Kon pa Identifiká e Bestia Salbahe i Su Marka

ABO ta gusta resolvé charada? Pa bo hasi esei, bo ta buska un indikashon ku por yuda bo saka afó kiko un sierto charada ta nifiká. Den su Palabra inspirá, Dios ta duna e indikashonnan nesesario relashoná ku e number 666, e nòmber, òf marka, di e bestia salbahe di Revelashon kapítulo 13.

Den e artíkulo aki, nos lo analisá kuater punto prinsipal—indikashonnan klave—ku lo revelá e nifikashon di e marka dje bestia. Nos lo analisá (1) kon sa skohe nòmbernan di Beibel, (2) e identidat di e bestia salbahe, (3) kiko ta nifiká e echo ku e number 666 ta “number di un hende,” i (4) e nifikashon di e sifra 6 i pakiko e ta ser menshoná tres biaha tras di otro, esta 666.—Revelashon 13:18.

Nòmbernan di Beibel —Mas ku Djis un Etikèt

Hopi bes nòmbernan di Beibel tin un nifikashon spesial, foral ora ku nan a bini di Dios. Por ehèmpel, pa motibu ku Abram lo a bira tata di hopi nashon, Dios a kambia nòmber di e patriarka pa Abraham, ku ta nifiká “Tata di un Multitut.” (Génesis 17:5) Un otro ehèmpel ta ku Dios a manda Hosé ku Maria yama e futuro yu di Maria, Hesus, lokual ta nifiká “Yehova Ta Salbashon.” (Mateo 1:21; Lukas 1:31) Na armonia ku e nòmber signifikativo ei, pa medio di Hesus su ministerio i morto sakrifisial, Yehova a hasi posibel pa nos haña salbashon.—Juan 3:16.

P’esei, e nòmber 666 ku Dios a duna e bestia mester ta representá e karakterístikanan ku Dios ta mira den dje. Klaru ku pa komprondé e karakterístikanan ei, nos tin ku identifiká e bestia mes i haña sa kiko e ta hasi.

Identidat di e Bestia Revelá

E buki bíbliko di Daniel ta duna hopi informashon ku ta klarifiká e nifikashon di bestianan simbóliko. Kapítulo 7 ta kontené un deskripshon bibu di “kuater bestia grandi”—un leon, un ber, un leopardo i un bestia spantoso ku djente grandi di heru. (Daniel 7:2-7) Daniel ta konta nos ku e bestianan aki ta representá ‘reinan,’ òf reinonan polítiko, ku ta goberná un tras di otro riba imperionan ekstenso.—Daniel 7:17, 23.

Relashoná ku e bestia di Revelashon 13:1 i 2, The Interpreter’s Dictionary of the Bible ta splika ku e ta un “kombinashon di tur e karakterístikanan di e kuater bestianan di e vishon di Daniel . . . Konsekuentemente, e promé bestia aki [di Revelashon] ta representá e forsanan kombiná di tur gobièrnu polítiko na mundu ku ta kontra Dios.” Revelashon 13:7 ta konfirmá e remarke aki, pasobra e ta bisa di e bestia: “Outoridat riba tur tribu i pueblo i lenga i nashon a wòrdu duná na dje.”a

Pakiko Beibel ta usa bestia komo símbolo di gobernashon humano? Tin por lo ménos dos motibu. Na promé lugá, pa motibu di e laman di sanger ku gobièrnunan semehante na bestia salbahe a drama den transkurso di siglonan. E historiadónan Will i Ariel Durant a skirbi ku “guera ta un di e rasgonan konstante di historia, i [ku] e no a mengua ni ku sivilisashon ni ku demokrasia.” Ta un echo establesí anto ku ‘hende a ehersé outoridat riba otro hende pa su daño’! (Eklesiastés 8:9) E di dos motibu ta ku “e dragon [Satanas] a dun’é [e bestia] su poder i su trono i gran outoridat.” (Revelashon 12:9; 13:2) Konsekuentemente, gobernashon humano ta un invento di Diabel, ku ta reflehá su kualidatnan bestial, manera di un dragon.—Juan 8:44; Efesionan 6:12.

Sin embargo, esaki no ta nifiká sí ku delaster un gobernante humano ta un instrumento direkto di Satanas. Por sierto, den un sentido, gobièrnunan humano ta “sirbidó di Dios” dor ku nan ta sòru pa sierto stabilidat den e sosiedat humano; sin esei lo reina káos. I algun gobernante a protehá derechonan fundamental di hende, inkluso e derecho di partisipá den adorashon berdadero—algu ku ta bai kontra e deseo di Satanas. (Romanonan 13:3, 4; Esdras 7:11-27; Echonan 13:7) Tòg, pa motibu di e influensia di Diabel, ningun hende ni institushon humano por a logra trese pas i siguridat duradero pa pueblo.b—Juan 12:31.

“Number di un Hende”

Un di tres indikashon pa komprondé e nifikashon di 666 ta sinta den e echo ku e ta “number di un hende,” òf manera The Amplified Bible ta yam’é, “un number humano.” E ekspreshon aki no por ta refiriendo na un sierto hende, pasobra ta Satanas tin outoridat riba e bestia, i no hende. (Lukas 4:5, 6; 1 Juan 5:19; Revelashon 13:2, 18) Mas bien, e echo ku e bestia tin un ‘number [òf marka] di hende,’ ta indiká ku e ta un entidat humano—no un spiritu òf demoño—i p’esei e ta manifestá sierto karakterístikanan humano. Ta di ki karakterístika nos ta papia aki? Beibel ta kontestá bisando: “Tur [ser humano] a peka i ta falta e gloria di Dios.” (Romanonan 3:23) P’esei, e echo ku e bestia tin un “un number humano,” ta indiká ku gobièrnunan ta reflehá e kondishon degradá di hende, e marka di piká i imperfekshon.

Historia ta duna evidensia di esaki. Na un okashon, Henry Kissinger, eks-sekretario di estado di Merka, a bisa: “Ku tempu, tur sivilisashon ku a yega di eksistí a basha den otro. Historia ta un relato di esfuersonan ku a frakasá, di aspirashonnan ku no a materialisá . . . Pues, komo historiadó, bo tin ku biba ku e sintimentu ku tragedia ta inevitabel.” Kissinger su evaluashon franko ta konfirmá e bèrdat bíbliko fundamental aki: “Mi sa ku e kaminda di hende no ta di dje mes; tampoko no ta keda na hende pa dirigí su pasonan.”—Jeremias 10:23.

Awor ku nos a identifiká e bestia i haña sa kon Dios ta mir’é, nos por analisá e parti final di nos enigma: e sifra seis i pakiko e ta ser skirbí tres biaha tras di otro, esta 666.

Pakiko Tres Biaha Seis?

Den e Skritura, sierto sifranan tin nifikashon simbóliko. Tuma komo ehèmpel e sifra shete. Hopi bes e sifra aki ta ser usá pa simbolisá loke ta kompletu, òf perfekto, den bista di Dios. Por ehèmpel, Dios su siman di kreashon ta konsistí di shete ‘dia’—kada unu representando un periodo di tempu hopi largu—durante kua Dios a kumpli kabalmente ku e propósito pa kua el a krea tera. (Génesis 1:3–2:3) Otro ehèmpel: E “palabranan” di Dios ta manera plata ku a ser “purifiká shete biaha,” pues perfektamente refiná. (Salmo 12:6; Proverbionan 30:5, 6) Tambe nos ta haña e kaso di e leproso Naaman, ku a ser mandá pa bai baña shete biaha den Riu Hordan, despues di kua el a kura kompletamente.—2 Reinan 5:10, 14.

Seis ta unu ménos ku shete. Lo e no ta un símbolo apropiá di algu imperfekto, òf defisiente, den bista di Dios? Indudablemente! (1 Krónikanan 20:6, 7) Ademas, tres biaha seis, òf 666, ta enfatisá e imperfekshon ei fuertemente. I e echo ku 666 ta “un number humano,” manera nos a mira kaba, ta konfirmá pa nos ku esei ta e punto di bista korekto. Pues, tantu e historia di e bestia, su “number humano,” komo e sifra 666 riba su mes, ta laga nos yega na un konklushon inekibokabel: defisiensia i frakaso total den bista di Yehova.

E deskripshon di e defisiensianan di e bestia ta pone nos kòrda loke Dios a bisa di Rei Bèlsasar di Babilonia di antigwedat. Pa medio di Daniel, Yehova a bisa e gobernante ei: “Bo a wòrdu pisá den balansa i bo ta pisa muchu poko.” E mes anochi ei Bèlsasar a wòrdu matá i e poderoso Imperio di Babilonia a kai. (Daniel 5:27, 30) Meskos tambe, e huisio di Dios kontra e bestia polítiko i kontra esnan ku tin su marka ta nifiká fin di e entidat ei i tambe di su apoyadónan. Pero den e kaso aki Dios lo eliminá no solamente un sistema polítiko sino tur rastro di gobernashon humano. (Daniel 2:44; Revelashon 19:19, 20) P’esei, ta masha importante anto pa nos evitá di tin e marka mortal di e bestia!

E Marka Identifiká

Inmediatamente despues ku e buki di Revelashon a menshoná e sifra 666, e ta papia di 144.000 siguidó di e Lamchi, Hesukristu, ku tin su nòmber i nòmber di su Tata, Yehova, skirbí riba nan frenta. E personanan ku tin e nòmbernan aki ta pertenesé na Yehova i na su Yu, di ken nan ta duna testimonio ku orguyo. Meskos tambe, esnan ku tin e marka di e bestia ta mustrando públikamente ku nan ta sirbiendo e bestia. Pues, e marka, sea riba man drechi òf riba frenta, na moda di papia, ta un símbolo ku ta identifiká esnan ku tiné komo personanan ku ta venerá i apoyá e sistemanan polítiko semehante na bestia di e mundu aki. Esnan ku tin e marka ta duna “Cesar” loke en realidat ta pertenesé na Dios. (Lukas 20:25; Revelashon 13:4, 8; 14:1) Kon asina? Nan ta hasi esaki dor di onra i venerá estado i su polítika, su símbolonan i su potensia militar, esta, kosnan ku nan ta mira komo nan speransa i salbashon. Kualke adorashon ku nan rindi na e Dios berdadero no ta nada mas ku sirbishi di lep.

Na kontraste, Beibel ta hasi un apelashon fuerte na nos pa “no konfia den prensnan, den yu di hende, den kende no tin salbashon. Su spiritu ta sali, e ta bolbe na tera; e mes dia ei su pensamentunan ta peresé.” (Salmo 146:3, 4) Esnan ku ta sigui e konseho sabí ei no ta keda desilushoná ora gobièrnunan keda sin kumpli ku nan promesanan òf ora lidernan karismátiko pèrdè nan prominensia.—Proverbionan 1:33.

Esaki no ta nifiká ku kristiannan berdadero ta sinta wak sin hasi nada pa aliviá e miseria di humanidat. Al kontrario, nan ta hopi aktivo den e obra di proklamá e úniko gobièrnu ku lo resolvé e problemanan di humanidat: e Reino di Dios, ku nan ta representá.—Mateo 24:14.

E Reino di Dios —E Úniko Speransa di Humanidat

Tempu ku Hesus tabata riba tera, el a hasi e Reino di Dios e tema prinsipal di su predikashon. (Lukas 4:43) Den su orashon modelo, konosí tambe komo e orashon di Nos Tata, Hesus a siña su siguidónan pidi p’e Reino ei bini i p’e boluntat di Dios sosodé aki riba tera. (Mateo 6:9, 10) E Reino ta un gobièrnu ku lo goberná riba henter e tera, no for di un ke otro kapital aki riba tera, sino for di shelu. P’esei Hesus a yam’é “e reino di shelu.”—Mateo 11:12.

Ken ta den un mihó posishon pa ta Rei di e Reino ei ku Hesukristu, esun ku a muri pa su futuro súpditonan? (Isaias 9:6, 7; Juan 3:16) Pronto e Gobernante perfekto aki, awor un kriatura spiritual poderoso, lo tira e bestia, su reinan i su ehérsitonan den “e lago di kandela ku ta kima ku suafel,” un símbolo di destrukshon kompletu. Pero esei no ta tur kos. Hesus lo eliminá Satanas tambe, algu ku hende lo no ta kapas di hasi nunka.—Revelashon 11:15; 19:16, 19-21; 20:2, 10.

E Reino di Dios lo trese pas pa tur su súpditonan obediente. (Salmo 37:11, 29; 46:8, 9) Ni tristesa, ni doló ni morto lo no eksistí mas. Esaki sí ta un speransa glorioso pa esnan ku keda liber di e marka di e bestia!—Revelashon 21:3, 4.

[Nota]

[Kuadro na página 5]

Indikashonnan pa Haña Sa Nifikashon di 666

 1. Hopi bes nòmbernan di Beibel ta bisa algu di e karakterístikanan òf bida di e personanan ku tabatin e nòmbernan ei, manera den e kaso di Abraham, Hesus i hopi otro hende. Meskos tambe, e nòmber di e bestia, ku ta mas bien un number, ta representá su karakterístikanan.

 2. Den e buki bíbliko di Daniel, e vários bestianan ta representá reinonan òf imperionan humano ku a sigui un tras di otro. E bestia di Revelashon 13:1 i 2, ku ta konsistí di diferente animal, ta simbolisá e sistema polítiko mundial ku ta funshoná ku poder i bou di kontròl di Satanas.

 3. E echo ku e bestia tin “number di un hende,” òf “un number humano,” ta indiká ku e ta un entidat humano, i no un demoño. P’esei, e ta reflehá e fayonan humano kousá pa piká i imperfekshon.

 4. Den bista di Dios, e sifra seis, unu ménos ku shete—ku ta bíblikamente kompletu òf perfekto—ta indiká imperfekshon. E marka 666 ta enfatisá e defisiensia ei dor di ripití e sifra tres biaha.

[Plachinan na página 6]

Gobernashon humano a resultá di ta un frakaso; e number 666 ta un símbolo apropiá di esei

[Rekonosementu]

Mucha hambrá: UNITED NATIONS/Potrèt di F. GRIFFING

[Plachinan na página 7]

Hesukristu lo perkurá pa un gobernashon perfekto riba tera