Mi A Hasi Sirbishi na Yehova Mi Karera

Na kuminsamentu di 1942, djis despues ku Merka a drenta Segundo Guera Mundial, mi tabata den e di sinku aña di universidat, i mi tabata falta apénas algun luna pa mi gradua den arkitektura. Mi tabata biba huntu ku dos mucha hòmber mas. Un di nan a sugerí mi pa bai papia ku un mener ku tabata “bishitá e mucha hòmbernan na e piso abou.” Ei mi a topa John O. (Johnny) Brehmer, kende tabata un Testigu di Yehova. Mi a keda asombrá kon e tabata usa Beibel pa kontestá kasi tur mi preguntanan. Esei a motivá mi pa kuminsá studia Beibel regularmente kuné i ku tempu mi tabata bai prediká kuné ora ku mi tabata por.

Otto, tata di Johnny, a bira Testigu tempu e tabata direktor di un banko na Walnut, Iowa. Despues, el a tuma su retiro pa drenta den e sirbishi di tempu kompleto. Ku tempu, su bon ehèmpel i tambe esun di su famia a animá mi pa tuma un desishon hopi importante.

Un dia e dekano di e universidat a bisa mi ku mi puntonan tabata bayendo atras i ku lo mi no a slag a base di mi rapòrtnan anterior. Mi ta kòrda kon mi tabata pidi Yehova den orashon pa e yuda mi. Djis despues, mi profesor a yama mi pa bini serka dje. El a bisa mi ku nan a pidié pa un ingeniero, anto el a tuma e libertat di kontestá e telegram i bisa ku lo mi aseptá e trabou. Mi a gradisí e profesor, pero mi a splik’é pakiko mi tabata determiná pa hasi sirbishi na Yehova mi karera. Dia 17 di yüni 1942 mi a batisá i kasi mesora mi a kuminsá traha komo pionero, esta, un Testigu di Yehova ku ta dediká gran parti di su tempu na e trabou di prediká.

Mas despues, na 1942, nan a manda yama mi pa servisio militar i dilanti di un komité mi mester a splika dikon mi konsenshi no a permití mi bai guera. Mi a mustra nan deklarashonnan firmá di mi profesornan, kaminda nan a elogiá mi pa mi bon kualidatnan i mi kapasidat eksepshonal komo arkitekto. Apesar di e testimonionan ei na mi fabor, tòg nan a dal mi un but di $10.000 i a sentensiá mi na 5 aña di prizòn na Leavenworth, Kansas.

Nan a sentensiá mas ku 230 Testigu hóben na un boerderij ku ta kai bou di e prizòn di estado na Leavenworth. Einan nan a pone nos traha bou di supervishon di vários wardadó di prezu. Algun di nan tabata sa di nos posishon neutral komo kristian i tabata respetá nos punto di bista.

Algun di nan a kooperá ku nos pa nos por a sigui tene nos reunionnan bíbliko. Tambe nan a yuda nos haña literatura bíbliko den prizòn. E hefe di prizòn a asta aboná riba e revista Konsuelo (awor ¡Despertad!).

Despues ku mi a sinta tres di mi sinku añanan di kastigu, mi a sali liber dia 16 di febrüari 1946, algun luna despues ku Segundo Guera Mundial a terminá. Mi a kuminsá traha pionero mesora atrobe. Nan a asigná mi pa bai bèk na e stat di Leavenworth, Kansas. E idea ei so a duna mi hopi miedu ya ku einan tabatin hopi prehuisio kontra Testigunan di Yehova. Tabata difísil pa mi haña un trabou, pa no papia mes di un lugá di biba.

Mi ta kòrda dia ku mi a topa un wardadó di prezu den sirbishi, kon el a grita mi pa bai for di su lugá. Ora mi a mira e bate di beisbòl den su man, mi a haña masha miedu i a bira bai mesora. Na un otro kas un señora a bisa mi: “Warda mi un ratu,” anto el a sera e porta. Miéntras mi tabata warda, diripiente un bentana di e piso ariba a habri, anto el a basha awa sushi di laba tayó riba mi. Apesar di esei, mi a haña vários bendishon den sirbishi. Despues mi a bin haña sa ku algun di e personanan ku a tuma literatura bíbliko serka mi a bira Testigu.

Na aña 1943 nan a kuminsá ku un skol pa misionero na New York. Nan a invitá mi pa asistí, i dia 8 di febrüari 1948 mi a gradua for di e di dies klas. Nan a yama e skol: Skol Bíbliko di Galaad di Watchtower. Ora mi a gradua, nan a manda mi bai sirbi na Kosta di Oro, konosí awor komo Gana.

Ora mi a yega Kosta di Oro, mi asignashon tabata pa prediká na ofisialnan di gobièrnu i europeonan. Den wikènt mi tabata traha ku un kongregashon di Testigunan di Yehova i prediká ku nan di kas pa kas. Tambe mi a bishitá Testigunan ku tabata biba na lugánan isolá i a siña nan kon pa prediká. Ademas, mi a sirbi komo superintendente biahero na Kosta di Marfil [Côte d’Ivoire], un pais bisiña.

Miéntras mi tabata sirbi den e áreanan ei, mi a siña biba manera e nativonan afrikano: Mi tabata drumi den kas trahá di lodo, kome ku man i bùk “pafó” pa hasi mi nesesidat, meskos ku e israelitanan den desierto. (Deuteronomio 23:12-14) Asina ami ku e otro misioneronan a bin haña un bon reputashon. Esposanan di algun di e ofisialnan lokal a kuminsá studia Beibel ku nos. Pues, ora opositornan a kuminsá molestiá nos i instigá outoridatnan pa revoká nos visa, e esposanan di e ofisialnan a pone preshon riba nan esposo i nan a anulá e desishon!

Meskos ku hopi di e misioneronan na Afrika, despues di tempu mi a haña malaria. Mi a haña kalafriu i keintura ku tabata pone mi eilu. Tabatin biaha ku asta mi mester a tene mi kachete pa e stòp di tembla. Apesar di esei, mi a sigui haña goso i satisfakshon den sirbishi.

Durante e promé kuater añanan na Afrika, mi tabata korespondé ku Eva Hallquist, un ruman ku mi a konosé promé ku mi a sali Merka. El a bisa mi ku e tabata bai gradua for di e di 21 klas di Galaad dia 19 di yüli 1953, na e kongreso internashonal di Testigunan di Yehova na Yankee Stadium, New York. Mi a kumbiní ku un kapitan pa traha riba su barku, a kambio di e biahe pa Merka.

Despues di 22 dia, algun biaha pasando den laman basta brutu, mi a yega. Mi a kue kaminda mesora pa topa Eva na e ofisina prinsipal di Testigunan di Yehova na Brooklyn. Nos a subi riba dak di un edifisio ku un bista espektakular di e edifisionan haltu i e haf di New York, i einan mi a pidié kasa ku mi. Despues, Eva a bini Kosta di Oro pa traha komo misionero huntu ku mi.

Despues ku ami ku Eva a sirbi pa vários aña na Afrika, mi mama a manda mi un karta, bisando ku mi tata tabata muriendo di kanser. Asina ku nos a haña pèrmit pa bandoná nos asignashon, ami ku Eva a bolbe Merka. Mi tata su salú a bai atras hopi lihé, i el a fayesé un poko tempu despues.

Nos a bolbe na nos asignashon na Gana, pero despues di 4 aña, nos a bin haña sa ku mi mama su salú a bai hopi atras. Algun amigu a konsehá nos pa nos bai bèk pa sòru p’e. Esei tabata e desishon di mas difísil ku nos a yega di tuma. Despues di a sirbi 15 aña komo misionero, 11 di nan komo pareha, nos a bolbe Merka.

E añanan ku a sigui nos tabata sòru pa mi mama bùrt pa bùrt, i nos tabata hib’é reunion segun su salú tabata permití. Dia 17 di yanüari 1976, el a fayesé ku 86 aña di edat. Pero mi a haña un sla mas duru ainda nuebe aña despues. A resultá ku Eva tabatin kanser. Nos a buska tur manera pa bringa e malesa, pero finalmente el a pèrdè e bataya. El a fayesé dia 4 di yüni 1985, ku 70 aña di edat.

Na 1988, nan a invitá mi pa asistí na inougurashon di e parti nobo di e sukursal di Gana. Esta un okashon memorabel! Mas o ménos 40 aña promé, tempu mi a bini Gana despues di a gradua for di Galaad, tabatin apénas 700 i piku Testigu einan. Na 1988, ya tabatin mas ku 34.000, i awor nan ta kasi 114.000!

Dos aña despues di a bishitá Gana, mi a kasa ku Eva su bon amiga, Betty Miller, dia 6 di ougùstùs 1990. Huntu nos a sigui hasi Yehova su sirbishi nos karera. Nos ta anhelá e dia ku nos por mira nos welanan, mayornan i tambe Eva bèk riba tera den e resurekshon den Paradeis.—Echonan 24:15.

Awa ta yena mi wowo ora mi pensa riba e gran privilegio ku mi tabatin di por sirbi Yehova pa mas ku 70 aña. Mi ta gradisié tur ora bai ku el a yuda mi hasi sirbishi na dje mi karera. Awor mi tin mas ku 90 aña, pero Yehova, e arkitekto di mas grandi di universo, ta sigui duna mi forsa i kurashi pa mi sigui ku mi karera.