Ken Dios Ta?

E Dios berdadero ta e Kreador di tur kos. E no tabatin prinsipio ni lo e no tin fin. (Salmo 90:2) E ta e Fuente di e bon notisia ku nos ta haña den Beibel. (1 Timoteo 1:11) Komo ku ta Dios a duna nos bida, ta e so nos mester adorá.—Lesa Revelashon 4:11.

Nunka niun hende no a mira Dios pasobra Dios ta un Spiritu; esei ta nifiká ku e tin un forma di bida superior na hende ku ta biba riba tera. (Huan 1:18; 4:24) No opstante, e kosnan ku Dios a krea ta yuda nos konosé su kualidatnan. Por ehèmpel, e variedat di fruta i flor ku nos ta mira rònt di nos ta siña nos ku e ta un Dios di amor i di sabiduria. Ademas, e inmenso universo ta duna nos un idea kuantu poder e tin.—Lesa Romanonan 1:20.

Nos por siña asta mas tokante Dios su kualidatnan ora nos lesa su Palabra. Por ehèmpel, su Palabra ta bisa nos kiko e ta gusta i kiko e no ta gusta, kon e ta trata hende i kon e ta reakshoná den kada situashon.—Lesa Salmo 103:7-10.

Hesus a bisa: “Nos Tata ku ta den shelu, bo nòmber sea santifiká.” (Mateo 6:9) Aunke Dios tin hopi título, ta un nòmber so e tin. Kada idioma ta pronunsi’é na un manera diferente. Por lo general, na papiamentu hende ta bisa “Yehova.” Algun ta bisa “Yahweh.” Den e Tradukshon di Mundu Nobo, Salmo 83:18 ta bisa: “Pa hende por sa ku abo, kende su nòmber ta Yehova, abo so ta e Haltísimo riba henter tera.”

Den hopi Beibel nan a remplasá e nòmber di Dios ku título manera Señor òf Dios. Pero tempu ku a skirbi Beibel e nòmber di Dios tabata aparesé mas o ménos 7.000 biaha. Ora Hesus a siña hende tokante Dios, el a duna nan di konosé e nòmber ei.—Lesa Huan 17:26.

Wak e vidio Dios Tin Nòmber?

E echo ku tin asina tantu sufrimentu awe ta nifiká ku Dios no ta interesá den nos? Tin hende ta bisa ku Dios ta laga nos sufri pa pone nos na prueba. Pero esei no ta bèrdat.—Lesa Santiago 1:13.

Dios a duna hende boluntat liber; esei ta demostrá ku e ta balorá kada un di nos. Nos no ta apresiá ku nos tin libertat di skohe pa sirbi Dios? (Hosue 24:15) Pero hopi hende ta skohe pa hasi loke ta malu, i esei ta kousa hopi sufrimentu. Tal inhustisia ta duel Yehova.—Lesa Génesis 6:5, 6.

Yehova ta un Dios ku ta interesá den nos. E ke pa nos disfrutá di bida. Pronto lo e kaba ku sufrimentu i tur esnan ku ta kous’é. Mientrastantu, Yehova tin un motibu pakiko e ta laga hende sufri pa un tempu. Den Lès 8 nos lo haña sa kiko e motibu ei ta.—Lesa 2 Pedro 2:9; 3:7, 13.

Yehova ta invitá nos pa hala serka dje, i nos por hasi esei ora nos ta papia kuné den orashon. E ta interesá den kada un di nos. (Salmo 65:2; 145:18) E ta kla pa pordoná. Aunke nos ta faya de bes en kuando, e ta mira e esfuerso ku nos ta hasi pa agrad’é. Apesar ku nos ta imperfekto, nos por tin un bon relashon ku Dios.—Lesa Salmo 103:12-14; Santiago 4:8.

Yehova ta esun ku a duna nos bida; p’esei, nos mester stim’é mas ku tur otro persona. (Marko 12:30) Bo ta demostrá bo amor pa Yehova ora ku bo ta siña mas tokante dje i hasi loke e ta pidi bo; asina bo ta hala mas serka dje.—Lesa 1 Timoteo 2:4; 1 Huan 5:3.