Religion Falsu Ta Bayendo pa Su Destruccion!

PA POR haña sa si e religionnan dje mundu aki ta yegando nan fin, laga nos scudriñá un dje profecianan bíblico di mas dramático. E ta tocante e misterioso muher simbólico describí den e último buki di Bijbel, Revelacion.

Bo por visualisá un muher cu a goberná como reina riba e nacionnan, influenciando bida di miles di miyones di hende atrabes di henter e historia—un muher ricu cu ta maraviyosamente areglá den púrpura i scarlata, dorná ricamente cu oro, piedranan precioso i perla? Riba su frenta tin skirbí un nomber largu, un misterio: “Babilonia e Grandi, mama dje muhernan di mala bida i dje cosnan repugnante dje tera.” E ta inekibocablemente marcá pa e bida desenfrená i promiscuo cu el a hiba, dor di a cometé “fornicacion” cu e gobernantenan di mundu. Su picánan a montoná te na shelu. E ta montá riba un bestia salbahe monstruoso, cu shete cabes, dies cachu i di color scarlata.—Revelacion 17:1-6; 18:5.

Si bo por visualisá e muher aki, bo tin un idea dje personahe principal den e drama profético cu Jesus su apostel Juan a mira den un vision cu a ser duná na dje mediante un angel. Di un manera bibu e ta describié den Revelacion capítulonan 17 i 18. Lesa e capítulonan aki den bo mes Bijbel. Lo bo por sigui e órden di sucesonan for dje momento cu e identidad dje muher misterioso aki ta ser desenmascará te na su fin fatal.

Identificando e Muher di Mala Bida

Un clave pa comprendé su identidad ta ser hañá den e dos cosnan riba cua e reina di muhernan di mala bida ta sintá simbólicamente. Na Revelacion 17:18, e ta ser describí como “e gran stad cu tin un reino riba e reynan dje tera.” Esaki ta permitié sinta riba “hopi awa,” locual ta nificá “pueblonan i multitudnan i nacionnan i lenganan,” manera Revelacion 17:1, 15 ta mustra. Di acuerdo cu versículo 3 dje mésun capítulo, e muher ei ta ser mirá tambe sintá riba un bestia salbahe cu shete cabes—generalmente bestianan ta ser usá den Bijbel como símbolo di podernan político of organisacionnan di mundu.

Esaki ta indicá cu e muher di mala bida, Babilonia e Grandi, ta e personificacion di un imperio halsá, unu cu ta dominá otro autoridadnan i nan súbditonan. Esaki por ta solamente e imperio di religionnan falsu di mundu.

E influencia dje lidernan religioso riba asuntunan di maneho i política di estado ta un parti bon conocí di historia. The World Book Encyclopedia ta declará: “Despues dje caida dje Imperio Romano di occidente [siglo 5], e papa tabatin mas autoridad cu cualkier otro persona na Europa. . . . E papa tabata ehercé autoridad político i tambe spiritual. Na aña 800, Papa Leo III a coroná e gobernante dje franconan, Carlo Magno [Karel de Grote], como emperador dje romanonan. . . . Leo III a establecé e derecho di papa pa haci e autoridad di un emperador legal.”

Un ehempel mas dje autoridad cu e Iglesia Católico i su “prinsnan” a ehercé riba gobernantenan ta cardinal Thomas Wolsey (1475?-1530). E ta ser describí como “e persona di mas poderoso na Inglatera pa hopi aña.” Bou dje reinado di Rey Henry VIII, e “pronto tabata e figura cu a controlá tur asuntu di estado. . . . El a biba den splendor real i a gosa plenamente di su poder.” E enciclopedia ta continuá: “Cardinal Wolsey a usa su gran abilidadnan como estadista i administrador principalmente den maneho di asuntunan exterior di Inglatera pa Henry VIII.”

Un otro ehempel sobresaliente di autoridad católico riba asuntunan seglar di estado ta Cardinal Richelieu di Francia (1585-1642), kende “pa mas cu 18 aña . . . tabata e berdadero gobernante di Francia.” E fuente citá anteriormente ta declará: “E tabata extremadamente ambicioso i pronto tabata impaciente pa haña puesto mas haltu.” El a ser nombrá como cardinal na 1622 “i pronto a bira e influencia principal den e gobiernu di Francia.” Tabata evidente cu e tabata un homber di accion, pasobra “el a guia e ehército real personalmente n’e sitiamentu di La Rochelle.” E artículo ta agregá: “Richelieu su interes di mas grandi tabata den asuntunan exterior.”

Por mira e enbolbimentu constante di Vaticano cu autoridadnan político claramente den e anuncionan constante den e corant di Vaticano L’Osservatore Romano di diplomáticonan di exterior cu ta presentá nan credencialnan na e papa soberano. Evidentemente, e Vaticano tin un netwerk di católiconan leal cu por tene papa informá dje desaroyonan político i diplomático na tur parti di mundu.

Nos lo por duna hopi mas ehempel pa ilustrá e influencia poderoso di lidernan religioso—tantu paden como pafó di cristiandad—den asuntunan político dje mundu aki. E echo cu e muher di mala bida simbólico ta sinta riba “hopi awa” (representando “pueblonan i multitudnan i nacionnan”) i riba e bestia salbahe (representando tur e podernan político di mundu) ta duna di comprendé tambe cu su influencia riba pueblonan, nacionnan i podernan ta di un caracter diferente i superior cu solamente dominio político. Laga nos wak ki clase e ta.

Parti dje nomber largu riba su frenta tabata “Babilonia e Grandi.” Esei ta un referencia na Babilonia di antigwedad, establecí rond di 4.000 aña pasá dor di Nimrod, kende tabata “na oposicion cu Jehova,” e Dios berdadero. (Génesis 10:8-10) E echo cu e ta carga e nomber aki ta indicá cu e ta un representacion amplificá dje Babilonia di antigwedad, i cu e tin facetanan similar. Cua facetanan? Babilonia di antigwedad tabata yen-yen di religion místico, tradicionnan degradá, adoracion di ídolonan, magia, astrologia i supersticion—tur di cua ta ser condená dor dje Palabra di Jehova.

The New International Dictionary of New Testament Theology ta bisa cu den siglo 18 P.E.C., nan a haci Marduk “e dios dje stad di Babilonia, i asina e cabes dje stad sumerio di Accad, panteon di rond di 1.300 deidad. El a trece tur e tradicionnan religioso den un solo sistema. . . . Na Gén. 11:1-9 e arkitectura dje tempel gigantesco di Babilonia ta ser stigmatisá como e expresion di orguyo humano cu ta deseá di tuma shelu over.”

Pues, Babilonia di antigwedad tabata e centro di religion falsu, cu, den transcurso di tempu, a infectá henter e mundu. Prácticanan religioso, doctrinanan, tradicionnan i símbolonan babilónico a penetrá na tur parti di mundu i ta ser reflehá den e mescla confuso dje hopi miles di religionnan di mundu. Reinonan i imperionan político a lanta i a cai, pero religion babilónico a sobrebibí nan tur.

Pakico Ehecucion Ta Asina Cerca?

Manera a splica hopi bes caba den edicionnan anterior dje revista aki, profecia di Bijbel i e sucesonan cu a sagudí mundu desde 1914 ta indicá inekibocablemente cu awor nos ta bibando den “e conclusion dje sistema di cosnan.” (Mateo 24:3) Esaki ta nificá cu e fin dje sistema di mundu bestial aki ta yegando rápidamente cerca, i tambe e fin dje “bestia salbahe color scarlata” cu dies cachu, riba cua e muher di mala bida ta sintá awor. (Revelacion 17:3) Ta evidente cu e bestia aki ta representá e conglomeracion político di casi tur e nacionnan na mundu—Nacionnan Uní. E fin predicí ta nificá cu gobernacion político riba humanidad cu ta divisivo i sin dios lo ser eliminá. Pero kico dje reina di muhernan di mala bida cu ta monta e bestia?

E angel di Dios ta splica: “E dies cachunan cu bo a mira, i e bestia salbahe, esakinan lo odia e muher di mala bida i lo hacié keda devastá i sunú, i lo come su carni i lo kim’é completamente cu candela. Pasobra Dios a hinca den nan curason pa cumpli cu su pensamentu, asta pa cumpli cu nan solo pensamentu dor di duna nan reino n’e bestia salbahe, te cu e palabranan di Dios lo a ser cumplí.”—Revelacion 17:16, 17.

Asina e profecia ta mustra cu poco tempu promé cu e bestia salbahe político baha bai den destruccion, lo e cuminsá odia esun cu ta montá riba dje i lo bai contra dje. Pakico? Gobernantenan i gobiernunan evidentemente lo sinti cu nan poder i autoridad ta ser menasá dor di religion organisá cu ta funcioná den nan teritorio. Di ripiente, instá dor di un forsa impulsador, nan lo cumpli cu Dios su “pensamentu,” su decision, dor di ehecutá su huicio riba e imperio mundial di religion falsu cu ta adúltero i manchá cu sanger.a—Compará cu Jeremías 7:8-11, 34.

E fin dje religionnan falsu dje mundu aki lo bini miéntras cu ainda nan ta parce vigoroso i cu hopi influencia. Sí, e profecia ta mustra cu net promé cu e muher di mala bida ser destruí, lo e bisa ainda den su curason: “Mi ta sintá como reina, i mi no ta biuda, i nunca lo mi mira lamentacion.” (Revelacion 18:7) Sin embargo, su destruccion lo bini como sorpresa pa su miles di miyones di súbditonan. Lo e ta un dje sucesonan mas inesperá i catastrófico den historia humano.

For dje tempu cu Babilonia di antigwedad a lanta, religionnan falsu a ehercé tremendo influencia riba humanidad mediante nan lidernan i apoyadornan; nan doctrinanan, tradicionnan i prácticanan; nan numeroso edificionan imponente pa adoracion; i nan rikesa increibel. Siguramente nan lo no disparcé sin ningun hende ripará. P’esei, e angel encargá pa comunicá e mensahe di huicio riba e muher di mala bida ta usa palabranan franco i directo ora e ta declará: “Den un solo dia su plaganan lo bini, morto i lamentacion i hamber, i lo e ser kimá completamente cu candela, pasobra Jehova Dios, kende a husgu’é, ta fuerte.” Pues, e fin di Babilonia e Grandi lo bini manera un weerlicht inesperá i lo pasa forbij rápidamente, como si fuera “den un solo dia.”—Revelacion 18:8; Isaías 47:8, 9, 11.

E palabranan fuerte dje angel ta hiba nos n’e pregunta, Acaso lo resta un religion mes, i si ta asina, cua di nan i pakico? Kico profecia ta mustra? Esaki lo ser tratá den e próximo artículo.

[Nota]

[Kuadro na página 6]

Cristiandad Su Culpa di Sanger na Africa

Na Revelacion 18:24, Bijbel ta bisa cu a haña den Babilonia e Grandi e sanger di “tur esnan cu a ser matá riba tera.” Pensa riba e gueranan cu hende a bringa pa motibu di diferencianan religioso i pa motibu cu lidernan religioso no tabata capas pa impedí nan. Un ehempel recien di esaki tabata evidente den e genocidio na Ruanda, den cua rond di 500.000 hende a ser matá—un tercer parti di nan tabata mucha.

Autor canades Hugh McCullum ta informá for di Ruanda: “Un pastor hutu na Kigali [Ruanda] ta bisa cu e fracaso dje iglesia pa duna liderato moral ta inexplicabel. E posicion dje obispunan den e sociedad ruandes mester tabata enormemente importante. Nan tabata sa cu e desaster tabata biniendo hopi promé cu e matansanan a cuminsá. Preekstoelnan di iglesia lo por a duna un oportunidad pa casi henter e poblacion tende un mensahe fuerte cu lo por a prevení e genocidio. En bes di esei e lidernan a keda ketu.”

Despues dje pió masacre na 1994, Justin Hakizimana, un anciano di iglesia, a bisa na un reunion chikitu tené den un iglesia presbiteriano na Kigali: “E iglesia a bai man-den-man cu e política di Habyarimana [presidente di Ruanda]. Nos no a condená loke tabata pasando, pasobra nos a ser corumpí. Ningun di nos iglesianan, specialmente e católiconan, no a condená e masacrenan.”

Aaron Mugemera, un pastor di iglesia, a bisa na un otro reunion na Ruanda despues dje genocidio: “E iglesia tin bergwensa. . . . Nos tabatin matansanan akinan desde 1959. Ningun hende a condená nan. . . . Nos no a bisa nada, pasobra nos tabatin miedu, i pasobra nos tabata confortabel.”

[Plachi na página 7]

E “muher di mala bida” aki ta afectá henter e mundu

[Rekonosementu]

Globo: Mountain High Maps® Copyright © 1995 Digital Wisdom, Inc.