Kumpli ku Bo Papel Komo Predikadó di e Bon Notisia

 1. Dikon Yehova ta e promé i e mihó Predikadó di bon notisia?

YEHOVA ta e promé i e mihó Predikadó di bon notisia. Kon asina? Wèl, djis despues ku Adam ku Eva a rebeldiá kontra dje, el a anunsiá un bon notisia, esta, ku lo e destruí e kolebra ku ta Satanas e Diabel. (Gén. 3:15) Atraves di siglonan, Yehova a inspirá vários hòmber fiel pa skirbi detayenan enkuanto kon lo e santifiká su nòmber, drecha e daño ku Satanas a kousa i kon humanidat lo bolbe haña loke Adam ku Eva a tira afó. Esakinan sigur ta bon notisia, no ta bèrdat?

 2. (a) Ki papel e angelnan ta hunga den predikashon di e bon notisia? (b) Ki ehèmpel Hesus a pone pa esnan ku ta prediká e bon notisia?

² Yehova su angelnan tambe ta prediká bon notisia; ademas, nan ta yuda nos proklamá e bon notisia rònt mundu. (Luk. 1:19; 2:10; Echo. 8:26, 27, 35; Rev. 14:6) Awor, kiko di Miguel, e arkangel? E tambe ta un predikadó di bon notisia. Tempu ku e tabata riba tera komo Hesus, predikashon di e bon notisia tabata e kos di mas importante den su bida. Asina, el a pone un ekselente ehèmpel pa tur predikadó di e bon notisia awe!—Luk. 4:16-21.

 3. (a) Ki bon notisia nos ta prediká awe? (b) Ki preguntanan ta importante pa nos kontestá?

³ Hesus a duna su disipelnan e mandamentu pa prediká e bon notisia. (Mat. 28:19, 20; Echo. 1:8) Apòstel Pablo a urgi su kompañero Timoteo: “Hasi e trabou di un predikadó di e bon notisia, kumpli ku bo sirbishi kabalmente.” (2 Tim. 4:5) Awor, ki bon notisia nos, komo siguidónan di Kristu, ta proklamá awe? Wèl, entre otro kosnan, nos ta konta hende e bèrdat tokante nos Tata selestial, Yehova, esta, ku e ta stima nos. (Huan 3:16; 1 Ped. 5:7) I e Reino di Dios ta un prueba ku Yehova ta stima nos. P’esei, ku goso nos ta laga tur hende sa ku nan por bira amigu di Dios basta nan bira súpdito di e Reino di Dios, obedesé Dios i hasi loke ta hustu. (Sal. 15:1, 2) I na su debido tempu, Yehova lo kaba ku tur sufrimentu. Ademas, lo e eliminá tur doló ku mal rekuerdo ta trese kuné. Eseinan ta bon notisia, no ta bèrdat? (Isa. 65:17) Awor, komo ku nos ta predikadó di e bon notisia, ta bon pa nos haña kontesta pa dos pregunta importante. Nan ta: Dikon ta urgente pa hende haña sa e bon notisia awe? Kon nos por kumpli kabalmente ku nos papel komo predikadó di e bon notisia?

 4. Ki mentira hende ta plama enkuanto Dios?

⁴ Suponé ku un hende gaña bo. E ta bisa bo ku bo tata a bandoná abo i bo famia. E ta pretendé ku e konosé bo tata i ta bisa bo ku bo tata no tabata interesá den boso, ku e tabata tene kos sekreto pa boso i ku e tabata un hòmber kruel. Kaba, e ta bisa bo pa no tuma e molèster di buska kontakto ku bo tata pasobra e ta morto. De echo, eseinan ta kosnan ku hopi hende a ser siñá tokante Dios. Lidernan religioso a siña nan ku Dios ta kruel, ku e ta un misterio i ku bo no por siña konos’é. Por ehèmpel, algun lider religioso ta bisa ku Dios ta kastigá mal hende pa semper den fièrnu. Otronan ta kulpa Dios pa e sufrimentu ku desasternan natural ta kousa. Aunke e desasternan akí ta mata tantu bon hende komo mal hende, nan ta bisa ku ta kastigu di Dios.

5, 6. Kon e teoria di evolushon i otro doktrinanan falsu ta perhudiká hende?

⁵ Otronan ta bisa ku Dios no ta eksistí. Tuma por ehèmpel e teoria di evolushon. Hopi hende ku ta kere den e teoria akí ta bisa ku no tin un mente inteligente tras di bida ma ku el a originá pa kasualidat. Pa nan, no tin un Kreador. Algun ta asta bisa ku hende ta djis un otro espesie di animal i ku nos no mester keda sorprendí ora hende ta komportá nan mes manera bestia. Pa nan ta masha normal ku hende fuerte ta trata hende débil na un manera kruel, pasobra esei ta simplemente un konsekuensia di e asina yamá lei di naturalesa. Pues, no ta nada straño ku hopi hende ta kere ku semper lo tin inhustisia. P’esei, personanan ku ta kere den evolushon no tin berdadero speransa pa futuro.

⁶ Pues no tin duda, e teoria di evolushon i otro doktrinanan falsu ta kontribuí na e sufrimentu ku humanidat ta pasa aden durante e último dianan akí. (Rom. 1:28-31; 2 Tim. 3:1-5) E siñansanan akí no ta bon notisia. Al kontrario, manera apòstel Pablo a indiká, nan ta laga hende “mentalmente den skuridat i alehá for di e bida ku ta bini di Dios.” (Efe. 4:17-19) Ademas, e teoria di evolushon i otro doktrinanan falsu ta stroba hende di aseptá Dios su bon notisia.—Lesa Efesionan 2:11-13.

7, 8. Kua ta e úniko manera ku hende por haña un bon komprondementu di e bon notisia?

⁷ Pa hende por rekonsiliá ku Yehova Dios, na promé lugá, nan mester ta konvensí ku e ta eksistí i ku tin bon motibu pa nan hala serka dje. Nos por yuda nan siña konosé Dios, animando nan pa opservá e kreashon i meditá riba dje. Ora nan hasi esei ku un mente habrí, nan lo siña di Dios su sabiduria i poder. (Rom. 1:19, 20) Awor, kon nos por yuda nan haña rèspèt profundo pa Dios pa motibu di tur loke el a krea? Wèl, nos por usa e foyeto Bida Ta Obra di un Kreador? Pero tin pregunta ku hende no por haña nan kontesta opservando e kreashon so. Algun ehèmpel di esakinan ta: Dikon Dios ta permití sufrimentu? Kiko ta Dios su propósito pa tera? Dios ta interesá den kada un di nos?

⁸ E úniko manera ku hende por haña un bon komprondementu di e bon notisia enkuanto Dios i su propósito ta studiando Beibel. Anto nos tin e gran privilegio di por yuda hende haña kontesta pa nan preguntanan. Pero pa yega na kurason di un persona, nos mester hasi mas ku djis siñ’é e bèrdat; nos mester konvens’é ku loke e ta siñando ta e bèrdat. (2 Tim. 3:14) I nos por mehorá den esaki si nos ta imitá e ehèmpel di Hesus. Kon bini Hesus tabata asina bon den konvensé hende? Un motibu ta ku e tabata hasi bon uso di pregunta. Kon nos por imit’é?

 9. Kiko nos mester hasi pa nos por yuda hende spiritualmente?

⁹ Dikon nos mester hasi uso di pregunta den nos trabou di prediká, manera Hesus a hasi? Wèl, pensa riba e siguiente situashon: Suponé ku bo dòkter bisa bo ku e tin bon notisia pa bo: Bo por kura di bo malesa basta bo hasi un operashon grandi. Probablemente bo ta ker’é. Pero kiko si e primintí bo esei sin ku nunka bo a papia kuné tokante bo salú? E chèns ta grandi ku lo bo no konfi’é. No ta importá kon bon e dòkter ta; e mester papia ku bo, hasi pregunta i skucha bo promé ku e por yuda bo. Di mes manera, si nos ke yuda hende aseptá e bon notisia di e Reino, nos mester hasi bon uso di pregunta. Hasiendo pregunta, nos por komprondé den ki kondishon spiritual nan ta pa nos por yuda nan.

10, 11. Kiko nos lo por logra si nos ta imitá Hesus su manera di siña hende?

¹⁰ Hesus tabata sa ku preguntanan bon pensá no solamente ta yuda un maestro siña konosé su studiante, pero nan ta yuda e studiante tambe pensa i ekspresá su mes. Por ehèmpel, ora Hesus kier a siña su disipelnan un lès di humildat, el a hasi nan un pregunta ku a pone nan pensa. (Mar. 9:33) Na un otro okashon, Hesus a siña Pedro kon pa rasoná a base di prinsipio; el a hasié un pregunta i a dun’é chèns di skohe entre dos kontesta. (Mat. 17:24-26) Na un otro okashon, Hesus kier a saka afó kiko tabata biba den kurason di su disipelnan. P’esei, el a hasi nan un seri di pregunta di punto di bista. (Lesa Mateo 16:13-17.) Pues, Hesus no tabata djis bisa hende kiko nan tabatin ku hasi. El a hasi pregunta ku a alkansá kurason i asina motivá su oyentenan pa aseptá e bon notisia i hasi kambio den nan bida.

¹¹ Ora nos ta hasi bon uso di pregunta manera Hesus tabata hasi, nos ta logra por lo ménos tres kos. Nos ta haña sa kon ta e mihó manera pa yuda hende, kon pa rasoná ku nan apesar di e opheshonnan ku nan ta bini kuné i kon pa yuda hende humilde komprondé kon un estudio di Beibel por benefisiá nan. Awor, laga nos analisá tres senario den kua nos por hasi bon uso di pregunta.

12-14. Kon bo por yuda bo yu haña mas konfiansa pa prediká e bon notisia? Duna un ehèmpel.

¹² Senario 1: Suponé ku bo yu tiner bin bisa bo ku e tin miedu di papia ku su kompañeronan di klas tokante e kreashon. Kiko lo bo hasi? Wèl, sin duda lo bo ke yuda bo yu haña mas konfiansa pa prediká e bon notisia. Pues, en bes di kritik’é òf bis’é mesora kiko e tin ku bisa, imitá Hesus; hasié algun pregunta ku ta motiv’é pa ekspresá su punto di bista. Kon asina?

¹³ Lesa huntu ku bo yu algun porshon for di e foyeto Bida Ta Obra di un Kreador? Despues, puntr’é kua di e argumentonan ku e foyeto ta presentá e ta haña mas interesante. Anim’é pa pensa riba e motibunan pakiko e ta konvensí ku tin un Kreador i dikon e ke hasi Dios su boluntat. (Rom. 12:2) Laga bo yu komprondé ku su motibunan por ta diferente for di esnan di bo.

¹⁴ Splika bo yu ku e por rasoná ku un kompañero di klas di e mesun manera ku abo a hasi kuné. Lo e por analisá kuné echo palpabel di kreashon i puntr’é su punto di bista. Por ehèmpel, e por pidi su kompañero di klas pa lesa e di dos suptema na página 12 di e foyeto Bida Ta Obra di un Kreador? Kaba, e por puntra su kompañero: “Bo ta kere ku e ingenieronan ku a diseñá ala di avion tabata hende masha inteligente?” Probablemente, e kompañero di klas lo bisa: “Sí.” Despues, bo yu por puntr’é: “Bo tabata sa ku ta ala di meuchi di laman ingenieronan a imitá?” Kaba e por puntr’é: “Si pa traha un imitashon mester tabatin un diseñadó inteligente, kiko di e produkto original?” Ta bon pa bo praktiká regularmente di e manera akí ku bo yu pa yud’é haña mas konfiansa pa papia ku otro hende tokante su kreensianan. Si bo train bo yu pa hasi bon uso di pregunta, lo bo yud’é kumpli ku su papel komo predikadó di e bon notisia.

15. Kon nos por hasi uso di pregunta pa rasoná ku un ateista?

¹⁵ Senario 2: Durante nos trabou di prediká, nos por topa ku hende ku ta duda ku Dios ta eksistí òf ku no ta kere mes ku e ta eksistí. Pero e kòmbersashon no tin nodi di keda te ei; nos por purba di rasoná ku un persona asina. Na un manera respetuoso, nos por puntr’é ta for di ki tempu i kon bini e no ta kere den Dios. Despues di skucha su kontesta, nos por bis’é ku nos ta mira ku el a pensa seriamente tokante e asuntu. Anto nos por puntr’é si e tin algu kontra pa lesa un foyeto ku ta duna evidensia ku bida ta obra di un Kreador. Si e ta sinsero, kasi sigur lo e bisa ku e no tin nada kontra pa analisá tal evidensia. E ora ei, nos por ofres’é e foyeto Bida Ta Obra di un Kreador? Pues, ora nos ta usa takto i ta hasi pregunta na un manera kariñoso, nos por alkansá kurason di un persona ku e bon notisia.

16. Dikon nos no mester djis laga nos studiantenan lesa kontesta for di paragraf?

¹⁶ Senario 3: Tur ora ku nos ta dirigí un estudio di Beibel, nos ta laga e studiante djis lesa su kontestanan for di e paragrafnan. Kiko lo por ta e resultado? Nos por stroba e studiante di progresá den e bèrdat. Dikon? Wèl, un studiante ku ta djis kontestá loke tin den e paragrafnan sin pensa riba e asuntu ta manera un mata ku no tin rais profundo. Ora e hañ’é ku e kayente di oposishon, fásilmente e por marchitá, esta, bandoná e bèrdat. (Mat. 13:20, 21) Pa evitá esei, nos mester puntra nos studiante kiko e ta pensa di loke e ta siñando; purba di saka afó si e ta di akuerdo ku loke e ta siña. Ta masha importante pa bo lag’é splika bo dikon e ta eens òf dikon nò. Kaba, yud’é rasoná for di e Skritura pa e mes por yega na konklushonnan korekto. (Heb. 5:14) Si nos ta hasi bon uso di pregunta, tin mas chèns ku nos studiantenan lo para firme den e bèrdat i resistí hende ku ke oponé òf engañá nan. (Kol. 2:6-8) Kiko mas nos por hasi pa kumpli kabalmente ku nos papel komo predikadó di e bon notisia?

17, 18. Kon bo por yuda bo kompañero den sirbishi ora e ta papiando ku un doño di kas?

¹⁷ Hesus a manda su disipelnan dos dos bai prediká. (Mar. 6:7; Luk. 10:1) Mas despues, apòstel Pablo a papia di su “kompañeronan di trabou” ku a ‘lucha lado a lado kuné na fabor di e bon notisia.’ (Flp. 4:3) Siguiendo e ehèmpelnan bíbliko akí, e organisashon di Testigunan di Yehova a kuminsá ku un kampaña spesial na aña 1953a pa predikadónan di Reino train nan kompañeronan den e trabou di prediká.

¹⁸ Awor, kon abo por yuda un otro publikadó ku bo ta trahando kuné den sirbishi ora e ta papiando ku un doño di kas? (Lesa 1 Korintionan 3:6-9.) Wèl, bo por habri bo Beibel i buska e tekstonan ku e ta lesa huntu ku e doño di kas. Presta atenshon ora e ta papia òf ora e doño di kas ta ekspresá su mes. Di e manera ei, si bo kompañero tin mester di yudansa, bo por yud’é rasoná ku e doño di kas. (Ekl. 4:12) Pero esaki sí: Tene kuidou pa bo no interumpí e publikadó siendo ku e ta dunando un bon testimonio ni e doño di kas ora e ta papia. Si bo ta interumpí e kòmbersashon innesesariamente, bo por deskurashá bo kompañero i konfundí e doño di kas. No ta malu pa bo kontribuí na e kòmbersashon, pero limitá bo mes na ún òf dos komentario breve i laga bo kompañero sigui ku su kòmbersashon.

19. Kiko nos mester kòrda, i dikon?

¹⁹ Awor, kon abo i bo kompañero por yuda otro segun ku boso ta bai di un kas pa otro? Usa e tempu ei pa analisá kon boso por mehorá boso presentashonnan. Papia kosnan edifikante. Pues, tene kuidou pa boso no papia malu di e hendenan den e teritorio ni kritiká boso kompañeronan di trabou. (Pro. 18:24) Nos tin ku kòrda ku nos tur ta manera pòchi di klei; nos niun no ta perfekto. Ta Yehova a mustra miserikòrdia na nos, dunando nos e tesoro akí, esta, e privilegio di por prediká e bon notisia. (Lesa 2 Korintionan 4:1, 7.) P’esei, laga nos balorá e tesoro akí i kumpli ku nos papel komo predikadó di e bon notisia lo mihó ku nos por.