E Palabra di Yehova Ta Bibu

Puntonan Sobresaliente di e Buki di Revelashon​—II

KIKO ta spera hende ku ta adorá Yehova Dios i esnan ku no ta ador’é? Kon lo para ku Satanas i su demoñonan? Ki bendishon hende obediente lo disfrutá di dje durante e Reinado di Mil Aña di Kristu? Revelashon 13:​1–22:21a ta kontestá e preguntanan akí i otro preguntanan importante. Den e kapítulonan akí di Revelashon tin e último 9 di e 16 vishonnan ku apòstel Juan a haña kasi na fin di promé siglo.

Juan a skirbi: “Bendishoná ta esun ku lesa i esnan ku tende e palabranan di e profesia” i “esun ku ta warda e palabranan di e profesia di e buki akí.” (Rev. 1:3; 22:7) Ora nos lesa i apliká loke nos a siña di e buki di Revelashon, esei por tin efekto riba nos kurason i tambe fortalesé nos fe den Dios i su Yu, Hesukristu, i duna nos un speransa briante.b​—Heb. 4:12.

ANGELNAN TA BASHA E SHETE KÒNCHINAN DI E FURIA DI DIOS

(Rev. 13:1–16:21)

Revelashon 11:18 ta bisa: “E nashonnan a bira furioso, i [Dios su] furia a bin, i a yega e tempu . . . pa destruí esnan ku ta destruí e tera.” Dikon Dios a bira furioso? Vishon number ocho ta duna e kontesta. E ta mustra loke “un bestia [salbahe ku] . . . tabatin dies kachu i shete kabes” ta hasiendo.​—Rev. 13:1.

Den vishon number nuebe, Juan ta mira ku “e Lamchi tabata pará riba Seru Sion, i huntu kuné 144.000.” Nan ta “kumprá for di entre hende.” (Rev. 14:​1, 4) Djei e ta mira angelnan ta duna mensahe. Den e siguiente vishon, Juan ta mira “shete angel ku tabatin shete plaga.” Evidentemente, Yehova mes a manda e angelnan akí pa basha “e shete kònchinan di e furia di Dios” riba vários parti di e mundu di Satanas. E kònchinan ta kontené proklamashon- i spièrtamentunan di huisio ku Dios lo ehekutá. (Rev. 15:1; 16:1) E dos vishonnan akí ta duna detaye di otro huisionan di e Reino ku ta relashoná ku e di tres ai i e tokamentu di e di shete tròmpèt.​—Rev. 11:​14, 15.

Kontesta Riba Pregunta Bíbliko:

13:8​—Kiko “e buki di bida di e Lamchi” ta? Esaki ta un buki figurativo ku ta kontené solamente nòmber di esnan ku ta goberná ku Hesukristu den su Reino selestial. E ta inkluí nòmber di kristiannan ungí ku ta riba tera ainda, kendenan tin speransa di haña bida den shelu.

13:​11-13​—Kon e bestia salbahe ku dos kachu ta aktua manera un dragon i hasi kandela baha for di shelu? E echo ku e bestia salbahe ku dos kachu (Poder Mundial Anglo-Amerikano) ta papia manera un dragon ta indiká ku e ta usa menasa, preshon i violensia pa fòrsa hende aseptá su forma di goberná. E ta hasi kandela baha for di shelu den e sentido ku e ta hasi manera ta profeta e ta dor di pretendé ku el a vense forsanan di maldat durante e dos gueranan mundial di siglo 20 i a triunfá riba komunismo.

16:17​—E “angel a basha su kònchi den laira.” Kiko e palabra “laira” ta simbolisá? E ta simbolisá forma di pensa satániko, “e spiritu [inklinashon mental] ku ta obra awor den e yunan di desobedensia.” Na moda di papia, henter e sistema di kosnan malbado di Satanas ta respirá e aire venenoso akí ku tin den laira.​—Efe. 2:2.

Lès pa Nos:

13:​1-4, 18. “Un bestia” salbahe ku ta simbolisá gobièrnunan ta “subi sali for di den laman,” es desir, for di humanidat ku ta manera awa turbulento. (Isa. 17:​12, 13; Dan. 7:​2-8, 17) E bestia akí, ku Satanas a krea i duna poder, tin e number 666, ku ta enfatisá kon imperfekto e bestia ta. Ora nos komprondé kiko e bestia ta representá, esei lo yuda nos pa nos no siguié ku atmirashon ni ador’é manera hende en general ta hasi.​—Juan 12:31; 15:19.

13:​16, 17. Apesar di problema ku nos ta haña nos kuné den nos aktividatnan di tur dia manera ‘kumpra òf bende,’ nos no mester permití e bestia salbahe preshoná nos. Nos ta aseptá e ‘marka di e bestia salbahe na nos man drechi òf na nos frenta’ si nos laga e bestia salbahe kontrolá nos akshonnan i afektá nos manera di pensa.

14:​6, 7. E proklamashon angelikal ta siña nos ku nos tin ku prediká e bon nobo di e Reino establesí di Dios ku un sentido di urgensia. Nos mester yuda nos studiantenan di Beibel haña temor di Yehova i pa dun’é gloria.

14:​14-20. Ora “e kosecha di tera,” es desir, e kosecha di esnan ku lo haña salbashon, ta kla, lo ta tempu pa e angel tira loke el a rekohé di “e mata di wendrùif di e tera . . . den e gran baki-di-pèrs-wendrùif di e furia di Dios.” E mata di wendrùif ei—Satanas su sistema korupto ku ta goberná ku su ‘tròshi’ di mal fruta riba humanidat—lo ser destruí pa semper. Nos mester ta determiná pa no laga e mata di wendrùif di e tera influensiá nos.

16:​13-16. E ekspreshon “spiritu impuru” ta simbolisá propaganda di demoño ku tin e meta di perkurá pa e reinan di tera no wòrdu influensiá pa e bashamentu di e shete kònchinan di e furia di Dios, sino mas bien pa instigá nan kontra Yehova.​—Mat. 24:​42, 44.

16:21. Djis promé ku fin di e mundu akí, e proklamashon di Yehova su huisio kontra e sistema malbado di Satanas por enserá ekspreshonnan mas fuerte di Dios su huisio, ku probablemente ta ser simbolisá pa awa kongelá. Tòg, un gran parti di humanidat lo sigui blasfemá Dios.

E REI TRIUNFANTE TA GOBERNÁ

(Rev. 17:1–22:21)

‘Babilonia e Grandi,’ e imperio mundial di religion falsu, ta un parti repugnante di e mundu malbado di Satanas. Vishon number 11 ta pint’é komo un “gran prostituta”—un muhé inmoral—“sintá riba un bestia koló skarlata.” E “dies kachu” di e bestia ku ta karg’é mester destruí e muhé akí kompletamente. (Rev. 17:​1, 3, 5, 16) Komparando e prostituta ku un “gran stat,” e siguiente vishon ta anunsiá su kaida i ta hasi un yamada urgente pa Dios su pueblo “sali for di dje.” Hopi hende ta yora kaida di e gran stat. Sinembargo, tin alegria den shelu debí na “e matrimonio di e Lamchi.” (Rev. 18:​4, 9, 10, 15-19; 19:7) Den vishon number 13, e koredó di “un kabai blanku” ta bai bringa kontra e nashonnan. E ta pone un fin na Satanas su mundu malbado.​—Rev. 19:​11-16.

Kiko di “e kolebra di antigwedat, kende ta [e] Diabel i Satanas”? Ki tempu lo tir’é “den e lago di kandela”? Esei ta un di e tópikonan ku vishon number 14 ta trata. (Rev. 20:​2, 10) E último dos vishonnan ta duna nos un idea kon bida lo ta durante e Milenio. Segun ku e “revelashon” ta yega su final, Juan ta mira ‘un riu di e awa di bida, sali for di meimei di e kaya,’ i un maravioso invitashon ta ser ekstendé na “esun ku tin set.”​—Rev. 1:1; 22:​1, 2, 17.

Kontesta Riba Pregunta Bíbliko:

17:16; 18:​9, 10​—Dikon “e reinan di tera” ta yora esun ku nan mes a destruí? Nan ta yor’é puramente pa motibu egoista. Despues di destrukshon di Babilonia e Grandi, e reinan di tera evidentemente ta realisá kon útil e tabata pa nan. E tabata duna e impreshon ku ta aseptabel pa polítikonan oprimí hende. Ademas, Babilonia e Grandi a yuda nan pa reklutá hóbennan pa bai guera. I tambe el a yuda e reinan di tera pa tene hende bou di kontròl.

19:12​—Kon bin Hesus so konosé su nòmber ku no ta ser menshoná? Ta parse ku e nòmber akí ta representá e posishon- i privilegionan, entre otro esnan menshoná na Isaias 9:6, ku Hesus ta disfrutá di dje durante e dia di Señor. E so konosé e nòmber akí den e sentido ku su privilegionan ta úniko i ta e so ta komprondé kiko ke men okupá un posishon asina haltu. Sinembargo, Hesus ta kompartí algun di e privilegionan ku e miembronan di su klase di brùit, de echo, ‘skirbiendo riba nan su nòmber nobo.’​—Rev. 3:12.

19:14​—Ken ta sigui Hesus na Armagedón? Entre ‘e ehérsitonan den shelu’ ku lo uni ku Hesus den Dios su guera lo tin tantu angelnan komo e ungínan ku a vense i a haña nan rekompensa selestial kaba.​—Mat. 25:​31, 32; Rev. 2:​26, 27.

20:​11-​15​—Ken su nòmber ta skirbí den “e buki di bida”? E buki akí tin tur e nòmbernan di esnan ku ta bin na remarke pa haña bida eterno: e kristiannan ungí, miembronan di e multitut grandi i e sirbidónan fiel di Dios ku lo haña “resurekshon di e hustunan.” (Echo. 24:15; Rev. 2:10; 7:9) Lo skirbi nòmber di esnan ku lanta for di morto durante ‘resurekshon di e inhustunan’ den “e buki di bida” solamente si nan aktua na armonia ku loke tin “skirbí den e buki” òf instrukshonnan nobo ku lo tin durante e Milenio. Sinembargo, nan nòmber no ta skirbí den dje permanentemente. E nòmbernan di esnan ungí lo bira permanente si nan keda fiel te na morto. (Rev. 3:5) Nòmber di esnan ku haña bida riba tera lo bira permanente ora nan pasa e prueba final na fin di e mil aña.​—Rev. 20:​7, 8.

Lès pa Nos:

17:​3, 5, 7, 16. “Sabiduria di ariba” ta yuda nos komprondé “e misterio di e muhé i di e bestia [salbahe koló di skarlata] ku ta karg’é.” (Sant. 3:17) Promé e bestia salbahe a simbolisá Liga di Nashonnan i despues el a rebibá komo Nashonnan Uní. E revelashon di e misterio akí no mester konmové nos pa ta zeloso den e predikashon di e bon nobo di e Reino di Dios i pa proklamá e dia di Yehova su huisio?

21:​1-6. Nos por ta apsolutamente sigur ku e bendishonnan primintí bou di e Reino lo bira un realidat. Dikon? Pasobra Beibel ta bisa ku nan “ta kumplí.”

22:​1, 17. E “riu di e awa di bida” ta representá loke Yehova a proveé pa hende obediente haña liberashon for di piká i morto. Aktualmente tin un sierto kantidat di e awa akí disponibel. Laga nos no solamente aseptá ku gustu e invitashon pa bini i “tuma e awa di bida pòrnada” sino ekstend’é na otro hende tambe!

[Nota]

[Plachi na página 13]

Ki bendishonnan maravioso hende lo haña bou di e Reino!