Pregunta Di Lector

Nos a goza estudio di profecía di Daniel splicá den “E Toren di Vigilancia.” Pero, pakico fecha pe tres tempo i mei di Revelacion 11:3 ta diferente cu fecha dje buki “Revelacion su culminacion”?

Sí, E Toren di Vigilancia di 1 di November di 1993 a ofrece un ahuste chikito en cuanto fecha di cumplimento moderno di Revelacion 11:⁠3. Pakico?

Láganos wak promé Revelacion 11:​2, e cabamento di locual ta menciona “cuarentidos luna.” Nos ta sigi den versículo 3: “Lo mi haci mi dos testigo profetizá pa mil dos cient’i sesenta dia bistí den paña di sacu.” Na ki tempo esei ta aplica?

Wel, Testigo di Jehova pa mashá tempo a reconoce cu e profecía tabata cumplí den hende cristian ungí cu e spiritu despues di fin di “tempo siñalá dje nacionan” (tempo gentil) na 1914. (Lucas 21:24; 2 Corintio 1:​21, 22) Comentando riba esei, Revelacion​—⁠su gran culminacion ta cerca!a (1988) ta bisa na bladji 164: “Tabatin un periodo marcá di tres aña i mei ora experencia penoso dje pueblo di Dios a corresponde cu suceso profetizá aki​—⁠cuminzando na principio dje promé gera mundial den e último parti di 1914 i sigiendo te na principio di 1918.”

Tuma nota di cu e fecha mencioná ta e “principio dje promé gera mundial den e último parti di 1914 i sigiendo te na principio di 1918.” Esei ta corresponde cu fecha menciona hopi bez, tal como e fecha den e buki “Entonces queda terminado el misterio de Dios,” bladji 285-288, (1971).*

Sin embargo, E Toren di Vigilancia a enfoca riba profecía den Daniel, un buki cu ta menciona dos biaha un periodo comparable cu e periodo mencioná despues den Revelacion como 3 1/2 aña of 42 luna. Pa ser específico, Daniel 7:25 ta bisa cu e santonan di Dios lo ser persigí “pa un tempo, i temponan i mitá tempo,” of 3 1/2 tempo. Despues, Daniel 12:7 ta profetiza di “un tempo siñalá, temponan siñalá i mitá,” of 3 1/2 tempo, cu lo ser culminá cu “un terminacion dje aplastamento dje poder dje pueblo santo.”

Pues, nos tin profecía tratando cu e mesun periodo den Daniel 7:​25, Daniel 12:​7, i Revelacion 11:​2, 3, i també den Revelacion 13:⁠5. Nos literatura ta mustra cu tur profecía ei tabatin cumplimento den e periodo entre 1914-1918. Pero, ora nos a trata cu cada profecía separá, fecha pe cuminzamento i e fin a variá un poco.

Sin embargo, E Toren di Vigilancia di 1 di November di 1993, a puntra: “Di ki manera tur profecía paralelo tabata cumplí?” Sí, nos ta reconoce cu profecía di 3 1/2 tempo mencioná den Daniel 7:​25, Daniel 12:​7, i Revelacion 11:3 ta “profecía paralelo.” P’sei, nan mester corresponde en cuanto nan principio i nan fin.

En cuanto nan terminacion, e revista ta mustra cu persecucion dje ungínan di Dios (Daniel 7:25) a culmina den Juni di 1918 ora J. F. Rutherford i otro director di Watch Tower Bible and Tract Society tabata “sentenciá bao di acusacion falso pa un tempo largu den prisón.” Tal suceso siguramente tabata “un terminacion dje aplastamento di poder dje pueblo santo,” mencioná den Daniel 12:⁠7.

Contando patrás for di Juni di 1918 ta híbanos na December di 1914 pe comienzo dje 3 1/2 tempo. Den e luna final di 1914, e ungínan di Dios riba tera a siña e texto di aña pe sigiente aña: “ ‘Boso por bebe foi mi copa?’​—⁠Mateo 20:​20-23.” E artículo anunciando esei a adverti: “Ken sa si lo tin un prueba special, un copa di sufrimento of di bergüenza, pa sigidor leal dje Lamchi durante 1915!” Manera Daniel 7:25 a profetiza pe periodo di 3 1/2 tempo, ‘persecucion a lanta i a sigi contra e santonan mes dje Supremo.’ E nacionan tabata enbolbí den Gera Mundial I, locual a haci mas fácil pa nan cumpli cu persecucion inhusto. E conclusion ta: E tres profecía paralelo​—⁠Daniel 7:​25, 12:​7, i Revelacion 11:3​—⁠a ser cumplí den e 3 1/2 aña, of 42 luna, desde December di 1914 te Juni di 1918.

Esei ta splica e refinamento chikito den e fecha dje cumplimento di Revelacion 11:⁠3. E ahuste ta algo cu nos por tene presente mientras cu nos ta studia i ta usa e buki Revelacion su culminacion den e futuro.

[Footnotes]