Capítulo 38

Alaba Jah pa su huicio!

 1. Cua palabra Juan a tende “manera un boz fuerte di un multitud grandi den cielo”?

BABILONIA E GRANDI no ta existi mas! Esei berdaderamente ta bon noticia. No ta straño cu Juan a tende sclamacion di alegría i alabanza den cielo! “Despues di esei mi a tende loke tabata manera un boz fuerte di un multitud grandi den cielo. Nan a bisa: ‘Aleluya!a Salbacion i gloria i poder ta pertenece na nos Dios, pasobra su huicio ta berdadero i husto. Pasobra el a ehecuta huicio riba e gran muher di mala bida cu a corrumpi e tera cu su fornicacion, i a vinga e sanger di su esclabonan dje man di dje.’ I mesora pe segunda bez nan a bisa: ‘Aleluya!* I e huma di dje ta sigi subi pa semper hamás.’”—Revelacion 19:1-3.

 2. (a) Kico e palabra “aleluya” kier men, i e echo cu Juan a tendé dos bez ne tempo ei ta demonstra kico? (b) Ken ta recibi e gloria pe destruccion di Babilonia e Grandi? Splica.

² Aleluya en berdad! E palabra kier men “boso alaba Jah,” i “Jah” ta afkorting dje nomber divino, Jehova. Esei ta hácinos corda e conseho dje salmista: “Tur loke ta hala rosea—alaba Jah. Boso alaba Jah!” (Salmo 150:6) Ya cu Juan a tende e gozoso coro celestial canta “Aleluya!” dos bez ne punto ei den Revelacion, esei ta demonstra e continuacion di revelacion divino dje berdad. E Dios dje Scritura Griego Cristian ta e Dios dje Scritura Hebreo promé, i Jehova ta su nomber. E Dios cu a causa caimento di Babilonia di antigua awor ta huzga i ta destrui Babilonia e Grandi. Duna tur gloria na dje pa tal hazaña! E poder cu a guia circunstancia cu a resulta den su caimento ta di dje en bez di ser dje nacionan cu el a usa como instrumento pa e desolacion di dje. Na Jehova so nos ta debe salbacion.—Isaías 12:2; Revelacion 4:11; 7:10, 12.

 3. Pakico e gran muher ta merece asina tanto su huicio?

³ Pakico e gran muher di mala bida ta merece e huicio asina tanto? Segun e ley cu Jehova Dios a duna Noé—i mediante dje na tur humanidad—dramamento desenfrená di sanger ta exigi e castigo di morto. Esei tabata declará di nobo den e Ley di Dios duná na Israel. (Genesis 9:6; Número 35:20, 21) Ademas, bao di Ley di Moisés adulterio tanto fisical como spiritual a merece morto. (Levítico 20:10; Deuteronomio 13:1-5) Pa miles di aña, Babilonia e Grandi ta culpable di dramamento di sanger, i ta fornicador grosero. Por ehempel, e ley dje Iglesia católico romano tahando casamento di pastor ta resulta den inmoralidad grosero di hopi pastor, i no un poco di nan djawe ta haya AIDS. (1 Corintio 6:9, 10; 1 Timoteo 4:1-3) Pero e picá principal di dje, ‘montonando hunto te na cielo,’ ta e acto escandaloso di fornicacion spiritual—esta, siñamento di falsedad i ceramento di alianza cu político corrupto. (Revelacion 18:5) Siendo cu su castigo por fin a yega, e multitud celestial ta sclama pe segunda bez “Aleluya!”

 4. E echo cu e huma di Babilonia e Grandi ta “sigi subi pa semper hamás” ta simboliza kico?

⁴ Babilonia e Grandi a ser kimá manera un stad conquistá, i e huma di su kimamento “ta sigi subi pa semper hamás.” Ora ehército conquistador ta kima un stad mes, huma ta sigi subi tan tempo cu e shinishi ta cayente. E resto cayente simplemente ta kima ken cu ta purba di reedifica e stad. Siendo cu e huma di Babilonia e Grandi lo subi “pa semper hamás” como evidencia dje finalidad di su huicio, ningun hende nunca por restora e stad malbado. Religion falso a desparce pa semper. Aleluya en berdad!—Compara cu Isaías 34:5, 9, 10.

 5. (a) Kico e 24 anciano i e cuater criatura bibiente ta haci i ta bisa? (b) Pakico e refrán di aleluya ta hopi mas melodioso cu coro di aleluya cantá den misa di cristiandad?

⁵ Den un vision promé, Juan a mira rond dje trono cuater criatura bibiente, hunto cu 24 anciano cu ta simboliza heredero dje Reino den nan glorioso puesto celestial. (Revelacion 4:8-11) Awor el a míranan atrobé mientras cu nan ta saca manera donder e tercera Aleluya riba e destruccion di Babilonia e Grandi: “I e binticuater anciano i e cuater criatura bibiente a cai abao i a adora Dios sintá riba e trono, i a bisa: ‘Amén! Aleluya!’”b (Revelacion 19:4) Pues, anto, e gran coro di aleluya ta ser agregá ne “cantica nobo” di alabanza pe Lamchi. (Revelacion 5:8, 9) Nan ta canta awor e magnífico refrán di victoria, i nan ta atribui tur e gloria na Señor Soberano Jehova pa su victoria decisivo riba e gran muher, Babilonia e Grandi. Tal aleluya ta klink hopi mas melodioso cu cualkier coro di aleluya cu ta ser cantá den misa di cristiandad, unda Jehova, of Jah, a ser desonrá i despreciá. Tal cantamento hipócrita cu ta reprocha e nomber di Jehova ta ser silenciá pa semper!

 6. Cua “boz” Juan a tende, e ta conseha hacimento di kico, i ken ta participa contestando?

⁶ Tabata na 1918 cu Jehova a cuminza recompensa ‘esnan cu tin temor di su nomber, chikito i grandi’—e promé di locual tabata cristian ungí cu a muri fielmente, cu el a resusita i a pone den e fila celestial dje 24 anciano. (Revelacion 11:18) Otronan ta uni cu eseinan cantando aleluya, pasobra segun Juan: “També, un boz a sali for dje trono i a bisa: ‘Alaba nos Dios, boso tur cu ta esclabo di dje, cu ta temé, chikito i grandi.’” (Revelacion 19:5) Esei ta e “boz” dje Portaboz di Jehova, su mes Yiu, Jesucristo, cu ta para “den centro dje trono.” (Revelacion 5:6) No den cielo so, sino també aki riba tera, “boso tur cu ta esclabo di dje” ta participa den e cantamento, cu e grupo cu Juan a simboliza hibando e delantera riba tera. Cu cuanto gozo eseinan ta participa den cumplimento dje mandamento: “Alaba nos Dios”!

 7. Despues di destruccion di Babilonia e Grandi, ken ta alaba Jehova?

⁷ Sí, esnan dje multitud grandi també ta ser contá hunto cu tal esclabo. Desde 1935 nan ta saliendo for di Babilonia e Grandi i ta experimenta cumplimento dje promesa di Dios: “Lo e bendiciona esnan cu ta teme Jehova, tanto e chikito como e grandinan.” (Salmo 115:13) Ora Babilonia semehante di muher di mala bida ta ser destruí, miyones di hende asina lo uni “alabando nos Dios”—hunto cu e grupo cu Juan a simboliza i tur ehército celestial. Despues, hende resusitá riba tera, sea cu nan tabata prominente na antes of no, sin duda lo canta mas aleluya ora nan ta tende cu Babilonia e Grandi a desparce pa semper. (Revelacion 20:12, 15) Laga tur hende alaba Jehova pa su victoria redonda riba e muher bieu di mala bida!

 8. Cua estímulo e coro celestial di alabanza cu Juan a mira mester dúnanos awor, promé cu e destruccion di Babilonia e Grandi?

⁸ Cuanto e plena participacion den e trabao di Dios pa awe ta estímulános! Laga tur sirbidor di Jehova dedicánan di curazón i alma ne declaracion dje huicio di Dios, hunto cu e gran speranza dje Reino awor, promé cu Babilonia e Grandi ta ser tumbá i destruí.—Isaías 61:1-3; 1 Corintio 15:58.

‘Aleluya—Jehova ta Rey!’

 9. Pakico e último aleluya ta klink i ta asina fuerte?

⁹ Tin mas motibo pa alegra, manera Juan ta sigi bísanos: “I mi a tende loke tabata manera e boz di un multitud grandi i manera e sonido di hopi awa i manera e sonido di donder fuerte. Nan a bisa: ‘Aleluya,c pasobra Jehova nos Dios, e Todopoderoso, a cuminza reina como rey.’” (Revelacion 19:6) E último aleluya ei ta esun cu ta haci e proclamacion completo of henter. Esei ta un sonido celestial fuerte, mas grandi cu cualkier coro humano, mas mahestuoso cu cualkier catarata terrenal, i mas inspirador di temor cu cualkier donder dje tera. E miríada di boz celestial ta celebra e echo cu “Jehova nos Dios, e Todopoderoso, a cuminza reina como rey.”

10. Den ki sentido nos por bisa cu Jehova ta cuminza reina como rey despues di destruccion di Babilonia e Grandi?

¹⁰ Pero, pakico e ta bisa cu Jehova a cuminza reina? Miles di aña a pasa desde cu e salmista a declara: “Dios ta mi Rey desde leu atrás.” (Salmo 74:12) E gobernacion real di Jehova tabata bieu asta den e tempo ei, pues, con e coro universal por canta cu “Jehova . . . a cuminza reina como rey”? Pasobra ora Babilonia e Grandi ta ser destruí, lo no existi mas un rival arrogante contra Jehova, kitando hende di obedecele como Soberano Universal. Religion falso lo no existi mas pa instiga gobernante di mundo pa opone Dios. Ora Babilonia di antigua a cai for di su posicion di dominacion mundial, Sion a tende e proclamacion victorioso: “Bo Dios a bira rey!” (Isaías 52:7) Despues di nacimento dje Reino na 1914, e 24 anciano a proclama: “Nos ta gradicíbo, Jehova Dios . . . pasobra bo a tuma bo gran poder i a cuminza reina como rey.” (Revelacion 11:17) Awor, despues di destruccion di Babilonia e Grandi, e grito ta sali di nobo: “Jehova . . . a cuminza reina como rey.” Ningun dios cu hende a traha ta existi pa opone e soberanía di Jehova, e Dios berdadero!

Casamento dje Lamchi ta yega cerca!

11, 12. (a) Con Jerusalem di antigua a dirigié na Babilonia di antigua, poniendo cua modelo pa Jerusalem Nobo i Babilonia e Grandi? (b) Despues dje victoria riba Babilonia e Grandi, kico ehército di cielo ta canta i ta anuncia?

¹¹ “Ai, e enemiga di mi”! Ta asina cu Jerusalem, e sitio dje tempel pe adoracion di Jehova, a dirigié na Babilonia idólatra. (Miqueas 7:8) Di igual manera, “e stad santo, Jerusalem Nobo,” componí dje bruid di 144.000 miembro, tin tur motibo pa dirigié na Babilonia e Grandi como su enemiga. (Revelacion 21:2) Pero por fin e gran muher a experimenta castigo, calamidad, i ruina. Su práctica di spiritismo i su astrólogo no por salbé. (Compara cu Isaías 47:1, 11-13.) En berdad, esei ta un victoria grandi pe adoracion berdadero!

¹² Ya cu e muher repugnante, Babilonia e Grandi, a desparce pa semper, atencion por ta enfocá riba e bruid dje Lamchi, un berdadero birgen! Pues, ehército celestial ta canta cu gozo alabando Jehova: “Láganos alegra i pasa over cu gozo, i láganos duné gloria, pasobra e casamento dje Lamchi a yega i su esposa a prepara su mes. Sí, tabata duná na dje di ser bistí den linen fini, briyante i limpi, pasobra linen fini ta representa acto husto dje santonan.”—Revelacion 19:7, 8.

13. Cua preparacion pa casamento dje Lamchi a ser hací através dje siglonan?

¹³ Através dje siglonan, Jesús a haci preparacion amoroso pe casamento celestial. (Mateo 28:20; 2 Corintio 11:2) El a haci limpi e 144.000 di Israel spiritual pe “por presenta e congregacion na su mes den su splendor, sin tene ningun mancha ni plooi ni nada asina, sino keda santo i sin mancha.” (Efesio 5:25-27) Afin di logra “e premio dje yamada celestial di Dios,” cada cristian ungí tabatin cu kita e personalidad bieu cu su práctica, i bisti e personalidad cristian nobo i cumpli cu acto husto “cu tur nan alma como pa Jehova.”—Filipense 3:8, 13, 14; Colosense 3:9, 10, 23.

14. Con Satanás a purba di contamina posible miembro di esposa dje Lamchi?

¹⁴ Desde Pentecoste di aña 33 EC padilanti, Satanás a usa Babilonia e Grandi como su instrumento, forzando pa contamina posible miembro di esposa dje Lamchi. Promé cu e fin dje promé siglo, el a sembra simía caba dje religion babilónico den e congregacion. (1 Corintio 15:12; 2 Timoteo 2:18; Revelacion 2:6, 14, 20) Apóstol Pablo a detaya hende cu tabata saboteá e fe, bisando: “Pasobra hende asina ta apóstol falso, trahador engañoso, transformando nan mes na apóstol di Cristo. I no ta straño, pasobra Satanás mes ta sigi transformando su mes na un angel di luz.” (2 Corintio 11:13, 14) Durante siglonan despues, cristiandad apóstata, mescos cu e resto di Babilonia e Grandi, a bistié den bistí di riqueza i privilegio, “púrpura i scarlata, . . . oro i piedra precioso i perla.” (Revelacion 17:4) Clero i papa di dje a frei cu emperador dramador di sanger, tal como Constantino i Carlo Magno. E nunca tabata bistí den “acto husto dje santonan.” Como un bruid falso, e berdaderamente tabata un obra maestro di engaño satánico. Por fin, e ta desparce pa semper!

Esposa dje Lamchi a preparele

15. Con ungínan cristian ta seyá, i nan tin cu cumpli cu cua requisito?

¹⁵ Pues, anto, despues di casi 2.000 aña, tur 144.000 dje grupo dje bruid a preparánan. Pero, precisamente na ki tempo nos por bisa cu ‘esposa dje Lamchi a preparele’? Progresivamente, desde Pentecoste di aña 33 EC padilanti, e ungínan creyente “tabata seyá cu e spiritu santo primintí,” den bista dje binidero “dia di liberacion mediante rescate.” Manera apóstol Pablo a bisa, Dios “també a pone su seyo riba nos i a dúnanos e prenda di loke ta bini, esta, e spiritu den nos curazón.” (Efesio 1:13; 4:30; 2 Corintio 1:22) Cada cristian ungí ta ser “yamá i escogí,” i ta duna prueba cu nan ta “fiel.”—Revelacion 17:14.

16. (a) Seyamento di apóstol Pablo tabata completo na ki tempo, i con nos sa? (b) Na ki tempo esposa dje Lamchi ta completamente prepará?

¹⁶ Despues di hopi aña di prueba, Pablo mes por a bisa: “Mi a lucha e bon lucha, i a corre e carreda te na fin, mi a warda e fe. Dje tempo aki padilanti tin reserbá pa mi e corona di husticia, cu Señor, e huez husto, lo dunámi como recompensa den e dia ei, pero no na mi so, sino també na tur esnan cu a stima su manifestacion.” (2 Timoteo 4:7, 8) Seyamento dje apóstol a parce di ser completo, aunque e tabata den carni ainda i tabatin cu enfrenta martirio ainda. Di igual manera, e tempo mester yega ora tur e resto riba tera dje 144.000 lo ser seyá individualmente como perteneciendo na Jehova. (2 Timoteo 2:19) Esei lo ta ora esposa dje Lamchi ta preparele completamente—ya cu e mayoría grandi dje 144.000 a recibi caba nan recompensa celestial i esnan riba tera ainda ta ser aprobá finalmente i seyá como hende fiel.

17. Na ki tempo casamento dje Lamchi por ta efectuá?

¹⁷ Ne tempo ei den e orario di Jehova, ora seyamento dje 144.000 ta completo, angel lo los e cuater bientu dje tribulacion grandi. (Revelacion 7:1-3) Promé, huicio ta ser ehecutá riba Babilonia e Grandi, semehante di un muher di mala bida. Cristo victorioso sigientemente lo dal paso lihé na Armagedón pa destrui e resto dje organizacion di Satanás riba tera i, finalmente tira Satanás i su demoñonan den abismo. (Revelacion 19:11–20:3) Si ainda lo tin ungínan na bida riba tera, nan sin duda lo recibi nan recompensa celestial pronto despues cu Cristo completa su victoria i nan lo uni cu otro miembro dje grupo di bruid. E ora ei, na Dios su debido tempo, casamento dje Lamchi por ta efectuá!

18. Con Salmo 45 ta confirma volgordu di suceso en relacion cu casamento dje Lamchi?

¹⁸ E relato profético den Salmo 45 ta describí e volgordu di e sucesonan. Primeramente e Rey entronizá ta sali riba cabai pa vence su enemigonan. (Versículo 1-7) Anto e casamento ta ser efectuá, cu e multitud grandi riba tera como birgen compañé sirbiendo e bruid celestial. (Versículo 8-15) Sigientemente, e casamento ta bira fructífero, ora humanidad resusitá ta ser hizá te na perfeccion bao di superintendencia di “prinz den tur e tera.” (Versículo 16, 17) Ki bendicion glorioso ta compañá casamento dje Lamchi!

Feliz ta e invitadonan

19. Menciona e cuarto di siete felicidad den Revelacion, i ken ta participa den e felicidad special?

¹⁹ Awor Juan a skirbi e cuarto di siete felicidad di Revelacion: “I e [angel cu a revela e cosnan ei na Juan] a bisámi: ‘Skirbi: Feliz ta esnan invitá né cena di casamento dje Lamchi.’ També, el a bisámi: ‘Esei ta e berdadero declaracion di Dios.’” (Revelacion 19:9)d Esnan invitá ne “cena di casamento dje Lamchi” ta miembro dje grupo di bruid. (Compara cu Mateo 22:1-14.) Tur e grupo dje ungínan di bruid ta participa den e felicidad di a recibi tal invitacion. E mayor parti dje invitadonan a bai cielo caba, e lugar dje cena di casamento. Esnan cu ta riba tera ainda ta keda contentu, també, cu nan a ser invitá. Nan lugar ne cena di casamento ta sigur. (Juan 14:1-3; 1 Pedro 1:3-9) Ora nan ta ser resusitá den cielo anto tur e bruid uní lo sigi pa participa cu e Lamchi den e casamento supremamente feliz.

20. (a) Kico kier men e palabra: “Esei ta e berdadero declaracion di Dios”? (b) Con e palabra dje angel a afecta Juan, i con e angel a reacciona?

²⁰ E angel ta bisa cu “esei ta e berdadero declaracion di Dios.” E palabra “berdadero” ta traduci e palabra griego a·le·thi·nós i kier men “legítimo” of “confiabel.” Siendo cu tal declaracion realmente ta bini di Jehova, nan ta fiel i confiabel. (Compara cu 1 Juan 4:1-3; Revelacion 21:5; 22:6.) Como un invitado ne fiesta di casamento, Juan mester a keda yená cu gozo ora el a tende esei i a anticipa bendicion cu ta spera e grupo di bruid. Juan realmente a keda asina profundamente conmoví cu e angel a duné conseho, manera Juan a bisa: “Anto mi a cai abao dilanti su pia pa adoré. Pero el a bisámi: ‘Tene cuidao! No haci esei! Mi ta simplemente un esclabo compañé di bo i di bo rumanan cu tin e trabao di duna testimonio di Jesús. Adora Dios.’”—Revelacion 19:10a.

21. (a) Kico Revelacion ta mustra en cuanto angel? (b) Hende cristian mester tene cua actitud en cuanto angel?

²¹ Den tur Revelacion un testimonio notable ta ser duná dje fieldad i diligencia di angel. Nan ta ocupá den e canal di comunicacion dje berdad. (Revelacion 1:1) Nan ta traha hunto cu hende den e predicacion dje bon nobo i den bashamento di plaga simbólico. (Revelacion 14:6, 7; 16:1) Nan a bringa banda di Jesús tirando Satanás i su angelnan foi cielo, i nan lo bringa banda di dje atrobé den Armagedón. (Revelacion 12:7; 19:11-14) Realmente, nan tin acceso ne persona mes di Jehova. (Mateo 18:10; Revelacion 15:6) No obstante, nan ta solamente esclabo humilde di Dios. No tin lugar den e adoracion puro pa adoracion di angel; ni sikiera pa adoracion relativa, esta, dirigiendo adoracion na Dios via un “santo” of angel. (Colosense 2:18) Hende cristian ta adora Jehova so, haciendo nan peticion na dje den e nomber di Jesús.—Juan 14:12, 13.

E papel di Jesús den e profecía

22. Kico e angel a bisa Juan, i kico e palabra kier men?

²² Anto e angel a bisa: “Pasobra e dunamento di testimonio di Jesús ta loke ta inspira profecía.” (Revelacion 19:10b) Di ki manera? Esei kier men cu tur profecía inspirá a sali debí na Jesús i e papel cu e ta hunga den e propósito di Jehova. E promé profecía den e Bijbel ta priminti e binimento dje simía. (Génesis 3:15) Jesús a bira e Simía. Revelacion despues a edifica un coleccion enorme di berdad profético fundá riba tal promesa fundamental. Apóstol Pedro a bisa Cornelio, e gentil creyente: “Tur profeta ta duna testimonio di [Jesús].” (Echo 10:43) Mas cu 20 aña despues, apóstol Pablo a bisa: “No ta importa cuanto promesa di Dios tini, nan a bira Sí mediante [Jesús].” (2 Corintio 1:20) Despues di 43 aña mas, Juan mes ta hácinos corda: “E berdad a yega di ser pa medio di Jesucristo.”—Juan 1:17.

23. Pakico e puesto halto i autoridad di Jesús no ta kita nada for dje adoracion cu nos ta rindi na Jehova?

²³ Esei di cualkier manera ta kita algo for dje adoracion cu nos ta rindi na Jehova? No. No lubida e conseho di cautela dje angel: “Adora Dios.” Jesús nunca ta purba di competi cu Jehova. (Filipense 2:6) Ta cierto cu tur angel ta ser bisá pa “rindi homenahe na [Jesús],” i tur creacion tin cu reconoce su puesto halto di manera cu “den e nomber di Jesús tur rudía tin cu dobla.” Pero, ripara, esei ta pe “gloria di Dios e Tata” i ta su mandamento. (Hebreo 1:6; Filipense 2:9-11) Jehova Dios a duna Jesús su autoridad halto, i ora nos ta reconoce tal autoridad, nos ta duna gloria na Dios. Si nos ta nenga di someténos ne gobernacion di Jesús, esei ta mescos cu rechaza Jehova Dios mes.—Salmo 2:11, 12.

24. Nos ta considera cua dos suceso asombroso, i p’sei nos mester declara cua palabra?

²⁴ Pues, anto, láganos unidamente declara e promé palabra di Salmo 146 te 150: “Boso alaba Jah!” Laga e coro di aleluya sali cu e forza di donder den anticipacion dje triunfo di Jehova Dios riba e imperio mundial babilónico di religion falso! I laga gozo abunda mientras cu e casamento dje Lamchi ta yega cerca!

[Nota]

[Kuadro na página 273]

“Carta pa Sodoma i Gomorra”

Bao dje título ei, e curant Daily Telegraph di Londres di 12 di November di 1987, a informa di un mocion presentá ne Sinodo General dje Iglesia Anglicano. Esei a exigi expulsion di “cristian” homosexual for dje religion. Columnista Godfrey Barker a bisa: “Arzobispo di Canterbury a opina tristemente ayera: ‘Si San Pablo ta skirbi un carta ne Iglesia Anglicano, nos por wel puntra ki clase di carta esei lo tá.’” Sr. Barker mes a comenta: “E contesta ta un carta pa Sodoma i Gomorra,” i a agrega: “Dr. [arzobispo] Runcie a pensa cu e mester ta manera capítulo 1 di Romano.”

E autor a cita e palabra di Pablo den Romano 1:26-32: “Dios a entregánan, den mal deseo di nan curazón, na impureza. . . . Homber cu ta comete acto sin bergüenza cu homber . . . aunque nan ta conoce e decreto di Dios di cu hende cu ta haci tal cosnan ta merece di muri, nan no solamente ta hácinan sino ta aproba di hende cu ta practicánan.” El a conclui: “San Pablo solamente a preocupele cu tipo sintá den banki. E problema di Dr. Runcie tin cu ber cu tipo riba preekstoel.”

Pakico e arzobispo tin un problema asina? Título grandi den e curant Daily Mail di Londres di 22 di October di 1987, a declara: “ ‘Di cada tres vicario, uno ta homosexual’ . . . E campaña pa expulsa homosexual ‘por laga e Iglesia anglicano bashí.’” Informe a cita e sigiente palabra dje “reverendo” secretario general dje Movimento Cristian di Lesbiana i Homosexual: “Si nan ta acepta tal mocion, esei lo ta un catástrofe pe Iglesia, i e arzobispo di Canterbury sa esei. Como un calculacion general, nos ta kere cu entre 30 te 40 porciento di clero dje Iglesia Anglicano ta homosexual. I nan ta hende di mas activo cu ta contribui ne ministerio dje Iglesia.” Sin duda e cantidad menguante di hende cu sa bai misa ta refleha en parti nan disgusto cu e aumento di pastor homosexual.

Kico e sinodo dje iglesia a decidi? Un gran mayoría dje 388 miembro (95 porciento dje clero) a vota na fabor di bashamento di awa den biña. En cuanto esei, e periódico The Economist di 14 di November di 1987, a informa: “E Iglesia Anglicano ta contra práctica homosexual, pero no mashá. E sinodo general, e parlamento dje Iglesia, pensando riba pastor homosexual, a decidi e siman aki cu acto homosexual, distinto di fornicacion i adulterio, no ta picá: nan simplemente ‘no ta alcanza e ideal’ di cu ‘relacion sexual ta un acto di compromiso total cu ta pertenece correctamente den e relacion matrimonial permanente.’” Haciendo contraste entre e posicion dje Arzobispo di Canterbury i e posicion franco di apóstol Pablo den Romano 1:26, 27, The Economist a skirbi e palabra di Pablo cu e título “San Pablo tabata sa loke el a pensa.”

Jesucristo també tabata sa loke el a pensa i a expresa esei claramente. El a bisa cu lo ta “mas soportable pe tera di Sodoma ne Dia di Huicio” cu pa clero cu ta rechaza su mensahe. (Mateo 11:23, 24) Jesús a exagera e asunto pa mustra cu guía religioso cu ta rechaza e Yiu di Dios i su siñanza ta asta mas reprensible cu sodomita. Hudas 7 ta bisa cu sodomita a experimenta “e castigo hudicial di candela eterno,” significando destruccion eterno. (Mateo 25:41, 46) Pues, anto, ki severo lo ta e huicio di lider yamá cristian ciegu cu ta guia tao ciegu leu for di ley moral halto dje Reino di Dios te ne camina baho i corrupto di mundo! (Mateo 15:14) En cuanto religion falso, Babilonia e Grandi, e boz di cielo ta grita cu urgencia: “Sali for di dje, mi pueblo, si boso no kier participa cuné den su picánan, i si boso no kier recibi parti di su pláganan.”—Revelacion 18:2, 4.

[Plachi na página 275]

Cielo ta klink cu cuater aleluya, alabando Jah pa su victoria final riba Babilonia e Grandi