Capítulo 32

E rabia di Dios ta completá

 1. Kico ta bai sosode ora bashamento dje siete conchi ta termina, i cua pregunta ta presenta awor tocante e conchinan?

JUAN a introduci caba e angelnan comisioná pa basha e siete conchi. E ta bísanos cu tal plaga ta e “últimonan, pasobra pa medio di eseinan e rabia di Dios ta completá.” (Revelacion 15:1; 16:1) Tal plaga, revelando e castigo di Jehova pe maldad riba tera, mester ta bashá completamente. Ora nan ta caba, e huicio di Dios lo a ser ehecutá. E mundo di Satanás lo no existi mas! Kico tal plaga ta anuncia pa humanidad i gobernante dje mal sistema actual? Con hende cristian por evita plagamento hunto cu e mundo condená? Eseinan ta pregunta vital, i nan ta ser contestá awor. Tur hende cu ta anhela e triunfo di husticia tin un interés intenso den loke Juan a mira sigientemente.

E rabia di Jehova contra “e tera”

 2. Kico ta e resultado di bashamento di conchi dje promé angel riba tera, i kico e “tera” ta simboliza?

² E promé angel a drenta den accion! “I e promé a bai i a basha su conchi riba tera. I a yega di ser un úlcera perhudicial i maligno riba hende cu tabatin e marca dje bestia salbahe i cu tabata adora su imagen.” (Revelacion 16:2) Mescos cu den e caso dje promé tocamento di trompet, “e tera” ei ta simboliza e sistema político cu ta parce firme cu Satanás a cuminza edifica aki riba tera ayá den e tempo di Nimrod, mas cu 4.000 aña pasá.—Revelacion 8:7.

 3. (a) Con hopi gobierno ta exigi di nan pueblo loke ta igual cu adoracion? (b) Kico e nacionan a produci como sustituto dje Reino di Dios, i ki efecto esei tin riba hende cu ta adoré?

³ Den e último dianan aki, hopi gobierno ta exigi di nan pueblo loke ta mescos cu adoracion, insistiendo pa nan halza e gobierno mas halto cu Dios of cu cualkier otro lealtad. (2 Timoteo 3:1; compara cu Lucas 20:25; Juan 19:15.) Desde 1914 ta común pe nacionan recluta hovenan pa nan bringa, of preparánan pa bringa, den e clase di gera total cu a drama tanto sanger den historia moderna. Durante e dia di Señor, e nacionan també a produci, como sustituto pe Reino di Dios, e imagen dje bestia, esta, e Liga di Nacion i su sucesor, Nacion Uní. Ki blasfemia pa proclama, manera papa reciente a haci, cu tal organizacion di hende ta e único speranza pa paz pa tur nacion! E ta opone firmemente e Reino di Dios. Hende cu ta adora tal organizacion político ta bira impuro spiritualmente, yen di yaga, mescos cu egipcio cu a opone Jehova Dios den e dia di Moisés tabata plagá pa yaga i úlcera literal.—Exodo 9:10, 11.

 4. (a) E contenido dje promé conchi dje rabia di Dios ta duna énfasis fuerte na kico? (b) Con Jehova ta considera hende cu ta acepta e marca dje bestia salbahe?

⁴ Contenido dje conchi ta duna énfasis fuerte ne scogimento cu hende tin cu haci. Nan mester sufri di desaprobacion di mundo of dje indignacion di Jehova. Humanidad ta keda obligá di acepta e marca dje bestia salbahe, cu e intencion di cu “ningun hende por cumpra ni bende sino hende cu tin e marca, e nomber dje bestia salbahe of e número di su nomber.” (Revelacion 13:16, 17) Pero, nan tin cu paga un prijs pa esei! Jehova ta considera esnan cu ta acepta e marca como heridá cu “un úlcera perhudicial i maligno.” Desde 1922 nan a ser marcá den público como hende cu a rechaza e Dios bibo. Nan proyecto político no tin bon éxito, i nan ta sufri di angustia. Nan ta impuro spiritualmente. Amenos cu nan ta arrepenti, nan maleza “perhudicial” lo mátanan, pasobra awor nos ta den e dia di huicio di Jehova. No tin terreno neutral separando e sistema di cosnan di mundo for dje sirbishi di Jehova Dios di parti di su Cristo.—Lucas 11:23; compara cu Santiago 4:4.

Lamá ta bira sanger

 5. (a) Kico ta sosode ora e segundo conchi ta ser bashá? (b) Con Jehova ta considera hende cu ta habitá lamá simbólico?

⁵ Awor e segundo conchi dje rabia di Dios mester ta bashá. Kico esei kier men pa humanidad? Juan ta bísanos: “I e segundo a basha su conchi den lamá. I el a bira sanger mescos cu esei di hende morto, i tur alma bibiente a muri, sí, cosnan cu tin den lamá.” (Revelacion 16:3) Mescos cu e segundo tocamento di trompet, e conchi ei ta dirigí contra “lamá”—e multitud di humanidad inketu i rebelde cu ta alehá di Jehova Dios. (Isaías 57:20, 21; Revelacion 8:8, 9) Den bista di Jehova, tal “lamá” ta manera sanger, cu no ta sirbi pa hende biba den dje. P’sei mes, hende cristian no mag ser parti di mundo. (Juan 17:14) E bashamento dje segundo conchi dje rabia di Dios ta revela cu tur humanidad cu ta biba den tal lamá ta morto den bista di Jehova. Cargando responsabilidad di comunidad, humanidad ta culpable di dramamento di sanger inocente na cantidad. Ora e dia di rabia di Jehova ta yega, nan lo muri literalmente den man di su ehército di ehecucion.—Revelacion 19:17, 18; compara cu Efesio 2:1; Colosense 2:13.

Dunando nan sanger pa bebe

 6. Kico ta sosode ora e tercera conchi ta ser bashá, i ki palabra ta sali for dje angel i for dje altar?

⁶ E tercera conchi di rabia di Dios, mescos cu e tercera tocamento di trompet, tin un efecto riba fuente di awa dushi. “I esun di tres a basha su conchi riba rio i fontein di awa. I nan a bira sanger. I mi a tende e angel encargá cu awa bisa: ‘Abo, Esun cu tá i cu tabata, Esun leal, ta husto, pasobra bo a tuma tal decision, pasobra nan a drama sanger di santo i di profetanan, i bo a dúnanan sanger pa bebe. Nan ta merece esei.’ I mi a tende e altar bisa: ‘Sí, Jehova Dios, Todopoderoso, bo decision hudicial ta berdadero i husto.’”—Revelacion 16:4-7.

 7. Kico “rio i fontein di awa” ta simboliza?

⁷ Tal “rio i fontein di awa” ta simboliza loke ta ser yamá fontein refrescante di guiamento i sabiduría cu e mundo ta acepta, tal como filosofía político, económico, científico, educativo, social i religioso cu ta guia accion i decision humano. En bez di acudi na Jehova Dios, e Fuente di bida, pa e berdad cu ta duna bida, hende ‘ta coba pa nan mes regenbak kibrá’ i ta bebe profundamente di “sabiduría dje mundo aki [cu] ta bobedad pa Dios.”—Jeremías 2:13; 1 Corintio 1:19; 2:6; 3:19; Salmo 36:9.

 8. Di ki manera humanidad ta culpable pa dramamento di sanger?

⁸ Tal “awa” contaminá ta hiba hende pa bira culpable di dramamento di sanger, por ehempel, animando nan pa drama sanger na escala grandi den gera, cu den siglo pasá a mata mas cu cien miyón hende. Specialmente den cristiandad, unda dos gera mundial a cuminza, hende “tin purá pa drama sanger inocente,” i esei ta inclui sanger di testigo di Dios mes. (Isaías 59:7; Jeremías 2:34) Hende també tin culpa pa dramamento di sanger haciendo mal uso di un cantidad enorme di sanger den transfusion, violando ley husto di Jehova. (Génesis 9:3-5; Levítico 17:14; Echo 15:28, 29) P’sei mes, nan a cosecha dolor caba plamando den transfusion di sanger AIDS, hepatitis, i otro maleza. Pleno pago pa tur culpa pa dramamento di sanger lo yega pronto ora ofensor lo paga e pena supremo, ora nan ta ser pisá den e “baki grandi di pers biña dje rabia di Dios.”—Revelacion 14:19, 20.

 9. Bashamento di conchi di tres ta enbolbe kico?

⁹ Den e dia di Moisés, ora rio Nilo a bira sanger, egipcio por a mantenénan bibo buscando otro fuente di awa. (Exodo 7:24) Pero, awe durante e plaga spiritual, no tin lugar den e mundo di Satanás unda hende por haya awa dunador di bida. Bashamento dje tercer conchi ta enbolbe e proclamacion di cu “rio i fontein di awa” di mundo ta sanger, causando morto spiritual pa tur hende cu ta bebé. Amenos cu hende ta acudi na Jehova Dios, nan lo cosecha su huicio desfavorable.—Compara cu Ezekiel 33:11.

10. Kico e “angel cu ta riba e awa” ta duna di conoce, i e “altar” a agrega cua testimonio?

¹⁰ “E angel encargá cu e awa,” esta, e angel cu ta basha su conchi riba e awa, ta engrandece Jehova como Huez Universal, kende su decisionan husto ta absoluto. P’sei, e angel a bisa di tal huicio: “Nan ta merece esei.” Sin duda, e angel a presenciá personalmente hopi dramamento di sanger i crueldad cu siñanza falso i filosofía dje mundo malbado aki a instigá pa miles di aña. P’sei, e angel sa cu decision hudicial di Jehova Dios ta husto. Asta e “altar” di Dios ta papia. Den Revelacion 6:9, 10, e ta bisa cu alma di hende martirizá ta na base dje altar. Asina e “altar” ta agrega un testimonio fuerte en cuanto e husticia i rectitud di decision di Jehova.a Siguramente, ta apropiado pa hende cu a drama sanger i a haci tanto mal uso di sanger keda obligá di bebe sanger, como símbolo dje sentencia di morto cu Jehova ta dúnanan.

Kimando hende cu candela

11. Unda conchi di cuater dje rabia di Dios ta ser bashá, i kico ta sosode na su bashamento?

¹¹ Conchi di cuater dje rabia di Dios tin e solo como su blancu. Juan ta bísanos: “I esun di cuater a basha su conchi riba solo; i solo tabata permití di kima hende cu candela. I hende tabata kimá cu mashá calor, pero nan a blasfemá e nomber di Dios, cu tin autoridad riba tal plaga, i nan no a arrepenti pa duné gloria.”—Revelacion 16:8, 9.

12. Kico ta “solo” di mundo, i kico ta ser duná ne solo simbólico aki?

¹² Awe, den e conclusion dje sistema di cosnan, ruman spiritual di Jesús ta “briya tanto briyante como e solo den e reino di nan Tata.” (Mateo 13:40, 43) Jesús mes ta e “solo di husticia.” (Malaquías 4:2) Pero, humanidad tin nan mes “solo,” nan mes gobernantenan cu ta purba di resplandece na oposicion cu e Reino di Dios. Tocamento di trompet di cuater a proclama cu ‘solo, luna, i strea’ den cielo di cristiandad realmente ta fuente di scuridad, i no di claridad. (Revelacion 8:12) Conchi di cuater dje rabia di Dios awor ta mustra cu “solo” di mundo ta bira insoportablemente cayente. Homber cu pueblo ta considera como lider briyando manera solo ta “kima” humanidad. Solo simbólico ta ser permití di haci esei. Es decir, Jehova Dios ta permiti esei como parti di su huicio ardiente contra humanidad. Di ki manera tal kimamento a tuma lugar?

13. Di ki manera gobernante di mundo semehante di solo a “kima” humanidad?

¹³ Despues dje promé gera mundial, gobernante di mundo a forma e Liga di Nacion, haciendo esfuerzo pa resolve problema di siguridad mundial, pero esei a fracasa. Pues, nan a purba otro forma di gobernacion experimental, tal como facismo, nazismo. Comunismo a sigi aumenta. En bez di mehora estado di humanidad, tal gobernante semehante di solo den tal sistemanan a cuminza ‘kima humanidad cu un gran calor.’ Gera local den Spaña, Etiopia, i Manchuria a resulta den e segundo gera mundial. Historia moderno ta mustra cu Mussolini, Hitler, i Stalin como dictador a bira responsabel directa i indirectamente pe morto di diez di miyones di hende, incluyendo hopi hende di nan mes nacion. Mas recientemente, conflicto internacional of civil a “kima” hende den país tal como Vietnam, Cambodia, Iran, Líbano, i Irlanda, i també país di América Latina i Africa. Agrega na esei e lucha continuo entre superpoder, cu tin arma nuclear spantoso cu por kima tur humanidad. Den e último dianan aki, humanidad siguramente ta bao di un “solo” kimador, esta, nan mes gobernante inhustonan. E bashamento di conchi di cuater dje rabia di Dios ta siñalá directamente na tal echo histórico, i e pueblo di Dios a proclama esei den tur e mundo.

14. Kico Testigo di Jehova a siña consistentemente como e único solucion pa problema di humanidad, i con humanidad en conhunto a reacciona?

¹⁴ Testigo di Jehova ta siña consistentemente cu e único solucion pa problema confundidor di humanidad ta e Reino di Dios, cu Jehova Dios lo usa pa santifica su nomber. (Salmo 83:4, 17, 18; Mateo 6:9, 10) Sin embargo, humanidad en conhunto no kier tende esei. Hopi hende cu ta rechaza e Reino també ta blasfema e nomber di Dios, mescos cu faraó a haci ora el a nenga di reconoce e soberanía di Jehova. (Exodo 1:8-10; 5:2) Ya cu tal opositor no tin ningun interés den e Reino Mesiánico, nan ta opta di sufri bao di nan mes “solo” kimador di gobernacion humano opresivo.

E trono dje bestia salbahe

15. (a) Conchi di cinco ta ser bashá riba kico? (b) Kico ta e “trono dje bestia salbahe,” i bashamento dje conchi riba dje ta enbolbe kico?

¹⁵ Riba kico e sigiente angel ta basha su conchi? “I esun di cinco a basha su conchi riba e trono dje bestia salbahe.” (Revelacion 16:10a) E “bestia salbahe” ta e sistema gobernamental di Satanás. E no tin un trono literal, pasobra e bestia salbahe mes no ta literal. Pero, e mencion di un trono ta mustra cu e bestia salbahe a eherce autoridad real riba humanidad; i esei ta di acuerdo cu e echo cu cada cachu dje bestia tin bistí un diadema real. Realmente, e “trono dje bestia salbahe” ta e fundeshi, of fuente, di tal autoridad.b E Bijbel ta revela e berdadero situacion dje autoridad real dje bestia salbahe ora e ta bisa cu e “dragón a duna e bestia su poder i su trono i gran autoridad.” (Revelacion 13:1, 2; 1 Juan 5:19) Pues, e bashamento dje conchi riba e trono dje bestia salbahe ta enbolbe un proclamacion cu ta revela e berdadero papel cu Satanás a hunga i ta hunga ainda apoyando i promoviendo e bestia salbahe.

16. (a) E nacionan ta rindi sirbishi na ken, sea cu nan sa of no? Splica. (b) Con mundo ta refleha e personalidad di Satanás? (c) Na ki tempo e trono dje bestia salbahe lo ser tumbá?

¹⁶ Con Satanás ta mantene su relacion cu e nacionan? Ora Satanás a tenta Jesús, el a mustré tur reino di mundo den un vision i a ofrecele “tur e autoridad i gloria di nan.” Pero, tabatin un condicion—promé Jesús tabatin cu haci un acto di adoracion dilanti Satanás. (Lucas 4:5-7) Nos por imaginános cu gobierno di mundo ta recibi nan autoridad pa un prijs menos cu esei? Di ningun manera. Segun e Bijbel, Satanás ta dios dje sistema di cosnan aki, di manera cu, si e nacionan sa esei of no, nan ta sirbi Satanás. (2 Corintio 4:3, 4)c Tal situacion ta ser revelá den e composicion dje sistema mundial actual, cu ta ser edificá riba nacionalismo intolerante, odio i egoísmo. E ta ser organizá manera Satanás kier—pa mantene humanidad bao di su control. Corrupcion den gobierno, ambicion pa poder, diplomacia mentiroso, e carreda di armamento—eseinan ta refleha e personalidad degradá di Satanás. Mundo ta sigi norma inhusto di Satanás, i asina ta hacié un dios. E trono dje bestia salbahe lo ser kibrá ora e bestia ta ser exterminá i e Simía dje esposa di Dios finalmente ta tira Satanás mes den abismo.—Génesis 3:15; Revelacion 19:20, 21; 20:1-3.

Scuridad i dolor persistente

17. (a) Con e bashamento di conchi di cinco ta relacioná cu e scuridad spiritual cu semper a tapa e reino dje bestia salbahe? (b) Con hende ta reacciona na bashamento di conchi di cinco dje rabia di Dios?

¹⁷ E reino dje bestia salbahe a keda den scuridad spiritual desde su principio. (Compara cu Mateo 8:12; Efesio 6:11, 12.) Conchi di cinco ta intensifica e anuncio público di tal scuridad. E asta ta dramatizá esei, pasobra e conchi dje rabia di Dios ta ser bashá riba e trono mes dje bestia salbahe simbólico. “I su reino a bira scuridad, i nan a cuminza morde nan lenga den nan dolor, pero nan a blasfema e Dios di cielo pa nan dolor i pa nan úlcera, i nan no a arrepentínan di nan obra.”—Revelacion 16:10b, 11.

18. Ki correspondencia tin entre e tocamento di trompet di cinco i conchi di cinco dje rabia di Dios?

¹⁸ Tocamento di trompet di cinco no ta exactamente mescos cu conchi di cinco dje rabia di Dios, siendo cu e tocamento dje trompet a anuncia e plaga di sprinkhan. Pero ripara cu ora e plaga di sprinkhan a sali, solo i aire a bira scur. (Revelacion 9:2-5) I den Exodo 10:14, 15, nos ta leza di plaga di sprinkhan cu Jehova a manda riba Egipto: “Nan tabata un carga mashá pisá. Nunca promé cu nan a presenta sprinkhan asina dje manera ei, i nunca despues di nan ningun lo presenta asina. I nan a plama tapando tur e superficie visibel di tur e país, i e país a bira scur.” Sí, scuridad! Awe, e scuridad spiritual di mundo a bira demasiado visibel como resultado di tocamento di trompet di cinco i bashamento di conchi di cinco dje rabia di Dios. E mensahe picante cu e nubia di sprinkhan djawe ta proclama ta resulta den tormento i dolor pa hende malbado cu ta “stima scuridad mas bien cu luz.”—Juan 3:19.

19. Na armonía cu Revelacion 16:10, 11, kico denuncio público di Satanás como e dios dje sistema di cosnan aki ta causa?

¹⁹ Como gobernante di mundo, Satanás a causa hopi infelicidad i sufrimento. Hamber, gera, violencia, crimen, abuso di droga, inmoralidad, maleza contagiá sexualmente, falta di onradez, hipocresía religioso—tur esei i mas ta identificá e sistema di cosnan di Satanás. (Compara cu Galatio 5:19-21.) Además, e denuncio público di Satanás como e dios dje sistema di cosnan aki ta causa dolor i bergüenza pa hende cu ta sigi su moda di biba. “Nan a cuminza morde nan lenga den nan dolor,” specialmente cristiandad. Hopi hende ta carga rencor pasobra e berdad ta denuncia nan moda di biba. Algun ta mira esei como un peliger, i nan ta persigi esnan cu ta publica e berdad. Nan ta rechaza e Reino di Dios i ta papia contra e nomber santo di Jehova. Nan estado religioso enfermo i ulceroso ta ser desenmascará, p’sei nan ta blasfema e Dios di cielo. No, nan no ta “arrepentínan di nan obra.” Pues, nos no por spera un gran conbertimento di hende promé cu e fin dje sistema di cosnan.—Isaías 32:6.

Rio Eufrates a seca

20. Con tanto e tocamento di trompet di seis i bashamento di conchi di seis ta toca rio Eufrates?

²⁰ Tocamento di trompet di seis a anuncia losmento di “cuater angel cu tabata mará cerca e gran rio Eufrates.” (Revelacion 9:14) Históricamente, Babilonia tabata e stad grandi situá cant’i rio Eufrates. I na 1919 e losmento dje cuater angel simbólico a compañá un caimento significante di Babilonia e Grandi. (Revelacion 14:8) Pues, ta notable cu conchi di seis dje rabia di Dios també ta enbolbe e rio Eufrates: “I número seis a basha su conchi riba e gran rio Eufrates, i su awa a seca, pa prepara e camina pe reynan biniendo di salimento di solo.” (Revelacion 16:12) Esei també ta mal noticia pa Babilonia e Grandi!

21, 22. (a) Di ki manera awa di rio Eufrates cu a proteha Babilonia na aña 539 PEC a seca? (b) Babilonia e Grandi ta sinta riba cua “awa”, i di ki manera tal awa simbólico ta seca asta awor?

²¹ Ora Babilonia di antigua tabata na mando, e awa abundante di Eufrates tabata un parti principal di su sistema di defensa. Na aña 539 PEC su awa a seca ora Ciro, e lider di Persia, a mandé den otro canal. Asina e camina a habri pa Ciro di Persia i Darío di Media, e dos rey di “salimento di solo” (esta, djariba), drenta Babilonia i dominé. Den e ora di crisis, e rio Eufrates no a sirbi como defensa dje stad grandi. (Isaías 44:27–45:7; Jeremías 51:36) Algo similar ta cla pa sosode Babilonia djawe, e sistema mundial di religion falso.

²² Babilonia e Grandi “ta sinta riba hopi awa.” Segun Revelacion 17:1, 15, e awa ta simboliza “pueblo i multitud i nacion i lenga”—tur e multitud di hende cu e ta considera como un proteccion. Pero e “awa” ta seca! Den Westeuropa, unda religion tabata eherce mashá influencia, cientos di miyones di hende ta ignora religion abiertamente. Den algun país, pa hopi aña nan a declara nan maneho di destrui e influencia di religion. E multitud di hende den tal país no a lanta pa defende religion. Di igual manera, ora e tempo ta yega pe destruccion di Babilonia e Grandi, e cantidad menguante di miembro di dje lo no resulta di ser un proteccion di ningun manera. (Revelacion 17:16) Aunque Babilonia e Grandi ta bisa cu e tin miles di miyones di miembro, e ta hayé sin defensa contra e “reynan di salimento di solo.”

23. (a) Ken tabata e dos rey biniendo di “salimento di solo” na aña 539 PEC? (b) Ken ta e “dos rey biniendo di salimento di solo” durante e dia di Señor, i con nan lo destrui Babilonia e Grandi?

²³ Ken ta e dos rey? Na aña 539 PEC nan tabata Darío di Media i Ciro di Persia, cu Jehova Dios a usa pa vence e stad di Babilonia di antigua. Den e dia di Señor djawe, gobernante humano també lo destrui e sistema di religion falso di Babilonia e Grandi. Pero, di nobo, esei ta un huicio divino. Jehova Dios i Jesucristo, “reynan di salimento di solo,” tin cu pone den curazón di gobernante humano e “idea” di bira contra Babilonia e Grandi i destruyé totalmente. (Revelacion 17:16, 17) Bashamento di conchi di seis ta proclama públicamente cu tal huicio lo ser ehecutá pronto!

24. (a) Con e contenido dje promé seis conchi dje rabia di Jehova a ser publicá, i cu ki resultado? (b) Promé cu mencion dje otro conchi dje rabia di Dios, kico Revelacion ta revela?

²⁴ E promé seis conchi dje rabia di Jehova ta yen di un mensahe di mashá seriedad. Sirbidor terrenal di Dios, cu apoyo di angel, ta keda ocupá publicando e mensahe na un escala mundial. Asina, un debido advertencia ta ser duná na tur sector dje sistema mundial di Satanás, i Jehova Dios ta duna hende oportunidad di bolbe na husticia i sigi biba. (Ezekiel 33:14-16) Ainda, tin un conchi mas dje rabia di Dios. Pero, promé cu Revelacion ta bísanos tocante esei, e ta revela con Satanás i su agencia terrenal ta purba di contrarresta e publicacion di huicio di Jehova.

Reunimento pa Armagedón

25. (a) Kico Juan ta bisa tocante “expresion inspirá” semehante di dori impuro? (b) Di ki manera tabatin un presentacion di “expresion inspirá impuro” i repugnante ne dia di Señor, i cu ki resultado?

²⁵ Juan ta bísanos: “I mi a mira tres expresion inspirá impuro cu a parce dori sali for di boca dje dragón i for di boca dje bestia salbahe i for di boca dje profeta falso. Nan realmente ta expresion inspirá di demoño i ta haci siñal, i ta sali pa bai cerca rey di tur e tera habitá, pa reunínan hunto pe gera dje gran dia di Dios Todopoderoso.” (Revelacion 16:13, 14) Den e dia di Moisés, Jehova a manda un plaga repugnante di dori riba Egipto di faraó, di manera cu e “tera a cuminza hole stinki.” (Exodo 8:5-15) Durante e dia di Señor, tin també e presencia di algo repugnante manera dori, pero di otro fuente. Esei ta consisti di “expresion inspirá impuro” di Satanás, claramente simbolizando propaganda cu tin e propósito di guia gobernante humano, esta, “rey,” pa pónenan na oposicion cu Jehova Dios. Asina Satanás ta haci sigur cu e bashamento di conchi di rabia di Dios no ta hácinan vacila sino ta keda firmemente di parti di Satanás ora e “gera dje gran dia di Dios Todopoderoso” ta cuminza.

26. (a) Propaganda satánico ta bini di cua tres fuente? (b) Kico ta e “profeta falso,” i con nos sa?

²⁶ E propaganda ta bini dje “dragón” (Satanás) i dje “bestia salbahe” (e arreglo político terrenal di Satanás), bestia cu Revelacion a dúnanos di conoce caba. Pero, kico ta e “profeta falso”? Su nomber so ta algo nobo. Na antes nos a mira un bestia salbahe cu dos cachu manera lamchi cu a haci siñal grandi dilanti dje bestia salbahe cu siete cabez. Tal bestia engañoso ta actua manera profeta pe bestia salbahe. El a promove adoracion dje bestia salbahe, asta a haci hende traha un imagen di dje. (Revelacion 13:11-14) E bestia salbahe cu dos cachu manera lamchi mester ta mescos cu e “profeta falso” mencioná ei. Confirmando esei, nos ta leza despues cu e profeta falso, mescos cu e simbólico bestia salbahe cu dos cachu, “ta haci siñal dilanti dje [bestia salbahe cu siete cabez] cu locual el a gaña esnan cu a recibi e marca dje bestia salbahe i esnan cu ta rindi adoracion na su imagen.”—Revelacion 19:20.

27. (a) Cua advertencia oportuno Jesucristo mes ta duna? (b) Cua advertencia Jesús a duna ora e tabata riba tera? (c) Con apóstol Pablo a repiti e advertencia di Jesús?

²⁷ Ya cu tin tanto propaganda di Satanás plamá na tur parti, e sigiente palabra cu Juan a skirbi ta oportuno en berdad: “Mira! mi ta bini manera ladrón. Feliz ta esun cu ta keda lantá i ta warda su bistí exterior, pe no camna desnudo i hende mira su bergüenza.” (Revelacion 16:15) Ken ta bini “manera ladrón”? Jesús mes, biniendo na un tempo no anunciá como Ehecutor di Jehova. (Revelacion 3:3; 2 Pedro 3:10) Ora e tabata riba tera ainda, Jesús també a compara su binimento cu esun di ladrón, bisando: “Sigi vigila, pues, pasobra boso no sa na ki dia boso Señor ta bini. P’sei, boso també mustra cu boso ta cla, pasobra na un ora cu boso no ta pensa cu té, e Yiu di hende ta bini.” (Mateo 24:42, 44; Lucas 12:37, 40) Repitiendo e advertencia, apóstol Pablo a bisa: “E dia di Jehova ta bini mescos cu ladrón den anochi. Ora hende ta bisa: ‘Paz i siguridad!’ anto destruccion di ripiente ta bini riba nan instantáneamente.” Satanás ta tras di cualkier proclamacion falso di “Paz i siguridad!”—1 Tesalonicense 5:2, 3.

28. Ki advertencia Jesús a duna tocante resistencia contra presion di mundo, i hende cristian no kier pa cua “dia” yega riba nan manera “laz”?

²⁸ Jesús també a adverti dje clase di presion cu mundo, yen di propaganda, lo pone riba hende cristian. El a bisa: “Presta atencion na boso mes pa boso curazón nunca bira cargá cu mucho comimento i mucho bebimento i ansiedad di bida, i di ripiente e dia ei lo ser riba boso instantáneamente manera laz. . . . Pues, keda lantá, anto, tur ora haciendo súplica pa boso logra scapa tur e cosnan ei cu ta destiná di sosode, i di para dilanti dje Yiu di hende.” (Lucas 21:34-36) “E dia” ta e “gran dia di Dios Todopoderoso.” (Revelacion 16:14) Mientras cu e “dia” dje vindicacion dje soberanía di Jehova ta yega cerca, ta bira cada bez mas dificultoso pa enfrenta ansiedad di bida. Hende cristian tin cu keda alerto i vigilante, kedando lantá te cu e dia ta yega.

29, 30. (a) E advertencia di Jesús di cu hende hayá drumí lo ser bergonzá door di perde nan “bistí exterior” ta indica kico? (b) Bistí exterior ta identifica hende cu tin nan bistí como kico? (c) Con hende por perde nan bistí exterior simbólico, i cu ki resultado?

²⁹ Pero, kico ta ser indicá den e advertencia di cu hende hayá drumí lo ser bergonzá pasobra nan ta perde nan “bistí exterior”? Den Israel di antigua, cualkier sacerdote of levita cu tabatin warda den e tempel tabatin un responsabilidad pisá. Comentador hudío ta bísanos cu ken cu nan a coge na soño durante nan warda, a háyanan paña kitá i kimá, di manera cu nan tabata bergonzá públicamente.

³⁰ Aki Jesús a adverti cu algo similar por sosode awe. Sacerdote i levita a simboliza e rumanan ungí di Jesús. (1 Pedro 2:9) Pero e advertencia di Jesús por extende i aplica ne multitud grandi també. Bistí exterior mencioná ei ta identifica nan doño como un Testigo cristian di Jehova. (Compara cu Revelacion 3:18; 7:14.) Si hende ta laga presion di mundo di Satanás hácinan pega soño of bira inactivo, probablemente nan lo perde nan bistí exterior—es decir, perde nan identificacion limpi como hende cristian. Tal situacion ta bergonzoso. Esei ta pone hende den peliger di perde tur cos.

31. (a) Con Revelacion 16:16 ta enfatiza e necesidad pa hende cristian keda lantá? (b) Cua speculacion algun lider religioso a haci tocante Armagedón?

³¹ E necesidad pa hende cristian keda lantá ta bira cada bez mas urgente mientras cu e sigiente versículo di Revelacion ta yega mas cerca cumplimento: “I nan [expresion inspirá di demoño] a reunínan [rey, of gobernante di tera] hunto ne lugar cu ta ser yamá na hebreo Har-Magedón.” (Revelacion 16:16) E nomber, generalmente traducí mas tanto como Armagedón, ta pará skirbí un biaha so den e Bijbel. Pero e ta afecta mashá e imaginacion di hende. Lider di mundo ta duna advertencia di un posible Armagedón nuclear. També, nan ta conecta Armagedón cu e stad di antigua di Meguidó, e sitio di hopi bataya decisivo den tempo bíblico, i p’sei algun guía religioso ta specula, pues, cu e gera final riba tera lo tuma lugar riba e terreno chikito ei. Den esei, nan ta mashá leu for dje berdad.

32, 33. (a) En bez di ser un lugar literal, kico e nomber Har-Magedón, of Armagedón, ta representa? (b) Cua otro palabra bíblico ta similar cu “Armagedón” of ta relacioná cuné? (c) Ki ora lo ta tempo pe angel di siete basha e conchi final dje rabia di Dios?

³² E nomber Har-Magedón kier men “Montaña di Meguidó.” Pero, en bez di ser un lugar literal, e ta representa e situacion mundial den locual tur nacion ta ser reuní na oposicion cu Jehova Dios i unda lo e destruínan finalmente. Esei ta na un escala mundial. (Jeremías 25:31-33; Daniel 2:44) Esei ta similar cu e “baki grandi di pers biña dje rabia di Dios” i e “sabana abao di decision,” of e “sabana abao di Josafat,” unda e nacionan ta reuní pa ehecucion di parti di Jehova. (Revelacion 14:19; Joël 3:12, 14) E ta relacioná també cu e “suelo di Israel” unda ehército satánico di Gog di Magog ta ser destruí i e sitio “entre lamá grandi i e ceru santo di Decoracion” unda e rey di nort ta yega “te na su mes fin” den man di Miguel e gran prinz.—Ezekiel 38:16-18, 22, 23; Daniel 11:45–12:1.

³³ Ora kwakmento di dori cu ta propaganda di Satanás i su agentenan terrenal ta guia e nacionan te na tal situacion, ta tempo pa angel di siete basha e conchi final dje rabia di Dios.

“El a sosode!”

34. Angel di siete ta basha su conchi riba kico, i cua proclamacion ta sali for dje “santuario i dje trono”?

³⁴ “I esun di siete a basha su conchi riba aire. Anto un boz fuerte a sali for dje santuario i dje trono, bisando: ‘El a sosode!’”—Revelacion 16:17.

35. (a) Kico ta e “aire” di Revelacion 16:17? (b) Ora angel di siete ta basha su conchi riba aire, kico e ta expresa?

³⁵ Tal “aire” ta e último elemento cu ta sostene bida cu ta recibi plaga. Pero, esei no ta e aire mes. No tin nada den e aire mes cu ta hacié merece un huicio desfavorable di Jehova, no mas cu e tera, lamá, of fuente di awa dushi, of solo literal ta merece di recibi un huicio for di man di Jehova. Mas bien, esei ta e “aire” cu Pablo a mencioná ora el a yama Satanás “e gobernante di autoridad di laira.” (Efesio 2:2) Esei ta e “aire” satánico cu mundo ta respira awe, esta, e spiritu, of inclinacion mental general cu ta identifica tur su mal sistema mundial di cosnan, e pensamento satánico cu ta penetra den tur aspecto di bida pafó dje organizacion di Jehova. Pues, den e bashamento di su conchi riba aire, angel di siete ta expresa e rabia di Dios contra Satanás, su organizacion, i tur loke ta impulsa humanidad pa nan apoya Satanás den su desafío dje soberanía di Jehova Dios.

36. (a) E siete plaga ta compone kico? (b) E proclamacion di Jehova di “El a sosode!” ta indica kico?

³⁶ Plaga di siete i e seis plaga promé ta duna e suma total di huicio di Jehova contra Satanás i su sistema. Nan ta un declaracion di condenacion pa Satanás i su simía. Ora e conchi final ta ser bashá, Jehova mes ta proclamá: “El a sosode!” No tin nada mas pa bisa. Ora e contenido dje siete conchi di rabia di Dios ta ser publicá te ne grado cu Jehova kier, lo no tin tardamento pe ehecucion di su huicio cu tal mensahe ta proclama.

37. Con Juan a detaya loke a sosode despues di bashamento di conchi di siete dje rabia di Dios?

³⁷ Juan a sigi: “I weerlicht i boz i donder a sosode, i un temblor grandi a sosode tal como no a sosode desde cu tabatin hende riba tera, un temblor asina extensivo, asina grandi. I e stad grandi a parti den tres, i stad dje nacionan a cai; i Babilonia e Grandi tabata recordá den bista di Dios, pa duné e copa di biña dje rabia di su furia. També, tur isla a hui, i no tabata hayá montaña. I piedra grandi di ijs cu cada piedra rond dje peso di un talento a baha foi cielo riba hende, i hende a blasfema Dios debí ne plaga di piedra di ijs, pasobra e plaga tabata extraordinariamente grandi.”—Revelacion 16:18-21.

38. Kico tabata simbolizá pa (a) e “temblor grandi”? (b) e echo cu e “stad grandi,” Babilonia e Grandi, tabata partí den “tres parti”? (c) e echo cu “tur isla a hui, i montaña no tabata hayá”? (d) e “plaga di piedra di ijs”?

³⁸ Una bez mas, no tin duda cu Jehova ta actua en relacion cu humanidad, siñalando esei cu “weerlicht i boz i donder.” (Compara cu Revelacion 4:5; 8:5.) Humanidad ta ser sagudí como nunca na antes, como si pa un temblor desastroso. (Compara cu Isaías 13:13; Joël 3:16.) E temblor enorme lo kibra e “stad grandi,” Babilonia e Grandi, di manera cu e ta kibra den “tres pida”—simbólico di su colapso den ruina sin recobro. Además, “stad dje nacionan” lo cai. “Tur isla” i “montaña”—esta, institucion i organizacion cu ta parce asina permanente den e sistema aki—lo desparce. “Piedra di ijs grandi,” hopi mas grandi cu loke a cai riba Egipto durante plaga di siete, cu cada piedra di ijs dje peso di un talento, lo bati humanidad causando dolor.d (Exodo 9:22-26) E castigo di caimento di awa den forma di piedra probablemente ta simboliza expresion verbal di peso extraordinario dje huicio di Jehova, siñalando cu e fin dje sistema di cosnan a yega por fin! Jehova por wel usa piedra di ijs mes també den su trabao destructivo.—Job 38:22, 23.

39. Apesar di bashamento di siete plaga, cua proceder e mayor parti di humanidad ta scoge?

³⁹ Asina e mundo di Satanás lo recibi e huicio husto di Jehova. Te ne fin, e mayor parti di humanidad lo sigi desafiá i blasfema Dios. Mescos cu faraó di antigua, nan curazón no ta bira moli bao di plaga continuo ni bao dje culminacion fatal di tal plaga. (Exodo 11:9, 10) Lo no tin arrepentimento di curazón ne último ora na escala grandi. Cu nan último rosea nan lo plega Dios cu ta declara: “Nan lo tin cu sa cu mi ta Jehova.” (Ezekiel 38:23) No obstante, e soberanía di Jehova Dios Todopoderoso ya ta vindicá.

[Nota]

[Kuadro na página 221]

“Riba tera”

E grupo cu Juan a simboliza a publicá e rabia di Jehova contra e “tera” cu declaracion tal como lo sigiente:

“Despues di siglonan di esfuerzo, partido político a duna prueba di nan incapacidad di enfrenta e situacion actual i resolve problema desconsolador. Economista i homber político, studiando e cuestion diligentemente, ta haya cu nan no por haci nada.”—Miyones di hende bibando awor lo no muri nunca (na inglés), 1920, bladji 61.

“No ta existi un gobierno riba tera awe cu ta satisface un porciento razonabel di mundo. Dictador ta domina hopi nacion. Mundo henter ta casi bankroet.”—Un gobierno deseabel (na inglés), 1924, bladji 5.

“Pone fin ne sistema di cosnan aki . . . esei ta e único manera pa libra mundo di maldad i haci lugar pa paz i husticia florece.”—“E bon nobo di reino” (na inglés), 1954, bladji 25.

“E arreglo actual di mundo ta keda destacá debí na aumento di picá, inhusticia i rebelion contra Dios i su boluntad. . . . E ta irreformable. P’sei, e tin cu bai!”—E Toren di Vigilancia, Juli, 1982, bladji 5.

[Kuadro na página 223]

“Riba lamá”

Lo sigiente ta algun declaracion so cu e grupo cu Juan a simboliza a publica den transcurso di añanan proclamando e rabia di Dios contra “lamá” inketu i rebelde di humanidad perverso alehá foi Jehova Dios:

“E pasado di tur nacion ta mustra cu tabatin un lucha entre diferente clase di hende. Semper tabatin un menoría contra e mayoría. . . . Tal lucha a resulta den hopi revolucion, mashá sufrimento, i hopi dramamento di sanger.”—Gobierno (na inglés), 1928, bladji 244.

Den e mundo nobo, “lo no existi ‘lamá’ simbólico di hende inketu, rebelde i perverso di locual e simbólico bestia salbahe a subi for di hopi tempo caba, cu e Diabel ta usa.”—The Watchtower, 15 di September di 1967, bladji 567.

“Humanidad djawe ta spiritualmente enfermo i swak. Ningun di nos por salbé pasobra e Palabra di Dios ta mustra cu su enfermedad lo hibé te na morto.”—Berdadero paz i siguridad—di ki fuente?, 1975, bladji 131.

[Kuadro na página 224]

“Den rio i fontein”

E tercera plaga a denuncia “rio i fontein di awa” mediante declaracion como lo sigiente:

“Clero, cu ta bisa cu nan ta siña doctrina [di Cristo], ta bendiciona gera i ta hacié algo santo. Nan ta gusta pa nan portret i standbeeld ser poní na exhibicion hunto cu guerrero sangriente.”—The Watch Tower, di 15 di September di 1924, bladji 275.

“Spiritismo ta ser fundá ariba un falsedad grandi, e mentira di cu curpa ta muri pero cu alma ta spiritu cu no ta muri nunca.” —Qué dicen las Escrituras acerca de “supervivencia después de la muerte”?, 1956, bladji 50.

“Filosofía humano, teoría político, organizador social, consehero económico i defensor di tradicion religioso no a resulta den refrescamento dunador di bida . . . Tal awa asta a hiba bebedor di dje di viola e ley dje Creador tocante e santidad di sanger i pa participa den persecucion religioso.”—Declaracion adoptá ne Asamblea Internacional “Bon nobo eterno”, 1963.

“No ta salbacion científico, sino destruccion dje raza humano ta e cos pa spera for di hende mes. . . . Nos no por acudi na sicólogo i sikiater di mundo pa nan cambia e moda di pensa di hende . . . Nos no por depende di formacion di un cuerpo di poliz internacional . . . pa haci mundo un lugar sigur pa biba.”—E salbacion dje raza humano—ne moda dje Reino, (spañol); 1970, bladji 5, 6.

[Kuadro na página 225]

“Riba solo”

Mientras cu e “solo” di gobernacion humano ta “kima” humanidad durante e dia di Señor, e grupo cu Juan a simboliza, cu declaracion como lo sigiente, a hala atencion na loke ta sosode:

“Awe Hitler i Mussolini, homber dictatorial, ta pone e paz di mundo henter den peliger, i nan tin e pleno apoyo dje herarquía católico romano den nan destruccion di libertad.”—Fascismo of libertad, 1939, bladji 12.

“Durante tur e pasado e proceder cu dictador humano ta sigi ta di goberna of ruina! Pero e regla pa ser aplicá na tur e tera bao dje Rey Jesucristo cu Dios a instala, tá: Sea goberná of sea ruiná!”—Ora tur nacion ta uni bao di Reino di Dios (na inglés), 1961, bladji 23.

“Desde 1945 mas cu 25 miyon hende a muri den mas cu 150 gera bringá den tur e mundo.”—E Toren di Vigilancia, Juli, 1981, bladji 6.

“Nacion rond di mundo . . . tin poco interés den responsabilidad internacional of ley di conducta. Pa cumpli cu nan deseo, algun nacion ta síntinan completamente husto usando cualkier medio cu nan ta considera necesario—matamento en masa, asesinato, secuestro di avion, bombardeo, etc. . . . Pa cuanto tempo e nacionan ta tolera otro den tal conducta irrazonabel i irresponsabel?”—The Watchtower, di 15 di Februari di 1985, bladji 4.

[Kuadro na página 227]

“Riba trono dje bestia salbahe”

Testigo di Jehova a denuncia e trono dje bestia salbahe i a publica Jehova su condenacion di dje cu declaracion tal como lo sigiente:

“Gobernante i guía político dje nacionan ta bao di influencia di forza sobrehumano malicioso cu ta híbanan irresistiblemente den un marcha suicida ne conflicto decisivo di Armagedón.”—Después del Armagedón—el nuevo mundo de Dios, 1953, bladji 8.

“E ‘bestia salbahe’ di gobierno humano no teocrático a recibi su poder, autoridad i trono for dje Dragón. P’sei e tin cu conformele cu regla dje partido, e partido dje Dragón.”—Después del Armagedón—el nuevo mundo de Dios, 1953, bladji 14.

“Nacion gentil por identifica nan mes solamente . . . cu e partido dje enemigo principal di Dios, esta, Satanás e Diabel.”—Declaracion adoptá den e Asamblea Internacional “Victoria Divino,” 1973.

[Kuadro na página 229]

“Su awa a seca”

Asta awor, apoyo duná na religion babilónico ta seca den hopi lugar, indicando loke lo sosode ora “rey di salimento di solo” ta haci nan atake.

“Un encuesta nacional a descubri cu 75 porciento di hende cu ta biba den stad [di Tailandia] no ta bai na tempel budista pa scucha predicashi, mientras cu hende di campo cu ta bishita tempel ta mengua te na rond di cincuenta porciento.”—Bangkok Post, 7 di September di 1987, bladji 4.

“Taoismo a perde su atraccion den [China] unda e tabata fundá mas cu dos mil aña pasá. . . . Privá di medio mágico cu nan i nan antepasado a usa pa alcanza hopi sigidor, nan pastor ta háyanan sin sucesor, enfrentando exterminacion di taoismo como un religion organizá den China.”—The Atlanta Journal and Constitution, 12 di September di 1982, bladji 36-A.

“Hapón . . . tin un concentracion di mas grandi di mundo di misionero stranhero, casi 5.200, sin embargo . . . menos cu 1% dje poblacion ta cristian. . . . Un pastor franciscano cu a traha ei desde 1950 . . . ta kere cu ‘e dia di misionero stranhero den Hapón a termina.’”—The Wall Street Journal, 9 di Juli, 1986, bladji 1.

Den Inglaterra durante e último trinta aña, “casi 2.000 di 16.000 misa anglicano a cera pasobra nan ta bashí. Asistencia a mengua te na misa di mas chikito di país cu ta yama nan mes cristian. . . . ‘No ta sigur awor cu Inglaterra ta un país cristian,’ [obispo di Durham] a bisa.”—The New York Times, 11 di Mei di 1987, bladji A4.

“Despues di oranan di debate cayente, e parlamento [di Grecia] awe a aproba di ley cu ta permiti gobierno socialista coge propiedad enorme dje religion católico ortodoxo griego . . . Además, e ley ta duna hende cu no ta pastor control di concilio religioso i comité responsabel pa administracion di inversion religioso precioso cu ta inclui hotel, mina di marmol i edificio di oficina.”—The New York Times, 4 di April di 1987, bladji 3.

[Plachi na página 222]

E promé cuater conchi dje rabia di Dios ta resulta den plaga similar cu plaga cu a resulta di tocamento dje promé cuater trompet

[Plachi na página 226]

Conchi di cinco ta desenmascara e trono dje bestia salbahe mustrando cu esei ta e autoridad cu Satanás a duna e bestia salbahe

[Plachi na página 231]

Propaganda di demoño ta reuni gobernante di mundo ne mesun situacion, esta, Har-Magedón, unda e huicio di Jehova lo ser bashá riba nan

[Plachi na página 233]

Hende cu e “aire” contaminá di Satanás ta impulsa tin cu experimenta ehecucion di huicio husto di Jehova