Dos Clave pa un Matrimonio Duradero

1, 2. (a) Pa cuantu tempu matrimonio a ser diseñá pa dura? (b) Con esaki ta posibel?

ORA Dios a uni e promé homber i muher den matrimonio, no tabatin ningun indicacion cu e union lo tabata solamente temporal. Adam i Eva lo tabata huntu pa semper. (Génesis 2:24) Dios su norma pa un matrimonio onorabel ta e unimentu di un homber i un muher. Solamente inmoralidad sexual grosero di parti di un of ámbos casá ta percurá base bíblico pa divorcio cu e posibilidad pa bolbe casa.—Mateo 5:32.

² Ta posibel pa dos individuo biba huntu felismente pa un tempu indefinidamente largu? Sí, i Bijbel ta identificá dos factor of clave vital, cu ta yuda haci esaki posibel. Si tantu e esposo como e esposa pone esakinan na práctica, nan lo habri e porta pa felicidad i hopi bendicion. Kico e clavenan aki ta?

 3. Cua tres clase di amor casánan mester cultivá?

³ E promé clave ta amor. Interesantemente, tin diferente clase di amor identificá den Bijbel. Unu ta un cariño caluroso i personal pa un persona, e clase di amor cu ta existí entre amigunan íntimo. (Juan 11:3) Un otro ta e amor cu ta crece entre miembronan di famia. (Romanonan 12:10) Un di tres ta e amor romántico cu un persona por tin pa un miembro di e sexo opuesto. (Proverbionan 5:15-20) Naturalmente, tur esakinan un esposo i esposa mester cultivá. Pero tin un di cuater clase di amor, unu mas importante cu e otronan.

 4. Cua ta un di cuater clase di amor?

⁴ Den e idioma original dje Scritura Griego Cristian, e palabra pa e di cuater clase di amor aki ta a·gaʹpe. E palabra ei ta ser usá na 1 Juan 4:8, caminda nos ta ser bisá: “Dios ta amor.” En berdad, “nos ta stima, pasobra [Dios] a stima nos promé.” (1 Juan 4:19) Un cristian ta cultivá tal amor promé pa Jehova Dios i despues pa próhimo. (Marco 12:29-31) E palabra a·gaʹpe ta ser usá tambe na Efesionan 5:2, cu ta declará: “Sigui cana den amor, mescos cu Cristo tambe a stima boso i a entregá su mes pa boso.” Jesus a bisa cu e clase di amor aki lo identificá su berdadero siguidornan: “Den esaki tur lo sa cu boso ta mi disipelnan, si boso tin amor [a·gaʹpe] entre boso.” (Juan 13:35) Tambe, tuma nota di e uso di a·gaʹpe na 1 Corintionan 13:13: “Ta permanecé fe, speransa, amor, e tresnan aki; pero esun mayor di esakinan ta amor [a·gaʹpe].”

5, 6. (a) Pakico amor ta mayor cu fe i speransa? (b) Cua ta algun motibu pakico amor lo yuda un matrimonio dura?

⁵ Kico ta haci e amor a·gaʹpe aki mayor cu fe i speransa? E ta ser dirigí dor di principio—principionan hustu—hañá den Dios su Palabra. (Salmo 119:105) E ta un interes inegoista pa haci cu otronan loke ta corecto i bon desde e punto di bista di Dios, sea esun cu ta ricibié ta parce di ta merec’é of no. Amor asina ta capacitá partnernan matrimonial pa sigui e conseho bíblico: “Sigui soportá otro i pordoná otro libremente si cualkier un tin un motibu pa keha contra un otro. Mescos cu Jehova a pordoná boso libremente, asina boso tambe haci mescos.” (Colosensenan 3:13) Parehanan casá amoroso tin i ta cultivá “amor [a·gaʹpe] intenso [un] pa otro, pasobra amor ta cubri un multitud di picá.” (1 Pedro 4:8) Ripará cu amor ta cubri fayonan. E no ta eliminá nan, siendo cu ningun hende imperfecto por ta liber di eror.—Salmo 130:3, 4; Santiago 3:2.

⁶ Ora un pareha casá ta cultivá un amor asina pa Dios i un pa otro, nan matrimonio lo dura i lo ta felis, pasobra “amor nunca ta faya.” (1 Corintionan 13:8) Amor ta “un laso perfecto di union.” (Colosensenan 3:14) Si bo ta casá, con abo i bo casá por cultivá e clase di amor aki? Lesa e Palabra di Dios huntu, i papia tocante dje. Studia Jesus su ehempel di amor i trata na imit’é, pa pensa i actua manera dje. Ademas, asistí na reunionnan cristian, unda e Palabra di Dios ta ser siñá. I haci oracion pa haña Dios su yudansa pa desaroyá e clase di amor elevá aki, locual ta un fruta di Dios su spiritu santu.—Proverbionan 3:5, 6; Juan 17:3; Galationan 5:22; Hebreonan 10:24, 25.

 7. Kico ta respet, i ken mester mustra respet den matrimonio?

⁷ Si dos hende casá realmente ta stima otro, anto nan lo tin tambe respet un pa otro, i respet ta e di dos clave pa un matrimonio felis. Respet ta ser definí como “mustra consideracion na otronan, onrando nan.” E Palabra di Dios ta consehá tur cristian, incluyendo esposo i esposanan: “Hiba delantera den mustra onor un na otro.” (Romanonan 12:10) Apostel Pedro a skirbi: “Boso, esposonan, sigui biba di igual manera cu [boso esposanan] segun conocimentu, asignando na nan onor manera na un wea mas swak, esun femenino.” (1 Pedro 3:7) E esposa ta ser consehá pa “tene respet profundo pa su esposo.” (Efesionan 5:33) Si bo kier onra un hende, bo ta cariñoso cu e persona ei, ta respetá e persona ei su dignidad i punto di bista expresá, i ta cla pa cumpli cu cualkier peticion razonabel hací na bo.

8-10. Cua ta algun manera cu respet lo yuda haci un union matrimonial stabil i felis?

⁸ Esnan cu ta deseá di disfrutá di un matrimonio felis ta mustra respet pa nan casá dor di ‘no vigilá cu interes personal [nan] mes asuntunan so, sino tambe cu interes personal den asuntu di [nan casánan].’ (Filipensenan 2:4) Nan no ta considerá loke ta bon solamente pa nan mes—locual lo ta egoista. En bes di esei, nan ta considerá loke ta mihó tambe pa nan casá. En berdad, nan ta duna e interes di nan casá e prioridad.

⁹ Respet lo yuda casánan reconocé diferencianan den punto di bista. No ta razonabel pa spera pa dos persona tin puntonan di bista idéntico riba tur cos. Loke por ta importante pa un esposo kisas no ta asina importante pa un esposa, i loke un esposa ta gusta kisas no ta loke un esposo ta gusta. Pero cada un mester respetá e punto di bista i escohonan dje otro, tanten cu esakinan ta den e límitenan dje leynan i principionan di Jehova. (1 Pedro 2:16; compará cu Filemon 14.) Ademas, cada un mester respetá e dignidad dje otro dor di no haci esun ei e obheto di comentarionan of chistenan humiyante, sea den público of den privá.

¹⁰ Sí, amor pa Dios i pa otro i respet mutuo ta dos yabi vital pa un matrimonio exitoso. Con nan por ser aplicá den algun dje áreanan mas importante di bida casá?

11. Segun e Scritura, ken ta e cabes den un matrimonio?

¹¹ Bijbel ta bisa nos cu e homber a ser creá cu atributonan cu lo a hacié un cabes di famia exitoso. Como tal, e homber lo ta responsabel dilanti Jehova p’e bienestar spiritual i físico di su esposa i yunan. Lo e mester tuma decisionnan balansá cu ta reflehá e boluntad di Jehova i ser un bon ehempel di conducta piadoso. “Laga esposanan keda sumiso na nan esposonan mescos cu na Señor, pasobra un esposo ta cabes di su esposa mescos cu Cristo tambe ta cabes dje congregacion.” (Efesionan 5:22, 23) Sin embargo, Bijbel ta bisa cu e esposo tambe tin un cabes, Unu cu autoridad riba dje. Apostel Pablo a skirbi: “Mi kier pa boso sa cu e cabes di tur homber ta Cristo; en buelta e cabes di un muher ta e homber; en buelta e cabes di Cristo ta Dios.” (1 Corintionan 11:3) E esposo sabí ta siña con pa ehercé hefatura dor di imitá su mes cabes, Cristo Jesus.

12. Ki ehempel excelente Jesus a pone tantu den mustra sumision como den ehercé hefatura?

¹² Jesus tambe tin un cabes, Jehova, i e ta debidamente sometí na Dje. Jesus a bisa: “Mi ta busca no mi mes boluntad, sino e boluntad di esun cu a mandá mi.” (Juan 5:30) Ki un ehempel excelente! Jesus ta “e primogénito di tur creacion.” (Colosensenan 1:15) El a bira e Mesías. E lo bai tabata e Cabes dje congregacion di cristiannan ungí i e Rey scogí dje Reino di Dios, mas haltu cu tur e angelnan. (Filipensenan 2:9-11; Hebreonan 1:4) Apesar di un posicion asina haltu i prospectonan asina elevá, e homber Jesus no tabata severo, inflexibel of demasiado exigente. E no tabata un tirano, constantemente recordando su disipelnan cu nan mester a obedec’é. Jesus tabata amoroso i compasivo, specialmente pa cu esnan oprimí. El a bisa: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma. Pasobra mi yugo ta suave i mi carga ta lihé.” (Mateo 11:28-30) Tabata un placer pa ta den su compania.

13, 14. Con un esposo amoroso lo ehercé su hefatura, den imitacion di Jesus?

¹³ E esposo cu ta deseá un bida di famia felis ta haci bon di considerá Jesus su cualidadnan excelente. Un bon esposo no ta severo i dictatorial, usando su hefatura incorectamente manera un klop pa intimidá su esposa. Mas bien, e ta stim’é i ta onr’é. Si Jesus tabata “humilde di curason,” e esposo tin asta mas motibu pa ta asina pasobra, distinto di Jesus, e ta cometé fayonan. Ora e cometé un fayo, e kier e comprension di su esposa. P’esei, e esposo humilde ta admití su fayonan, aunke e palabranan, “Dispensá mi; bo tabatin razon,” kisas ta difícil pa bisa. Un esposa lo hañ’é hopi mas fácil pa respetá e hefatura di un esposo modesto i humilde cu esun di unu orguyoso i cabesura. En buelta, e esposa respetuoso tambe ta pidi disculpa ora e ta robes.

¹⁴ Dios a crea e muher cu atributonan excelente cu e por usa pa contribuí na un matrimonio felis. Un esposo sabí lo reconocé esaki i lo no sofok’é. Hopi hende muher ta incliná di tin mayor compasion i sensitividad, cualidadnan cu ta necesario pa percurá pa un famia i den promové relacionnan humano. Generalmente, e muher ta basta experto den haci cas un lugá placentero pa biba aden. E “esposa capas” describí na Proverbionan capítulo 31 tabatin hopi cualidad maraviyoso i talento excelente, i su famia a beneficiá plenamente di nan. Pakico? Pasobra e curason di su esposo “a pone confiansa” den dje.—Proverbionan 31:10, 11.

15. Con un esposo por mustra amor i respet manera di Cristo pa su esposa?

¹⁵ Den algun cultura, e autoridad di un esposo ta ser enfatisá di mas, di manera cu asta pa hacié un pregunta ta ser considerá un falta di respet. E por ta trata su esposa casi manera un catibu. Un manera robes asina di ehercé hefatura ta resultá den un mal relacion no solamente cu su esposa sino tambe cu Dios. (Compará cu 1 Juan 4:20, 21.) Di otro un banda, algun esposo ta negligente den hiba delantera, lagando nan esposa dirigí e famia. E esposo cu ta debidamente sometí na Cristo no ta probechá di su esposa of hort’é di su dignidad. En bes di esei, e ta imitá e amor di sacrificio propio di Jesus i ta haci manera Pablo a consehá: “Esposonan, sigui stima boso esposanan, mescos cu Cristo tambe a stima e congregacion i a entregá su mes p’e.” (Efesionan 5:25) Cristo Jesus a stima su siguidornan asina tantu cu el a muri pa nan. Un bon esposo lo trata na imitá e actitud inegoista ei, buscando e bienestar di su esposa, mas bien cu ser exigente riba dje. Ora un esposo ta sometí na Cristo i ta desplegá amor i respet manera di Cristo, su esposa lo ser motivá pa someté su mes na dje.—Efesionan 5:28, 29, 33.

16. Cua cualidadnan un esposa mester desplegá den su relacion cu su esposo?

¹⁶ Algun tempu despues cu Adam a ser creá, “Jehova Dios a pasa na bisa: ‘No ta bon p’e homber sigui su so. Mi ta bai traha un yudante p’e, como un complemento di dje.’” (Génesis 2:18) Dios a crea Eva como “un complemento,” no como un competidor. Matrimonio no mester tabata manera un barcu cu dos capitan compitiendo cu otro. E esposo mester a ehercé hefatura amoroso, i e esposa mester a manifestá amor, respet i sumision boluntario.

17, 18. Cua ta algun manera cu un esposa por ta un berdadero yudante pa su esposo?

¹⁷ Sin embargo, un bon esposa ta mas cu solamente sumiso. E ta purba di ta un berdadero yudante, dunando apoyo na su esposo den e decisionnan cu e ta tuma. Naturalmente, esei ta mas fácil p’e ora e ta di acuerdo cu decisionnan di su esposo. Pero asta ora e no ta di acuerdo, su apoyo cooperativo por yuda e decision di su esposo tin un resultado mas exitoso.

¹⁸ Un esposa por yuda su esposo pa ta un bon cabes den otro maneranan. E esposa por expresá aprecio pa su esfuersonan den hiba delantera, en bes di critik’é of lagu’é sinti cu e nunca por satisfac’é. Tratando cu su esposo den un manera positivo, e mester corda cu un “spiritu ketu i suave . . . ta di gran balor den bista di Dios,” no djis den bista di su esposo. (1 Pedro 3:3, 4; Colosensenan 3:12) Kico si e esposo no ta un creyente? Sea e ta of no, e Scritura ta animá esposanan “pa stima nan esposo, pa stima nan yunan, pa ta di sano huicio, decente, trahadornan na cas, bon, sometiendo nan mes na nan propio esposo, p’e palabra di Dios no ser zundrá.” (Tito 2:4, 5) Si asuntunan di concenshi presentá, ta mas fácil pa un esposo no-creyente respetá e posicion di su esposa si e presentá e asuntu cu un “genio suave i respet profundo.” Algun esposo no-creyente a ser “ganá sin un palabra mediante conducta di nan esposa, debí cu nan tabata testigo ocular di [nan] conducta decente huntu cu respet profundo.”—1 Pedro 3:1, 2, 15; 1 Corintionan 7:13-16.

19. Kico si un esposo pidi su esposa pa kibra e ley di Dios?

¹⁹ Kico si un esposo ta pidi su esposa pa haci algu cu Dios ta prohibí? Si esei sosodé, e esposa mester corda cu Dios ta su Gobernante supremo. E ta tuma como un ehempel loke e apostelnan a haci ora cu autoridadnan a pidi nan pa violá e ley di Dios. Echonan 5:29 ta relatá: “Pedro i e otro apostelnan a bisa: ‘Nos mester obedecé Dios como gobernante mas bien cu hende.’”

20. Cua ta un área vital den cua amor i respet ta esencial?

²⁰ Amor i respet ta esencial den un otro área di matrimonio—comunicacion. E esposo amoroso lo combersá cu su esposa tocante e esposa su actividadnan, su problemanan, su punto di bista riba vários asuntu. E esposa tin mester di esaki. Un esposo cu ta tuma e tempu pa papia cu su esposa i realmente ta scucha na loke e ta bisa ta demostrá su amor i respet p’e. (Santiago 1:19) Algun esposa ta keha cu nan esposo ta dedicá masha tiki tempu combersando cu nan. Esei ta tristu. Ta cierto cu, den e tempunan druk aki, esposonan kisas ta traha hopi ora pafó di cas, i circunstancianan económico por pone cu algun esposa ta traha trabou seglar tambe. Pero un pareha casá mester reservá tempu un pa otro. Sino, nan por bira independiente di otro. E por hiba na problemanan serio si nan sinti nan mes obligá di busca compañerismo comprensivo pafó dje areglo di matrimonio.

21. Con un manera di papia adecuá por yuda mantené un matrimonio felis?

²¹ E manera cu esposa i esposonan ta comunicá ta importante. “Dichonan agradabel ta . . . dushi p’e alma i un curacion p’e wesunan.” (Proverbionan 16:24) Sea e casá ta un creyente of no, e conseho dje Bijbel ta aplicá: “Laga boso expresion semper ser cu gracia, sazoná cu salu,” esta, di bon gusto. (Colosensenan 4:6) Ora un persona tabatin un dia difícil, un par di palabra bondadoso i comprensivo di su casá por logra hopi. “Manera apelnan di oro den obra grabá di plata ta un palabra papiá n’e tempu apropiado p’e.” (Proverbionan 25:11) E tono di bos i e palabranan scogí ta masha importante. Por ehempel, den un manera iritá i exigente, esun por bisa e otro: “Cera e porta ei!” Pero cuantu mas “sazoná cu salu” ta e palabranan, bisá cu un bos calmu i comprensivo, “Bo por cera e porta, por fabor?”

22. Ki actitudnan parehanan tin mester pa por mantené bon comunicacion?

²² Bon comunicacion ta florecé ora tin palabranan papiá cu suavedad, mirada i gestonan encantador, bondad, comprension i ternura. Trahando duru pa mantené bon comunicacion, tantu esposo como esposa lo sinti nan liber pa haci nan necesidadnan conocí, i nan por ta fuentenan di consuelo i yudansa un pa otro den tempunan di desilusion of tension. “Papia di un manera consolador cu e almanan deprimí,” e Palabra di Dios ta urgi. (1 Tesalonicensenan 5:14) Lo tin tempunan ora e esposo i tempunan ora e esposa ta desanimá. Nan por “papia di un manera consolador” edificando un e otro.—Romanonan 15:2.

23, 24. Con amor i respet lo yuda ora tin desacuerdonan? Duna un ehempel.

²³ Partnernan matrimonial cu ta manifestá amor i respet lo no mira tur desacuerdo como un problema grandi. Nan lo traha duru pa no ser “amargamente rabiá” un cu otro. (Colosensenan 3:19) Ambos mester corda cu “un contesta, ora e ta suave, ta apartá rabia.” (Proverbionan 15:1) Tene cuidou pa no humiyá of condená un casá cu ta expresá sintimentunan di curason. En bes di esei, mira expresionnan asina como un oportunidad pa gana comprendimentu penetrante den e otro su punto di bista. Huntu, trata na resolvé diferencianan i yega na un conclusion armonioso.

²⁴ Corda e ocasion ora Sara a recomendá na su esposo, Abraham, un solucion pa un cierto problema i esei no a corespondé cu Abraham su sintimentunan. Tog, Dios a bisa Abraham: “Scucha na su bos.” (Génesis 21:9-12) Abraham a haci esei, i el a ser bendicioná. Mescos, si un esposa sugerí algu diferente for di loke su esposo tin na mente, e mester por lo ménos scucha. N’e mésun tempu, un esposa no mester dominá e combersacion sino mester scucha na loke su esposo tin di bisa. (Proverbionan 25:24) Pa sea e esposo of e esposa insistí pa cos bai na nan manera tur momento ta un falta di amor i respet.

25. Con bon comunicacion lo contribuí na felicidad den e aspectonan íntimo di bida casá?

²⁵ Bon comunicacion ta importante tambe den e relacion sexual di un pareha. Egoismo i un falta di dominio propio por daña seriamente e relacion di mas íntimo aki den matrimonio. Comunicacion habrí, huntu cu pacenshi, ta esencial. Ora cada un ta busca sin egoismo e bienestar di e otro, relacion sexual rara bes ta un problema serio. Den esaki mescos cu den otro asuntunan, “laga cada un sigui busca, no su propio bentaha, sino esun dje otro persona.”—1 Corintionan 7:3-5; 10:24.

26. Aunke tur matrimonio lo tin nan bon i mal experencianan, con scuchando n’e Palabra di Dios lo yuda parehanan casá haña felicidad?

²⁶ Ki excelente conseho e Palabra di Dios ta ofrecé! Ta cierto cu, tur matrimonio lo tin nan bon i mal experencianan. Pero ora casánan ta someté nan mes na Jehova su pensamentu, manera el a ser revelá den Bijbel, i funda nan relacion riba amor basá riba principio i respet, nan por tin confiansa cu nan matrimonio lo ta duradero i felis. Asina nan lo onra no solamente un e otro sino tambe e Originador di matrimonio, Jehova Dios.