Sirbiendo Como Piscador di Hende

“Jesús a bisa Simón: ‘No tene miedu. Djawor padilanti lo bo pisca hende na bida.’”—LUCAS 5:10.

 1, 2. (a) Ki papel piscamento a hunga den e pasado di humanidad? (b) Cua clase di piscamento nobo tabata introduci casi 2.000 aña pasá?

PA MILES di aña, humanidad a haya cuminda piscando den lamá, lagún, i rio dje tera. Piscá di rio Nilo tabata un parti importante di cuminda di Egipto di antigua. Ora awa dje Nilo a bira sanger den e dia di Moisés, egipcio a sufri no solamente pa motibo cu nan a falta awa pa bebe sino també pa motibo cu tur piscá a muri, i nan no por a haya cuminda. Despues, cerca Sinaí, ora Jehova Dios a duna Israel e Ley, el a bísanan cu nan por a come cierto piscá pero cu otronan tabata impuro, i no tabata cuminda. Esei a indica cu israelita por a come piscá ora nan a drenta den e Tera Primintí, di manera cu algun di nan tabata piscador.—Éxodo 7:20, 21; Levítico 11:9-12.

² No obstante, casi 2.000 aña pasá, humanidad tabata duná di conoce otro clase di piscamento. Esei tabata un piscamento dje clase spiritual cu por beneficiá no solamente piscador sino també piscá! Tal clase di piscamento ta ser hací awe ainda, cu beneficio inmenso pa miyones di hende mundial­mente.

“Pisca Hende na Bida”

 3, 4. Cua dos piscador a mustra gran interés den Jesucristo?

³ Na aña 29 EC, Juan bautista a bautiza Jesús den e rio Jordan, Esun cu a introduci e manera nobo di pisca. Un poco siman despues, Juan a siñalá na Jesús i a bisa dos disípel di dje: “Mira, e Lamchi di Dios!” Un disípel, esun yamá Andrés, a bisa su ruman Simón Pedro pronto: “Nos a haya Mesías”! Ta interesante cu Andrés i també Simón tabata piscador profesional.—Juan 1:35, 36, 40, 41; Mateo 4:18.

⁴ Basta tempo despues, Jesús tabata predica pa un multitud cant’i Lamá di Galilea, no mucho leu di unda Pedro i Andrés tabata biba. El a bisa e pueblo: “Boso arrepenti, pasobra e reino di cielo a yega cerca.” (Mateo 4:13, 17) Nos por imaginános cu Pedro i Andrés tabata ansioso pa tende su mensahe. Pero, probablemente nan no tabata sa cu Jesús tabata cla pa bísanan algo cu lo cambia nan bida pa semper. Además, loke Jesús a sigi bisa i a haci den nan presencia tabatin un nificacion importante pa nos tur djawe.

 5. Con Pedro e piscador por a ser útil pa Jesús?

⁵ Nos ta leza: “Na un ocasion ora e multitud tabata pretá riba dje scuchando e palabra di Dios, e tabata pará na oriya di lago di Genesaret. I el a mira dos boto mará cant’i awa, pero piscador a baha caba i tabata laba nan reda.” (Lucas 5:1, 2) Den e tempo ei, hopi bez piscador profesional a traha anochi, i e hombernan tabata haci nan reda limpi despues di a pisca henter anochi. Jesús a decidi di usa un boto di nan pa predica mas efectivamente pe multitud. “Subiendo un boto, cu tabata di Simón, el a pidié hala un tiki for di tera. Anto el a sinta, i for dje boto el a cuminza siña e multitud.”—Lucas 5:3.

 6, 7. Cua milagro relacioná cu piscamento Jesús a haci, i esei a hiba na cua declaracion tocante piscamento?

⁶ Ripara cu Jesús no tabata pensa solamente riba siñamento dje multitud: “Ora el a caba di papia, el a bisa Simón: ‘Hala afó unda ta hundo, i boso por tira boso reda pa coge piscá.’” Corda cu e piscadornan a traha henter anochi caba. No ta un sorpresa cu Pedro a contestá: “Instructor, nos a traha henter anochi i no a coge nada, pero riba bo palabra, lo mi baha e reda.” Kico a pasa ora nan a haci esei? “Nan a cera un gran cantidad di piscá. Realmente, nan reda a cuminza kibra. P’sei nan a haci seña na nan compañé den e otro boto pa bini i yúdanan; i nan sí a bini, i a yena e dos boto, di manera cu nan a cuminza sink.”—Lucas 5:4-7.

⁷ Jesús a haci un milagro. Nan no a coge nada den e awa ei henter anochi; ma awor e tabata yen di piscá. E milagro tabatin un efecto profundo riba Pedro. “Simón Pedro a cai na rudía di Jesús, bisando: ‘Bai lagámi, Señor, pasobra mi ta hende pecador.’ Pasobra debí ne cantidad di piscá cu nan a coge, asombro a dominé i tur esnan hunto cuné, i també tanto Santiago como Juan, yiu di Zebedeo, cu tabata participante cu Simón.” Jesús a calma Pedro anto a pronunciá e palabra cu a cambia e bida di Pedro. “No tene miedu mas. Djawor padilanti lo bo pisca hende na bida.”—Lucas 5:8-10.

Piscador di Hende

 8. Con cuater piscador profesional a responde ne invitacion di ‘pisca hende na bida’?

⁸ Dje manera ei Jesús a compara hende cu piscá, i el a invita e piscador humilde pa bandoná su ofishi seglar i acepta un manera di pisca hopi mas superior, esta, pisca hende na bida. Pedro, i su ruman Andrés, a acepta e invitacion. “Bandonando nan reda un bez, nan a sigié.” (Mateo 4:18-20) Sigientemente, Jesús a yama Santiago i Juan, cu tabata den nan boto drechando reda. El a invitánan també pa bira piscador di hende. Con nan a responde? “Bandonando e boto i nan tata un bez, nan a sigié.” (Mateo 4:21, 22) Jesús a demonstra aptitud como un piscador di alma. Ne ocasion ei el a coge cuater homber na bida.

 9, 10. Pedro i su compañénan a demonstra cua fe, i con nan tabata entrená den piscamento spiritual?

⁹ Piscador profesional ta gana nan pan cu e benta di piscá, pero piscador spiritual no por haci esei. Pues, e disípelnan a demonstra un gran fe ora nan a bandona tur cos pa sigi Jesús. Sin embargo, nan no a duda cu nan piscamento spiritual lo tene éxito. Jesús por a haci awa improductivo abundá cu piscá literal. Di igual manera, ora nan a tira nan reda den awa dje nacion di Israel, e disípelnan por a keda sigur cu, cu e yudanza di Dios, nan por coge hende na bida. E trabao di piscamento spiritual cu a cuminza ayá ta sigi, i Jehova Dios ainda ta duna un cosecha abundante.

¹⁰ Pa mas cu dos aña Jesús a entrena e disípelnan pa pisca hende. Na un ocasion el a dúnanan instruccion cuidadoso i a mándanan dilanti dje pa predica. (Mateo 10:1-7; Lucas 10:1-11) Ora Jesús tabata traicioná i matá, e disípelnan a keda tolondrá. Pero, e morto di Jesús a nifica cu lo no tin mas piscamento di hende? Loke a sosode pronto a duna e contesta.

Piscamento den e Lamá di Humanidad

11, 12. Despues di su resureccion, cua milagro Jesús a haci en relacion cu piscamento?

¹¹ Un poco despues dje morto di Jesús pafó di Jerusalem i despues di su resureccion, e disípelnan a bolbe pa Galilea. Na un ocasion siete di nan tabata hunto cerca Lamá di ­Galilea. Pedro a bisa cu e tabata bai pisca, i e otronan a bai cuné. Manera costumber, nan a pisca anochi. Realmente, nan a tira nan reda atrobé den lamá henter anochi sin coge nada. Anto ora dia a habri, un homber cu nan a mira pará na oriya a grítanan riba lamá: “Muchanan, boso no tin nada pa come, no ta berdad?” E disípelnan a contesta cu: “No!” Pues, e persona pará na oriya a bísanan: “‘Tira e reda ne banda drechi dje boto i boso lo haya.’ Anto nan a tiré, pero nan no por a halé mas debí ne cantidad di piscá.”—Juan 21:5, 6.

¹² Ki un experencia asombroso! Probablemente e disípelnan a corda e milagro promé en relacion cu piscamento, i por lo menos uno di nan a reconoce e persona na oriya. “E disípel cu Jesús a stima a bisa Pedro: ‘Esei ta Señor!’ Anto Simón Pedro, ora el a tende cu tabata Señor, a bistié cu su bistí exterior, pasobra e tabata sunú, i a tira zambuya den lamá. Pero e otro disípelnan a bini den e boto chikito, pasobra nan no tabata mucho leu for di tera, solamente rond di nobenta meter foi dje.”—Juan 21:7, 8.

13. Despues cu Jesús a subi na cielo, cua programa di piscamento internacional a cuminza?

¹³ Kico e milagro a indica? Cu e trabao di pisca hende no a caba. Tal echo tabata enfatizá ora Jesús a sigi bisa Pedro tres bez—i mediante dje a bisa tur e disípelnan—alimentá e carnénan di Jesús. (Juan 21:15-17) Sí, ainda nan tabatin cu sigi un programa di alimentacion spiritual. Promé cu su morto, Jesús a profetiza: “E bon nobo di reino lo ser predicá den tur e tera habitá como testimonio pa tur nacion.” (Mateo 24:14) Awor tabata tempo pa cuminza cumplimento dje profecía den e promé siglo. Su disípelnan tabata puesto pa tira nan reda den lamá di humanidad, i nan reda lo no subi bashí.—Mateo 28:19, 20.

14. Di ki manera e piscamento di sigidor di Jesús tabata bendicioná durante e añanan promé cu e destruccion di Jerusalem?

¹⁴ Promé cu el a subi ne trono di su Tata den cielo, Jesús a bisa su sigidornan: “Boso lo recibi poder ora spiritu santo ta yega riba boso, i boso lo ser testigo di mi tanto den Jerusalem como den tur Hudea i den Samaria i te ne parti mas lehano dje tera.” (Echo 1:8) Ora spiritu santo tabata bashá riba e disípelnan na Pentecoste di aña 33 EC, e trabao grandi di piscamento spiritual a cuminza na escala internacional. Riba e dia di Pentecoste so, nan a coge tres mil alma na bida, i pronto despues “e cantidad di hende a bira rond di cinco mil.” (Echo 2:41; 4:4) E aumento a sigi. E relato ta bísanos: “Creyente den Señor a sigi ser agregá, multitudnan tanto di homber como di muher.” (Echo 5:14) Pronto, samaritano a acepta e bon nobo, i un poco despues gentil incircuncidá a haci mescos. (Echo 8:4-8; 10:24, 44-48) Mas cu 27 aña despues di Pentecoste, apóstol Pablo a skirbi hende cristian colosense cu e bon nobo a ser “predicá den tur creacion cu ta bao di cielo.” (Colosense 1:23) Claramente, e disípelnan di Jesús a pisca leu for di awa di Galilea. Nan a tira nan reda den hudío plamá den e Imperio Romano, i també den lamá di pueblo no hudío cu a parce di ofrece poco speranza. I nan a hala reda yen. Pa satisface e necesidad di hende cristian dje promé siglo, e profecía di Jesús den Mateo 24:14 tabata cumplí promé cu Jerusalem tabata destruí na aña 70 EC.

Piscamento di Hende den e “Dia di Señor”

15. Cua otro trabao di piscamento tabata profetizá den e buki di Revelacion, i esei tabata cumplí na cua tempo?

¹⁵ No obstante, tabatin mas trabao. Cerca e fin dje promé siglo, Jehova Dios a duna Juan, e último apóstol na bida, un revelacion di loke lo sosode durante e “dia di Señor.” (Revelacion 1:1, 10) Un rasgo sobresaliente tabatin cu ser e declaracion dje bon nobo mundialmente. Nos ta leza: “Mi a mira un otro angel bulando den centro di cielo, i e tabatin bon nobo eterno pa declara como noticia alegre pa hende cu ta biba riba tera, i pa tur nacion i tribu i lenga i pueblo.” (Revelacion 14:6) Bao di direccion di angel, sirbidor di Dios lo predica e bon nobo literalmente den tur e tera habitá, no den tur e Imperio Romano so. Un trabao mundial di pisca alma tabatin cu cuminza, i nos dia a mira cumplimento dje vision.

16, 17. Na ki tempo e trabao di piscamento spiritual a cuminza den e último dianan, i con Jehova a bendicioné?

¹⁶ Con e piscamento a progresa durante siglo 20 aki? Na principio, piscador tabata basta poco. Despues di fin di Gera Mundial I, tabatin solamente rond di cuater mil predicador activo dje bon nobo, homber i muher celoso cu tabata principalmente di ­esnan ungí. Nan a tira nan reda unda cu Jehova Dios a habri camina, i nan a coge hopi alma na bida. Despues dje segundo gera mundial, Jehova Dios a habri awa nobo pa piscamento. Misionero cu a asisti ne Scol Bíblico di Galad di Watchtower a hiba delantera den e trabao den hopi país. País tal como Hapón, Italia, i Spaña, cu por a parce basta bashí na principio, cu tempo a produci un cosecha abundante di alma. També, nos a tende recientemente dje bon éxito cu piscamento tin den Oosteuropa.

¹⁷ Awe, den hopi país, reda ta cerca di kibra. E cosecha grandi di alma a haci necesario pe organizacion di congregacion i circuito nobo. Pa recibínan, construccion di Salón di Reino nobo i Salón di Asamblea ta sigi. Mas anciano i sirbidor ministerial ta necesario pa atende ne aumento. E fiel hendenan ayá na 1919 a cuminza un trabao grandi. Den un sentido literal, Isaías 60:22 a ser cumplí. ‘E chikito a bira mil,’ pasobra e cuater mil piscador a bira mas cu cuater miyón awe. I e fin no a yega ainda.

18. Con nos por imita ehempel excelente cu piscador spiritual di hende a pone den e promé siglo?

¹⁸ Kico tur esei kier men pa nos como hende individual? E Scritura ta bisa cu ora Pedro, Andrés, Santiago, i Juan tabata invitá pa bira piscador di hende, “nan . . . a bandona tur cos i a sigi [Jesús].” (Lucas 5:11) Ki un ehempel excelente di fe i dedicacion! Nos por cultiva e mesun spiritu di sacrificio propio, e mesun gana di sirbi Jehova Dios cueste loke cueste? Miyones di hende ta contestá cu Sí. Den e promé siglo, e disípelnan a pisca hende unda cu Jehova Dios a permiti. Sea cu tabata den hudío of den gentil, nan a pisca sin vacila. Láganos també predica na tur hende sin ningun freno of prehuicio.

19. Kico nos mester haci si awa unda nos ta pisca no ta parce di ser productivo?

¹⁹ Sin embargo, kico bo por haci si bo territorio actual no ta parce productivo? No desanimá. Corda cu Jesús a yena reda dje disípelnan despues cu nan a pisca henter anochi sin resultado. Mescos por sosode den un sentido spiritual. Por ehempel, den Irlanda, fiel testigonan a traha pa hopi aña cu resultado basta limitá. Pero, recientemente e situacion a cambia. E raport dje Anuario de los testigos de Jehová para 1991 ta bisa cu na fin dje aña di sirbishi di 1990, Irlanda a alcanza 29 máximo un tras di otro! Por ta cu un dia bo territorio lo produci mescos. Mientras cu Jehova Dios ta permiti, sigi pisca!

20. Na ki tempo nos mester participa den piscamento di hende?

²⁰ Den Israel, piscador a sali pa pisca den anochi, ora tur otro hende tabata drumí dushi riba cama. Nan no a sali ora tabata conbeniente pa nan, sino ora cu nan por a coge e mayor cantidad di piscá. Nos també tin cu studia nos territorio di manera cu nos ta bai pisca, den un sentido, ora e mayoría di hende ta na cas i por recibínos. Esei por ta den atardi, na fin di siman, of na otro tempo. Ki ora cu tá, láganos haci tur loke nos por pa haya hende di curazón recto.

21. Kico nos mester corda si e territorio cu nos tin ta ser trahá cu frecuencia?

²¹ Kico nos por haci si nos territorio ta ser trahá hopi? Hopi bez piscador profesional ta keha cu nan lugar di pisca ta ser piscá demasiado. Pero, nos lugar spiritual di pisca ta piscá demasiado? Realmente cu no! Hopi territorio ta produci un aumento asta ora nan ta ser trahá cu frecuencia. Algun territorio ta produci mihor pasobra nan ta bon trahá. No obstante, ora nos ta bishita cas cu frecuencia, tene extra cuidao pa anota cas unda cu no tabatin hende i bishitánan despues. Siña un variedad di tópico di conbersacion. Corda cu un otro ruman lo bishitánan pronto, pues no fada hende ni instiga enemistad den e cas. I desaroyá bo aptitud pa ofrece revista riba caya i també pa duna testimonio informal. Tira bo reda spiritual na tur ocasion i di tur manera posibel.

22. Nos tin cua privilegio magnífico ne tempo actual?

²² Corda cu den e piscamento aki tanto e piscador como e piscá ta beneficiá. Si hende cu nos ta coge ta persevera, nan por biba pa semper. Pablo a anima Timoteo: “Persisti den e cosnan aki, pasobra haciendo esei lo bo salba bo mes i també esnan cu ta scuchábo.” (1 Timoteo 4:16) Tabata Jesús mes cu na principio a entrena su disípelnan den piscamento spiritual, i e trabao ta sigi ainda bao di su direccion. (Compara cu Revelacion 14:14-16.) Ki un privilegio magnífico nos tin di traha bao di dje pa cumplí cu e trabao! Láganos sigi tira nos reda mientras cu Jehova Dios ta permiti. Cua trabao mayor por tin cu e trabao di coge alma na bida?

Bo por Corda?

◻ Jesús a entrena su sigidornan pa haci cua trabao?

◻ Con Jesús a mustra cu su morto no a pone fin ne trabao di piscamento spiritual?

◻ Di ki manera Jehova a bendiciona e trabao di piscamento spiritual den e promé siglo?

◻ Cua abundante cogimento di piscá tin durante e “dia di Señor”?

◻ Con nos como hende individual por tene asta mas éxito como piscador di hende?

[Plachi na página 15]

Despues dje resureccion di Jesús, su apóstolnan a extende e trabao divino di pisca hende