LÈS 36

Sea Onesto den Tur Kos

Edishon Imprimí

Tur hende ke tin amigu ku ta onesto. Yehova tambe ke pa su amigunan ta onesto. Pero no ta fásil pa ta onesto den un mundu kaminda hopi hende no ta onesto. Kiko ta algun benefisio ku nos lo haña si nos ta onesto den tur kos?

1. Kiko ta e motibu di mas importante pa ta onesto?

Ora nos ta onesto ku otro hende, nos ta mustra Yehova ku nos ta stim’é i respet’é. Kòrda ku Yehova ta konsiente di tur loke nos ta pensa i hasi. (Hebreonan 4:13) Ora nos skohe pa ta onesto, Yehova ta mira esei i esei ta hasié felis. Su Palabra ta bisa: “Yehova ta detestá hende astuto. E tin amistat será ku hende rekto.”—Proverbionan 3:32.

2. Kon nos por demostrá den nos bida diario ku nos ta onesto?

Yehova ke pa nos “papia bèrdat un ku otro.” (Zakarías 8:16, 17) Kiko esei ta enserá? Sea nos ta papia ku famia, kolega di trabou, nos rumannan di kongregashon òf funshonario di gobièrnu, nos no ta gaña ni duna informashon ku por laga nan yega na un konklushon robes. Hende onesto no ta hòrta ni kometé froude. (Lesa Proverbionan 24:28 i Efesionan 4:28.) Ademas, nan ta paga tur belasting ku nan debe. (Romanonan 13:5-7) Pues, nos ke “komportá nos mes na un manera onesto den tur kos.”—Hebreonan 13:18.

3. Kiko ta e benefisionan di ta onesto?

Si nos ta konosí pa ta onesto, otro hende lo konfia nos. Nos ta yuda tur hende den kongregashon sinti nan safe, meskos ku ora nan ta parti di un famia amoroso. Nos lo tin un konsenshi limpi. Ademas, ora nos ta onesto, nos ta “dòrna e siñansa di nos Salbador, Dios,” i ta duna otro hende gana di siña e bèrdat.—Tito 2:10.

KIKO MAS NOS POR SIÑA?

Laga nos wak kon Yehova ta sintié ora nos ta onesto i kon nos ta benefisiá ora nos ta onesto. Laga nos wak tambe kon nos por ta onesto den vários aspekto di nos bida.

4. Yehova ta kontentu ora nos ta onesto

Lesa Salmo 44:21 i Malakías 3:16. Despues, analisá e siguiente preguntanan:

Dikon no ta sabí pa pensa ku nos por skonde e bèrdat for di Yehova?
Kon bo ta kere Yehova ta sintié ora nos ta papia bèrdat asta ora esei no ta fásil?

Un mucha ta papia ku su tata ku ta na rudia i ta mir’é den su wowo. Un glas di djus a basha riba mesa. — Ora mucha ta papia bèrdat, nan ta hasi nan mayornan kontentu. Ora nos ta papia bèrdat, nos ta hasi Yehova kontentu

5. Semper nos mester ta onesto

Hopi hende ta pensa ku no ta kumbiní pa semper ta onesto. Pero wak dikon nos mester ta onesto na tur momento. Pasa e VIDIO.

VIDIO: Kiko Ta Kontribuí na Nos Felisidat?—Un Konsenshi Limpi (2:32)

Esena di e vidio ‘Kiko Ta Kontribuí na Nos Felisidat?—Un Konsenshi Limpi.’ Despues ku Ben a bisa su doño di trabou ku el a hasi un eror ku lo kosta nan hopi plaka, nan ta duna otro man.

Lesa Hebreonan 13:18. Despues, analisá kon nos por ta onesto . . .

ku nos famia.
na trabou òf skol.
den otro situashon.

6. E benefisionan di ta onesto

Tin biaha, ora nos ta onesto, nos por haña nos ku problema. Pero al fin i al kabo semper ta mihó pa ta onesto. Lesa Salmo 34:12-16. Despues, analisá e siguiente pregunta: