Un Fruta Koló di Oro ku un Pasado Interesante

DI E KORESPONSAL DI SPIÈRTA! NA FIDJI

T ABATA aña 1789. E boto habrí di 7 meter tabata manera un feneta riba laman ganchu, i kargá ku hòmber. Su pasaheronan tabata suak dor di hamber, i nan tabata agotá ya ku nan tabatin vários dia ta saka awa for di e boto i a la bes lucha kontra ola brutu i haltu i kontra bientu fuerte. Ainda nan tabatin ku biaha mas ku 5.000 kilometer riba laman deskonosí, yen di ref di koral traishonero. Kuminda tabata skars. Kada hòmber tabatin mag di kome solamente 30 gram di pan (buskuchi di barku) pa dia huntu ku un tiki awa. Aparentemente e hòmbernan ei tabatin masha tiki chèns di sobrebibí.

Den poko mas ku un siman, nan a pasa den hopi kos: rebelion riba laman, bandoná den un boto sin timon, i un di nan a ser matá den un atake di nativonan. Tambe nan a konfrontá tormentanan feros i apénas a logra skapa di kanoanan ku a persiguí nan for di e islanan konosí e tempu ei komo Islanan Kanibal.

Kiko a atraé e hòmbernan aki na e parti leu i peligroso aki di Oséano Sur Pasífiko? Ki mishi nan asina leu for di nan kas na Inglatera, un pais di hòfi- i hardinnan bon ordená? E opheto di nan búskeda tabata e remarkabel palu di breadfruit òf fruta di pan. (Esaki ta famia di e fruta di pan ku nos konosé na Antia.) Laga nos splika kon e bunita palu aki ku su fruta nutritivo a hunga un papel klave den e relato aki i den otro biahenan heroiko di deskubrimentu ku a tuma lugá hopi mas promé ku esaki.

Kisas bo a identifiká e hòmbernan den boto di e relato ariba komo e sobrebibientenan di e notorio rebelion riba e barku Bounty. E barku di marina britániko aki di 215 tonelada, bou di mando di Kapitan William Bligh, a sali for di Inglatera rumbo pa Tahiti. Na su yegada einan, Bligh a tuma abordo un grupo di “pasahero” hopi remarkabel: kasi 1.000 yu di e palu di fruta di pan. E matanan den pòchi aki tabatin e potensial di kubri e gastu di nan pasashi dor di produsí fruta nutritivo koló di oro unabes nan wòrdu establesí den nan hogar nobo na e kolonianan britániko den Karibe.

Nan a kuminsá ku e proyekto aki a base di e konseho ku Sir Joseph Banks a duna gobièrnu britániko. Gobièrnu tabata buska urgentemente un fuente nobo di kuminda pa e katibunan ku tabata traha den e kunukunan di kaña. Banks, kende e tempu ei tabata traha komo konsehero pa e Hardinnan Botániko di Kew serka di Lònden, Inglatera, a nabegá anteriormente komo spesialista di mata huntu ku Kapitan James Cook riba esaki su promé biahe di eksplorashon di Oséano Pasífiko.a Tantu Banks komo Cook a premirá posibilidatnan prometedor pa e palu di fruta di pan.

Ounke Banks no a kompañá Bligh personalmente, el a prepará un plan kon pa kuida e matanan riba barku durante e biahe largu riba laman, dunando atenshon spesial na nan nesesidat di awa fresku. Algun eskritor ta kere ku ta e atenshon i awa ku nan a duna e matanan na abundansia—a kosto di e tripulante—kisas a pone e tripulashon malkontentu rebelá. Serka di e kosta di Tonga, mainta trempan dia 28 di aprel 1789, Bligh ku 18 hòmber ku a apoy’é, a ser poné den un boto sin timon bou di menasa di spada. E tripulashon rebelde probablemente a hiba di gustu den benta e palunan di fruta di pan den laman pa nan muri.

Sin embargo, Bligh no tabata un hòmber ku ta entregá fásilmente. El a kuminsá ku loke a ser yamá “e biahe di mas famoso den boto habrí den historia di laman.” Den shete siman trabahoso, el a nabegá ku e boto chikí aki mas ku 5.800 kilometer, pasando nortwèst meimei di e islanan konosí awe komo Fidji, a lo largu di kosta ost di New Holland (Oustralia), i bai te na e refugio di e isla di Timor.

Ora el a regresá Inglatera, Bligh a haña dos otro barku bou di su mando, i despues di esei el a bolbe Tahiti pa rekohé palu di fruta di pan. E biaha aki, na aña 1792, sí el a logra transportá un 700 “pasahero” den pòchi pa e islanan di St. Vincent i Jamaica den Karibe. Te ku awe, palunan di fruta di pan ta prosperá einan, produsiendo, na moda di papia, un kosecha di oro bou di nan korona di blachinan bèrdè i abundante.

Ounke Bligh su biahe sigur ta un kuenta heroiko di sobrebibensia i deskubrimentu, e ta simplemente un kapítulo resien den e historia di fruta di pan. Si e palu di fruta di pan por a papia, ken sa ki historianan lo el a konta di míles di aña pasá ora ku el a kompañá nabegantenan di antigwedat riba biahenan grandi di deskubrimentu!

E Palu di Fruta di Pan Su Promé Biahenan

Arkeólogonan ta kere ku vários ola di migrashon a tuma lugá den parti wèst di Pasífiko, i ku esun mas resien a kuminsá rònt di aña 1500 promé ku nos era.b Kuminsando den sùitost Asia, e pueblo lapita a usa embarkashonnan ku a konsistí di dos kanoa grandi pegá na otro pa migra atraves di paisnan konosí awe komo Indonesia, Nueva Guinea, Nueva Caledonia, Vanuatu i Fidji i asta mas leu te den parti sentral di Oséano Pasífiko. E biahenan aki a enserá hazañanan realmente asombroso di orientashon, si tuma na kuenta ku algun di e biahenan entre e islanan a nifiká nabegá sentenáres di kilometer riba laman ganchu.

E pueblo lapita su embarkashonnan di dòbel kanoa por a karga un kantidat grandi di hende huntu ku bestia, kuminda i un variedat di simia, stèk i mata den pòchi. Segun ku e pueblo lapita a plama den henter Pasífiko, nan a deskubrí i pobla e islanan di Melanesia, Polinesia i Mikronesia den nort i Nueva Zelandia den sùit. Nan a plama manera e olanan di laman, i ku tempu nan a yega te na Isla di Pasku i Hawai.c Unda ku nan a bai, nan tabatin huntu ku nan e “pasaheronan” mas sobresaliente, esta, e palu resistente di fruta di pan.

Un Alimento Nutritivo i di Hopi Uso

Awe na Fidji, meskos ku na hopi otro parti di mundu, fruta di pan tin hopi balor komo un alimento nutritivo i barata. Algun variedat di e palu ta resistente i ta produsí hopi fruta, tin bes tres biaha pa aña pa 50 aña largu, asta ora no tin bon kondishon di klima. Ora bo fula e fruta e ta manera pan, i tur su variedatnan tin diferente sabor. Por lo general hende ta bisa ku e ta smak un tiki pan i un tiki batata. Por hereb’é den awa, stom e, pon’é den fòrnu òf has’é, i hopi bes nan ta trah’é komo postre. Por sek’é i mul’é manera hariña di funchi. Anto si kask’é i fermentá e fruta, e ta keda bon pa años.

Por lora e blachinan di e mata rònt di produktonan manera piská òf galiña pa mantené nan awa i sabor ora di kushiná nan. Asta e simia bo por kome i e ta smak nechi. Nan sa rekohé e lechi di e palu i mucha gusta kou e komo bals. Mira kuantu uso e tin! P’esei no ta difísil pa komprondé dikon algun hende di e islanan di Pasífiko ta gusta e palu di fruta di pan.

Ledua, kende ta biba na Fidji, ta konta nos ku ora menshoná fruta di pan esaki ta trese rekuerdonan grato i tambe desagradabel di su infansia. Su famia tabatin sinku palu grandi di fruta di pan. Tabata Ledua su trabou pa bari nan blachinan den kurá, un tarea ku e tabatin rabia riba dje. Di otro banda, hopi bes despues di skol e ku su rumannan tabata piki e frutanan i bende nan mas tantu posibel di kas pa kas. Anto nan mayornan tabata usa e plaka pa kumpra kos ku nan tabatin mester pa bai asambleanan kristian, manera kuminda, karchi di bùs òf sapatu nobo.

Kisas bo ta biba den un di e hopi partinan di mundu ku awor ta anfitrion di e “pasahero” aki ku a biaha leu i ku tin un nòmber impreshonante: Artocarpus altilis. Kisas ántes bo no a konsiderá e kreashon maravioso aki komo un tesoro òf ni sikiera komo un artíkulo di balor òf di beyesa. Sin embargo, hopi hende ku ta biba den Pasífiko ta haña ku ora menshoná fruta di pan, esei ta laga nan kòrda riba hazañanan grandi riba laman i di biahenan di deskubrimentu, tantu di e pueblo lapita komo di Kapitan Bligh.

[Nota]

[Kuadro/Plachi na página 25]

Un Palu Ku Ta Produsí Hopi Regalo

E palu maduro di fruta di pan ta un palu semper bèrdè i espektakular. El a originá den e selvanan di Malasia. Komo miembro di e famia di palu Moraceae, e ta un pariente di palu di figu i di moerbei i jackfruit. Ora e palu madurá, e por alkansá un haltura di 12 meter. Bo por kòrta e yunan ku e ta saka na su rais i planta nan. E palu di fruta di pan ta produsí flornan machu i hembra distinto for di otro i den tròshi separá. Den mondi e flornan aki ta dependé di un raton djanochi chikí ku ta kome fruta, pa polinisá nan i plama nan simia. Despues e flor ta desaroyá bira un fruta grandi rondó òf oval, tamaño di un melon chikí, kaska bèrdè i paden koló hel manera oro.

Tambe e palu di fruta di pan ta produsí blachi masha grandi, lombrante, koló bèrdè skur, ku ta duna dushi sombra kontra e solo tropikal kayente. Su palu ta suave i liviano, i ta ser usá pa traha muebel i kanoa, miéntras ku nan sa usa e kaska paden di e palu pa traha un tipo di tela, konosí rònt Pasífiko komo tapa. E lechi di e palu nan ta usa pa seal kos kontra awa, i den algun lugá nan a yega di us’é pa pega wesu frakturá i asta komo leim pa kohe para.

[Plachi na página 24]

Pintura di Robert Dodd di e rebelion riba e barku “Bounty”

[Rekonosementu]

Libreria Nashonal di Oustralia, Canberra, Australia/Bridgeman Art Library

[Plachinan na página 26]

Por prepará fruta di pan na hopi diferente manera