“Faha Boso Mes cu Humildad di Mente”

“Dios ta oponé esnan halsá, pero e ta duna bondad inmerecí na esnan humilde.”—1 PEDRO 5:5.

 1, 2. Cua dos disposicion mental contrario di otro tin un efecto profundo riba conducta di hende?

DOS di e disposicionnan mental cu e Palabra di Dios ta hala nos atencion na dje, ta net contrali di otro. Tur dos tin un efecto profundo riba conducta di hende. Bijbel ta describí un di nan como “humildad di mente.” (1 Pedro 5:5) Un definicion di “humildad” ta esaki: ser humilde den moda di anda of den spiritu, sin orguyo arogante. Humildad di mente ta nificá mescos, i for di Dios su punto di bista e ta un cualidad sumamente deseabel.

² Lo contrario ta orguyo. E ta ser definí como “balor propio exagerá,” ser “arogante.” E ta egocéntrico i ta busca, entre otro, bentahanan material i egoista, sin tene cuenta cu efecto negativo riba otronan. Bijbel ta mencioná un di su resultadonan: “Hende a dominá hende pa su perhuicio.” E ta bisa cu e “rivalidad di un contra otro” ta “corementu tras di bientu,” pasobra ora un hende muri “e no por hiba absolutamente nada.” Tal orguyo ta sumamente indeseabel for di Dios su punto di bista.—Eclesiástes 4:4; 5:15; 8:9.

E Spiritu Dominante di Mundu

 3. Kico ta e spiritu dominante di mundu?

³ Cua di e dos disposicionnan mental aki ta caracterisá mundu awe? Kico ta mundu su spiritu dominante? World Military and Social Expenditures 1996 ta comentá: “Ningun otro siglo den historia skirbí ta igualá siglo 20 pa loke ta violencia salbahe.” Competencia pa poder político i económico—i tambe rivalidad nacional, religioso, étnico i entre tribu—a mata mas cu 100 miyon hende durante e siglo aki. Conducta egoista riba nivel individual tambe a aumentá. E korant Chicago Tribune a declará: “Algun malesa social ta violencia sin rason, abusu di mucha, divorcio, buracheria, AIDS, suicidio di tiener, droga, gèng di caya, violacion, yu ilegítimo, aborto, pornografia, . . . gañamentu, infidelidad, corupcion político . . . A eliminá bon i malu como conceptonan moral.” P’esei, UN Chronicle a advertí: “Sociedadnan ta desintegrando.”

 4, 5. Con profecia di Bijbel tocante nos tempu a describí e spiritu di mundu cu exactitud?

⁴ E situacionnan aki ta mundial. Ta net manera profecia bíblico a predicí pa nos tempu: “Den e último dianan lo presentá tempu crítico, duru pa trata cuné. Pasobra hende lo ta stimadó di nan mes, stimadó di placa, presumido, halsá, blasfemadó, desobediente na mayornan, malagradecidu, desleal, sin cariño natural, no dispuesto na ningun acuerdo, calumniadó, sin dominio propio, feros, sin amor pa bondad, traicionero, cabesura, hinchá cu orguyo.”—2 Timoteo 3:1-4.

⁵ Esei ta un descripcion hopi exacto di e spiritu dominante dje mundu aki, un actitud egoista: semper mester ta “ami promé.” Mescos cu nacionnan ta den rivalidad, individuonan tambe ta den rivalidad. Por ehempel, den deportenan competitivo, hopi atleta kier ta number unu, sin tin cunes ki daño emocional of asta físico nan ta causa otronan. Hende ta promové e spiritu egoista aki den mucha, i e ta sigui manifestá su mes den hopi área di bida adulto. Su resultadonan ta “enemistad, pleitu, yaluzí, atake di rabia, contencion, desunion.”—Galationan 5:19-21.

 6. Ken ta promové egoismo, i kico Jehova ta pensa di e actitud mental aki?

⁶ Bijbel ta mustra cu e spiritu egoista dje mundu aki ta reflehá e spiritu di “esun yamá Diabel i Satanas, cu ta gañando henter e tera habitá.” Tocante e influencia di Satanas riba hende cu ta biba den e último dianan crítico aki, Bijbel ta predicí: “Ai dje tera . . . pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” (Revelacion 12:9-12) P’esei e cu su socionan demoño a intensificá nan esfuerso pa promové un actitud mental egoista den e famia humano. Anto, kico Jehova ta pensa di tal actitud? Su Palabra ta bisa: “Tur hende cu ta orguyoso di curason ta algu repugnante pa Jehova.”—Proverbionan 16:5.

Jehova Ta cu Esnan Humilde

 7. Con Jehova ta considerá hende humilde, i kico e ta siña nan?

⁷ Di otro banda, Jehova ta bendicioná esnan cu ta di mente humilde. Cantando pa Jehova, rey David a bisa: “Hende humilde lo bo salba; pero bo wowonan ta contra esnan halsá, pa bo rebahá nan.” (2 Samuel 22:1, 28) P’esei e Palabra di Dios ta consehá: “Busca Jehova, boso tur, e mansunan dje tera . . . Busca husticia, busca suavedad. Probablemente boso lo ser scondí den e dia di rabia di Jehova.” (Sofonías 2:3) Jehova ta siña esnan cu ta busk’é na moda humilde, pa nan cultivá un spiritu totalmente diferente for di esun dje mundu aki. “Lo e siña e mansunan su caminda.” (Salmo 25:9; Isaías 54:13) E caminda ei ta e caminda di amor. E ta basá riba hacimentu di loke ta corecto segun Dios su normanan. Bijbel ta bisa cu e amor basá riba principio aki “no ta broma, no ta hincha cu orguyo . . . no ta busca su mes interes.” (1 Corintionan 13:1-8) Ademas e ta manifestá su mes dor di humildad di mente.

 8, 9. (a) Kico ta e orígen di amor basá riba principio? (b) Con importante ta pa nos imitá e amor i humildad cu Jesus a desplegá?

⁸ Pablo i otro cristiannan di promé siglo a siña e tipo di amor aki for dje siñansanan di Jesus. I Jesus a siñ’é for di su Tata, Jehova, di ken Bijbel ta bisa: “Dios ta amor.” (1 Juan 4:8) Jesus tabata sa cu Dios su boluntad p’e, tabata p’e biba segun e ley di amor, i ta esei ta loke el a haci. (Juan 6:38) Ta p’esei el a sinti compasion pa esnan oprimí, e pobernan i e pecadónan. (Mateo 9:36) El a bisa nan: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason.”—Mateo 11:28, 29.

⁹ Jesus a mustra su disipelnan con importante ta pa nan imitá su amor i su humildad, ora el a bisa nan: “Den esaki tur lo sa cu boso ta mi disipelnan, si boso tin amor entre boso.” (Juan 13:35) Nan lo tabata claramente diferente di e mundu egoista aki. P’esei Jesus por a bisa di su siguidónan: “Nan no ta parti di mundu.” (Juan 17:14) No, nan no ta imitá e spiritu orguyoso i egoista dje mundu di Satanas. Na lugá di esei, nan ta imitá e spiritu di amor i humildad cu Jesus a desplegá.

10. Kico Jehova ta haciendo cu hende humilde den nos tempu?

¹⁰ E Palabra di Dios a predicí cu durante e último dianan aki, hende hustu lo ser reuní den un sociedad mundial basá riba amor i humildad. Asina, meimei di un mundu cu ta bira dia pa dia mas arogante, Jehova su pueblo ta desplegá un actitud net contrali: humildad di mente. Nan ta bisa: “Laga nos subi na e ceru di Jehova [su adoracion berdadero elevá], . . . i lo e instruí nos tocante su camindanan, i nos lo cana den su bereanan.” (Isaías 2:2, 3) Ta Testigonan di Jehova ta forma e sociedad mundial aki cu ta cana den Dios su bereanan. Entre nan tin un “multitud grandi” aumentante, “cu ningun hende no por a conta, for di tur nacion i tribu i pueblo i lenga.” (Revelacion 7:9) Awor e multitud grandi aki ta consistí di miyones di hende. Con Jehova ta entrenando nan pa ta humilde?

Siña Ser di Mente Humilde

11, 12. Con Dios su sirbidónan ta desplegá humildad di mente?

¹¹ E operacion di Dios su spiritu riba su pueblo dispuesto ta capacitá nan pa siña dominá e mal spiritu di mundu, anto desplegá e fruta di Dios su spiritu, cu ta manifestá su mes den “amor, goso, pas, gran pacenshi, amabilidad, bondad, fe, suavedad, dominio propio.” (Galationan 5:22, 23) Pa yuda nan desaroyá e cualidadnan ei, Bijbel ta consehá Dios su sirbidónan pa no bira “egoista, instigando competencia un cu otro, envidiando otro.” (Galationan 5:26) Den e mésun sentido, apostel Pablo a bisa: “Mi ta bisa cada un cu ta ei den boso pa no pensa mas di su mes cu ta necesario pa pensa; sino pensa di tal manera cu e por tin sano huicio.”—Romanonan 12:3.

¹² E Palabra di Dios ta bisa cristiannan berdadero pa nan no haci ‘nada motivá pa gana di pleita of motivá pa egoismo, sino considerá cu humildad di mente cu e otro sirbidónan di Dios ta superior cu boso, no vigilando cu interes personal boso mes asuntunan so, sino tambe cu interes personal den asuntu dje otronan.’ (Filipensenan 2:3, 4) “Laga cada un sigui busca, no su mes bentaha, sino esun dje otro persona.” (1 Corintionan 10:24) Sí, “amor ta edificá” otronan pa medio di palabra i echonan inegoista. (1 Corintionan 8:1) E ta promové cooperacion, no competencia. No tin lugá p’e spiritu di “ami promé” entre sirbidónan di Jehova.

13. Di con ta necesario pa nos siña humildad di mente, i con nos por siñ’é?

¹³ Sin embargo, pa motibu di imperfeccion heredá, nos no ta nace cu humildad di mente. (Salmo 51:5) Nos mester siña e cualidad aki. I esaki por ta difícil pa esnan cu no a siña Jehova su camindanan for di infancia, sino mas despues den bida. Ya nan a forma nan personalidad segun e actitudnan dje mundu bieu aki. Pues, nan mester siña “kita e personalidad bieu cu ta conformá cu [nan] manera di anda anterior,” i “bisti e personalidad nobo cu a ser creá segun e boluntad di Dios den berdadero husticia i lealtad.” (Efesionan 4:22, 24) Cu Dios su yudansa, hende sincero por cumpli cu loke e ta pidi nan: “Bisti boso cu tierno cariño di compasion, amabilidad, humildad di mente, suavedad, i gran pacenshi.”—Colosensenan 3:12.

14. Con Jesus a papia contra halsamentu di nos mes?

¹⁴ E disipelnan di Jesus tabatin cu siña esei. Nan tabata adulto tempu nan a bira su disipelnan, i nan tabatin un grado dje spiritu mundano di rivalidad den nan. Ora mama di dos di nan a purba logra prominencia pa su yunan, Jesus a bisa: “E gobernantenan dje nacionnan ta dominá [e pueblo] i e grandinan ta ehercé autoridad riba nan. No ta asina den boso; pero ken cu kier bira grandi den boso mester ta boso sirbidó, i ken cu kier ta e promé den boso mester ta boso esclabo. Mescos cu e Yu di hende [Jesus] a bini, no pa ser sirbí, sino pa sirbi i pa duna su alma como rescate en cambio pa hopi.” (Mateo 20:20-28) Ora Jesus a bisa su disipelnan pa no usa título pa purba halsa nan mes, el a agregá: “Boso tur ta ruman.”—Mateo 23:8.

15. Ki actitud esnan cu ta traha pa logra un puesto di superintendente mester tin?

¹⁵ Un berdadero siguidó di Jesus ta un sirbidó, sí, un esclabo di su compañeronan cristian. (Galationan 5:13) Esaki ta conta specialmente pa esnan cu kier cualificá como superintendente den congregacion. Nunca nan no mester competí pa prominencia of poder; nan no mester ‘dominá riba esnan cu ta herencia di Dios, sino bira ehempel pa nan.’ (1 Pedro 5:3) De echo, un spiritu egoista ta un indicacion di cu un homber ta inadecuá pa ta un superintendente. Un hende asina lo ta perhudicial pa e congregacion. Ta cierto cu ta apropiado cu un homber ta ‘percurá pa alcansá un puesto di superintendente,’ pero esei mester ta motivá dor di un deseo pa sirbi otro cristiannan. E puesto ei no ta un posicion di prominencia of poder, pasobra superintendentenan mester ta entre esnan di mente mas humilde den e congregacion.—1 Timoteo 3:1, 6.

16. Di con e Palabra di Dios a denunciá Diótrefes?

¹⁶ Apostel Juan ta hala nos atencion na un hende cu tabatin e punto di bista robes. E ta bisa: “Mi a skirbi algu p’e congregacion, pero Diótrefes, cu gusta haña e promé lugá den nan, no ta ricibí nada di nos cu respet.” E homber aki a trata otro hende cu falta di respet pa purba mehorá su propio posicion. Pero Dios su spiritu a motivá Juan pa incorporá un denunciacion contra Diótrefes den Bijbel, dor di su actitud di “ami promé.”—3 Juan 9, 10.

E Actitud Corecto

17. Con Pedro, Pablo i Barnabas a desplegá humildad di mente?

¹⁷ Tin hopi ehempel bíblico dje actitud corecto, esta, humildad di mente. Ora Pedro a drenta e cas di Cornelio, e homber a “cai na [Pedro] su pia i a rindié homenahe.” Pero, na lugá di aceptá tantu onra exagerá, “Pedro a lant’é, bisando: ‘Lanta; ami mes tambe ta hende.’” (Echonan 10:25, 26) Ora Pablo cu Barnabas tabata na Listra, Pablo a cura un homber cu a nace lam. Como resultado, e multitud a bisa cu e apostelnan aki tabata dios. Pero Pablo cu Barnabas a “sker nan paña exterior i a bula den e multitud, gritando i bisando: ‘Hombernan, pakico boso ta haciendo e cosnan aki? Nos tambe ta hende i tin e mésun debilidadnan cu boso.’” (Echonan 14:8-15) E cristiannan humilde aki no kier a aceptá gloria cerca hende.

18. Kico un angel poderoso a bisa Juan cu humildad?

¹⁸ Ora apostel Juan a ricibí “un revelacion via Jesucristo,” el a haña esaki transmití via un angel. (Revelacion 1:1) Si nos considerá e poder cu un angel tin, nos por comprendé con impresioná Juan a keda, pasobra un solo angel a destruí 185.000 asirio den un solo anochi. (2 Reynan 19:35) Juan ta relatá: “Despues di a tende i a mira, mi a cai pa adorá dilanti dje pia dje angel cu a mustra mi e cosnan ei. Pero e ta bisa mi: ‘Tene cuidou! No haci esei! Mi ta simplemente un co-esclabo di bo i di bo rumannan . . . Adorá Dios.’” (Revelacion 22:8, 9) Esta un humildad di mente di parti dje angel poderoso aki!

19, 20. Mustra e contraste entre e arogancia dje generalnan romano victorioso i e humildad di mente di Jesus.

¹⁹ Jesus tabata e ehempel mas excelente di un hende cu mente humilde. E tabata Dios su Yu unigénito, e futuro Rey di Dios su Reino celestial. Ora el a presentá su mes na e pueblo como tal, e no a haci manera e generalnan victorioso di tempunan romano. Tabatin marcha enorme pa nan—procesionnan—i nan tabata core den garoshi decorá cu oro i ivor, halá pa cabai blancu, of asta olefante, leon of tiger. Tabatin musicante den e procesion ta canta cantica di victoria, huntu cu garoshi yen di botin di guera i carosanan enorme cu exhibicion di esenanan di bataya. Tambe tabatin rey, prins i generalnan catibu, cu nan famia, hopi bes sunú pa humiyá nan. E ambiente dje eventonan ei tabata cargá cu orguyo i arogancia.

²⁰ Mira ki un contraste cu e manera den cua Jesus a ofrecé su mes. E tabata dispuesto di someté su mes humildemente pa cumpli cu e profecia tocante dje cu a bisa: “Mira! Bo rey mes ta bini cerca bo. E ta hustu, sí, salbá; humilde, i coriendo riba un buricu.” Cu humildad el a core riba un bestia di carga, no den un garoshi halá dor di animal di parada magnífico. (Zacarías 9:9; Mateo 21:4, 5) Hende humilde ta masha contentu cu Jesus ta e Rey cu Jehova lo nombra riba henter e tera den e mundu nobo, un persona cu berdadero humildad di mente, amoroso, compasivo i misericordioso!—Isaías 9:6, 7; Filipensenan 2:5-8.

21. Kico humildad di mente no ta indicá?

²¹ E echo cu Jesus, Pedro, Pablo i otro homber i muhernan di fe den tempu bíblico tabata di mente humilde, ta mustra cu no ta berdad cu humildad ta nificá debilidad. Al contrario, humildad ta mustra fortalesa di caracter, pasobra e hendenan aki tabatin curashi i celo. Nan a soportá vários prueba severo cu hopi forsa mental i moral. (Hebreonan, capítulo 11) I awe, ora sirbidónan di Jehova ta di mente humilde, nan tambe tin forsa asina, pasobra Dios ta respaldá hende humilde cu su poderoso spiritu santu. P’esei Bijbel ta urgi nos: “Boso tur faha boso mes cu humildad di mente un pa cu otro, pasobra Dios ta oponé esnan halsá, pero e ta duna bondad inmerecí na esnan humilde. Humiyá boso mes, anto, bou dje man poderoso di Dios, p’e por halsa boso n’e debido tempu.”—1 Pedro 5:5, 6; 2 Corintionan 4:7.

22. Kico nos lo trata den e siguiente artículo?

²² Tin un otro aspecto positivo di humildad di mente cu Dios su sirbidónan tin cu practicá. E ta unu cu ta yuda hopi pa edificá e spiritu di amor i cooperacion den congregacion. Sí, e ta un ingrediente esencial di humildad di mente. Nos lo trat’é den e siguiente artículo.

Como Repaso

◻ Describí e spiritu dominante dje mundu aki.

◻ Con Jehova ta mustra fabor na hende di mente humilde?

◻ Di con humildad di mente ta algu cu nos mester siña?

◻ Cua ta algun ehempel bíblico di individuonan cu a desplegá humildad di mente?

[Plachi na página 15]

E angel a bisa Juan: “No haci esei! Mi ta simplemente un co-esclabo”