Capítulo 26

E secreto sagrado di Dios—su glorioso culminacion!

 1. (a) Con Juan ta informános di cu e secreto sagrado ta wordu terminá? (b) Pakico ehército di angel ta papia duro?

BO TA corda e declaracion di huramento dje angel fuerte cu ta pará skirbí den Revelacion 10:1, 6, 7? El a bisa: “Lo no tin tardamento mas; sino cu den e dianan di tocamento di angel di siete, ora e ta na punto di toca su trompet, berdaderamente ta keda terminá e secreto sagrado di Dios segun e bon nobo cu el a declara na su mes esclabo e profetanan.” E debido tempo di Jehova a yega pa tocamento dje trompet final! Anto, di ki manera e secreto sagrado ta keda terminá? Tabata un berdadero gozo pa Juan bísanos! El a skirbi: “I angel di siete a toca su trompet. I boz fuerte a sosode den cielo, bisando: ‘E reino di mundo sí a bira e reino di nos Señor i di su Cristo, i lo e reina como rey pa semper hamás.’” (Revelacion 11:15) Ehército di angel tabatin motibo pa papia duro, asta manera donder! Pasobra e anuncio histórico ta di importancia universal. E ta di importancia vital pa tur e creacion bibiente.

 2. Na ki tempo i cu ki suceso e secreto sagrado ta wordu terminá cu triunfo?

² E secreto sagrado ta yega na su culminacion feliz! Gloriosamente, magníficamente, e tabata hibá na un terminacion triunfante na 1914 ora Señor Jehova a entroniza su Cristo como Rey asociado di dje. Jesucristo, actuando pa su Tata a tuma e gobernacion activo den un mundo di humanidad enemigo. Como e Simía primintí, el a recibi poder di Reino pe reduci na nada e Colebra i su raza i restora paz di Paradijs riba tera. (Génesis 3:15; Salmo 72:1, 7) Como Rey Mesiánico, Jesús asina lo cumpli cu e Palabra di Jehova i vindica su Tata, e “Rey di eternidad,” cu tin cu goberna como Señor Soberano “pa semper hamás.”—1 Timoteo 1:17.

 3. Pakico Jehova Dios, aunque e ta semper Rey, a permiti otro soberanía existi riba tera?

³ Pero, di ki manera e “reino di mundo . . . a bira e reino di nos Señor,” Jehova? Jehova Dios no tabata semper Rey? Esei ta cierto, pasobra levita Asaf a canta: “Dios ta mi Rey desde mucho tempo atrás.” I un otro salmista a proclama: “Jehova mes a bira rey! . . . Bo trono ta firmemente establecí desde mucho tempo atrás; bo ta desde tempo indefinitivo.” (Salmo 74:12; 93:1, 2) Sin embargo, den su sabiduría, Jehova a permiti otro soberanía existi riba tera. Asina, el a permiti un prueba completo dje cuestion cu a presenta den Eden en cuanto si hende por goberna nan mes sin Dios. Gobernacion humano ta un fracaso tremendo. Berdaderamente cierto ta e palabra dje profeta di Dios: “Mi wel sa, O Jehova, cu e camina di hende terrenal no ta pertenece na dje. No ta pertenece na hende cu sa camna di sikiera dirigi su paso.” (Jeremías 10:23) Desde e dia dje caimento di nos promé mayornan, tur e tera habitá ta bao di dominacion dje “colebra original,” Satanás. (Revelacion 12:9; Lucas 4:6) Awor ta tempo pa un cambio dramático! Pa vindica e puesto cu e tin derecho di ocupá, Jehova a cuminza eherce su soberanía riba tera di manera nobo, usando su Reino Mesiánico cu el a nombra.

 4. Ora trompet a cuminza toca na 1922, kico a wordu duná énfasis? Splica.

⁴ Ora tocamento dje siete trompet a cuminza na 1922, den e asamblea di Studiante di Bijbel den Cedar Point, Ohío, J. F. Rutherford a pronunciá un discurso basá riba e texto bíblico: “E reino di cielo a yega cerca.” (Mateo 4:17) El a conclui cu e sigiente palabra: “Anto bolbe ne campo, O yiunan di e Dios Haltísimo! Bisti boso armadura! Sea serio, sea vigilante, sea activo, sea balente. Sea testigo fiel i berdadero di Señor. Sigi padilanti den e lucha te cu tur pida di Babilonia ta keda desolá. Proclama e mensahe leu i na tur parti. E mundo tin cu sa cu Jehova ta Dios i cu Jesucristo ta Rey di reynan i Señor di señornan. Esaki ta e dia di máximo importancia. Mira, e Rey ta reina! Boso ta anunciador di dje. P’sei, anuncia, anuncia, anuncia, e Rey i su reino.” Esei a duna énfasis ne Reino di Dios mediante Cristo Jesús, i a duna comienzo na un gran aumento di predicacion di Reino cu a inclui huicio cu tocamento di tur siete trompet angelical a proclama.

 5. Na 1928, kico a sosode ne asamblea di Studiante di Bijbel cu a enfatizá e tocamento di trompet di siete?

⁵ E tocamento di trompet di angel di siete tabata reflehá den punto sobresaliente dje asamblea di Studiante di Bijbel den Detroit, Michigan, dia 30 di Juli te 6 di Augustus di 1928. Ne tempo ei 107 radioemisora tabata conectá den loke The New York Times a yama ‘e conexion di radioemisora di mas extenso i mas costoso den historia.’ E asamblea a adopta cu entusiasmo un vigoroso “Declaracion contra Satanás i na fabor di Jehova,” siñalando ne destruccion di Satanás i su organizacion perverso den Armagedón i ne emancipacion di tur hende cu ta stima husticia. E pueblo leal dje Reino di Dios cu gusto a recibi e buki nobo introducí ne asamblea, e buki di 368 bladji titulá Gobierno. Esei a duna prueba di mas claro cu “Dios a establece su Rey Ungí riba su trono na 1914.”

Jehova a tuma poder

 6. Con Juan a informa dje anuncio di cu Cristo tabata entronizá den e Reino di Dios?

⁶ Cristo entronizá den e Reino di Dios—cuanto gozo tal anuncio ta causa! Juan a informa: “I e binticuater anciano cu tabata sintá riba nan trono dilanti Dios a cai boca abao, i a adora Dios, bisando: ‘Nos ta gradicíbo, Jehova Dios, e Todopoderoso, Esun cu tá i cu tabata, pasobra bo a tuma bo gran poder i a cuminza reina como rey.’”—Revelacion 11:16, 17.

 7. Con agradicimento tabata duná na Jehova Dios (a) di parti dje resto dje 24 anciano simbólico riba tera? (b) di parti dje 24 anciano simbólico cu a ser resusitá na nan puesto den cielo?

⁷ Esnan cu a ofrece e agradicimento na Jehova Dios tabata e 24 anciano, simbolizando e rumanan ungí di Cristo den nan puesto celestial. Desde 1922 padilanti un resto dje 144.000 ungínan riba tera a ocupánan den e trabao cu tocamento di trompet a conmové. Nan a yega di comprende e plena importancia dje siñal den Mateo 24:3–25:46. Sin embargo, asta mas promé den e dia di Señor, testigo compañé cu a ‘resulta di ser fiel te na morto’ tabata resusitá pa nan ocupa nan puesto den cielo, di manera cu awor nan por a representa henter e grupo di 144.000 ora nan a cai boca abao pa rindi homenahe na Jehova. (Revelacion 1:10; 2:10) Ki agradicido nan tur a keda di cu nan Señor Soberano no a tarda pa hiba su secreto sagrado na un terminacion culminante!

 8. (a) Ki efecto tocamento di trompet di siete tabatin riba e nacionan? (b) E nacionan a expresa nan rabia contra ken?

⁸ En cambio, tocamento di trompet di siete no a causa gozo pe nacionan. E tempo a yega pa nan experimenta e rabia di Jehova. Manera Juan a relata: “Pero e nacionan a rabia, i bo mes rabia a bini, i e tempo siñalá pe mortonan ser huzgá, i pa duna nan recompensa na bo esclabonan, profeta i santonan i na esnan cu tin temor di bo nomber, chikito i grandi, i pa causa e ruina di esnan cu ta ruina e tera.” (Revelacion 11:18) Desde 1914 padilanti, nacion di mundo a expresa ferozmente nan rabia contra otro, contra e Reino di Dios, i specialmente contra e dos testigo di Jehova.—Revelacion 11:3.

 9. Di ki manera e nacionan ta ruina e tera, i kico Dios a determiná di haci tocante esei?

⁹ Durante tur e pasado, e nacionan a ruina e tera cu nan gera sin fin i nan mal maneho. Sin embargo, desde 1914, tal ruinamento a aumenta na un grado alarmante. Golosidad i corrupcion a resulta den expansion di desierto i pérdida tremendo di terreno productivo. Yobida ácido i nubia radioactivo a daña sector grandi. Fuente di cuminda a ser contaminá. E aire cu nos ta respira i e awa cu nos ta bebe ta contaminá. Sushidad di industria ta un peliger pa bida riba tera i den lamá. I un tempo, nacion grandi a pone mundo henter den peliger di destruccion completo den un exterminacion nuclear di tur humanidad. Felizmente, Jehova “lo causa e ruina di esnan cu ta ruina e tera”; lo e ehecuta huicio di hende orguyoso i sin Dios cu ta responsabel pe estado lamentable dje tera. (Deuteronomio 32:5, 6; Salmo 14:1-3) P’sei, Jehova ta haci arreglo pa un tercera calamidad, pa regla cuenta cu tal malechor.—Revelacion 11:14.

Ai di hende cu ta causa ruina!

10. (a) Kico ta e tercera calamidad? (b) Di ki manera e tercera calamidad ta trece mas cu tormento?

¹⁰ Lo sigiente ta e tercera calamidad. E ta bini lihé! Esei ta e medio cu Jehova ta usa pa causa e ruina di hende cu ta profana e “stoel pa su pia,” esta, e tera bonita riba locual nos ta biba. (Isaías 66:1) Loke ta pone esei na accion ta e Reino Mesiánico—e secreto sagrado di Dios. Enemigo di Dios, i specialmente lider di cristiandad, a ser tormentá pe promé dos calamidad—resultando principalmente dje plaga di sprinkhan i ehército di cabai; pero e tercera calamidad, cu e Reino di Jehova mes ta manda, ta causa mas cu tormento. (Revelacion 9:3-19) Esei ta dal e golpi fatal, eliminando un arreglo social humano ruinoso i gobernante di dje. Esei lo bini como e culminacion dje huicio di Jehova na Armagedón. Ta net manera Daniel a profetiza: “I den dia dje reynan ei [gobernante cu ta ruina e tera] e Dios di cielo lo establece un reino cu nunca lo ser reducí na ruina. I e reino mes lo no ser pasá na ningun otro pueblo. Lo e aplasta i pone fin na tur reino ei, i e mes lo permanece te na tempo indefinitivo.” Manera un montaña grandi, e Reino di Dios lo reina riba e tera glorificá, pe vindicacion dje soberanía di Jehova i e gozo eterno di humanidad.—Daniel 2:35, 44; Isaías 11:9; 60:13.

11. (a) E profecía ta duna detaye di cua serie continuo di suceso feliz? (b) Cua bondad inmerecida ta ser realizá, di ki manera, i di parti di ken?

¹¹ Hunto cu e tercera calamidad ta bini un serie continuo di suceso feliz cu lo sigi progresivamente durante e dia di Señor. Esei ta e tempo pe ‘mortonan ser huzgá, i pa Dios duna recompensa na esclabo, su profeta i santonan i na esnan cu tin temor di su nomber.’ Esei kier men un resureccion for di morto! Pa tur e santonan ungí cu a bai drumi den morto, esei a sosode pronto den e dia di Señor. (1 Tesalonicense 4:15-17) Ne debido tempo e resto dje santonan ta uni cu eseinan den un resureccion instantáneo. Otronan també ta haya recompensa, incluyendo esclabo di Dios, e profetanan di tempo di antigua i tur otronan di humanidad cu a yega di teme e nomber di Jehova, sea cu nan ta dje multitud grandi cu ta sobrebiba e tribulacion grandi of ta e “mortonan, grandi i chikito,” cu ta ser lantá na bida durante e Reino di mil aña di Cristo. Siendo cu e Rey Mesiánico di Dios tin e yabi di morto i di Hades, e gobernacion di su Reino ta habri camina pe duna bida eterna na tur hende cu ta forza pa alcanza tal percuracion. (Revelacion 1:18; 7:9, 14; 20:12, 13; Romano 6:22; Juan 5:28, 29) Sea cu esei ta bida inmortal den cielo of bida eterna riba tera, e don di bida ta un bondad inmerecida di Jehova, pa locual tur hende cu ta recibié por keda agradicido pa semper!—Hebreo 2:9.

Mira e arca di su pacto!

12. (a) Segun Revelacion 11:19, kico Juan a mira den cielo? (b) E arca di pacto tabata un símbolo di kico, i kico a sosodele despues cu Israel tabata hibá preso na Babilonia?

¹² Jehova ta reina! Usando su Reino Mesiánico, e ta eherce su soberanía pa cu humanidad na moda maraviyoso. Loke Juan a mira sigientemente ta confirma esei: “I e santuario dje tempel di Dios cu ta den cielo tabata habrí, i a wordu mirá e arca di su pacto den e santuario di su tempel. I a sosode weerlicht i boz i donder i temblor i piedra grandi di ijs.” (Revelacion 11:19) Esei ta e único mencion den Revelacion dje arca di pacto di Dios. E arca tabata un símbolo visibel dje presencia di Jehova cu su pueblo Israel. Den e tabernáculo, i despues den e tempel cu Salomón a traha, e tabata wardá den e Lugar Santísimo. Pero ora Israel tabata hibá preso na Babilonia na aña 607 PEC, Jerusalem tabata desolá i e arca di pacto a desparce. Esei tabata ora representante dje cas di David no a sinta mas riba e “trono di Jehova como rey.”—1 Crónica 29:23.a

13. E echo cu e arca di pacto di Dios ta ser mirá den e santuario celestial di Dios ta indica kico?

¹³ Awor, despues di mas cu 2.600 aña, e arca ta ser mirá una bez mas. Pero den e vision di Juan e arca no tabata den un tempel terrenal. El a miré den e santuario celestial di Dios. Una bez mas, Jehova ta goberna mediante un rey den e linea real di David. Pero, e biaha aki, e Rey, Cristo Jesús, ta entronizá den Jerusalem celestial—un puesto halto bentahoso desde locual e ta ehecuta e huicio di Jehova. (Hebreo 12:22) Capítulo sigiente di Revelacion ta dúnanos di conoce tal huicio.

14, 15. (a) Den Jerusalem di antigua, kende únicamente a yega di mira e arca di pacto, i pakico? (b) Den e santuario dje tempel celestial di Dios, ken ta yega di mira e arca di pacto?

¹⁴ Den Jerusalem terrenal di antigua, israelita en general no a mira e arca, ni sikiera sacerdote cu a sirbi den e tempel no a miré, pasobra e tabata den e Lugar Santísimo separá for dje Lugar Santo pa un cortina. (Número 4:20; Hebreo 9:2, 3) E sumosacerdote so a yega di miré ora el a drenta e Lugar Santísimo ne Dia di Reconciliacion anual. No obstante, ora e santuario dje tempel ta habri den cielo, e arca simbólico ta visibel no solamente pa Jesucristo e Sumosacerdote di Jehova, sino també pa sub-sacerdote di dje, e 144.000, incluyendo Juan.

¹⁵ E proménan cu a ser resusitá na cielo ta mira e arca simbólico di cerca, pasobra nan a tuma nan lugar como parti dje 24 anciano rond dje trono di Jehova. I e grupo cu Juan a simboliza riba tera a ser iluminá pe spiritu di Jehova pa distingi Su presencia den Su tempel spiritual. Tabatin siñal també pa alertá humanidad en general na tal maraviyoso sosodimento. E vision di Juan ta menciona weerlicht, boz, donder, temblor, i piedra di ijs. (Compara cu Revelacion 8:5.) Kico esei ta simbolizá?

16. Di ki manera tabatin weerlicht, boz, donder, temblor, i piedra grandi di ijs?

¹⁶ Desde 1914 tabatin un sagudimento tremendo den e campo di religion. Pero, felizmente, tal “temblor” a ser compañá pa boz dedicá declarando un mensahe claro tocante e Reino establecí di Dios. Nan ta proclama ‘advertencia di tempestad’ manera donder cu base bíblico. Manera rayo di weerlicht, nan a mira i a publica luz di comprendimento dje Palabra profético di Dios. Huicio divino manera “piedra di ijs” cu ta dal duro a ser declará contra cristiandad i religion falso en general. Tur esei mester a hala e atencion di hende. Pero, lástimamente, e mayoría—mescos cu hende di Jerusalem den e dia di Jesús—no a mira cumplimento di tal siñal di Revelacion.—Lucas 19:41-44.

17, 18. (a) Tocamento di trompet dje siete angel ta duna cua responsabilidad na cristian dedicá? (b) Con hende cristian ta cumpli cu nan comision?

¹⁷ E siete angel ta sigi toca nan trompet, siñalando suceso histórico aki riba tera. Cristian dedicá tin un responsabilidad grandi pa sigi proclama tal anuncio pa mundo. Ki gozosamente nan ta cumpli cu nan comision! Esei ta ser indicá pasobra durante e 20 añanan cu a pasa di 1986 pa 2005, nan a casi dobel e cantidad di ora cu anualmente nan ta dedica ne predicacion—di 680.837.042 te na 1.278.235.504. Berdaderamente, “e secreto sagrado di Dios segun e bon nobo” ta ser proclamá “te na extremidad dje tera habitá.”—Revelacion 10:7; Romano 10:18.

¹⁸ Otro vision ta spéranos awor mientras cu e propósito di Dios en cuanto su Reino ta sigi ser revelá.

[Nota]

[Kuadro na página 173]

Punto principal di proclamacion di huicio di Jehova manera tocamento di trompet

 1. 1922, Cedar Point, Ohío: Un desafío pa lider di cristiandad den religion, político, i negoshi grandi pa nan hustifica e fracaso di nan esfuerzo di trece paz, prosperidad, i felicidad. E Reino di Mesías ta e remedi universal.

 2. 1923, Los Angeles, California: E discurso público, “Tur nacion awor ta marcha pa Armagedón, pero miyones cu ta biba awor lo no muri nunca,” a pidi “carné” amante di paz bandona e lamá fatal di humanidad.

 3. 1924, Columbus, Ohío: E clero denunciá pe halzamento di nan mes i nan nengamento di predica e Reino di Mesías. Cristian berdadero tin cu predica e vinganza di Dios i consola humanidad afligí.

 4. 1925, Indianapolis, Indiana: Un mensahe di speranza haciendo contraste entre scuridad spiritual di cristiandad i e promesa briyante di paz, prosperidad, salud, bida, libertad, i felicidad eterno dje Reino.

 5. 1926, Londres, Inglaterra: Cristiandad i su clero plagá como si fuera cu sprinkhan, den un denuncio di nan rechazo dje Reino di Dios, i un aclamacion di nacimento dje gobierno celestial.

 6. 1927, Toronto, Canadá: Un invitacion, hibá como si fuera cu ehército di cabai, pa pueblo bandona ‘cristianismo organizá’ i duna lealtad di nan curazón na Jehova Dios i na su Rey i Reino.

 7. 1928, Detroit, Michigan: Un declaracion contra Satanás na fabor di Jehova Dios, haciendo claro cu e Rey ungí di Dios, entronizá na 1914, lo destrui e organizacion malbado di Satanás i emancipa humanidad.

[Kuadro na página 175]

Ruinando e tera

“Cada tres secondo ta desparce un parti di mondi tropical original e tamaño di un feld di bala. . . . Tal perdimento di mondi original ta destrui miles di calidad di mata i raza di bestia.”—Illustrated Atlas of the World (Rand McNally).

“Den dos siglo di habitacion, [Lago Grandi di Nortamérica] també a bira e riool di mas grandi di mundo.”—The Globe and Mail (Canadá).

Den April di 1986 un explosion i candela den un planta di energía nuclear den Chernóbil, URSS, “tabatin e sosodimento nuclear di mas significante . . . desde bombardeo di Hiroshima i Nagasaki,” “haciendo tanto contaminacion di largu plazo di aire, tera i awa di mundo como tur prueba nuclear i bomba cu nan a yega di explota te awor.”—JAMA; The New York Times.

Den Minamata, Hapón, un planta di químico a basha metilmercurio den e haf. Hende cu a come piscá i cocolishi contaminá cu e químico a haya e enfermedad Minimata (MD), un “enfermedad neurológico crónico. . . . Te ne fecha [1985], 2578 hende den tur Hapón tin MD segun confirmacion oficial.”—International Journal of Epidemiology.

[Kuadro na página 176]

Declaracion importante di Revelacion 11:15-19 ta un introduccion pa vision cu ta sigi. Revelacion capítulo 12 ta un bista di sosodimento anterior cu ta amplifica en detaye anuncio grandi di Revelacion 11:15, 17. Capítulo 13 ta duna fondo na 11:18, pasobra e ta splica e origen i desaroyo dje organizacion político di Satanás cu a trece ruina pe tera. Capítulo 14 i 15 ta duna mas detaye di huzgamento dje Reino enlazá cu tocamento di trompet di siete i e tercera calamidad.

[Plachi na página 174]

Jehova lo “causa e ruina di esnan cu ta ruina e tera”