Capitulo Dies

Ken Por Para Contra e Prins di Prinsnan?

1, 2. Di con e vision cu Daniel a haña den e di tres aña dje reinado di Bélsasar, ta di importancia pa nos?

CINCUENTISHETE aña a pasa desde cu a destruí Jehova su tempel na Jerusalem. Bélsasar i su tata, Nabonido, ta goberná e Imperio Babilónico huntu, e di tres potencia mundial di profecia bíblico.a Dios su profeta Daniel ta den exilio na Babilonia. I durante “e di tres aña dje gobernacion real di rey Bélsasar,” Jehova ta manda un vision pa Daniel, unu cu ta revelá cierto detayenan dje restoracion di adoracion berdadero.—Daniel 8:1.

² E vision profético cu Daniel a mira tabatin un efecto profundo riba dje, i ta di gran interes pa nos cu ta biba den “e tempu di fin.” Angel Gabriel ta bisa Daniel: “Mira, mi ta laga bo sa loke lo sosodé den e parti final dje denunciacion, pasobra e ta pa e tempu señalá di fin.” (Daniel 8:16, 17, 19, 27) P’esei, laga nos considerá cu interes profundo loke Daniel a mira i kico e ta nificá pa nos awe.

UN CHUBAT’I CARNE CU DOS CACHU

3, 4. Ki bestia Daniel a mira pará dilanti e canal di awa, i kico e ta simbolisá?

³ Daniel ta skirbi: “Mi a cuminsá wak den e vision; i a sosodé, miéntras mi tabata wak, cu mi tabata na e kasteel di Susa, cu ta den e distrito hurisdiccional di Elam; anto mi a mira den e vision, i mi a haña mi mes cantu dje canal di awa di Ulai.” (Daniel 8:2) Bijbel no ta bisa si realmente Daniel tabata ei na Susa—capital di Elam, situá un 350 kilometer oost di Babilonia—of cu ta e vision a lagu’e sinti cu e tabata na Susa.

⁴ Daniel ta sigui: “Ora mi a hisa mi wowo, e ora ei mi a wak, i, mira! un chubat’i carné pará dilanti e canal di awa, i e tabatin dos cachu.” (Daniel 8:3a) E identidad dje chubat’i carné no ta keda un misterio pa Daniel. Angel Gabriel ta declará despues: “E chubat’i carné cu bo a mira cu tabata poseé e dos cachunan ta representá e reynan di Media i Persia.” (Daniel 8:20) E medonan a bini dje region di meseta na oost di Asiria, i originalmente e personan a hiba un bida hopi bes nomádico den e region nort di Golfo Pérsico. Sin embargo, segun cu e Imperio di Medo-Persia a crece, su habitantenan a desaroyá un gustu exagerá pa luho.

 5. Con e cachu cu “a lanta despues” a bira mas haltu?

⁵ “E dos cachunan tabata haltu,” Daniel ta informá nos, “pero unu tabata mas haltu cu e otro, i esun mas haltu tabata esun cu a lanta despues.” (Daniel 8:3b) E cachu mas haltu cu a lanta despues ta representá e personan, miéntras cu e otro cachu ta representá e medonan. Na principio, e medonan a dominá. Pero na aña 550 P.E.C., e gobernante di Persia, Ciro, a gana un victoria fácil riba e rey medo Astiages. Ciro a combiná e custumber i leynan dje dos pueblonan, a uni nan reinonan i a expandé nan conkistanan. For di ei padilanti, e imperio a haña un caracter dòbel.

E CHUBAT’I CARNE TA DESPLEGA UN AIRE DI AROGANCIA

6, 7. Den ki sentido “ningun bestia salbahe a keda pará” dilanti e chubat’i carné?

⁶ Siguiendo cu su descripcion dje chubat’i carné, Daniel ta declará: “Mi a mira e chubat’i carné tira cachu den direccion west i pa nort i pa zuid, i ningun bestia salbahe a keda pará su dilanti, i no tabatin ningun persona cu tabata libra otronan for di su man. I el a haci manera e tabata kier, i el a desplegá un aire di arogancia.”—Daniel 8:4.

⁷ Den e vision anterior cu Daniel a ricibí, un bestia salbahe cu a sali for di laman i cu tabata manera un leon cu ala di águila a representá Babilonia. (Daniel 7:4, 17) E bestia simbólico ei no por a keda pará dilanti di “e chubat’i carné” dje vision nobo aki. Babilonia a cai den man di Ciro e Grandi na aña 539 P.E.C. Pa casi 50 aña despues di esei, “ningun bestia salbahe,” of gobiernu político, por a lanta para contra e Imperio di Medo-Persia, e di cuater potencia mundial di profecia bíblico.

8, 9. (a) Con “e chubat’i carné” a “tira cachu den direccion west i pa nort i pa zuid”? (b) Kico e buki di Ester ta bisa relacioná cu e sucesor dje rey perso Dario I?

⁸ E Potencia Mundial di Medo-Persia a bini for di ‘caminda solo ta sali’—esta, di oost—i tabata haci manera e ta haña bon, tirando “cachu den direccion west i pa nort i pa zuid.” (Isaías 46:11) Rey Cambises II, sucesor di Ciro e Grandi, a conkistá Egipto. Su sucesor tabata rey perso Dario I, kende a bai den direccion west, crusa e canal di Bósforo na aña 513 P.E.C. i a invadí e teritorio europeo di Tracia, capital di loke tabata Bizancio (awor Istanbul). Na aña 508 P.E.C., el a dominá Tracia, i el a conkistá Macedonia na aña 496 P.E.C. Pues, pa tempu di Dario, Medo-Persia—e “chubat’i carné”—a conkistá teritorio den tres direccion principal: nort bai te Babilonia i Asiria, west pasa dor di Asia Menor i zuid bai te Egipto.

⁹ Bijbel ta duna prueba dje grandesa dje Imperio di Medo-Persia, pasobra e ta referí na Dario su sucesor, Hérhes I, como “e Asuero cu a goberná como rey for di India te Etiopia, riba shentibintishete distrito hurisdiccional.” (Ester 1:1) Pero e gran imperio aki lo a bai sucumbí na man di un otro, i relacioná cu esaki, e vision di Daniel ta revelá algun detaye fasinante cu lo mester fortalecé nos fe den Dios su palabra profético.

E CHUBAT’I CABRITU TA DAL E CHUBAT’I CARNE ABOU

10. Den Daniel su vision, ki bestia a dal “e chubat’i carné” abou?

¹⁰ Imaginá Daniel su asombro pa loke e ta mira awor. E relato ta bisa: “Ami, di mi parti, a sigui pone atencion i, mira! tabatin un cabritu machu biniendo for di caminda solo ta baha riba superficie di henter e tera, i e no tabata mishi cu tera. I pa loke ta trata e chubat’i cabritu, tabatin un cachu riparabel meimei di su wowonan. I el a sigui bini te yega na e chubat’i carné cu tabatin e dos cachunan, cu mi a mira pará dilanti dje canal di awa i el a core bini den su direccion den su furia poderoso. I mi a wak e bini den contacto estrecho cu e chubat’i carné, i el a cuminsá mustra amargura pa cuné, i el a dal e chubat’i carné abou i a kibra su dos cachunan, i a resultá cu no tabatin poder den e chubat’i carné pa para su dilanti. Di manera cu el a tir’é na tera i a trap’é abou, i a resultá cu e chubat’i carné no tabatin un persona pa libr’é for di su man.” (Daniel 8:5-7) Kico tur esaki ta nificá?

11. (a) Kico angel Gabriel a splica cu e “chubat’i cabritu yen di lana” i su “cachu grandi” ta? (b) Ken e cachu riparabel a representá?

¹¹ Ni Daniel ni nos no tin cu rei kico ta e nificacion dje vision aki. Angel Gabriel ta informá Daniel: “E chubat’i cabritu yen di lana ta representá e rey di Grecia; i pa loke ta e cachu grandi cu tabatin meimei di su wowonan, e ta representá e promé rey.” (Daniel 8:21) Na aña 336 P.E.C. nan a coroná e último rey dje Imperio Perso, Dario III (Codomano). Den e mésun aña ei, Alexander a bira rey di Macedonia. Historia ta mustra cu Alexander e Grandi a resultá di ta e promé “rey di Grecia” cu Bijbel a predicí. Na aña 334 P.E.C., Alexander a move rápidamente cuminsando “for di caminda solo ta baha,” esta, di west. Como si fuera “e no tabata mishi cu tera,” el a conkistá teritorionan i a dal “e chubat’i carné” abou. Dje manera aki Grecia a bira e di cincu potencia mundial di importancia bíblico, i a pone fin n’e dominio di casi dos siglo di Medo-Persia. Ki un cumplimentu extraordinario di profecia divino!

12. Con “e cachu grandi” dje cabritu simbólico a “kibra,” i kico tabata e cuater cachunan cu a subi na su lugá?

¹² Pero e poder di Alexander lo tabata di corto duracion. E vision ta sigui revelá: “I e cabritu machu, di su parti, a desplegá un aire di arogancia te na extremo; pero asina cu el a bira poderoso, a kibra e cachu grandi, anto cuater cachu riparabel a subi na su lugá, den direccion dje cuater bientunan di shelu.” (Daniel 8:8) Gabriel ta splica e profecia, bisando: “Ya cu esei a ser kibrá, di manera cu tabatin cuater cu finalmente a lanta para na su lugá, tin cuater reino di su nacion cu lo lanta para, pero no cu su poder.” (Daniel 8:22) Manera a ser predicí, na top di su carera victorioso, Alexander a “kibra”, esta a muri, na edad di 32 aña so. I cu tempu a parti su gran imperio entre cuater di su generalnan.

UN CACHU CHIKITU MISTERIOSO

13. Kico a sali for di un dje cuater cachunan, i con el a actua?

¹³ E siguiente parti dje vision ta abarcá mas cu 2.200 aña, i su cumplimentu ta extendé te den tempu actual. Daniel ta skirbi: “For di un di [e cuater cachunan] a sali un otro cachu, un chikitu, i el a sigui bira hopi mas grandi den direccion di zuid i den direccion dje salimentu di solo i den direccion di e Decoracion. I el a sigui bira mas grandi te ora el a yega te n’e ehército di shelu, di manera cu el a pone algun dje ehército i algun dje streanan cai na tera, i el a pasa na trapa nan. I asta contra e Prins di e ehército el a desplegá un aire di arogancia, i a kita e rasgo constante for di dje, i a tira e lugá establecí di su santuario abou. I un ehército mes a ser entregá gradualmente, huntu cu e rasgo constante, pa motibu di transgresion; i el a sigui tira e berdad na tera, i el a actua i tabatin éxito.”—Daniel 8:9-12.

14. Kico angel Gabriel a bisa tocante e actividadnan dje cachu chikitu simbólico, i kico lo a sosodé cu e cachu ei?

¹⁴ Promé cu nos por comprendé nificacion dje palabranan citá ariba, nos tin cu presta atencion n’e angel di Dios. Despues di mencioná cu e cuater reinonan cu a sali for dje imperio di Alexander ta bini na poder, angel Gabriel ta bisa: “Den e parti final di nan reino, segun cu e transgresornan ta completá nan accionnan, un rey cu cara cerá i cu ta comprendé dichonan ambiguo lo lanta para. I su poder tin cu bira potente, pero no mediante su mes poder. I den un manera maraviyoso lo e causa ruina, i sigur lo e tin éxito i obra cu eficacia. I en realidad lo e hiba poderosonan na ruina, tambe e pueblo cu ta consistí di e santunan. I segun su perspicacia sigur lo e pone cu engaño tambe tin éxito den su man. I den su curason lo e desplegá un aire di arogancia, i durante un tempu liber di preocupacion lo e hiba hopi na ruina. I lo e lanta para contra e Prins di prinsnan, pero sin man lo e ser kibrá.”—Daniel 8:23-25.

15. Kico e angel a bisa Daniel pa haci cu e vision?

¹⁵ E angel ta bisa Daniel: “Abo, di bo parti, mantené e vision secreto, pasobra e ta ainda pa hopi dia.” (Daniel 8:26) Tabata falta “hopi dia” pa e parti aki dje vision cumpli, i Daniel mester a “mantené e vision secreto.” Aparentemente su nificacion a keda un misterio pa Daniel. Sin embargo, pa awor sí e ‘hopi dianan’ ei mester a terminá. P’esei nos ta puntra: ‘Kico historia mundial ta revelá relacioná cu cumplimentu dje vision profético aki?’

E CACHU CHIKITU TA BIRA PODEROSO DEN PODER

16. (a) For di cua cachu simbólico e cachu chikitu a sali? (b) Con Roma a bira e di seis potencia mundial di profecia bíblico, pero di con e no tabata e cachu chikitu simbólico?

¹⁶ Segun historia, e cachu chikitu a sali for di un dje cuater cachunan simbólico, esun mas na west. Esaki tabata e reino helenístico di general Casandro riba Macedonia i Grecia. Despues, e reino di general Lisímaco, rey di Tracia i Asia Menor, a conkistá e reino ei. Den siglo 2 promé cu nos Era Comun, Roma a conkistá e sectornan west aki dje dominio helenístico. I pa aña 30 P.E.C., Roma a conkistá tur e reinonan helenístico, i asina a haci su mes e di seis potencia mundial di profecia bíblico. Pero e Imperio Romano no tabata e cachu chikitu dje vision di Daniel, pasobra e imperio ei no a sigui existí te na “e tempu señalá di fin.”—Daniel 8:19.

17. (a) Ki relacion Gran Bretania tabatin cu e Imperio Romano? (b) Con e Imperio Británico ta conectá cu e reino helenístico di Macedonia i Grecia?

¹⁷ Ken anto, historia ta identificá como e “rey cu cara cerá” agresivo ei? Echo ta cu Gran Bretania a sali for di e seccion nortwest dje Imperio Romano. Te cu principio di siglo 5 E.C., tabatin provincianan romano na loke awor ta Gran Bretania. Den transcurso di tempu, e Imperio Romano a perde poder, pero e civilisacion griego-romano a sigui ehercé influencia na Gran Bretania i na otro partinan di Europa cu tabata bou di dominio romano. Octavio Paz, poëta i autor mexicano ganadó di Premio Nobel, a skirbi: “Ora e Imperio Romano a cai, Iglesia a tuma over.” El a agregá: “Tantu e tatanan di Iglesia como e eruditonan mas despues, a hinca filosofia griego den e doctrina cristian.” I Bertrand Russell, filósofo i matemático di siglo 20, a remarcá: “E civilisacion occidental, cu a originá for di fuentenan griego, ta basá riba un tradicion filosófico i científico cu a cuminsá na Mileto [un stad griego na Asia Menor] un dos mil cincushen aña pasá.” P’esei, nos por bisa cu e Imperio Británico tabatin su rais cultural den e reino helenístico di Macedonia i Grecia.

18. Kico ta e cachu chikitu cu a bira “un rey cu cara cerá” den e “tempu di fin”? Splica.

¹⁸ Pa aña 1763 e Imperio Británico a derotá su poderoso rivalnan, Spaña i Francia. Desde e momento ei padilanti el a demostrá di ta la doña dje océanonan i e di shete potencia mundial di profecia bíblico. Asta despues cu e 13 colonianan mericano a kita for di Gran Bretania na aña 1776, pa establecé Estados Unidos di América, e Imperio Británico a crece te abarcá un cuart dje superficie i poblacion di tera. E di shete potencia mundial a haña mas forsa ainda ora Estados Unidos di América a colaborá cu Gran Bretania pa forma e potencia mundial dòbel Anglo-Americano. Den sentido económico i militar, e potencia aki di berdad a bira “un rey cu cara cerá.” Pues anto, e cachu chikitu cu a bira un potencia político feros den e “tempu di fin,” ta e Potencia Mundial Anglo-Americano.

19. Kico “e Decoracion” mencioná den e vision ta?

¹⁹ Daniel a mira cu e cachu chikitu “a sigui bira hopi mas grandi” den direccion di “e Decoracion.” (Daniel 8:9) E Tera Primintí cu Jehova a duna su pueblo scogí, tabata asina bunita cu a yam’é “e decoracion di tur e teranan,” esta, di henter e tera. (Ezekiel 20:6, 15) Ta berdad cu Gran Bretania a capturá Jerusalem dia 9 di december 1917, i na aña 1920, e Liga di Nacionnan a duna Gran Bretania e mandato riba Palestina, pa sigui te cu 14 di mei 1948. Pero e vision ta profético, i ta contené hopi símbolo. I “e Decoracion” mencioná den e vision no ta simbolisá Jerusalem, sino e condicion terenal dje pueblo cu Dios ta considerá santu durante e tempu dje di shete potencia mundial. Laga nos wak con e Potencia Mundial Anglo-Americano ta purba menasá e santunan.

E ‘LUGA DI SU SANTUARIO’ TIRÁ ABOU

20. Ken ta “e ehército di shelu” i “e streanan” cu e cachu chikitu ta purba tira abou?

²⁰ E cachu chikitu “a sigui bira mas grandi te ora el a yega te n’e ehército di shelu, di manera cu el a pone algun dje ehército i algun dje streanan cai na tera.” Segun e splicacion dje angel, “e ehército di shelu” i “e streanan” cu e cachu chikitu ta purba tira abou ta “e pueblo cu ta consistí di e santunan.” (Daniel 8:10, 24) E “santunan” aki ta cristiannan ungí cu spiritu. Debí cu nan a drenta den un relacion cu Dios mediante e pacto nobo, poné na vigor dor dje sanger dramá di Jesucristo, nan ta santificá, limpi i apartá pa Dios su sirbishi exclusivo. (Hebreonan 10:10; 13:20) Ya cu Jehova a asigná nan como heredero huntu cu su Yu den e herencia celestial, e ta considerá nan santu. (Efesionan 1:3, 11, 18-20) Pues anto, den e vision di Daniel “e ehército di shelu” ta referí na e resto riba tera dje 144.000 “santunan,” cu lo reina den shelu huntu cu e Lamchi.—Revelacion 14:1-5.

21. Ken ta ocupá un “lugá santu” cu e di shete potencia mundial ta purba haci desolá?

²¹ Awe e resto dje 144.000 ta representantenan terenal di “Jerusalem celestial”—e Reino di Dios parecido na un stad—i su areglo di tempel. (Hebreonan 12:22, 28; 13:14) Den e sentido aki nan ta ocupá un “lugá santu” cu e di shete potencia mundial ta purba trapa ariba i haci desolá. (Daniel 8:13) Papiando dje lugá santu ei tambe como “e lugá establecí di [Jehova] su santuario,” Daniel ta bisa: “A kita e rasgo constante for di dje [Jehova], i a tira e lugá establecí di su santuario abou. I un ehército mes a ser entregá gradualmente, huntu cu e rasgo constante, pa motibu di transgresion; i el a sigui tira e berdad na tera, i el a actua i tabatin éxito.” (Daniel 8:11, 12) Con esaki a cumpli?

22. Durante Guera Mundial II, con e di shete potencia mundial a cometé un “transgresion” notabel?

²² Kico Testigonan di Jehova a pasa aden durante Guera Mundial II? Nan a sufri persecucion intenso! E persecucion a cuminsá den paisnan nazi i facista. Pero no a tarda hopi cu nan tabata “tira e berdad na tera” den henter e inmenso teritorio dje ‘cachu chikitu kende su poder a bira potente.’ Den casi henter e Mancomunidad Británico nan a prohibí “e ehército” di proclamadónan di Reino i nan trabou di predicá “e bon nobo.” (Marco 13:10) Ora e nacionnan aki a reclutá hombernan pa servicio militar, nan a nenga di duna dispensacion na Testigo di Jehova, i asina no a mustra ningun respet pa nan nombramentu teocrático como minister di Dios. Jehova su fiel sirbidónan na Merca a experenciá violencia na man di multitudnan desordená i a sufri tambe di vários indignidad. Bon mirá, e di shete potencia mundial a purba kita e sacrificio di alabansa, esta, “e fruta di lipnan,” cu Jehova su pueblo tabata ofrec’é regularmente como “e rasgo constante” di nan adoracion. (Hebreonan 13:15) Asina e potencia mundial ei a cometé e “transgresion” di invadí e dominio legítimo di Dios Haltísimo, esta, “e lugá establecí di su santuario.”

23. (a) Durante Guera Mundial II, con e Potencia Mundial Anglo-Americano a lanta para “contra e Prins di prinsnan”? (b) Ken ta “e Prins di prinsnan”?

²³ Dor di persiguí “e santunan” durante Guera Mundial II, e cachu chikitu a desplegá un aire di arogancia “asta contra e Prins di e ehército.” Of, manera angel Gabriel ta declará, el a lanta para “contra e Prins di prinsnan.” (Daniel 8:11, 25) E título “Prins di prinsnan” ta aplicá exclusivamente na Jehova Dios. E palabra hebreo sar, traducí como “prins,” ta relacioná cu un verbo cu ta nificá “ehercé dominio.” Ademas di referí na e yu di un rey of un persona di rango real, e palabra ta aplicá na un cabesante, of persona principal. E buki di Daniel ta mencioná otro prinsnan angelical, por ehempel, Miguel. Dios ta e Prins Principal di tur e prinsnan ei. (Daniel 10:13, 21; compará cu Salmo 83:18.) Nos por imaginá cu cualkier persona lo por lanta para contra Jehova, e Prins di prinsnan?

E “LUGA SANTU” HIBÁ NA SU CONDICION CORECTO

24. Ki siguransa Daniel 8:14 ta duna nos?

²⁴ Ningun persona no por lanta para contra e Prins di prinsnan, ni sikiera un rey “cu cara cerá” manera e Potencia Mundial Anglo-Americano! E rey aki lo no tin éxito den su intentonan pa desolá e santuario di Dios. Segun e mensahero angelical, despues di un periodo di “dos mil treshen anochi i mainta . . . lo hiba e lugá santu na su condicion corecto,” of, segun The New English Bible, lo e “sali victorioso.”—Daniel 8:13, 14.

25. Con largu e periodo profético di 2.300 dia ta, i mester asoci’é cu ki suceso?

²⁵ E 2.300 dianan ta un periodo profético. Anto un aña profético ta 360 dia. (Revelacion 11:2, 3; 12:6, 14) E 2.300 dianan aki e ora ei, lo a suma 6 aña, 4 luna i 20 dia. Na ki tempu e periodo aki tabata? Wel, den añanan ’30, e pueblo di Dios den vários pais a cuminsá sufri di mas i mas persecucion. I durante Guera Mundial II, paisnan dje potencia mundial dòbel Anglo-Americano, a persiguí Testigonan di Jehova ferosmente. Di con? Pasobra nan a insistí pa “obedecé Dios como gobernante mas bien cu hende.” (Echonan 5:29) P’esei, mester asociá e 2.300 dianan cu e guera ei.b Pero kico nos por bisa dje comienso i final dje periodo profético aki?

26. (a) Di mas trempan, na ki tempu mester cuminsá conta e 2.300 dianan? (b) Na ki tempu e periodo di 2.300 dia a terminá?

²⁶ Pa por bisa cu a “hiba,” of restorá, “e lugá santu” na loke e mester ta, e 2.300 dianan lo mester a cuminsá tempu cu e tabata den e “condicion corecto” desde Dios su punto di bista. Di mas trempan, esaki tabata dia 1 di juni 1938, ora cu E Toren di Vigilancia [na ingles] a publicá parti 1 dje artículo “Organisacion.” Parti 2 a sali den e edicion di 15 di juni 1938. Si conta 2.300 dia (6 aña, 4 luna i 20 dia segun e kalender hebreo) for di 1 of 15 di juni 1938, nos ta yega na 8 of 22 di october 1944. Riba e promé dia di un asamblea special tené na Pittsburgh, Pennsylvania, Merca, dia 30 september i 1 di october 1944, e presidente di Sociedad Watch Tower a papia riba e tema “E Organisacion Alineá Teocráticamente Awe.” Na e reunion anual dje corporacion dia 2 di october, nan a haci cambio den e statutonan di Sociedad den un esfuerso pa e cuadra mas tantu posibel cu areglo teocrático te asina leu cu ley a permití. Dor cu den e publicacionnan a duna mas claridad na rekisitonan bíblico, no a tarda hopi cu e congregacionnan di Testigonan di Jehova tabata organisá mas teocráticamente.

27. Ki evidencia tin cu den e añanan di Guera Mundial II, durante cua tabatin hopi persecucion, “e rasgo constante” tabata restringí?

²⁷ Segun cu e 2.300 dianan a sigui nan rumbo durante Guera Mundial II, cu a cuminsá na 1939, ofrecementu di “e rasgo constante” na Dios su santuario a keda hopi limitá debí na persecucion. Na 1938 Sociedad Watch Tower tabatin 39 sucursal ta supervisá e trabou dje Testigonan mundialmente, pero pa 1943 tabatin 21 so. Tambe tabatin masha poco aumento den e cantidad di proclamadó di Reino durante e periodo ei.

28, 29. (a) Segun cu Guera Mundial II tabata yega na su fin, ki desaroyo a tuma lugá den Jehova su organisacion? (b) Kico nos por bisa dje intentonan malicioso dje enemigu pa desolá i destruí “e lugá santu”?

²⁸ Manera nos a mencioná, durante e último lunanan di Guera Mundial II, Testigonan di Jehova a reafirmá nan determinacion di engrandecé Dios su gobernacion dor di sirbié como un organisacion teocrático. Tabata cu e obhetivo aki cu na 1944 nan a reorganisá nan obra i nan structura di administracion. De echo, E Toren di Vigilancia [na ingles] di 15 di october 1944, tabatin un artículo titulá “Organisá pa e Obra Final.” E artículo aki i otronan dje mésun periodo ei, cu tabata promové sirbishi, a indicá cu e 2.300 dianan a terminá, i cu “e lugá santu” tabata den su “condicion corecto” atrobe.

²⁹ E intentonan malicioso dje enemigu pa desolá i destruí “e lugá santu” a faya por completo. Sí, e resto dje “santunan” riba tera, huntu cu nan compañeronan dje “multitud grandi,” a sali victorioso. (Revelacion 7:9) I awor e santuario, den su debido condicion teocrático, ta sigui rindi sirbishi sagrado na Jehova.

30. Kico lo sosodé djis aki cu e “rey cu cara cerá”?

³⁰ E Potencia Mundial Anglo-Americano ta den su puesto ainda. “Pero sin man lo e ser kibrá,” segun angel Gabriel. (Daniel 8:25) Djis aki, e di shete potencia mundial di profecia bíblico, esta, e “rey cu cara cerá,” lo ser kibrá, no pa mannan humano, sino dor di poder sobrehumano na Armagedon. (Daniel 2:44; Revelacion 16:14, 16) Ta ki emocionante pa sa cu e ora ei e soberania di Jehova Dios, e Prins di prinsnan, lo ta vindicá!

[Nota]

KICO BO A SACA AFO?

• Kico ta ser representá dor di

“e chubat’i carné” cu “dos cachu”?

“e chubat’i cabritu yen di lana” cu su “cachu grandi”?

e cuater cachunan cu a sali na lugá di “e cachu grandi”?

e cachu chikitu cu a sali for di un dje cuater cachunan?

• Durante Guera Mundial II, den ki manera e Potencia Mundial Anglo-Americano a purba desolá “e lugá santu,” i el a logra?

[Mapa/Plachi na página 166]

(Pa e teksto den su formato kompleto, wak e publikashon)

Imperio di Medo-Persia

MACEDONIA

EGIPTO

Mémfis

ETIOPIA

Jerusalem

Babilonia

Ecbátana

Susa

Persépolis

INDIA

[Mapa/Plachi na página 169]

(Pa e teksto den su formato kompleto, wak e publikashon)

Imperio Griego

MACEDONIA

EGIPTO

Babilonia

Riu Indo

[Mapa/Plachi na página 172]

(Pa e teksto den su formato kompleto, wak e publikashon)

Imperio Romano

BRITANIA

ITALIA

Roma

Jerusalem

EGIPTO

[Plachi di henter página 164]

[Plachi na página 174]

Algun figura prominente dje Potencia Mundial Anglo-Americano:

1. George Washington, promé presidente di Merca (1789-97)

2. Reina Victoria di Gran Bretania (1837-1901)

3. Woodrow Wilson, presidente di Merca (1913-21)

4. David Lloyd George, promé minister di Gran Bretania (1916-22)

5. Winston Churchill, promé minister di Gran Bretania (1940-45, 1951-55)

6. Franklin D. Roosevelt, presidente di Merca (1933-45)