Loke e Reino di Dios Lo Haci

 1. Kico e binimentu dje Reino di Dios lo nificá?

ORA Jesus a siña su siguidónan pidi p’e Reino di Dios den oracion, e tabata sa cu su binimentu lo a trece fin na miles di aña di gobernacion humano independiente di Dios. Durante tur e tempu ei, por lo general hende no a haci e boluntad di Dios riba tera. (Salmo 147:19, 20) Pero despues cu e Reino ser establecí den shelu, e boluntad di Dios lo tuma lugá tur caminda. E tempu p’e transicion dramático tuma lugá di gobernacion humano p’e Reino celestial di Dios, ta yegando masha cerca.

 2. Kico lo marca e transicion for di gobernacion humano pa gobernacion dje Reino?

² Loke lo marca e transicion aki ta e periodo di tempu cu Jesus a yama e “tribulacion grandi tal como no a sosodé desde principio di mundu te awor, no, ni lo no sosodé atrobe.” (Mateo 24:21) Bijbel no ta bisa con largu e periodo di tempu ei lo ta, pero e calamidadnan cu mester tuma lugá durante e periodo ei lo ta pió cu cualkier cos cu mundu a yega di mira. Na comienso dje tribulacion grandi, lo sosodé algu cu lo shok mayoria hende riba tera fuertemente: destruccion di tur religion falsu. Esei lo no shok Testigonan di Jehova, pasobra pa hopi tempu nan a anticipá esaki. (Revelacion 17:1, 15-17; 18:1-24) E tribulacion grandi lo caba na Armagedon ora e Reino di Dios aplastá henter e sistema satánico.—Daniel 2:44; Revelacion 16:14, 16.

 3. Con Jeremías ta describí e destino di hende desobediente?

³ Kico esaki lo nificá pa hende “cu no conocé Dios i esnan cu no ta obedecé e bon nobo” tocante su Reino celestial den man di Cristo? (2 Tesalonicensenan 1:6-9) Profecia di Bijbel ta bisa nos: “Mira! Un calamidad ta sali di nacion pa nacion, i un gran tormenta mes lo ser lantá for dje partinan mas remoto dje tera. I esnan matá dor di Jehova siguramente lo ta den e dia ei for di un punta dje tera te n’e otro punta dje tera. Nan lo no ser yorá, ni nan lo no ser recogé ni ser derá. Nan lo keda mescos cu mest riba cara dje suela.”—Jeremías 25:32, 33.

 4. Pakico Jehova tin tur rason pa trece fin n’e sistema malbado aki?

⁴ Pa miles di aña, Jehova Dios a tolerá maldad, suficiente pa hende di curason recto mira cu gobernacion humano ta un catástrofe. Por ehempel, den siglo 20 so caba, guera, revolucion i otro desordu civil a mata mas cu 150 miyon hende, segun un fuente. Foral durante Guera Mundial II hende su malicia tabata bisto ora cu rond di 50 miyon hende a ser matá. Hopi di nan a muri un morto horendo den campo di concentracion nazi. Net manera Bijbel a predicí, den nos tempu ‘hende malbado i impostor a bai di malu pa pió.’ (2 Timoteo 3:1-5, 13) Awe, inmoralidad, crímen, violencia, corupcion i menosprecio p’e normanan di Dios ta na ordu di dia. P’esei, Jehova tin tur rason pa trece fin n’e sistema malbado aki.

 5, 6. Describí e maldad cu tabata existí den Canan di antigwedad.

⁵ E situacion djawe ta similar cu esun na Canan rond di 3.500 aña pasá. Bijbel ta bisa: “Tur cos detestabel pa Jehova cu e ta ègt odia nan a haci na nan diosnan, pasobra asta nan yu hombernan i yu muhernan nan ta kima regularmente den candela na nan diosnan.” (Deuteronomio 12:31) Jehova a informá e nacion di Israel: “Ta pa e maldad dje nacionnan aki cu Jehova bo Dios ta bai saca nan for di dilanti bo.” (Deuteronomio 9:5) Historiadó di Bijbel Henry H. Halley a remarcá: “E adoracion di Baal, Astoret i otro diosnan cananeo tabata consistí dje orgianan di mas extravagante; nan tempelnan tabata centronan di maldad.”

⁶ Halley a mustra con grave nan maldad a bira, pasobra den un dje hopi áreanan ei, arkeólogonan “a haña gran cantidad di poron cu ta contené restonan di mucha cu a ser sacrificá na Baal.” El a bisa: “Henter e área a resultá di ta un santana pa baby recien nací. . . . E cananeonan tabata adorá nan diosnan cu actonan inmoral como rito religioso; pa despues, mata nan promé yu como sacrificio n’e mésun diosnan ei. Ta parce cu, pa gran parti, e tera di Canan a bira un sorto di Sódoma i Gomora riba escala nacional. . . . Un civilisacion asina repugnante i cruel tabatin derecho di sigui existí? . . . Arkeólogonan cu ta coba den e ruinanan di stadnan cananeo ta haña straño cu Dios no a destruí nan mas promé.”

 7, 8. Con Dios lo haci e tera aki limpi?

⁷ Mescos cu Dios a haci Canan limpi, pronto lo e haci henter e tera limpi i dun’é na esnan cu ta haci su boluntad. “E rectonan ta esnan cu lo biba riba tera, i esnan sin culpa ta esnan cu lo keda riba dje. En cuanto e malbadonan, nan lo ser cortá for dje tera mes.” (Proverbionan 2:21, 22) I e salmista ta bisa: “Solamente un poco tempu mas, i e malbado lo no t’ei mas . . . Pero e mansunan mes lo poseé e tera, i berdaderamente nan lo haña nan deleite exkisito den e abundancia di pas.” (Salmo 37:10, 11) Satanas tambe lo ser eliminá, “p’e no gaña e nacionnan mas te cu e mil aña a terminá.” (Revelacion 20:1-3) Sí, “mundu ta pasa bai i tambe su deseo, pero esun cu haci e boluntad di Dios ta permanecé pa semper.”—1 Juan 2:17.

⁸ Resumiendo e speransa grandioso pa esnan cu kier biba pa semper riba tera, Jesus a bisa: “Felis ta esnan di genio suave, ya cu nan lo heredá e tera.” (Mateo 5:5) Probablemente e tabata referí na Salmo 37:29, cu a profetisá: “E hustunan mes lo poseé tera, i nan lo biba pa semper riba dje.” Jesus tabata sa cu e propósito di Jehova ta pa hende di curason recto biba den un paradijs riba tera pa semper. Jehova ta bisa: “Ami mes a traha tera, humanidad i e bestianan cu ta riba superficie dje tera mediante mi gran poder . . . , i mi a dun’é na ken cu a resultá di ta recto den mi bista.”—Jeremías 27:5.

 9. Ki tipo di mundu e Reino di Dios lo introducí?

⁹ Despues di Armagedon, e Reino di Dios lo introducí un “tera nobo” maraviyoso den cua “husticia lo tin cu biba.” (2 Pedro 3:13) E desaparicion dje sistema di cosnan opresivo aki lo ta un tremendo alivio pa sobrebibientenan di Armagedon! Ki contentu nan lo ta di a drenta e hustu mundu nobo bou di gobernacion dje Reino celestial, cu bendicionnan maraviyoso i cu mira riba bida eterno!—Revelacion 7:9-17.

10. Ki cosnan malu lo no existí mas bou dje gobernacion di Reino?

¹⁰ Guera, crímen, hamber ni sikiera bestia peligroso lo no menasá hende mas. “Lo mi cera un pacto di pas cu [mi pueblo], i di berdad lo mi pone e bestia salbahe dañino stop di existí riba tera . . . I e palu dje campo mester duna su fruta, i e tera mes lo duna su producto, i realmente nan lo resultá di ta riba nan suela den siguridad.” “Nan lo tin cu bati nan spada na ploeg i nan lansa na sker di corta mata. Nan lo no hisa spada, nacion contra nacion, ni lo no siña di guera mas. I nan realmente lo sinta, cada un bou di su mata di wijndruif i bou di su palu di figu, i lo no tin ningun hende cu ta haci nan tembla.”—Ezekiel 34:25-28; Mikéas 4:3, 4.

11. Pakico nos por tin confiansa cu malesa físico lo caba?

¹¹ Enfermedad, tristesa i asta morto lo ser eliminá. “Ningun residente lo bisa: ‘Mi ta malu.’ E pueblo cu ta biba den e tera lo ta esnan pordoná pa nan eror.” (Isaías 33:24) “[Dios lo] seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai. . . . ‘Mira! Mi ta haci tur cos nobo.’” (Revelacion 21:4, 5) Ora Jesus tabata riba tera, el a demostrá su abilidad di haci cosnan cu e poder cu Dios a dun’é. Cu apoyo di spiritu santu, Jesus a bai di un lado pa otro curando e coho i enfermonan.—Mateo 15:30, 31.

12. Ki speransa tin p’e mortonan?

¹² Jesus a haci asta mas. El a lanta morto. Con hende humilde a reaccioná? Ora el a resucitá un mucha muher di 12 aña, su mayornan “tabata for di nan mes di gran excitacion.” (Marco 5:42) Esaki tabata un otro ehempel di loke Jesus lo haci rond mundu bou di gobernacion di Reino, pasobra e ora ei “lo bai tin un resureccion di tantu e hustunan como e inhustunan.” (Echonan 24:15) Imaginá bo e gran excitacion ora grupo tras di grupo di morto bini bek na bida i ser uní atrobe cu nan sernan kerí! Sin duda lo tin un gran trabou di educacion bou di supervision di Reino di manera cu “tera siguramente lo ta yená cu e conocimentu di Jehova mescos cu e awanan ta cubri laman mes.”—Isaías 11:9.

13. Con e rectitud di Dios su gobernacion lo keda demostrá?

¹³ Na fin dje mil aña di gobernacion di Reino, e famia humano lo a ser restorá na perfeccion di mente i curpa. E tera lo ta un hofi mundial di Eden, un paradijs. Esei lo resultá den pas, felicidad, siguridad i un sociedad humano amoroso. Hamas den historia humano promé cu gobernacion di Reino hende a yega di mira algu asina akí. Ki un gran contraste lo keda demostrá entre e promé miles di aña di gobernacion miserabel den man di hende i e gobernacion magnífico di Dios su Reino celestial di mil aña! E gobernacion di Dios mediante su Reino lo a demostrá di ta completamente superior den tur sentido. Dios su derecho di goberná, su soberania, lo ta totalmente vindicá.

14. Kico lo sosodé cu e rebeldenan ora e mil aña terminá?

¹⁴ Na fin dje mil aña, Jehova lo permití hende perfecto ehercé nan boluntad liber pa loke ta esun cu nan kier sirbi. Bijbel ta mustra cu lo ‘los Satanas for di su prizon.’ Lo e purba engañá hende atrobe. Algun lo scoge independencia for di Dios. Pa prevení ‘afliccion lanta cabes un di dos biaha,’ Jehova lo likidá Satanas, su demoñonan i tur esnan cu ta rebelá contra e soberania di Jehova. Ningun hende por keha cu esnan cu e tempu ei lo ser destruí pa semper no a haña chens of cu nan mal curso tabata debí na imperfeccion. No, nan lo ta perfecto mescos cu Adam cu Eva tabata, kendenan boluntariamente a scoge pa rebelá contra Jehova su gobernacion hustu.—Revelacion 20:7-10; Nahum 1:9.

15. Ki relacion esnan leal lo tin cu Jehova?

¹⁵ Di otro banda, probablemente e gran mayoria di hende lo scoge pa sostené Jehova su soberania. Ora likidá tur rebelde, e hustunan lo para dilanti Jehova despues di a pasa e prueba final di lealtad. E ora ei, Jehova lo aceptá e personanan leal aki como su yunan. P’esei nan ta bin haña bek e relacion cu Adam cu Eva tabatin cu Dios promé cu nan a rebelá. Asina Romanonan 8:21 lo cumpli: “Creacion mes [humanidad] tambe lo ser librá for di sclabitud na corupcion i lo tin e glorioso libertad dje yunan di Dios.” Profeta Isaías ta predicí: “[Dios lo] realmente traga morto pa semper, i e Señor Soberano Jehova siguramente lo limpia e lágrimanan for di tur cara.”—Isaías 25:8.

16. Pakico ta corecto pa anhelá e recompensa di bida eterno?

¹⁶ Ki un prospecto maraviyoso ta warda hende fiel, pa sa cu pa semper Dios lo drama riba nan un sobreabundancia di beneficio spiritual i material! E salmista a bisa corectamente: “Bo ta habri bo man i ta satisfacé e deseo [corecto] di tur cos bibu.” (Salmo 145:16) Jehova ta animá esnan dje clase terenal pa haci e speransa aki di bida den Paradijs parti di nan fe den dje. Aunke Jehova su soberania ta mas importante, e no ta pidi hende sirbié sin speransa di un recompensa. Den henter Bijbel, lealtad na Dios i e speransa di bida terenal ta inseparablemente mará na otro como partinan necesario di un fe cristian den Dios. “Esun cu ta acudí na Dios mester kere cu e ta existí i cu e ta bira e recompensador di esnan cu ta busk’é cu empeño.”—Hebreonan 11:6.

17. Con Jesus a mustra cu tabata corecto pa laga nos speransa sostené nos?

¹⁷ Jesus a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Aki el a conectá gana conocimentu di Dios i su propósitonan cu e recompensa cu esaki ta trece cuné. Por ehempel, ora un malechor a pidi Jesus pa corda riba dje ora e drenta den su Reino, Jesus a bis’é: “Lo bo ta cu mi den Paradijs.” (Lucas 23:43) E no a bisa e homber pa tene fe asta si e no haña un recompensa. E tabata sa cu Jehova kier pa su sirbidónan carga e speransa di bida eterno den un paradijs riba tera pa yuda sostené nan segun cu nan ta topa vários prueba den e mundu aki. Pues, nos anhelo pa haña e recompensa ta un yudansa vital pa wanta como cristian.

18, 19. Kico lo sosodé cu e Rey i e Reino na fin dje Reinado di Mil Aña?

¹⁸ Ya cu e Reino tabata un gobiernu subsidiario cu Jehova a usa pa hiba tera i su habitantenan humano na perfeccion i reconciliacion cuné, ki tarea e Rey Jesucristo i e 144.000 rey i sacerdotenan tin despues dje Mil Aña? “Siguientemente, e fin, ora e entregá e reino na su Dios i Tata, ora cu el a reducí na nada tur gobiernu i tur autoridad i poder. Pasobra e tin cu reina como rey te ora Dios pone tur enemigu bou di su pia.”—1 Corintionan 15:24, 25.

¹⁹ Ora Cristo entregá e Reino na Dios, con nos tin cu comprendé e textonan cu ta papia di e reino como algu cu ta dura pa semper? E logronan dje Reino lo dura pa semper. Cristo lo ta onrá pa semper debí n’e papel cu el a hunga p’e vindicacion di Dios su soberania. Pero siendo cu e tempu ei lo no tin picá i morto mas, i humanidad a ser rescatá, lo no tin mester di dje mas como Rescatador. E Gobernacion di Mil Aña dje Reino tambe lo a cumpli completamente; pues lo no tin mester di un gobiernu subsidiario mas pa permanecé entre Jehova i humanidad obediente. Di manera cu “Dios por ta tur cos pa tur hende.”—1 Corintionan 15:28.

20. Con nos por haña sa kico tin den futuro pa Cristo i e 144.000?

²⁰ Ki futuro papel Cristo i su co-gobernantenan lo tin despues cu e Reinado di Mil Aña ta completá? Bijbel no ta bisa. Tog, nos por ta sigur cu Jehova lo duna nan hopi otro privilegio di sirbishi den henter su creacion. Laga nos tur awe sostené Jehova su soberania i ricibí bida eterno, di manera cu den futuro, nos lo ta bibu pa haña sa kico ta e propósito di Jehova p’e Rey i su socionan rey i sacerdote, i tambe pa henter su universo asombroso!