TUR siman tin un diskurso públiko basá riba un tema bíbliko den mayoria kongregashon di Testigunan di Yehova. Si bo ta un ansiano òf sirbidó ministerial, bo diskursonan ta duna evidensia ku bo ta un oradó efektivo, un maestro? Si ta asina, lo bo por haña e invitashon pa duna un diskurso públiko. E Skol di Ministerio Teokrátiko a kapasitá míles i míles di ruman hòmber pa e privilegio di sirbishi aki. Na unda bo tin ku kuminsá si bo haña asignashon pa duna un diskurso públiko?

Promé ku bo kuminsá hasi investigashon, lesa e boskeho i meditá riba dje te ora bo kapta su sentido. Sòru pa e tema—ku ta e título di e diskurso—ta den bo mente. Kiko ta loke bo mester siña bo ouditorio? Kiko ta bo meta?

Familiarisá bo ku e suptemanan prinsipal (ku ta e puntonan prinsipal) i analisá nan. Ki relashon kada un tin ku e tema? Bou di kada punto prinsipal, tin vários idea sekundario. I bou di e ideanan sekundario ta sigui e puntonan ku ta apoyá nan. Purba saka afó kon kada sekshon di e boskeho ta apoyá esun anterior, kon e ta hiba na e siguiente sekshon i kon e ta kontribuí na e meta di e diskurso. Unabes bo komprondé e tema i e meta di e diskurso i kon e puntonan prinsipal ta yuda bo logra esei, bo ta kla pa kuminsá desaroyá e ideanan di e informashon.

Podisé na prinsipio lo bo nota ku ta kumbiní bo hasi komo si fuera e diskurso ta konsistí di kuater òf sinku parti kòrtiku, kada un ku un punto prinsipal. Prepará esakinan un pa un.

E boskeho ku bo ta haña ta solamente un medio pa yuda bo prepará e diskurso. E idea no ta pa e sirbi komo e skema final for di kua bo ta duna bo diskurso. E ta manera un skelèt. Na moda di papia, bo tin ku pone karni na dje, dun’é un kurason i hinka bida den dje.

Hesukristu i su disipelnan a basa nan siñansa riba e Skritura. (Luk. 4:16-21; 24:27; Echo. 17:2, 3) Abo por hasi meskos. E Palabra di Dios mester ta e base di bo diskurso. En bes di djis splika e deklarashonnan ku tin den e boskeho i mustra kon nan ta apliká, determiná kon e Skritura ta apoyá e deklarashonnan ei, anto basa bo siñansa riba e Skritura.

Segun bo ta prepará bo diskurso, eksaminá kada versíkulo menshoná den e boskeho i wak kiko su konteksto ta bisa. Tin tekstonan bíbliko ku kisas simplemente ta duna bo informashon general ku ta útil, i bo no tin nodi lesa òf komentá riba nan tur durante bo presentashon. Skohe mas bien esnan ku ta mas adekuá pa bo ouditorio. Si bo konsentrá riba e tekstonan bíbliko menshoná den e boskeho imprimí, lo bo no tin nodi usa tekstonan adishonal.

No ta e kantidat di teksto bíbliko ku bo usa ta determiná kon bon bo diskurso ta, sino e kalidat di e instrukshon. Ora bo ta introdusí tekstonan bíbliko, bisa dikon bo ta usa nan. Tuma tempu pa mustra kon nan ta apliká. Despues ku bo lesa un teksto bíbliko, tene bo Beibel habrí miéntras ku bo ta splika e teksto. Probablemente bo ouditorio tambe lo hasi meskos. Kon bo por lanta e interes di bo ouditorio i yuda nan saka mas tantu probecho di e Palabra di Dios? (Neh. 8:8, 12) Bo por hasi esei dor di splika e tekstonan bíbliko, ilustrá nan i mustra kon nan ta apliká.

Splikashon. Ora bo ta prepará pa splika un teksto bíbliko klave, puntra bo mes: ‘Kiko e kier men? Dikon mi ta us’é den mi diskurso? Kiko e hendenan den ouditorio lo por puntra nan mes tokante e versíkulo aki?’ Talbes bo tin ku analisá e konteksto, e background históriko, e marko di sirkunstansia, e intensidat di e palabranan i e intenshon di e eskritor inspirá. Esaki ta eksigí investigashon i lo bo haña hopi informashon balioso den e publikashonnan di “e esklabo fiel i prudente.” (Mat. 24:45-47) No purba splika tur kos tokante e versíkulo, mas bien splika dikon bo a laga bo ouditorio les’é i ki konekshon e tin ku e punto ku bo ta tratando.

Ilustrashon. E propósito di usa ilustrashon òf komparashon ta pa yuda bo ouditorio komprondé e asuntu mas mihó òf pa yuda nan kòrda un punto òf un prinsipio ku bo a konsiderá. Un ilustrashon ta yuda hende konektá loke bo ta bisa nan ku algu ku nan sa kaba. Esaki ta loke Hesus a hasi ora el a duna su famoso Sermon Riba Seru. “Paranan di shelu,” “lelinan di sabana,” un “porta smal,” un “kas riba baranka” i hopi di e tipo di ekspreshonnan ei a duna mas énfasis na su forma di siña, i a hasié kla i inolvidabel.—Mat., kap. 5–7.

Aplikashon. Splikashon i ilustrashon di teksto bíbliko ta duna konosementu, pero ta aplikashon di e konosementu ei ta produsí resultado. I ta bèrdat ku ta bo oyentenan tin e responsabilidat pa aktua riba e mensahe di Beibel, pero abo por yuda nan komprondé loke nan mester hasi. Unabes bo tin sigur ku bo ouditorio ta komprondé e versíkulo ku bo ta tratando i ta mira su relashon ku e punto presentá, tuma tempu pa mustra nan ki impakto e tin riba asuntunan di doktrina i kondukta. Resaltá e benefisionan di bandoná ideanan robes òf kondukta ku no ta kuadra ku e bèrdat ku bo ta konsiderando.

Ora bo ta pensa riba kon pa apliká e tekstonan bíbliko, kòrda ku e hendenan ku ta forma bo ouditorio ta bini di vários antesedente i sirkunstansia. Por tin hende ku ta resien interesá, personanan hóben òf di edat, i hende ku podisé ta luchando ku tur sorto di problema personal. Sòru pa bo diskurso ta práktiko i realista. Evitá di duna konseho ku ta zona komo si fuera bo ta pensando riba solamente un par di hende presente.

Tin algun aspekto di bo diskurso ku ya ta disidí kaba. Por ehèmpel, e boskeho ta indiká bon kla kua ta e puntonan prinsipal, i tambe e kantidat di tempu ku bo mester dediká na kada un. Tin otro desishonnan sí ku ta abo tin ku tuma. Bo por skohe pa dediká mas tempu (òf ménos) na sierto puntonan sekundario. No pensa ku bo tin ku bai den detaye riba delaster un punto sekundario. Esei lo por pone bo pasa asina lihé dor di e informashon ku bo ta yena bo ouditorio ku muchu kos. Kon bo por determiná riba kua punto bo tin ku bai den detaye i kua bo tin ku menshoná brevemente òf aribariba? Puntra bo mes: ‘Kua ta e puntonan ku lo yuda mi transmití e idea sentral di e diskurso? Kua di nan probablemente lo benefisiá e ouditorio mas tantu? Si mi laga un sierto teksto bíbliko i un punto relashoná kuné afó, esei lo debilitá e argumentunan presentá?’

Tene masha kuidou pa bo no hinka spekulashon òf opinionnan personal den e diskurso. Ni sikiera Hesukristu, e Yu di Dios, no ‘a papia di su mes’ inisiativa. (Huan 14:10) Kòrda ku e motibu pakiko hende ta bini na e reunionnan di Testigunan di Yehova ta pa tende nan papia di Beibel. Si hende ta konsiderá bo un bon oradó, probablemente ta pasobra bo no ta hala atenshon na bo mes, sino na e Palabra di Dios. Ta pa e motibu aki nan ta apresiá bo diskursonan.—Fil. 1:10, 11.

Despues di a kombertí un simpel boskeho den un splikashon amplio di e Skritura, a yega ora pa bo train bo diskurso. Lo ta bon si bo hasié na bos haltu. Pero e kos importante ta pa hasi sigur ku bo tin tur e puntonan bon grabá den bo mente. Bo mester por papia ku pleno konvikshon, i tambe hinka bida den e informashon i duna un presentashon entusiasmá di e bèrdat. Promé ku bo presentá bo diskurso, puntra bo mes: ‘Kiko mi kier logra?’ Puntra tambe: ‘E puntonan prinsipal ta resaltá? Mi a logra hasi e Skritura e base di mi diskurso? Kada punto prinsipal ta hiba den un forma natural na e siguiente punto? E diskurso ta krea apresio pa Yehova i pa loke el a duna nos? E konklushon ta direktamente konektá ku e tema? E ta mustra e ouditorio kiko pa hasi i ta motivá nan pa hasié?’ Si bo por kontestá e preguntanan aki ku sí, anto bo ta den posishon pa “usa konosementu korektamente” pa e benefisio di e kongregashon i pa e alabansa di Yehova!—Pro. 15:2.

KIKO ta bo meta komo maestro? Si ta resientemente bo a bira un publikadó di Reino, sin duda bo ta deseá di siña kondusí studio di Beibel, ya ku Hesus a duna su siguidónan e asignashon pa hasi disipel. (Mat. 28:19, 20) Si bo tin eksperensia kaba den e aktividat aki, kisas bo meta ta pa bira mas efikas den yega na kurason di e personanan ku bo ta purba yuda. Si bo ta un mayor, sigur bo kier ta e tipo di maestro ku por motivá bo yunan pa dediká nan bida na Dios. (3 Huan 4) Si bo ta ansiano òf bo ta hasiendo esfuerso pa bira ansiano, probablemente bo kier ta un oradó ku por krea un apresio mas profundo pa Yehova i pa su kamindanan den bo ouditorio. Kon bo por alkansá e metanan aki?

Siña for di e Gran Maestro, Hesukristu. (Luk. 6:40) Sea ku Hesus tabata papia ku un multitut na barika di seru òf ku djis un par di hende ku tabata kana kuné, loke el a papia i e manera ku el a papia tabata kousa un impreshon duradero. Hesus a stimulá e mente i kurason di su ouditorio, i den un forma práktiko ku nan por a komprondé el a mustra kon pa apliká asuntunan. Abo por logra e mesun kos?

Hesus a perfekshoná su abilidat di siña dor di e relashon íntimo ku e tabatin ku su Tata selestial i debí na e bendishon di Dios su spiritu. Abo ta pidi Yehova sinseramente pa e yuda bo bira kapas pa kondusí studio di Beibel? Si bo ta un mayor, bo ta pidi Dios regularmente pa e guia bo ora bo ta siña bo yunan? Bo ta resa di kurason ora bo ta prepará pa duna diskurso òf pa kondusí reunion? E konfiansa aki den Yehova ku bo ta ekspresá via di orashon, lo yuda bo bira un mihó maestro.

Nos ta mustra tambe ku nos ta dependé riba Yehova dor di konfia den su Palabra, Beibel. E último anochi di su bida komo hende perfekto, Hesus a resa na su Tata: “Mi a duna nan bo palabra.” (Huan 17:14) Ounke Hesus tabatin masha hopi eksperensia, nunka e no a papia di su mes outoridat. Semper el a papia loke su Tata a siñ’é, i asina el a pone un ehèmpel pa nos. (Huan 12:49, 50) E palabra di Dios, konserbá den Beibel, tin e poder pa influensiá hende: nan akshonnan, pensamentunan di mas íntimo i sintimentunan. (Heb. 4:12) Segun ku bo ta haña mas konosementu di e Palabra di Dios i bo ta siña us’é bon den bo sirbishi di vèlt, lo bo desaroyá e kualidatnan di siña ku ta atraé hende na Dios.—2 Tim. 3:16, 17.

Djis duna diskurso interesante no ta hasi bo un maestro ku ta imitá Kristu. Ta bèrdat ku hende a keda asombrá di e “palabranan agradabel” ku Hesus tabata papia. (Luk. 4:22) Pero ku ki propósito Hesus a papia bon asina? No pa hala atenshon na su mes, sino pa onra Yehova. (Huan 7:16-18) I el a animá su siguidónan: “Laga boso lus bria dilanti di hende di tal manera ku nan por mira boso bon obranan i glorifiká boso Tata ku ta den shelu.” (Mat. 5:16) E konseho aki mester influensiá e manera ku nos ta siña hende. Nos mester evitá tur loke por desviá nos for di e meta ei. Pues, ora nos ta pensa riba kiko nos lo bisa òf kon nos lo bis’é, ta bon pa puntra nos mes: ‘Esaki lo krea apresio pa Yehova, òf lo e hala atenshon na ami?’

Por ehèmpel, ilustrashonnan i ehèmpelnan di bida real por ta efikas ora di siña hende. Sin embargo, si nos bini ku un ilustrashon largu òf konta un eksperensia ku demasiado detaye, e punto ku nos kier destaká por bai pèrdí. Di igual manera, historianan ku nos konta djis pa entretené, ta kita atenshon for di e propósito di nos sirbishi di vèlt. Den tal kaso, e maestro ta hala atenshon na su mes en bes di kumpli ku e berdadero meta di edukashon teokrátiko.

Pa un persona por bira un berdadero disipel, e tin ku komprondé bon kla kiko bo ta siñ’é. E mester tende e bèrdat i mira kon e ta diferensiá for di otro kreensianan. P’esei ta bon pa indiká kiko ta e kontrastenan.

Bes tras bes Yehova a hasi un yamada riba su pueblo pa “hasi un distinshon” entre loke ta limpi i loke ta impuru. (Lev. 10:9-11) Yehova a bisa ku esnan ku lo sirbi den su gran tèmpel spiritual lo siña hende “e diferensia entre loke ta santu i loke ta profano.” (Eze. 44:23) E buki di Proverbionan hopi bes ta presentá e kontraste entre hustisia i maldat, entre sabiduria i bobedat. Asta kosnan ku no ta kontrali di otro por ser distinguí for di otro. Apòstel Pablo a hasi un distinshon entre un hende hustu i un bon hende na Romanonan 5:7. Den e buki di Hebreonan, el a mustra e superioridat di Kristu su sirbishi komo sumo saserdote, na komparashon ku esun di Aròn. Ta manera e edukadó di siglo 17 Johann Amos Comenius a skirbi: “Siña otro hende ta nifiká simplemente mustra nan kon kosnan ta distinto for di otro pa loke ta propósito, forma i orígen. . . . P’esei esun ku por duna bon splikashon di e diferensia ku tin entre kosnan, ta un bon maestro.”

Por ehèmpel, suponé ku bo ta siña un hende tokante e Reino di Dios. Si e no ta komprondé kiko e Reino ta, lo bo por mustr’é kon loke Beibel ta bisa ta diferente for di e idea ku e Reino ta simplemente un kondishon den kurason di un persona. Òf lo bo por mustr’é kon e Reino ta distinto for di gobièrnunan humano. Sin embargo, si e hende sa e bèrdatnan básiko aki kaba, lo bo por bai den mas detaye i splik’é kon e Reino Mesiániko ta diferensiá for di e reino universal di Yehova deskribí na Salmo 103:19, òf for di “e reino di [Dios] su Yu stimá” menshoná na Kolosensenan 1:13, òf for di ‘e preparashon pa reuní tur kos huntu den Kristu’ ku Efesionan 1:10 ta papia di dje. Dor di distinguí un kos for di otro bo por yuda bo ouditorio komprondé e siñansa bíbliko importante aki.

Hopi bes Hesus a hasi uso di e método di siña aki. El a mustra e kontraste entre e komprondementu popular di e Lei di Moises i e berdadero sentido di e Lei. (Mat. 5:21-48) El a mustra e diferensia entre berdadero deboshon na Dios i e hipokresia di e fariseonan. (Mat. 6:1-18) El a mustra e kontraste entre e aktitut di esnan ku “tin dominio” riba otronan i e spiritu di sakrifisio propio ku su siguidónan mester a desplegá. (Mat. 20:25-28) Na un otro okashon, ku ta pará skirbí na Mateo 21:28-32, Hesus a invitá su oyentenan pa nan mes determiná e kontraste entre un hende ku tabata hustu den su propio bista i berdadero arepentimentu. Esei ta hiba nos na un otro faseta balioso di bon manera di siña hende.

Na Mateo 21:28, nos ta lesa ku Hesus a introdusí su komparashon ku e pregunta: “Kiko boso ta pensa?” Un maestro kompetente no ta simplemente relatá echonan òf duna kontesta, sino mas bien e ta stimulá su oyentenan pa kultivá e kapasidat di pensa. (Pro. 3:21, NW; Rom. 12:1, NW) Un maestro ta logra esaki entre otro dor di hasi pregunta. Manera nos ta lesa na Mateo 17:25, Hesus a puntra: “Kiko bo ta pensa, Simon? Ken e reinan di tera ta kobra tributo òf belasting: nan yu hòmbernan òf stranheronan?” Hesus su preguntanan a pone Pedro pensa seriamente i yega na e konklushon korekto tokante pagamentu di e belasting di tèmpel. Asina tambe ora un hòmber a puntra: “Ta ken ta mi próhimo?,” Hesus a kontest’é dor di kompará e manera di aktua di un saserdote i un levita ku esun di un samaritano. Kaba Hesus a puntra e hòmber: “Kual di e tresnan aki bo ta kere tabata próhimo di e hòmber ku a kai den man di ladron?” (Luk. 10:29-36) Aki atrobe Hesus, en bes di pensa pa un persona ku a puntr’é algu, ta animá e persona p’e kontestá su propio pregunta.—Luk. 7:41-43.

Maestronan ku ta kapta e sentido di e Palabra di Dios ta realisá ku adorashon berdadero no ta djis un asuntu di memorisá sierto echo i kumpli ku sierto regla. Adorashon berdadero ta basá riba un bon relashon ku Yehova i apresio pa su kamindanan. Tal adorashon ta enserá e kurason. (Deu. 10:12, 13; Luk. 10:25-27) Den e Skritura, e palabra “kurason” ta referí hopi bes na e persona interior den su totalidat, i ta inkluí kosnan manera deseo, kariño, sintimentu i motivashon.

Hesus tabata sa ku hende ta wak aparensia, miéntras ku Dios ta wak kurason. (1 Sam. 16:7) Loke mester motivá nos pa sirbi Dios ta e amor ku nos ta sinti p’e, no e deseo di impreshoná otro hende. (Mat. 6:5-8) En kambio, e fariseonan a hasi hopi kos pa prònk kuné. Nan a pone hopi énfasis riba kumpli ku detayenan di e Lei i ku reglanan ku nan mes a traha. Pero nan no a desplegá den nan bida e kualidatnan ku lo a indiká ku nan ta ku e Dios ku supuestamente nan a adorá. (Mat. 9:13; Luk. 11:42) Hesus a siña hende ku ta importante wèl pa obedesé e rekisitonan di Dios, pero e balor di e obedensia ei ta dependé di loke tin den nan kurason. (Mat. 15:7-9; Mar. 7:20-23; Huan 3:36) Nos forma di siña lo logra e mihó resultado si nos imitá Hesus su ehèmpel. Ounke ta esensial pa nos siña hende loke Dios ta eksigí di nan, ta importante tambe pa nan siña konosé e personalidat di Yehova i stim’é. Di e manera ei nan kondukta lo reflehá kuantu balor nan ta duna na un bon relashon ku e Dios berdadero.

Ta klaru ku pa hende benefisiá di tal siñansa nan tin ku analisá loke tin den nan propio kurason. Hesus a animá hende pa analisá nan motibunan i nan sintimentunan. Ora e tabata korigí un idea robes, e tabata puntra su oyentenan dikon nan a pensa, bisa òf hasi sierto kosnan. Sin embargo, pa no laga e asuntu te einan, Hesus tabata kompañá su pregunta ku un deklarashon, un ilustrashon òf un akshon ku a animá nan pa mira e asuntu di e manera korekto. (Mar. 2:8; 4:40; 8:17; Luk. 6:41, 46) Nos tambe por sugerí hende ku ta skucha nos, pa puntra nan mes por ehèmpel: ‘Dikon e proseder aki ta atraé mi? Dikon mi ta reakshoná asin’aki riba e situashon?’ Anto despues motivá nan pa wak e asuntu for di e punto di bista di Yehova.

Un bon maestro sa ku “sabiduria ta e kos prinsipal.” (Pro. 4:7, NW) Sabiduria ta e kapasidat di usa konosementu pa resolvé problema, evitá peliger, alkansá meta i yuda otronan. Ta responsabilidat di e maestro pa yuda studiantenan siña hasi esaki, pero no p’e tuma desishon pa nan. Ora bo ta trata vários prinsipio bíbliko, yuda e studiante rasoná. Lo bo por menshoná un situashon di bida diario, anto puntra e studiante kon e prinsipio bíbliko ku boso a kaba di studia lo por yud’é si e hañ’é den e situashon ei.—Heb. 5:14.

Apòstel Pedro a demostrá kiko esaki ta nifiká den su diskurso na Pentekòste di aña 33 di nos era, ora ku el a duna un aplikashon práktiko ku a kambia bida di hende. (Echo. 2:14-36) Despues di a trata tres pasashi bíbliko ku e multitut supuestamente tabata kere, Pedro a mustra kon nan ta apliká en bista di e susesonan ku nan tur tabata testigu di dje. Komo resultado, e multitut a sinti e nesesidat di aktua na armonia ku loke nan a kaba di tende. Bo manera di siña tin un efekto similar riba hende? Bo ta bai mas leu ku djis menshoná algun echo i ta yuda hende komprondé e motibu dikon algu ta asina? Bo ta enkurashá nan pa pensa riba e efekto ku loke nan ta siñando mester tin den nan bida? Kisas nan no ta reakshoná ku e gritu: “Kiko nos mester hasi?,” manera a sosodé na Pentekòste, pero si bo a indiká e manera korekto ku e tekstonan bíbliko ta apliká, nan lo ser motivá pa dal e pasonan apropiá.—Echo. 2:37.

Mayornan, ora boso ta lesa Beibel ku boso yunan, boso tin un ekselente oportunidat pa siña nan e kustumber di buska e manera práktiko pa apliká prinsipionan bíbliko. (Efe. 6:4) Por ehèmpel, lo bo por skohe un par di versíkulo for di e lesamentu di Beibel programá pa e siman, splika kiko nan ta nifiká, i despues hasi preguntanan manera: ‘Ki guia e versíkulonan aki ta duna nos? Kon nos lo por usa nan den sirbishi di vèlt? Kiko nan ta revelá tokante Yehova i su manera di aktua, i kon nan ta yuda nos haña mas apresio p’e?’ Animá bo famia pa komentá riba e puntonan aki ora e ruman ta trata e puntonan sobresaliente di Beibel den e Skol di Ministerio Teokrátiko. E versíkulonan ku nan komentá ariba, probablemente ta esnan ku nan lo keda kòrda.

Bo por siña hende no solamente dor di loke bo ta bisa, sino tambe dor di loke bo ta hasi. Bo akshonnan ta duna un ehèmpel práktiko di e manera pa apliká e kosnan ku bo ta bisa. Ta asina mucha ta siña. Ora nan ta imitá nan mayornan, nan ta mustra ku nan kier ta meskos ku nan mayornan. Nan kier sa kiko nan ta sinti ora nan hasi e kosnan ku nan mayornan ta hasi. Meskos tambe, ora bo studiantenan ‘bira imitadó di bo, meskos ku abo ta di Kristu,’ nan ta kuminsá eksperensiá e bendishonnan di kana den e kaminda di Yehova. (1 Kor. 11:1) Nan mes lo eksperensiá kon Dios ta trata ku nan.

Esaki ta un rekordatorio serio ku mester pone nos reflekshoná riba e importansia di pone un bon ehèmpel. E “sorto di hende [ku nos] ta den un kondukta santu i deboto” lo duna esnan ku nos ta siña un ehèmpel bibu di e manera pa apliká prinsipionan bíbliko. (2 Ped. 3:11) Si bo ta animá un studiante di Beibel pa lesa e Palabra di Dios regularmente, abo mes mester ta diligente den les’é. Si bo kier pa bo yunan biba segun prinsipionan bíbliko, hasi sigur ku tur loke nan mira bo hasi ta na armonia ku e boluntat di Dios. Si bo ta animá e kongregashon pa prediká ku selo, sòru pa abo tin un pleno partisipashon den e trabou ei. Ora bo ta praktiká loke bo ta siña otro, bo ta den mihó posishon pa motivá nan.—Rom. 2:21-23.

Ku e meta di bira mihó maestro, puntra bo mes: ‘Mi manera di siña hende ta influensiá e aktitut, e manera di papia òf aktua di mi oyentenan? Pa hasi un asuntu kla, mi ta mustra kon un idea òf proseder ta diferensiá for di otro ideanan òf proseder? Kiko mi ta hasi pa yuda mi studiantenan, mi yunan òf mi ouditorio keda kòrda loke mi ta bisa? Mi ta mustra mi oyentenan bon kla kon pa pone loke nan ta siña na práktika? Mi ta mustra nan esei ku mi ehèmpel? Nan ta komprondé ku e manera ku nan reakshoná riba e asuntu ku mi ta papia di dje por influensiá nan relashon ku Yehova?’ (Pro. 9:10) Sigui duna atenshon na e preguntanan aki segun ku bo ta hasi esfuerso pa bira un bon maestro. “Paga bon tinu na bo mes i na bo siñansa; perseverá den e kosnan aki; pasobra hasiendo esaki lo bo sigurá salbashon, tantu pa bo mes komo pa esnan ku ta tende bo.”—1 Tim. 4:16.