“Laga Nos Bai ku Boso”

1, 2. (a) Kiko Yehova a profetisá ku lo pasa den nos tempu? (b)  E artíkulo akí lo kontestá kua preguntanan? (Wak e promé plachi.)

YEHOVA a bisa ku den nos tempu “dies hòmber for di tur e nashonnan lo kohe bistí di un hudiu tene, bisando: ‘Laga nos bai ku boso, pasobra nos a tende ku Dios ta ku boso.’” (Zak. 8:23) E “hudiu” den e profesia akí ta representá e kristiannan ku Dios a ungi ku spiritu santu. Nan ta ser yamá tambe “e Israel di Dios.” (Gal. 6:16) E “dies hòmber” ta representá tur kristian ku tin e speransa di biba pa semper riba tera. Nan sa ku Yehova a bendishoná e grupo di ungí, i p’esei pa nan ta un onor di por traha huntu ku e ungínan i apoyá nan.

² E palabranan di Zakarías ta mustra bon kla ku e sirbidónan di Dios ta un pueblo masha uní, i Hesus tambe a indiká esei. El a referí na su siguidónan komo dos grupo, un “tou chikitu” i e ‘otro karnénan.’ Pero el a bisa ku nan lo ta “ún tou bou di ún wardadó.” (Luk. 12:32; Huan 10:16) Esaki ta lanta kuater pregunta: (1) E otro karnénan mester sa presis ken tur e ungínan ta pa nan sirbi Dios huntu ku nan? (2) Kon e ungínan mester mira nan mes? (3) Kon bo mester trata un ruman den bo kongregashon ku kuminsá tuma di e pan ku e biña na Konmemorashon? (4) Bo mester preokupá ku awor tin mas hende ta tuma di e pan ku e biña? E artíkulo akí lo kontestá e preguntanan akí.

 3. Dikon no ta posibel pa nos sa presis ken lo forma parti di e 144.000?

³ Akaso e otro karnénan mester sa nòmber di tur e ungínan riba tera awe? Nò. Bon mirá, no tin sentido tampoko pa purba di averiguá ta ken entre e sirbidónan di Dios lo forma parti finalmente di e 144.000.^[1] Dikon nò? Pasobra te na ora mes ku un persona tin e yamada selestial, esei ta djis un invitashon i no un konfirmashon definitivo ku lo e bai shelu. Satanas tambe sa ku e persona mester keda fiel p’e haña su rekompensa, p’esei e ta usa profeta falsu pa purba di gañ’é. (Mat. 24:24) Pues, niun hende no por bisa ku tur siguridat si un ungí lo bai shelu, sino te ora ku Yehova duna e persona ei su aprobashon, òf seyo, final. Anto esaki por sosodé djis promé ku e persona muri fielmente òf promé ku e “tribulashon grandi” kuminsá.—Rev. 2:10; 7:3, 14.

 4. Si nos no sa presis ken tur e ungínan ku tin riba tera awe ta, kon nos por “bai ku” nan?

⁴ Si e otro karnénan no por sa presis ken tur e israelitanan spiritual ku tin riba tera awe ta, kon nan por “bai ku” nan? E profesia di Zakarías ta bisa ku e ‘dies hòmbernan’ lo “kohe bistí di un hudiu tene, bisando: ‘Laga nos bai ku boso, pasobra nos a tende ku Dios ta ku boso.’” Tuma nota ku e hòmbernan akí ta usa e palabra “boso” ora nan ta papia ku e hudiu. Esaki ta nifiká ku e ta representá henter e grupo di ungí, no un persona individual. Pues, pa sigui e hudiu spiritual nos no tin nodi di sa presis ken kada un di e ungínan ta. Mas bien, nos tin ku identifiká ken e grupo ta i dun’é nos apoyo. Niun ora so Beibel no ta animá nos pa sigui un persona individual. E úniko Lider ku nos tin ta Hesus.—Mat. 23:10.

 5. (a) Riba ki spièrtamentu e ungínan mester pensa bon? (b) Kiko e spièrtamentu akí ta kòrda nan?

⁵ Tur ku ta tuma di e pan ku e biña na Konmemorashon mester pensa bon riba e spièrtamentu ku nos ta haña na 1 Korintionan 11:27-29. (Les’é.) Ki punto apòstel Pablo kier a enfatisá den e teksto akí? Wèl, ku ora un kristian ungí ta tuma di e pan ku e biña sin ku e tin un bon relashon ku Dios, e ta aktua ‘na un manera indigno,’ es desir, sin rèspèt pa Dios. (Heb. 6:4-6; 10:26-29) E spièrtamentu akí ta yuda e ungínan kòrda ku nan no a risibí nan rekompensa selestial ainda. Nan tin ku sigui hasi “esfuerso pa alkansá e meta di risibí e premio di Dios su yamada selestial pa medio di Kristu Hesus.”—Flp. 3:13-16.

 6. Kon kristiannan ungí mester mira nan mes?

⁶ Na Efesionan 4:1-3, Pablo a bisa kristiannan ungí: “Ami, prizonero den Señor, ta hasi un apelashon na boso pa kana na un manera digno di e yamada ku boso a risibí.” Kon nan por hasi esei? Pablo a sigui bisa: “Ku tur humildat i suavedat, ku pasenshi, soportando otro den amor, hasiendo esfuerso sinsero pa mantené e union di spiritu den e vínkulo di pas.” Yehova su spiritu santu no ta promové orguyo, sino humildat. (Kol. 3:12) Pues, kristiannan ungí ta modesto i ta rekonosé ku nan no nesesariamente tin mas spiritu santu ku rumannan ku tin e speransa di biba riba tera. Nan no ta pretendé ku nan ta komprondé Beibel mihó ku otro rumannan òf ku nan ta haña sierto revelashon di Dios. Tampoko nan no ta hasi komo si fuera nan ta mihó ku otro hende. Nunka nan lo bisa un otro ruman ku e tambe ta ungí i ku e mester kuminsá tuma di e pan ku e biña. Al kontrario, nan ta rekonosé humildemente ku ta Yehova ta e úniko ku por invitá hende pa bai shelu.

7, 8. Kiko kristiannan ungí no ta ferwagt di otro hende, i dikon nò?

⁷ Aunke kristiannan ungí ta konsiderá nan yamada selestial un gran privilegio, nan no ta ferwagt un trato spesial for di otro ruman. (Efe. 1:18, 19; lesa Filipensenan 2:2, 3.) Ora Yehova a ungi nan ku su spiritu, e no a anunsiá esei públikamente; ta nan so a haña e testimonio ei. P’esei no mester straña nan ku tin hende ku no ke kere mesora ku di bèrdat nan a ser ungí ku spiritu santu. Nan sa ku Beibel ta asta bisa nos pa no sea muchu lihé pa kere un hende ku ta bisa ku Dios a dun’é un responsabilidat spesial. (Rev. 2:2) Ademas, komo ku nan no ke ta e sentro di atenshon, nan lo no introdusí nan mes komo ungí ora nan ta sera konosí ku un hende. Por lo general, nan no ta ni menshoná esei ya ku ta trata aki di un asuntu privá. I sigur nan lo no kana broma ku e rekompensa maravioso ku ta warda nan den shelu.—1 Kor. 1:28, 29; lesa 1 Korintionan 4:6-8.

⁸ Un otro punto ta ku kristiannan ungí no ta pensa ku nan mester pasa tempu ku otro ungí so, komo si fuera nan ta miembro di un klup eksklusivo. Nan no ta purba di drenta den kontakto ku otro ungí pa papia di nan eksperensianan òf pa forma grupo privá pa studia Beibel. (Gal. 1:15-17) Tipo di kosnan asina lo kousa divishon den kongregashon i ta obra kontra di e spiritu santu, ku yùist ta yuda promové pas i union den e pueblo di Dios.—Lesa Romanonan 16:17, 18.

 9. Ku kiko nos mester tene kuidou ora nos ta trata rumannan ku ta tuma di e pan ku e biña? (Wak e kuadro “Amor ‘No Ta Komport’é Indesentemente.’”)

⁹ Si bo konosé un ruman ku ta tuma di e pan ku e biña, kon bo mester trat’é? Hesus a bisa su disipelnan: “Boso tur ta ruman.” Tambe el a bisa nan: “Ken ku halsa su mes, lo keda humiá, i ken ku humiá su mes, lo keda halsá.” (Mat. 23:8-12) P’esei, lo no ta bon pa pone niun hende riba un pedestal, ni maske e ta un di e rumannan di Kristu. Por ehèmpel, Beibel ta konsehá nos pa imitá e fe di e ansianonan ku ta dirigí nos, pero nunka e ta manda nos halsa niun hende komo nos lider. (Heb. 13:7) Ta bèrdat ku Beibel ta bisa ku algun ruman ta “digno di dòbel onor.” Ma nan meresé e onor ei, no pasobra nan ta ungí, sino pasobra nan ta “dirigí na un manera ekselente” i “ta traha duru pa kumpli ku nan tarea di papia i duna siñansa tokante e palabra di Dios.” (1 Tim. 5:17) Pues, si nos ta duna demasiado atenshon i elogio na e rumannan ku tin e speransa di bai shelu, nos lo por laga nan sinti nan inkómodo. Es mas, si nos ta duna nan un trato spesial, ta bira difísil pa nan keda humilde. (Rom. 12:3) Niun di nos lo ke pone un di e rumannan di Kristu trompeká, tòg?—Luk. 17:2.

10. Kon bo por mustra e debido rèspèt pa kristiannan ungí?

¹⁰ Kon nos por demostrá e debido rèspèt pa kristiannan ku Yehova a skohe pa bai shelu? Un manera ta di no puntra nan kon nan por sa ku nan ta ungí. Esei ta un asuntu personal ku no ta toka nos. (1 Tes. 4:11; 2 Tes. 3:11) Nos no mester asumí tampoko ku e mayornan, kasá òf otro miembro di famia di un kristian ungí tambe tin e yamada selestial. E speransa selestial no ta algu ku un persona ta heredá di su famia. (1 Tes. 2:12) Tambe nos lo evitá di puntra e kasá di un ungí kon e ta sintié sabiendo ku su kasá lo no ta huntu kuné den Paradeis. En bes di hasi pregunta asina ku por ta doloroso, nos tur por tin e pleno konfiansa ku Yehova lo habri su man i “satisfasé e deseo di tur ser bibu.”—Sal. 145:16.

11. Kon nos ta protehá nos mes si nos ta evitá di halsa hende?

¹¹ Si nos ta trata kristiannan ungí meskos ku tur otro ruman, esei lo ta un protekshon pa nos. Dikon? Wèl, kòrda ku Beibel ta bisa ku “rumannan falsu” lo por slùip drenta e kongregashon. Nan por asta pretendé di ta ungí. (Gal. 2:4, 5; 1 Huan 2:19) Tambe por sosodé ku algun kristian ungí ta bandoná e bèrdat. (Mat. 25:10-12; 2 Ped. 2:20, 21) Ora nos ta evitá e trampa di halsa hende, esei lo protehá nos pasobra nos lo no bandoná e organisashon di Yehova pa nan motibu. Nos fe lo no haña un sla duru tampoko si un ruman masha konosí òf ku tin hopi aña den e bèrdat stòp di sirbi Dios.—Hudas 16.

12, 13. Dikon nos no mester preokupá ku awor tin mas hende ta tuma di e pan ku e biña na Konmemorashon?

¹² Pa hopi aña, e kantidat di ruman ku a tuma di e pan ku e biña na Konmemorashon di e morto di Kristu tabata baha. Pero último añanan ta nèt kontrali: e kantidat ta blo oumentá. Akaso esaki mester preokupá nos? Nò. Laga nos wak dikon.

¹³ “Yehova konosé esnan ku ta pertenesé na dje.” (2 Tim. 2:19) E rumannan ku ta hasi konteo di ken ta tuma di e pan ku e biña na Memorial no por sa ken realmente ta ungí. E kantidat ta inkluí rumannan ku kier sa ku nan ta ungí, pero ku no ta. Por ehèmpel, tin ruman ku a kuminsá tuma di e pan ku e biña pero ku despues a stòp di hasié. Otronan kisas ta sufri di un problema mental òf emoshonal ku ta pone nan kere ku nan lo reina huntu ku Kristu den shelu. P’esei e kantidat di ruman ku ta tuma di e pan ku e biña no ta un indikashon eksakto di e kantidat di ungí ku tin ainda riba tera.

14. Kiko Beibel ta bisa tokante e kantidat di ungí ku lo tin riba tera ora e tribulashon grandi kuminsá?

¹⁴ Lo tin rumannan ungí na tur parti di e tera ora Hesus bini pa hiba nan shelu. Beibel ta bisa di e tempu ei ku Hesus lo “manda su angelnan ku un zonido duru di tròmpèt, i nan lo reuní su skohínan for di e kuater skinanan di mundu, for di e punta di mas leu di shelu te na e otro punta di mas leu.” (Mat. 24:31) Tambe Beibel ta mustra ku durante e último dianan lo tin solamente un restu di e ungínan riba tera. (Rev. 12:17) Pero e no ta bisa kuantu lo tin ora e tribulashon grandi kuminsá.

15, 16. Kiko nos mester kòrda relashoná ku e 144.000 ku Yehova a skohe?

¹⁵ Ta Yehova ta disidí na ki momento den historia e ta skohe e ungínan. (Rom. 8:28-30) Yehova a kuminsá skohe e ungínan despues di e morto i resurekshon di Hesus. Parse ku den e promé siglo tur kristian berdadero tabata ungí. For di e promé siglo te na kuminsamentu di e último dianan, e gran mayoria di hende ku tabata bisa ku nan ta siguidó di Kristu tabata en realidat kristiannan falsu; Hesus a kompará nan ku “mal yerba.” Pero asina mes, Yehova a ungi algun persona fiel durante e tempu ei, i nan a resultá di ta e “trigu” ku Hesus a deskribí. (Mat. 13:24-30) Den e último dianan, Yehova a sigui skohe hende ku lo forma parti di e 144.000.^[2] Si e disidí di warda pa skohe algun hende te djis promé ku e fin bini, ken nos ta pa kuestion’é? (Isa. 45:9; Dan. 4:35; lesa Romanonan 9:11, 16.)^[3] Nos mester tene kuidou pa nos no reakshoná manera e trahadónan malkontentu den e ilustrashon di Hesus, kendenan a reklamá e echo ku nan doño a paga nan mes tantu ku e trahadónan ku a traha un ora so.—Lesa Mateo 20:8-15.

¹⁶ No ta tur kristian ku tin e speransa di biba den shelu ta parti di “e esklabo fiel i prudente.” (Mat. 24:45-47) Den e promé siglo, Yehova ku Hesus a usa un kantidat chikitu di kristian pa alimentá, òf siña, su pueblo. Por ehèmpel, ta un par di ungí so el a usa pa skirbi e Skritura Griego Kristian. Awe ta meskos. Ta djis un par di kristian ungí tin e responsabilidat di duna e pueblo di Dios “kuminda na e debido tempu.”

17. Kiko bo a siña for di e artíkulo akí?

¹⁷ Kiko nos a siña for di e artíkulo akí? Yehova a disidí di duna dos diferente rekompensa: bida den shelu na e hudiunan spiritual i bida eterno riba tera na e dies hòmbernan simbóliko. Ma e ta eksigí meskos di tantu esnan ku tin e yamada selestial komo di esnan ku tin e speransa di biba riba tera. Tur dos grupo mester obedesé e mesun leinan i keda fiel. Tur dos grupo mester keda humilde. Tur dos grupo mester ta uní. Tur dos grupo mester promové pas den e kongregashon. Pues, segun ku nos ta yega mas serka di e fin, laga nos tur sigui sirbi Yehova komo un solo tou bou di Kristu.