E Triunfo di Adoracion Berdadero Ta Acercando

“Jehova tin cu bira rey riba henter e tera.”—ZACARIAS 14:9.

 1. Kico tabata e experencia di cristiannan ungí durante Guera Mundial I, i con esaki a ser profetisá?

DURANTE e promé guera mundial, cristiannan ungí a sufri hopi dificultad i encarcelacion na man dje nacionnan den guera. Nan sacrificionan di alabansa na Jehova a ser restringí severamente, i nan a cai den un estado di cautiverio spiritual. Tur esaki a ser profetisá na Zacarías 14:2, cu ta describí un atake internacional riba Jerusalem. E stad dje profecia aki ta “Jerusalem celestial,” e Reino celestial di Dios i e sitio “dje trono di Dios i dje Lamchi.” (Hebreonan 12:22, 28; 13:14; Revelacion 22:3) E ungínan di Dios riba tera a representá e stad ei. Esnan fiel entre nan a sobrebibí e atake, nengando di permití nan mes ser hibá como exiliado “for dje stad.”a

 2, 3. (a) Con e adoracion di Jehova a triunfá desde 1919? (b) Desde 1935, ki desaroyo a tuma lugá?

² Na 1919 e fiel ungínan a ser librá for di nan condicion di cautiverio, i mesora nan a probechá dje periodo di pas cu a sigui despues dje guera. Como embahadornan di Jerusalem celestial, nan a gara e magnífico oportunidad pa predicá e bon nobo dje Reino di Dios i pa yuda den e recogementu dje miembronan final dje 144.000. (Mateo 24:14; 2 Corintionan 5:20) Na 1931 nan a adoptá e nomber bíblico apropiado Testigonan di Jehova.—Isaías 43:10, 12.

³ Desde e tempu ei, Dios su Testigonan ungí nunca a wak atras. Ni sikiera Hitler cu su mashin di guera nazi por a silenciá nan. Apesar di persecucion rond mundu, nan trabou a duna fruta na tur parti dje tera. Particularmente desde aña 1935, e “multitud grandi” internacional, profetisá den e buki di Revelacion, a uni cu nan. Esakinan tambe ta cristiannan dedicá i bautisá i a “laba nan pañanan largu i a haci nan blancu den e sanger dje Lamchi,” Jesucristo. (Revelacion 7:9, 14) Sin embargo, nan no ta ungí, cu e speransa di bida celestial. Nan speransa ta pa heredá loke Adam i Eva a perde, esta, bida humano perfecto riba un tera paradísico. (Salmo 37:29; Mateo 25:34) Awe, e multitud grandi ta mas cu cincu miyon alma na cantidad. E adoracion berdadero di Jehova ta triunfando, pero su triunfo final ta den futuro ainda.

Stranheronan den e Tempel Spiritual di Dios

 4, 5. (a) Unda e multitud grandi ta adorá Jehova? (b) Ki privilegionan nan ta disfrutá di dje, i na cumplimentu cu ki profecia?

⁴ Manera a ser profetisá, e multitud grandi “ta adorando [Dios] di dia i anochi den su tempel.” (Revelacion 7:15, nota) Siendo cu nan no ta israelita spiritual i sacerdotal, Juan probablemente a mira nan pará den e tempel riba e patio parti pafó dje gentilnan. (1 Pedro 2:5) Ki glorioso Jehova su tempel spiritual a bira, cu su teritorio yená cu e multitud grandi aki cu, huntu cu e resto di Israel spiritual, ta alaband’e!

⁵ E multitud grandi no ta sirbi Dios den e condicion di yu spiritual manera e patio interior sacerdotal a prefigurá. Nan no ta ser declará hustu cu e propósito di ser yu spiritual adoptá di Dios. (Romanonan 8:1, 15) No obstante, dor di ehercé fe den Jesus su rescate, nan tin un posicion limpi dilanti Jehova. Nan ta ser declará hustu cu e propósito di ser su amigu. (Compará cu Santiago 2:21, 23.) Nan tambe tin e privilegio di presentá sacrificionan aceptabel riba e altar spiritual di Dios. Pues, relacioná cu e multitud grandi aki, e profecia di Isaías 56:6, 7 ta pasando dor di un glorioso cumplimentu: “E stranheronan cu a uni nan mes cu Jehova pa sirbié i pa stima e nomber di Jehova, . . . ami tambe lo trece nan na mi ceru santu i haci nan alegrá den mi cas di oracion. Nan ofrendanan kimá completo i nan sacrificionan lo ta pa aceptacion riba mi altar. Pasobra mi cas mes lo ser yamá asta un cas di oracion pa tur e pueblonan.”

 6. (a) Ki clase di sacrificio e stranheronan ta ofrecé? (b) Di kico e ponchera di awa den e patio sacerdotal ta recordá nan?

⁶ Entre e sacrificionan cu e stranheronan aki ta ofrecé ta “e fruta di lipnan [manera ofrenda di grano prepará fini-fini] cu ta haci declaracion público di [Dios] su nomber” i “e hacimentu di bon i e compartimentu di cosnan cu otronan.” (Hebreonan 13:15, 16) E ponchera grandi di awa cu e sacerdotenan tabatin cu usa pa laba nan curpa tambe ta un recordatorio importante p’e stranheronan aki. Nan tambe mester someté nan mes na purificacion spiritual i moral segun cu e Palabra di Dios ta ser clarificá progresivamente na nan.

E Lugá Santu i Su Mobilario

 7. (a) Con e multitud grandi ta considerá e privilegionan dje sacerdocio santu? (b) Ki privilegionan adicional algun stranhero a ricibí?

⁷ E Lugá Santu i su mobilario tin nificacion p’e multitud grandi aki di stranheronan? Wel, nan nunca lo ta den e condicion cu e Lugá Santu a prefigurá. Nan no ta nace di nobo como yu spiritual di Dios cu ciudadania celestial. Esaki ta laga nan sinti envidioso? No. Mas bien, nan ta alegrá den nan privilegio di apoyá e resto dje 144.000, i nan ta mustra aprecio profundo p’e propósito di Dios di adoptá e yunan spiritual aki, cu lo traha huntu cu Cristo pa elevá humanidad na perfeccion. Tambe, e multitud grandi di stranheronan ta apreciá mashá e gran bondad inmerecí di Dios p’e echo cu el a duna nan un speransa terenal di bida eterno den Paradijs. Algun dje stranheronan aki, mescos cu e netineonan di pasado, a ricibí privilegionan di supervision den asistí e sacerdocio santu.b (Isaías 61:5) For di entre esakinan Jesus ta nombra “prins den tur e tera.”—Salmo 45:16.

 8, 9. Ki beneficio e multitud grandi ta saca for di un consideracion dje mobilario dje Lugá Santu?

⁸ Apesar cu nan nunca lo drenta e Lugá Santu antitípico, e multitud grandi di stranheronan ta siña lesnan balioso for di su mobilario. Mescos cu e candelaria tabatin mester di un suministro constante di zeta, asina e stranheronan mester di spiritu santu pa yuda nan capta e berdadnan progresivo for dje Palabra di Dios, transmití mediante “e esclabo fiel i discreto.” (Mateo 24:45-47) Ademas, e spiritu di Dios ta yuda nan respondé n’e invitacion aki: “E spiritu i e bruid [e resto ungí] ta sigui bisa: ‘Bin!’ I laga ken cu ta tende bisa: ‘Bin!’ I laga ken cu tin sed bini; laga ken cu kier tuma e awa di bida grátis.” (Revelacion 22:17) Dje manera ei, e candelaria ta un recordatorio p’e multitud grandi di nan obligacion pa briya como cristiannan i evitá cualkier cos den actitud, pensamentu, palabra of accion cu lo haci e spiritu santu di Dios tristu.—Efesionan 4:30.

⁹ E mesa di pan di presentacion ta recordá e multitud grandi cu pa permanecé spiritualmente saludabel, nan mester participá regularmente dje alimento spiritual for di Bijbel i for di publicacionnan di “e esclabo fiel i discreto.” (Mateo 4:4) E altar di censia ta recordá nan dje importancia di oracion sincero na Jehova pa yudansa pa por warda nan integridad. (Lucas 21:36) Nan oracionnan mester incluí expresionnan di alabansa i di gradicimentu cu ta bini di curason. (Salmo 106:1) E altar di censia tambe ta recordá nan dje necesidad pa alabá Dios den otro maneranan, manera dor di nan cantamentu di henter curason dje canticanan di Reino na reunionnan cristian i dor di nan bon preparacion pa haci ‘declaracion público eficas pa salbacion.’—Romanonan 10:10.

E Triunfo Completo di Adoracion Berdadero

10. (a) Ki prospecto magnífico nos por spera ansiosamente? (b) Ki desaroyo mester tuma lugá promé?

¹⁰ Awe “hopi pueblo” for di tur nacion ta basha bai Jehova su cas di adoracion. (Isaías 2:2, 3) Confirmando esaki, Revelacion 15:4 ta declará: “Ken lo no realmente temé bo, Jehova, i glorificá bo nomber, pasobra bo so ta leal? Pasobra tur nacion lo bini i adorá dilanti bo, pasobra bo decretonan hustu a ser manifestá.” Zacarías capítulo 14 ta describí loke ta sigui. Den futuro cercano, e mal actitud di mayoria hende riba tera lo alcansá un culminacion segun cu nan ta reuní p’e último biaha pa bringa un guera contra Jerusalem—e representantenan riba tera di Jerusalem celestial. E ora ei Jehova lo actua. Como un Dios-Guerero, e “siguramente lo sali i batayá contra e nacionnan ei” cu ta tribi haci e atake aki.—Zacarías 14:2, 3.

11, 12. (a) Con Jehova lo reaccioná riba e binidero atake global contra adoradornan den su tempel? (b) Kico lo ta e resultado dje guera di Dios?

¹¹ “Esaki ta loke lo resultá di ta e plaga cu locual Jehova lo plaga tur pueblo cu realmente lo haci sirbishi militar contra Jerusalem: Lo tin un putrimentu di carni di hende, miéntras cu e ta pará riba su pia; i su wowonan mes lo putri bai den nan kashi’ wowo, i lenga mes di hende lo putri bai den su boca. I mester sosodé riba e dia ei cu confusion procedente di Jehova lo bira plamá den nan; i nan cada un realmente lo gara e man di su compañero, i su man realmente lo hisa contra e man di su compañero.”—Zacarías 14:12, 13.

¹² Pa sa si e plaga aki ta literal of figurativo, nos lo tin cu warda pa mira esei. Sin embargo, un cos ta sigur. Segun cu e enemigunan di Dios ta moviendo pa haci nan atake global contra Jehova su sirbidornan, nan lo ser detené mediante demostracionnan extraordinario dje poder todopoderoso di Dios. Nan boca lo ser silenciá. Lo ta como si nan lenga di rebeldia a putri bai. Nan meta uní lo bira nublá den nan bista, como si fuera nan wowo a putri bai. Nan poder físico cu a yena nan cu curashi pa haci e atake, lo caba na nada. Den confusion, nan lo bira contra otro cu un gran matansa. Asina tur e enemigunan terenal dje adoracion di Dios lo ser eliminá. Por fin, tur nacion lo a ser forsá pa reconocé Jehova su soberania universal. E profecia lo ser cumplí: “Jehova tin cu bira rey riba henter e tera.” (Zacarías 14:9) Despues di esei, Satanas i su demoñonan lo ser mará ora e Reinado di Mil Aña di Cristo cuminsá cu gran bendicionnan reservá pa humanidad.—Revelacion 20:1, 2; 21:3, 4.

E Resureccion Terenal

13. Ken ta esnan cu ta “resta for di tur e nacionnan”?

¹³ E profecia di Zacarías ta sigui na capítulo 14, versículo 16: “Mester sosodé cu, den loke ta toca tur esnan cu ta resta for di tur e nacionnan cu ta bini contra Jerusalem, nan tambe tin cu subi aña tras aña pa buig dilanti e Rey, Jehova di ehércitonan, i pa celebrá e fiesta di cabaña.” Segun loke Bijbel ta mustra, tur hende na bida awe cu ta sigui biba te n’e fin dje mal sistema di cosnan aki i cu ta ser husgá como enemigu di adoracion berdadero lo ricibí e “castigu hudicial di destruccion eterno.” (2 Tesalonicensenan 1:7-9; mira tambe Mateo 25:31-33, 46.) Nan lo no haña un resureccion. Probablemente, anto, esnan cu a “resta” ta incluí e miembronan dje nacionnan cu a muri promé cu e guera final di Dios i pa ken tin un speransa bíblico di resureccion. “E ora ta bini,” Jesus a primintí, “den cua tur esnan cu ta den grafnan conmemorativo lo tende su bos i lo sali, esnan cu a haci bon cosnan pa un resureccion di bida, esnan cu a practicá cosnan baho pa un resureccion di huicio.”—Juan 5:28, 29.

14. (a) Kico esnan resucitá mester haci pa gana bida eterno? (b) Kico lo sosodé cu cualkier persona cu ta nenga di dedicá su mes na Jehova i practicá adoracion berdadero?

¹⁴ Tur esnan resucitá aki mester haci algu pa nan resureccion por resultá di ta unu di bida i no di huicio desfaborabel. Nan mester bini n’e pationan terenal dje tempel di Jehova i buig den dedicacion na Dios mediante Jesucristo. Cualkier persona resucitá cu ta nenga di haci esaki lo sufri e mésun plaga cu ta bini riba e nacionnan djawe. (Zacarías 14:18) Ken sa cuantu hende resucitá gustosamente lo djoin e multitud grandi den celebracion dje Fiesta di Cabaña antitípico? Sin duda, lo tin hopi, i Jehova su gran tempel spiritual lo bira asta mas glorioso como resultado di esei!

E Fiesta di Cabaña Antitípico

15. (a) Cua tabata algun dje rasgonan sobresaliente dje Fiesta di Cabaña di Israel di antigwedad? (b) Pakico nan a ofrecé 70 toro durante e fiesta?

¹⁵ Tur aña, Israel di antigwedad tabatin cu celebrá e Fiesta di Cabaña. El a dura pa un siman i a tuma lugá n’e conclusion dje recogementu di nan cosecha. Esei tabata un tempu gososo di gradicimentu. P’e duracion dje siman, nan tabatin cu biba den cabañanan temporal cubrí cu blachi di palu, specialmente rama di palma. E fiesta aki a recordá Israel con Dios a salba nan antepasadonan for di Egipto i con el a percurá pa nan segun cu nan tabata biba den tent miéntras cu nan tabata move pa 40 aña den e desierto te ora nan a alcansá e Tera Primintí. (Levítico 23:39-43) Durante e fiesta, 70 toro a ser sacrificá riba e altar dje tempel. Evidentemente, e rasgo aki dje fiesta tabata profético dje trabou salbador di bida perfecto i completo cu Jesucristo a efectuá. E beneficionan di su sacrificio di rescate cu tempu lo drama riba e incontabel desendientenan dje 70 famianan di humanidad cu a bini for di Noe.—Génesis 10:1-29; Númeronan 29:12-34; Mateo 20:28.

16, 17. (a) Na ki tempu e Fiesta di Cabaña antitípico a cuminsá, i con el a desaroyá? (b) Con e multitud grandi ta participá den e celebracion?

¹⁶ Pues e Festival di Cabaña di antigwedad a señalá n’e recogementu gososo di pecadornan rescatá den Jehova su gran tempel spiritual. E cumplimentu dje fiesta aki a cuminsá na Pentecoste na 33 E.C. cu e inicio dje recogementu gososo di israelita spiritual den e congregacion cristian. (Echonan 2:41, 46, 47) E personanan ungí aki a comprendé cu nan tabata “residentenan temporal” den e mundu di Satanas debí cu nan berdadero “ciudadania ta existí den shelu.” (1 Pedro 2:11; Filipensenan 3:20) E apostasia cu a resultá den e formacion di cristiandad temporalmente a tira un sombra riba e fiesta gososo di recogementu. (2 Tesalonicensenan 2:1-3) Sin embargo, e fiesta a ser resumí na 1919 cu e recogementu gososo dje miembronan final dje 144.000 israelita spiritual, siguí pa e recogementu dje multitud grandi internacional di Revelacion 7:9.

¹⁷ E multitud grandi ta ser describí cu rama di palma den nan man, cu ta mustra cu nan tambe ta celebrá gososamente e Fiesta di Cabaña antitípico. Como cristiannan dedicá, nan ta participá gososamente den e trabou di recogé mas adorador den Jehova su tempel. Ademas, como pecador, nan ta comprendé cu nan no tin derecho di biba permanentemente riba tera. Nan, huntu cu esnan cu lo ser resucitá den futuro, mester sigui ehercé fe den e sacrificio di rescate di Cristo te ora nan alcansá perfeccion humano na fin dje Reinado di Mil Aña di Cristo.—Revelacion 20:5.

18. (a) Kico lo sosodé na fin dje Reinado di Mil Aña di Jesucristo? (b) Con e adoracion berdadero di Jehova lo triunfá finalmente?

¹⁸ E ora ei, Dios su adoradornan riba tera lo para dilanti dje den perfeccion humano sin e necesidad di un sacerdocio celestial. E tempu lo a yega ora Jesucristo “ta entregá e reino na su Dios i Tata.” (1 Corintionan 15:24) Satanas lo ser di los “pa un poco tempu” pa pone humanidad hací perfecto na prueba. Cualkier persona infiel lo ser destruí pa semper, huntu cu Satanas i su demoñonan. Esnan cu ta keda fiel lo ricibí bida eterno. Nan lo bira habitantenan permanente den e Paradijs terenal. Asina e Fiesta di Cabaña antitípico lo a yega na un conclusion glorioso i exitoso. Adoracion berdadero lo a triunfá p’e gloria eterno di Jehova i p’e felicidad eterno di humanidad.—Revelacion 20:3, 7-10, 14, 15.

[Nota]

Preguntanan di Repaso

◻ Con “Jerusalem” tabata bou di atake durante e promé guera mundial?—Zacarías 14:2.

◻ Kico a sosodé cu e pueblo di Dios desde 1919?

◻ Ken awe ta participá den e celebracion dje Fiesta di Cabaña antitípico?

◻ Con adoracion berdadero lo triunfá completamente?

[Plachi na página 23]

Nan tabata usa rama di palma den e celebracion dje Fiesta di Cabaña