“Keda Vigilá”—E Ora di Huisio A Yega!
E informashon den e artíkulo di estudio aki ta basá riba e foyeto Keda Vigilá! presentá na e kongresonan di distrito ku a ser tené rònt mundu durante 2004/2005.
“Keda vigilá . . . pasobra boso no sa riba ki dia boso Señor ta bini.”—MATEO 24:42, NW.
1, 2. Ku kiko Hesus a kompará su binida?
KIKO lo bo hasi si bo sa ku tin un ladron ta kana rònt pa buska moda di hòrta den kasnan den bo bisindario? Lo bo keda alerta i vigilá pa bo por protehá bo sernan kerí i bo kosnan di balor. Un ladron no ta manda karta pa anunsiá ki dia e ta bin, tòg? Al kontrario, e ta bin ketu-ketu i na e ora ku ménos bo ta spera.
2 Na mas ku un okashon, Hesus a usa e manera ku un ladron ta kibra i drenta komo ilustrashon. (Lukas 10:30; Juan 10:10) Relashoná ku susesonan ku lo a tuma lugá durante e tempu di fin i ku lo a hiba na su yegada pa ehekutá huisio, Hesus a duna e spièrtamentu aki: “P’esei, keda vigilá, pasobra boso no sa riba ki dia boso Señor ta bini. Pero sabi un kos, ku si e doño di kas tabata sa den ki warda e ladron tabata pa bini, e lo a keda lantá i lo no a permitié kibra i drenta su kas.” (Mateo 24:42, 43, NW) Pues Hesus a kompará su binida ku bishita inesperá di un ladron.
3, 4. (a) Kiko hasi kaso dje spièrtamentu di Hesus tokante su binida ta enserá? (b) Ki preguntanan ta surgi?
3 E ilustrashon tabata apropiá, pasobra e dia eksakto di Hesus su binida lo no tabata konosí. Mas promé, den e mesun profesia, Hesus a bisa: “Di e dia i e ora ei ningun hende no sa, ni e angelnan di shelu tampoko, ni e Yu, sino e Tata so.” (Mateo 24:36) P’esei, Hesus a urgi su oyentenan: “Sea prepará.” (Mateo 24:44) Esnan ku ta hasi kaso di Hesus su spièrtamentu lo ta kla i prepará, komportando nan mes na un manera apropiá, ki ora ku e bini pa ehekutá e huisio di Yehova.
4 Ta surgi algun pregunta importante: E spièrtamentu di Hesus ta solamente pa hende di mundu, òf kristiannan berdadero tambe mester “keda vigilá”? Pakiko ta urgente pa nos “keda vigilá,” i kiko esaki ta enserá?
Spièrtamentu pa Ken?
5. Kon nos por sa ku e spièrtamentu pa “keda vigilá” ta dirigí na kristiannan berdadero?
5 Un kos ta sigur: Pa hende di mundu ku no ke tende e spièrtamentu di e binidero kalamidat, e binida di Señor lo ta meskos ku un ladron. (2 Pedro 3:3-7) Sin embargo, kiko di kristiannan berdadero? Apòstel Pablo a skirbi su rumannan den fe: “Boso mes sa masha bon ku e dia di Señor lo bin meskos ku un ladron den anochi.” (1 Tesalonisensenan 5:2) No tin duda den nos mente ku “e dia di Señor lo bini.” Pero esei ta nifiká ku nos no mester keda vigilá? Tuma nota ku ta na su disipelnan Hesus a bisa: “E Yu di Hende lo bin na un ora ku boso no ta pensa.” (Mateo 24:44) Mas promé, ora Hesus a urgi su disipelnan pa sigui buska e Reino, el a spièrta nan: “Sea prepará, pasobra e Yu di Hende lo bin na un ora ku boso no ta pensa.” (Lukas 12:31, 40) No ta bisto anto ku Hesus tabatin su siguidónan na mente ora el a duna e spièrtamentu pa “keda vigilá”?
6. Pakiko nos mester “keda vigilá”?
6 Pakiko nos mester “keda vigilá” i “prepará”? Hesus a splika: “Lo tin dos hòmber den kunuku; ún lo wòrdu tumá i e otro lo wòrdu lagá atras. Dos muhé lo ta mula na mulina; ún lo wòrdu tumá i e otro lo wòrdu lagá atras.” (Mateo 24:40, 41) Esnan ku ta prepará lo “wòrdu tumá” òf salbá, ora e mundu malbado ser destruí. Otronan lo wòrdu “lagá atras” pa destrukshon pasobra nan a sigui nan propio estilo di bida egoista. Entre esakinan lo por tin hende ku un tempu tabata konosé e bèrdat pero ku no a keda vigilá.
7. E echo ku nos no sa ki dia e fin lo yega ta permití nos hasi kiko?
7 E echo ku nos no sa e dia eksakto di e fin di e sistema bieu aki ta duna nos e oportunidat di demostrá ku nos ta sirbi Dios ku un motibu puru. Kon asina? Por parse ku e fin ta tarda hopi pa yega. Lamentablemente, algun kristian ku ta pensa asina a laga nan selo p’e sirbishi di Yehova fria. Sin embargo, ora nos a dediká nos bida na Yehova, nos a presentá nos mes na dje pa sirbié sin reserva. Hende ku konosé Yehova sa ku un manifestashon di selo na último ora lo no impreshon’é. E ta mira loke tin den nos kurason.—1 Samuel 16:7.
8. Kon amor pa Yehova ta motivá nos pa keda vigilá?
8 Pa motibu di nos gran amor pa Yehova, nos mayor delisia ta pa hasi su boluntat. (Salmo 40:8; Mateo 26:39) I nos ke sirbi Yehova pa semper. E speransa ei no ta bira ménos presioso djis pasobra nos tin ku warda un tiki mas di loke nos a ferwagt. Mas importante ainda, nos ta keda vigilá pasobra nos ta spera ansiosamente pa mira kiko e dia di Yehova lo nifiká pa realisashon di su propósito. Nos deseo sinsero pa agradá Dios lo motivá nos pa apliká e konseho di su Palabra i pone su Reino na promé lugá den nos bida. (Mateo 6:33; 1 Juan 5:3) Laga nos konsiderá ki influensia nos estado di alerta tin riba e desishonnan ku nos ta tuma i e manera ku nos ta hiba nos bida diario.
Den Ki Rumbo Bo Bida Ta Bayendo?
9. Pakiko ta urgente pa hende di e mundu aki lanta ariba i komprondé e nifikashon di nos tempu?
9 Awe hopi hende ta konsiente ku problemanan serio i susesonan spantoso a bira notisia di tur dia, i kisas nan no ta kontentu ku e rumbo ku nan propio bida ta bayendo. Pero nan sa realmente kiko ta e nifikashon di e kondishonnan di mundu? Nan ta realisá ku nos ta bibando den e “konklushon dje sistema di kosnan”? (Mateo 24:3, NW) Nan ta rekonosé ku e aktitutnan egoista, violento i asta malbado ku ta reina aktualmente ta identifiká nos tempu komo “e último dianan”? (2 Timoteo 3:1-5) Ta urgente pa nan ‘lanta ariba’ i komprondé e nifikashon di tur esaki i mira den ki rumbo nan bida ta bayendo.
10. Kiko nos tin ku hasi pa nos tin sigur ku nos ta keda vigilá?
10 Kiko di nos? Tur dia nos ta haña nos ta tuma desishon relashoná ku nos trabou, nos salú, nos famia i nos adorashon. Nos sa kiko Beibel ta bisa i nos ta hasi esfuerso pa aplik’é. P’esei, ta bon pa nos puntra nos mes: ‘Mi ta laga e preokupashonnan di bida kita mi for di mi rumbo? Mi ta laga e filosofia- i manera di pensa di mundu determiná kiko mi ta skohe p’e?’ (Lukas 21:34-36; Kolosensenan 2:8) Nos tin ku sigui demostrá ku nos ta konfia den Yehova ku henter nos kurason i no dependé riba nos mes komprondementu. (Proverbionan 3:5) Den e manera ei nos lo keda ku un ‘gara [firme] riba e berdadero bida,’ esta, bida eterno den Dios su mundu nobo.—1 Timoteo 6:12, 19.
11-13. Kiko nos por siña for di e ehèmpelnan di loke a sosodé (a) den e dianan di Noe? (b) den e dianan di Lòt?
11 Beibel ta kontené hopi ehèmpel ku ta sirbi komo spièrtamentu ku por yuda nos keda vigilá. Konsiderá loke a sosodé den tempu di Noe. Hopi tempu adelantá Dios a laga duna un spièrtamentu. Pero fuera di Noe i su famia, e hendenan no a hasi kaso. (2 Pedro 2:5) Relashoná ku esaki, Hesus a bisa: “Meskos ku den e dianan ei ku tabata promé ku e diluvio, nan tabata kome i bebe, nan tabata kasa i duna pa kasa, te dia ku Noe a bai den e arka, i nan no a komprondé te ora ku e diluvio a bin i a bai ku nan tur, asina e binida di e Yu di Hende lo ta.” (Mateo 24:37-39) Kiko nos por siña for di esei? Si kualke un di nos ta laga preokupashonnan di mundu—asta e aktividatnan normal di bida—stroba nos den nos aktividatnan spiritual ku Dios ta enkurashá nos pa mantené na promé lugá, nos tin ku pensa seriamente riba nos situashon.—Romanonan 14:17.
12 Pensa tambe riba e dianan di Lòt. E stat Sodoma, kaminda Lòt i su famia a bai biba, tabata próspero den sentido material pero sumamente inmoral. Yehova a manda su angelnan pa destruí e stat. E angelnan a pura Lòt i su famia pa hui for di Sodoma i no wak patras. Enkurashá pa e angelnan, en bèrdat nan a bandoná e stat. Pero e kasá di Lòt evidentemente no por a stòp di pensa riba su kas na Sodoma. El a desobedesé e òrdu pa no wak patras i esei a kost’é su bida. (Génesis 19:15-26) Hesus a spièrta nos tokante nos futuro: “Kòrda riba Lòt su esposa.” Nos ta hasi kaso di e spièrtamentu ei?—Lukas 17:32.
13 E hendenan ku a tuma spièrtamentu divino na pechu a sobrebibí. Esei tabata sierto den e kaso di Noe i su famia i di Lòt i su yu muhénan. (2 Pedro 2:9) Segun ku nos ta meditá riba e spièrtamentu ku tin den e ehèmpelnan aki, e mensahe di liberashon ku nan ta kontené pa amantenan di hustisia tambe ta un animashon pa nos. Esei ta yena nos kurason ku e speransa sigur ku Dios lo kumpli ku su promesa di trese “shelunan nobo i un tera nobo, den kua ta biba hustisia.”—2 Pedro 3:13.
‘E Ora di Huisio A Yega’!
14, 15. (a) Kiko “e ora” di huisio ta inkluí? (b) Kiko ta enserá “teme Dios i dun’é gloria”?
14 Segun ku nos ta keda vigilá, kiko nos por spera? E buki di Revelashon ta deskribí na un manera progresivo kon e propósito di Dios lo kumpli. Si nos ke ta prepará, ta importante pa nos aktua na armonia ku loke e ta bisa. E profesia ta deskribí na un manera bibu e susesonan ku lo tuma lugá den “e dia di Señor,” ku a kuminsá ora Kristu a ser entronisá den shelu na aña 1914. (Revelashon 1:10) Revelashon ta hala nos atenshon na un angel ku a haña e enkargo pa deklará e bon notisia òf “evangelio eterno.” E ta proklamá na bos haltu: “Teme Dios i dun’é gloria, pasobra e ora di su huisio a yega.” (Revelashon 14:6, 7) “E ora” di huisio ei ta enserá un periodo kòrtiku ku ta inkluí tantu e proklamashon komo e ehekushon di e huisionan deskribí den e profesia ei. Nos ta bibando den e periodo ei aktualmente.
15 Aworakí, promé ku e ora di huisio terminá, e angel ta urgi nos: “Teme Dios i dun’é gloria.” Kiko esaki ta enserá? Temor apropiá di Dios mester pone nos alehá for di maldat. (Proverbionan 8:13) Si nos ta onra Dios, nos lo skuch’é ku rèspèt profundo. Nos lo no ta asina okupá ku otro kos ku nos no tin tempu pa lesa su Palabra, Beibel, ku regularidat. Nos lo no minimisá su konseho pa asistí na reunionnan kristian. (Hebreonan 10:24, 25) Nos lo apresiá e privilegio di por proklamá e bon notisia di e Reino Mesiániko di Dios, i lo hasié ku entusiasmo. Nos lo pone nos konfiansa den Yehova na tur momentu i ku henter nos kurason. (Salmo 62:8) Komo ku nos ta rekonosé ku Yehova ta e Soberano Universal, nos ta onr’é dor di someté nos mes na dje di buena gana komo e Soberano di nos bida. Abo di bèrdat ta teme Dios i dun’é gloria den tur e maneranan ei?
16. Pakiko nos por bisa ku e huisio kontra Babilonia e Grandi menshoná na Revelashon 14:8 a kumpli kaba?
16 Revelashon kapítulo 14 ta sigui deskribí mas suseso ku mester tuma lugá den e ora di huisio. Babilonia e Grandi, e imperio mundial di religion falsu, ta menshoná promé: “Un otro angel, un di dos, a sigui, bisando: ‘El a kai! Ata e gran Babilonia a kai.’” (Revelashon 14:8) Sí, for di e punto di bista di Dios, Babilonia e Grandi a kai kaba. Na 1919, e sirbidónan ungí di Yehova a ser librá for di e sklabitut na doktrina- i práktikanan babilóniko, kuanan a dominá pueblo- i nashonnan pa míles di aña. (Revelashon 17:1, 5) Djei padilanti, nan por a dediká nan mes na promové adorashon berdadero. Desde e tempu ei, e predikashon mundial di e bon nobo di e Reino di Dios ta tumando lugá.—Mateo 24:14.
17. Kiko ta nifiká sali for di Babilonia e Grandi?
17 Pero esei no ta e huisio kompletu di Dios kontra Babilonia e Grandi. Su destrukshon final lo yega pronto. (Revelashon 18:21) Ku bon motibu Beibel ta urgi hende na tur parti: “Sali for di dje [Babilonia e Grandi] . . . pa bo no partisipá den su pikánan.” (Revelashon 18:4, 5) Kon nos ta sali for di Babilonia e Grandi? Esaki ta enserá mas ku djis kòrta tur laso ku religion falsu. E influensia di Babilonia ta presente den hopi selebrashon- i kustumbernan popular, den e aktitut permisivo di mundu pa ku sèks, den e popularidat kresiente di entretenimentu ku ta enserá spiritismo, i den hopi kos mas. Pa nos keda vigilá, ta masha importante pa tantu den nos akshonnan komo den e deseonan di nos kurason, nos duna prueba ku di bèrdat nos a separá for di Babilonia e Grandi den tur sentido.
18. En bista di loke Revelashon 14:9 i 10 ta trese dilanti, kristiannan alerta ta tene kuidou pa evitá kiko?
18 Revelashon 14:9 i 10 ta siña nos algu mas di ‘e ora di huisio.’ Un otro angel ta bisa: “Si un hende adorá e bestia i su imágen, i risibí un marka na su frenta òf na su man, e tambe lo bebe di e biña di e furia di Dios.” Pakiko? “E bestia i su imágen” ta simbolisá gobernashon humano ku no ta rekonosé Yehova su soberania. Kristiannan alerta ta tene kuidou pa no laga nan mes wòrdu influensiá òf marká, sea dor di nan aktitut òf akshon, komo hende ku ta esklabo di esnan ku ta nenga di rekonosé e soberania supremo di e Dios berdadero, Yehova. Kristiannan sa ku e Reino di Dios ya kaba a ser establesí den shelu, ku lo e pone fin na tur gobernashon humano i ku lo e dura pa semper.—Daniel 2:44.
No Pèrdè Bo Sentido di Urgensia!
19, 20. (a) Segun ku nos ta aserkando e fin di e último dianan, kiko nos por tin sigur ku Satanas lo purba hasi? (b) Kiko nos mester ta determiná pa hasi?
19 Segun ku nos ta aserkando e fin di e último dianan, nos lo haña nos ku mas preshon i tentashon. Miéntras nos ta biba den e sistema bieu aki i ta sufri di nos propio imperfekshon, tin hopi kos ku ta afektá nos, manera problema ku salú, behes, morto di un ser kerí, doló emoshonal, desepshon pa motibu di indiferensia pa ku nos esfuersonan pa prediká e Palabra di Dios i hopi kos mas. No lubidá nunka ku Satanas lo tin masha gana di probechá di e preshonnan ku nos ta konfrontá p’e pone nos entregá—pa stòp di prediká e bon nobo òf pa stòp di biba segun e normanan di Dios. (Efesionan 6:11-13) Aworakí no ta ora pa nos pèrdè nos sentido di urgensia relashoná ku e tempu den kua nos ta biba!
20 Hesus tabata sa ku nos lo ta bou di hopi preshon pa entregá, p’esei el a konsehá nos: “Keda vigilá . . . pasobra boso no sa riba ki dia boso Señor ta bini.” (Mateo 24:42, NW) Laga nos keda semper alerta anto ta den ki tempu nos ta bibando. Laga nos tene kuidou ku e trampanan di Satanas ku lo por pone nos baha man na aktividat òf bira inaktivo. Laga nos ta desididu pa prediká e bon nobo di e Reino di Dios ku asta mas selo i determinashon. En bèrdat, laga nos mantené nos sentido di urgensia segun ku nos ta hasi kaso di e spièrtamentu di Hesus: “Keda vigilá.” Asina nos lo trese onor pa Yehova i nos lo ta entre esnan ku ta den fila pa risibí su bendishonnan eterno.
Kon Lo Bo Kontestá?
• Kon nos por sa ku e spièrtamentu di Hesus pa “keda vigilá” ta dirigí na kristiannan berdadero?
• Ki ehèmpel ku ta sirbi komo spièrtamentu den Beibel por yuda nos pa “keda vigilá”?
• Kiko ta e ora di huisio, i kiko nos ta ser enkurashá pa hasi promé ku e yega na su fin?
[Plachi na página 23]
Hesus a kompará su binida ku bishita di un ladron
[Plachi na página 24]
E destrukshon di Babilonia e Grandi ta aserkando
[Plachinan na página 25]
Laga nos ta desididu pa prediká ku asta mas selo i determinashon