo 1 promé ku nos era. Entre e ruinanan di e stat tin un snoa i un tèmpel di e diosa di Efeso, Artemis.

 9. Kiko nos mester hasi si nos aktividatnan di sirbishi ta superfisial i sin smak?

⁹ Kristu a bisa e angel di e kongregashon di Sardis: “Mi konosé bo obranan, ku bo tin e nòmber di ta bibu, ma bo ta morto.” Kiko nos por hasi si nos tin e reputashon di ta personanan spiritual, ma en realidat nos no ta muchu interesá den privilegionan kristian i nos aktividatnan di sirbishi ta superfisial, sin smak i spiritualmente nos ta ‘kasi morto’? Den tal kaso nos tin ku sigui ‘kòrda kon nos a risibí i tende’ e mensahe di Reino, i nos mester rebibá nos esfuersonan den sirbishi sagrado. Un kos ku sigur nos mester kuminsá hasi bèk ta partisipá di henter alma den e reunionnan kristian. (Hebreonan 10:24, 25) Kristu a spièrta e kongregashon di Sardis: “Si bo no spièrta, lo mi bin manera un ladron, i lo bo no sa ki ora mi ta bin riba bo.” Ki tal di nos tempu? Pronto nos lo tin ku duna kuenta.

10. Kiko por ta e kaso di algun kristian asta den un situashon manera esun na Sardis?

¹⁰ Asta den un situashon manera esun na Sardis, por tin algun persona ku ‘no ta mancha nan paña i ku por kana ku Kristu na blanku bistí pasobra nan ta digno.’ Na tur momentu hende por rekonosé ku nan ta kristian, i nan ta perkurá pa nan keda sin mancha moral òf religioso di e mundu aki. (Santiago 1:27) P’esei Hesus ‘lo no kita nan nòmber for di e buki di bida, ma lo konfesá nan dilanti di su Tata i e angelnan.’ Kristu su brùit di ungínan a ser deklará digno di kana kuné, i nan lo ta bistí na lino fini, briante i limpi ku ta simbolisá e echonan hustu di e santunan di Dios. (Revelashon 19:8) E privilegionan maravioso di sirbishi ku ta spera nan den shelu ta stimulá nan pa vense e mundu aki. Bendishon ta spera tambe esnan ku ta den fila pa bida eterno riba tera. Nan nòmber tambe ta skirbí den e buki di bida.

11. Kiko nos mester hasi si nos ta kabishando spiritualmente?

¹¹ Niun di nos no kier kai den e situashon spiritual lamentabel di e kongregashon di Sardis. Pero kiko si nos ripará ku nos ta kabishando spiritualmente? Nos mester aktua rápidamente pa nos mes bon. Suponé ku kosnan malbado ta atraé nos òf nos ta birando floho pa bai reunion òf den nos sirbishi di vèlt. Laga nos buska Yehova su yudansa mediante orashon sinsero. (Filipensenan 4:6, 7, 13) Lesa Beibel tur dia i studia e Skritura i publikashonnan di ‘e mayordomo fiel’ lo yuda nos keda spiritualmente lantá. (Lukas 12:42-44) E ora ei nos lo ta manera esnan na Sardis ku tabatin e aprobashon di Kristu, i nos lo ta un bendishon pa nos rumannan den fe.

Na e Angel di Filadelfia

12. Kon lo bo deskribí e situashon religioso na antiguo Filadelfia?

¹² Hesus a elogiá e kongregashon di Filadelfia. (Lesa Revelashon 3:7-13.) Filadelfia (awor Alasehir) tabata e sentro próspero di un region den wèst di Asia Menor kaminda nan tabata produsí biña. De echo, nan dios prinsipal tabata Dioniso, e dios di biña. Evidentemente e hudiunan na Filadelfia a purba konvensé kristiannan hudiu pa nan keda sigui sierto práktikanan di e Lei di Moisés òf bolbe bèk na nan. Pero nan no a logra den nan intento.

13. Kon Kristu a usa “e yabi di David”?

¹³ Kristu “tin e yabi di David,” pues el a ser konfiá ku tur e interesnan di Reino i ku atministrashon di e famia di fe. (Isaias 22:22; Lukas 1:32) Hesus a usa e yabi ei pa habri oportunidatnan i privilegionan relashoná ku e Reino pa e kristiannan na Filadelfia i na otro parti. Desde 1919 el a pone dilanti di e ‘mayordomo fiel’ “un porta hanchu” ku ta hiba na predikashon di e Reino, un porta ku niun opositor no por sera. (1 Korintionan 16:9; Kolosensenan 4:2-4) Klaru ku a sera e porta ku ta hiba na privilegionan di Reino pa esnan di “e snoa di Satanas,” pasobra nan no ta israelitanan spiritual.

14. (a) Kiko Hesus a primintí e kongregashon na Filadelfia? (b) Kon nos por evitá di kai durante “e ora di prueba”?

¹⁴ Hesus a duna kristiannan den antiguo Filadelfia e promesa aki: “Pasobra bo a warda mi mandamentu pa perseverá, ami tambe lo warda bo di e ora di prueba ku lo bin riba henter mundu.” Pa un kristian por prediká, e mester tin e klase di perseveransia ku Hesus a desplegá. Nunka e no a entregá na enemigu, sino mas bien a sigui hasi e boluntat di su Tata. P’esei Kristu a ser resusitá pa bida inmortal den shelu. Si nos tene firme na nos desishon pa adorá Yehova i nos apoyá e Reino dor di prediká e bon nobo, nos lo no kai durante “e ora di prueba,” esta e aktual periodo di prueba. Nos lo sigui ‘tene firme na loke nos tin’ di Kristu dor di hasi esfuerso pa oumentá e interesnan di Reino ei. Hasiendo esaki lo resultá den un korona selestial presiosísimo pa e ungínan i bida eterno riba tera pa nan kompañeronan fiel.

15. Kiko ta ser rekerí di esnan ku lo ta ‘pilar den e tèmpel di Dios’?

¹⁵ Kristu ta agregá: “Esun ku vense, lo mi hasié un pilar den e tèmpel di mi Dios, . . . i lo mi skirbi riba dje e nòmber di mi Dios, i e nòmber di e stat di mi Dios, e Yerusalèm nobo, ku ta baha for di shelu for di mi Dios, i mi nòmber nobo.” Superintendentenan ungí mester boga pa adorashon berdadero. Nan mester sigui kualifiká komo miembro di “e Yerusalèm nobo” dor di prediká tokante e Reino di Dios i keda spiritualmente limpi. Esaki ta nesesario si nan kier ta pilar den e tèmpel selestial glorifiká i pa nan por karga e nòmber di e stat di Dios komo su siudadanonan selestial i kompartí e nòmber di Kristu komo su brùit. I klaru ku nan mester tin orea ku ta “tende loke e spiritu ta bisa e iglesianan.”

Na e Angel di Laodisea

16. Kiko ta algun echo di Laodisea?

¹⁶ Kristu a skual e kongregashon di Laodisea ku tabata satisfecho ku su mes. (Lesa Revelashon 3:14-22.) Laodisea tabata mas o ménos 150 kilometer ost di Efeso i situá na un krusada di rutanan komersial importante den e vaye fèrtil di Riu Liko. E tabata un stat industrial masha próspero i un sentro bankario. Bistínan trahá di e lana pretu di e region ei tabata masha konosí. Siendo e sitio di un skol famoso di medisina, Laodisea probablemente a produsí e remedi pa wowo konosí komo puiru frigio. Asclepio (òf, Eskulapio), un dios di medisina, tabata un di e diosnan prinsipal di e stat. Parse ku Laodisea tabatin un kantidat grandi di hudiu, i algun di nan aparentemente tabata hopi riku.

17. Dikon Hesus a skual e laodisensenan?

¹⁷ Dirigiendo su mes na e kongregashon di Laodisea via su “angel,” Hesus a papia ku outoridat komo “e testigu fiel i berdadero, e prinsipio di e kreashon di Dios.” (Kolosensenan 1:13-16) El a skual e laodisensenan pasobra spiritualmente nan no tabata “ni friu ni kayente.” Komo ku nan tabata lou, Kristu tabata bai skupi nan for di su boka. Lo no tabata difísil pa nan komprondé e ilustrashon ei. Hierápolis, un stat pegá ku nan, tabatin fòntein di awa kayente, i Kolosas tabatin awa friu. Sin embargo, komo ku nan mester a transportá awa riba un distansia grandi pa Laodisea, e awa probablemente tabata lou ora el a yega e stat. Pa un parti di e trayekto, e awa a pasa via un akuadukto. Yegando mas serka di Laodisea, e awa tabata pasa dor di buraku ku nan a bora den blòkinan di piedra pegá na otro ku semènt.

18, 19. Kiko por yuda kristiannan djawe ku ta manera esnan na Laodisea?

¹⁸ Personanan djawe ku ta manera e laodisensenan, no ta un kayente stimulante ni un friu refreskante. Nan lo wòrdu skupí afó, meskos ku awa lou! Hesus no kier pa nan papia p’e komo ‘embahadornan ungí pa Kristu.’ (2 Korintionan 5:20) A ménos ku nan repentí, nan lo pèrdè nan privilegio komo proklamadó di Reino. E laodisensenan a buska rikesa terenal i ‘no tabata sa ku nan tabata deplorabel, miserabel, pober, siegu i sunú.’ Ken ku ta manera nan awe, i ku kier stòp di ta pober, siegu i sunú den sentido spiritual, mester kumpra serka Kristu e “oro refiná” di un fe ku a ser probá, “paña blanku” di hustisia, i ‘ungwento pa hunta wowo kuné’ ku ta drecha bista spiritual. Superintendentenan kristian gustosamente lo yuda e personanan ei bira konsiente di nan nesesidat spiritual ya asina nan por bira “riku den fe.” (Santiago 2:5; Mateo 5:3, NW) Ademas, e superintendentenan mester yuda nan usa e ‘ungwento spiritual pa hunta wowo kuné,’ es desir, yuda nan aseptá i kumpli ku e siñansa, konseho, ehèmpel i aktitut mental di Hesus. Esaki ta un bon remedi ku ta kura “e deseo di karni i e deseo di wowo i e orguyo di bida.”—1 Juan 2:15-17.

¹⁹ Hesus ta skual i disipliná tur esnan ku e ta stima. Superintendentenan bou di dje mester hasi meskos ku ternura. (Echonan 20:28, 29) E laodisensenan mester a bira “ferviente i repentí,” hasiendo kambio den nan manera di pensa i nan estilo di bida. Wèl, akaso algun di nos a kustumbrá ku un estilo di bida ku a pusha nos sirbishi sagrado na Dios na un lugá ménos importante den nos bida? Si esei ta asina, laga nos ‘kumpra ungwento pa hunta wowo kuné serka Hesus’ di manera ku nos por mira e importansia di selosamente buska promé e Reino.—Mateo 6:33.

20, 21. Ken awe ta reakshoná na e manera korekto ora Hesus ta ‘bati na porta,’ i ki speransa nan tin?

²⁰ Kristu a bisa: “Ata, mi ta para na porta i ta bati; si un hende tende mi bos i habri porta, lo mi drenta serka dje, i lo sena kuné i é ku mi.” Hopi bes Hesus a duna instrukshon spiritual ora e tabata kome. (Lukas 5:29-39; 7:36-50; 14:1-24) Awor e ta bati na porta di kongregashonnan ku ta manera esun di Laodisea. E miembronan di e kongregashonnan ei lo reakshoná, rebibá nan amor p’e, risibié paden i lag’é siña nan? Si nan hasié, Kristu lo kome un bankete ku nan i esei lo ta di gran benefisio spiritual pa nan.

²¹ E “otro karnénan” djawe na moda di papia ta laga Hesus drenta, i tal akshon ta hiba na bida eterno. (Juan 10:16; Mateo 25:34-40, 46) Kada ungí ku vense, Kristu lo duna e privilegio di ‘sinta huntu kuné riba su trono, meskos ku e tambe a vense i a sinta huntu ku su Tata riba Su trono.’ Sí, Hesus ta primintí e ungínan ku vense, e gran rekompensa di un trono huntu kuné na man drechi di su Tata den shelu. I e otro karnénan ku vense ta antisipá un lugá maravioso riba tera bou di gobernashon di e Reino.

Nos Tur Por Siña un Lès

22, 23. (a) Kon tur kristian por benefisiá di loke Hesus a bisa e shete kongregashonnan? (b) Kiko nos mester ta determiná pa hasi?

²² No tin duda ku tur kristian por saka masha hopi benefisio di loke Hesus a bisa e shete kongregashonnan na Asia Menor. Por ehèmpel, tumando nota ku Kristu a duna e elogio apropiá, ansianonan kristian amoroso ta ser motivá pa elogiá personanan i kongregashonnan ku ta bai bon spiritualmente. Kaminda tin debilidat, e ansianonan ta yuda nan rumannan den fe apliká remedinan bíbliko. Nos tur por sigui benefisiá di e vários rasgonan di e konseho ku Kristu a duna na e shete kongregashonnan, basta nos ta apliká nan huntu ku orashon sinsero i sin tarda.a

²³ E último dianan aki no ta tempu pa materialismo, pa ta satisfecho ku nos mes ni pa nada otro ku lo por pone nos rindi un sirbishi na Dios ku ta djis pa kara di hende, superfisial i sin smak. P’esei laga tur kongregashon sigui bria bon kla manera kandelá ku Hesus ta mantené na nan lugá. Komo kristiannan fiel, laga nos ta semper determiná pa paga bon tinu ora Kristu ta papia i skucha loke e spiritu ta bisa. Anto nos lo tin goso eterno komo kargadónan di lus pa e gloria di Yehova.

[Nota]

Kon Lo Bo Kontestá?

• Ken “e muhé Jezabel” tabata, i pakiko hende muhé deboto no ta imit’é?

• Ki situashon tabatin den e kongregashon di Sardis, i kiko nos por hasi pa evitá di bira manera hopi di e kristiannan ku a biba einan?

• Kiko Hesus a primintí e kongregashon di Filadelfia, i kon nos por apliká esei awe?

• Dikon Hesus a skual e laodisensenan, pero ki speransa tin dilanti di kristiannan ku ta seloso?

[Plachi na página 16]

Nos mester evitá e kamindanan malbado di “e muhé Jezabel”

[Plachi na página 18]

Hesus a pone dilanti di su siguidónan “un porta hanchu” ku ta hiba na privilegionan di Reino

[Plachi na página 20]

Bo ta laga Hesus drenta i ta skuch’é?