Nota
1. Kiko Babilonia e Grandi Ta?
“Babilonia e Grandi” ta representá tur religion falsu. Kon nos por sa esei? (Revelashon 17:5) Tuma nota di e siguiente puntonan:
E tin influensia rònt parti di mundu. Beibel ta bisa ku Babilonia e Grandi ta sintá riba ‘multitut i nashon.’ Beibel ta bisa tambe ku e ta “reina riba e reinan di tera.”—Revelashon 17:15, 18.
E no ta un imperio polítiko ni komersial. “E reinan di tera” i “e komersiantenan” ta sobrebibí ora Babilonia e Grandi ser destruí.—Revelashon 18:9, 15.
E ta desonrá Dios. Babilonia e Grandi ta ser yamá un prostituta pasobra e ta traha estrechamente ku gobièrnu pa e por haña sèn òf pa nan hasié fabor. (Revelashon 17:1, 2) E ta gaña hende di tur nashon. Ademas, e ta responsabel pa morto di hopi hende.—Revelashon 18:23, 24.
2. Na Ki Tempu Mesías Lo A Bini?
Beibel a profetisá ku lo a pasa 69 siman promé ku Mesías lo a bini.—Lesa Dánièl 9:25.
Na ki tempu e 69 simannan a kuminsá? Esei ta na aña 455 promé ku Kristu. Na e tempu ei, Gobernador Nehemías a yega Herúsalèm “pa rekonstruí” e stat ei.—Dánièl 9:25; Nehemías 2:1, 5-8.
Kon largu e 69 simannan a dura? Den algun profesia di Beibel, un dia ta representá un aña. (Numbernan 14:34; Ezekiel 4:6) Pues, kada siman ta representá shete aña. Den e profesia akí, 69 siman ta igual na 483 aña (69 siman x 7 dia).
Na ki tempu e 69 simannan a terminá? Si nos konta 483 aña kuminsando for di aña 455 promé ku Kristu, nos ta yega na aña 29 despues di Kristu.a Esei ta e aña ku Hesus a batisá i bira Mesías!—Lukas 3:1, 2, 21, 22.
3. Prosedura Médiko den Kua Ta Usa Sanger
Den algun prosedura médiko, ta hasi uso di un pashènt su mes sanger. Algun di e proseduranan akí no ta aseptabel pa un kristian. Por ehèmpel, un kristian lo no duna sanger ni laga nan warda su sanger pa us’é despues durante un operashon.—Deuteronomio 15:23.
Sinembargo, tin otro prosedura òf tratamentu ku sí un kristian por hasi, òf aseptá. Por ehèmpel, tèst di sanger, diálisis (spulamentu di nir), hemodilushon, rekuperashon di sèl òf uso di mashin di kurason-pulmon. Kada kristian mester disidí pa su mes kon e ke pa su sanger ser usá durante un prosedura, tèst médiko òf tratamentu den kua ta usa su mes sanger ku no a ser wardá. Ta bon pa kòrda ku kada dòkter por hasi e proseduranan akí un poko diferente. Pues promé ku un kristian disidí di hasi un operashon, kualke tèst médiko òf tratamentu ku ta enbolbé uso di su mes sanger, e mester sa presis kiko dòkter ta bai hasi ku su sanger. Un kristian por hasi su mes e siguiente preguntanan:
Kiko si nan desviá un poko di mi sanger for di mi kurpa i e sirkulashon di sanger keda interumpí pa un ratu? Mi konsenshi bíblikamente entrená ta laga mi mira e sanger akí ainda komo parti di mi òf mi ta haña ku ta nesesario pa “bash’é riba suela”?—Deuteronomio 12:23, 24.
Kiko si durante un prosedura médiko nan saka un poko di mi sanger, modifik’é i despues hink’é bèk den mi kurpa òf pon’é riba un herida ku mi a haña debí na operashon? Esei lo molestiá mi konsenshi bíblikamente entrená òf lo mi aseptá e tratamentu ei?
4. Separashon Entre Pareha Kasá
Beibel ta bisa ku esposo i esposa no mester separá for di otro. Ademas, Beibel ta mustra ku si un pareha kasá separá for di otro, nan no por kasa ku otro hende. (1 Korintionan 7:10, 11) No opstante, sa tin situashon kaminda algun kristian ta skohe pa separá.
Un hòmber ta nenga di pèrkurá pa su famia: Esaki ta e kaso ora ku un esposo deliberadamente ta keda sin pèrkurá pa su famia i ta pone ku su famia ta keda sin nan nesesidatnan básiko.—1 Timoteo 5:8.
Maltrato físiko severo: Esaki ta ora ku un persona ta maltratá su kasá te na e punto ku salú di su kasá òf bida di su kasá ta na peliger.—Galationan 5:19-21.
Un persona su amistat ku Yehova ta den peliger grave: Esaki ta ora un esposo òf esposa ta hasié imposibel pa su kasá sirbi Yehova.—Echonan 5:29.
5. Dia di Fiesta i Selebrashon
Un kristian no ta partisipá na selebrashon ku no ta agradá Yehova. Sinembargo, kada kristian mester usa su konsenshi bíblikamente entrená pa disidí kiko lo e hasi den situashon kaminda otro hende sí ta selebrá e fiestanan ei. Ata algun ehèmpel:
Un hende ta deseá bo un dushi dia di fiesta. Kisas bo por djis yama e persona danki. Si e persona ke sa mas, bo por splik’é dikon bo no ta selebrá e dia di fiesta ei.
Si bo kasá, kende no ta Testigu di Yehova, invitá bo na un komementu huntu ku famia durante un dia di fiesta. Si bo konsenshi permití bo pa bai, bo por splika bo kasá di antemano ku si kustumber pagano tuma lugá durante e komementu, lo bo no partisipá.
Bo doño di trabou ke duna bo bónùs den temporada di dia di fiesta. Un kristian mester rechasá esei? No nesesariamente. Bo doño di trabou ta mira e dunamentu di bónùs komo parti di e selebrashon òf djis komo un manera ku e por mustra apresio pa bo bon trabou?
Un hende ta duna bo regalo durante dia di fiesta. Kisas e persona ku ke duna bo e regalo ta bisa: “Mi sa ku bo no ta selebrá e dia di fiesta akí pero tòg mi ke duna bo un regalo.” Kisas e persona ke djis mustra su apresio pa bo. Di otro banda, bo ta sinti kisas ku e persona ke pone bo fe na prueba òf ke enbolbé bo den selebrashon di e dia di fiesta? Despues di analisá e situashon, ta keda na abo si bo ta aseptá e regalo òf nò. Nos ke hasi sigur ku den kualke desishon ku nos tuma nos keda ku un konsenshi limpi i keda fiel na Yehova.—Echonan 23:1.
6. Malesa Kontagioso
Komo ku nos ta stima hende, nos ta tene masha kuidou pa no pasa malesa kontagioso pa otro hende. Esei ta e kaso, sea ku nos tin un malesa kontagioso òf si nos tin motibu pa kere ku nos ta infektá ku un malesa asina. Nos ta hasi esei pasobra Beibel ta bisa: “Stima bo próhimo meskos ku bo mes.”—Romanonan 13:8-10.
Kon un persona ku tin un malesa kontagioso por apliká e palabranan ei? Un persona ku malesa kontagioso lo evitá kontakto físiko ku otro persona, por ehèmpel, lo e no brasa, sunchi òf duna un otro persona man. Un persona ku malesa kontagioso no mester sintié ofendí si otro hende, pa motibu ku nan ke protehá nan famia, no por invit’é na nan kas. Ademas, promé ku un persona ku malesa kontagioso batisá, e mester informá e koordinadó di e kuerpo di ansiano tokante su malesa. Di e manera ei, por tuma e prekoushonnan nesesario pa protehá e otro personanan ku tambe ta bai batisá. Un persona ku a ser eksponé na un malesa kontagioso lo mester ta dispuesto pa hasi un tèst di sanger promé ku e kuminsá un namorashon ku un persona. Hasiendo esei, bo ta mustrando interes den bienestar di otro hende. Lo bo ta kumpliendo ku loke Beibel ta bisa, esta, ku bo ‘no ta buska bo mes interes so, ma tambe interes di otro hende.’—Filipensenan 2:4.
7. Negoshi i Asuntu Legal
Nos por evitá hopi problema si nos ta sera tur akuerdo finansiero por eskrito—asta si e akuerdo ta ku un ruman kristian. (Yeremías 32:9-12) Asina mes, tin biaha, un kristian por hañ’é ku desakuerdo chikitu ku un otro kristian tokante plaka òf kualke otro asuntu. Nan mester resolvé desakuerdo asina mesora, na un manera pasífiko i solamente ku e personanan enbolbí.
Pero kon nos mester resolvé asuntu mas serio, manera froude òf kalumnia? (Lesa Mateo 18:15-17.) Hesus a menshoná tres kos ku nos mester hasi:
Purba di resolvé e asuntu entre abo kuné so.—Wak versíkulo 15.
Si esei no funshoná, puntra un òf dos ruman maduro den kongregashon pa bai ku bo.—Wak versíkulo 16.
Si ainda no por resolvé e asuntu, e ora ei bo mester bai serka e ansianonan.—Wak versíkulo 17.
Den mayoria di kaso, nos lo no hiba nos rumannan korte pasobra esei por laga hende pensa malu di Yehova i di e kongregashon. (1 Korintionan 6:1-8) Sinembargo, tin algun situashon kaminda lo mester regla un asuntu den korte: proseso pa optené divorsio, pa haña kustodia di yu, pa establesé e montante di alimentashon, pa kobra un seguro, pa bini riba lista di kreditor den un kaso di bankarota i pa konfirmá ku un tèstamènt ta outéntiko. Si un kristian bai korte pa resolvé un asuntu asina na un manera pasífiko, lo e no ta hasiendo algu ku ta bai kontra konseho di Beibel.
Si ta trata di un krímen serio—manera violashon, abusu di mucha, maltrato severo, ladronisia grandi òf asesinato—un kristian ku denunsiá un krímen asina na e outoridatnan di e pais no ta bai kontra konseho di Beibel.
a Di aña 455 promé ku Kristu pa aña 1 promé ku Kristu ta 454 aña. Di aña 1 promé ku Kristu pa aña 1 despues di Kristu ta un aña (no tabatin aña sero). Di aña 1 despues di Kristu pa aña 29 despues di Kristu ta 28 aña. Si nos konta e sifranan 454, 1 i 28 huntu, nos ta yega na un total di 483 aña.