No Laga Nada Stroba Bo di Risibí Onor

1, 2. (a) Kiko e palabra “onor” òf “gloria” ta nifiká na hebreo? (b) Ki preguntanan nos lo analisá den e artíkulo akí?

ORA bo tende e palabra “onor,” òf e palabra “gloria,” riba kiko bo ta pensa? Riba e bunitesa di e kreashon? (Sal. 19:1) Òf riba e elogio i onor ku nan sa duna hende ku ta masha riku òf sabí òf ku a logra kosnan ekstraordinario? Den Beibel, e palabranan hebreo pa “onor” i “gloria” ta meskos, i nan ta transmití e idea di algu di peso. Den antigwedat—tempu nan tabata traha plaka di metal, manera oro òf plata—mas pisá e moneda tabata, mas balor e tabatin. P’esei, palabranan ku tabata ekspresá e idea di algu di peso por a referí tambe na algu balioso, magnífiko òf impreshonante.

² Komo hende, kisas nos ta keda impreshoná ku e poder, posishon òf reputashon di un persona. Pero kiko Dios ta buska den un hende pa e dun’é onor? Proverbionan 22:4 ta bisa: “E rekompensa di humildat i e temor di SEÑOR ta rikesa, onor i bida.” I disipel Santiago a skirbi: “Someté boso humildemente na Yehova, i lo e halsa boso.” (Sant. 4:10) Kiko ta e onor, òf gloria, ku Yehova ta duna hende? Kiko por stroba nos di risibí e onor akí? I kon nos por yuda otro hende risibié?

3-5. Ki onor Yehova por duna nos?

³ Un di e eskritornan di salmo a ekspresá e konfiansa ku Yehova lo tene su man drechi i gui’é na berdadero gloria. (Lesa Salmo 73:23, 24.) Kon Yehova ta guia su sirbidónan humilde na gloria? Wèl, e ta hasi esaki mustrando nan onor na vários manera. Por ehèmpel, e ta yuda nan komprondé su boluntat. (1 Kor. 2:7) Anto hende ku ta skucha su palabra i obedes’é, e ta duna e onor di por tin un amistat íntimo kuné.—Sant. 4:8.

⁴ Tambe Yehova ta konfia su siguidónan ku e sirbishi kristian ku ta un tesoro glorioso. (2 Kor. 4:1, 7) Esnan ku ta usa nan privilegio di sirbishi pa alabá Yehova i pa benefisiá otro hende lo risibí onor. Yehova ta primintí: “Esnan ku onra mi, lo mi onra.” (1 Sam. 2:30) E personanan ei ta haña un bon nòmber serka Yehova, i otro sirbidónan di Dios tambe lo papia bon di nan.—Pro. 11:16; 22:1.

⁵ Kiko lo ta e futuro di esnan ku ta ‘spera riba Yehova i sigui su kaminda’? Beibel ta primintí ku ‘Yehova lo halsa nan pa heredá e tera; ora ku e malbadonan wòrdu kòrta kitá afó, nan lo mira esaki.’ (Sal. 37:34) Nan ta antisipá tambe e onor sin igual di risibí bida eterno.—Sal. 37:29.

6, 7. Dikon hopi hende no kier a kere den Hesus?

⁶ Kiko lo por stroba nos di risibí e onor, òf gloria, ku Yehova ta dispuesto pa duna nos? Un faktor ta si nos ta duna demasiado importansia na opinion di hende ku no tin un bon relashon ku Dios. Esaki ta loke algun gobernante den tempu di Hesus a hasi. Apòstel Huan a skirbi tokante nan: “Asta hopi lider di e hudiunan a pone fe den [Hesus], ma pa motibu di e fariseonan, nan no tabata rekonos’é públikamente pa nan no keda ekspulsá for di snoa; pasobra nan tabata stima e gloria for di hende asta mas ku e gloria for di Dios.” (Huan 12:42, 43) E lidernan ei lo a benefisiá mas si nan no a duna asina tantu importansia na loke e fariseonan tabata pensa.

⁷ Hesus a splika bon kla na un okashon anterior dikon hopi hende lo no a asept’é ni kere den dje. (Lesa Huan 5:39-44.) E nashon di Israel tabatin siglonan ta warda riba yegada di e Mesías. Ora Hesus a kuminsá prediká, tabatin hende ku a komprondé for di e profesia di Daniel ku e tempu a yega pa e Mesías, òf Kristu, aparesé. Algun luna promé, ora ku Huan Boutista a kuminsá prediká, hopi hende a puntra: “Akaso e ta e Kristu?” (Luk. 3:15) Pero awor ku por fin e Mesías tan sperá tabata meimei di nan ta prediká, e hudiunan vèrsá den Lei no a asept’é. Hesus a indiká e motibu di esei ora el a puntra nan: “Kon boso por kere mi, ora ku boso ta aseptá gloria for di otro i boso no ta buska e gloria ku ta bini di e úniko Dios?”

8, 9. Usando e ilustrashon di lus, splika kon gloria di hende por bira mas importante pa nos ku gloria for di Yehova.

⁸ Nos por komprondé mihó kon gloria di hende por bira mas importante pa nos ku gloria for di Yehova si nos kompará gloria ku lus. Nos universo ta yen di lus, masha glorioso. Bo ta kòrda e último biaha ku bo a wak shelu riba un anochi sin nubia i bo por a mira míles di strea briante? E bunitesa, òf “gloria,” di e streanan ta masha impreshonante mes. (1 Kor. 15:40, 41) Pero si bo wak e mesun shelu ei ora bo ta pará den kaya di un stat bon iluminá, kon e ta? Wèl, ku e lusnan di stat ta kasi imposibel pa bo mira e streanan! Akaso ta asina pasobra e lusnan di kaya, di stadion i di edifisio ta mas fuerte òf mas bunita ku lus di strea? Nò! Esaki ta sosodé pasobra e lusnan di stat ta mas serka di nos i nan ta stroba nos di mira e kreashon di Yehova. Pa nos por disfrutá di e bunitesa di e streanan, nos mester ta un kaminda leu for di lus di stat.

⁹ Di e mesun manera, si e gloria, òf onor, di hende ta e kos ku ta mas importante pa nos, lo e por stroba nos di apresiá i buska e gloria duradero ku Yehova ta dispuesto pa duna nos. Hopi hende ta keda sin aseptá e bon notisia pasobra nan tin miedu di loke nan famia òf konosínan lo por pensa di nan. Akaso e deseo di risibí onor serka hende por influensiá asta sirbidónan di Dios dediká? Suponé ku un yònkuman ser asigná pa prediká den un bario kaminda e ta bon konosí, pero mayoria di hende ainda no sa ku e ta Testigu di Yehova. Lo e keda sin prediká einan pasobra e tin miedu? Òf kiko si un ruman tin metanan teokrátiko, pero otronan ta hasi bofon di su metanan? Lo e hasi kaso di e rumannan ei ku no tin asina tantu apresio pa e sirbishi di Yehova? Òf kiko di un ruman ku a kometé un piká serio? Lo e skonde su piká pasobra e tin miedu di pèrdè su responsabilidatnan den kongregashon òf pasobra e no ke desepshoná su sernan kerí? Si e ruman su preokupashon prinsipal ta pa drecha su relashon ku Yehova, lo e “manda yama e ansianonan di kongregashon” i pidi nan yud’é.—Lesa Santiago 5:14-16.

10. (a) Kiko lo por pasa si nos ta preokupá muchu ku loke otro hende ta pensa di nos? (b) Di kiko nos por ta sigur si nos ta humilde?

¹⁰ Kisas bo ta trahando duru pa bira un kristian maduro, pero kada bes un ruman ta duna bo konseho. Bo por aseptá su opservashonnan onesto i benefisiá di nan. Òf bo por ignorá su konsehonan debí na orguyo òf pasobra bo ta muchu preokupá ku bo reputashon òf pasobra bo ke hustifiká loke bo a hasi. Awor, suponé ku bo ta trahando riba un proyekto ku otro ruman. Lo bo keda sin duna bo pleno kooperashon pasobra bo no sa ken lo haña elogio pa bo bon ideanan i bo trabou duru? Si bo haña bo den kualke un di e situashonnan akí, kòrda ku ta “esun ku ta di spiritu humilde lo risibí onor.”—Pro. 29:23.

11. Kon nos mester reakshoná den nos kurason riba elogio, i dikon?

¹¹ Ansianonan i rumannan hòmber ku ta “hasi esfuerso” pa haña mas responsabilidat den kongregashon tambe mester tene kuidou ku buskamentu di elogio di hende. (1 Tim. 3:1; 1 Tes. 2:6) Kon un ruman hòmber mester reakshoná ora e haña palabranan sinsero di elogio pa un bon trabou ku el a hasi? Klaru ku lo e no lanta un monumento pa su mes, manera Rei Saul a hasi. (1 Sam. 15:12) Pero e ta kla pa rekonosé ku loke el a hasi tabata debí na Yehova su bondat inmeresí i ku lo e tin éksito den futuro solamente si Yehova sigui bendishon’é i yud’é? (1 Ped. 4:11) E manera ku nos ta reakshoná den nos kurason riba elogio ta revelá ki sorto di onor nos ta buska.—Pro. 27:21.

12. Dikon algun hudiu no a skucha e mensahe di Hesus?

¹² Un otro kos ku por stroba nos di risibí onor serka Yehova ta nos mal deseonan. Nan por pone ku nos no ke ni tende e bèrdat. (Lesa Huan 8:43-47.) Hesus a bisa sierto hudiu ku nan no kier a skucha su mensahe pasobra ‘nan ke kumpli ku e deseonan di nan tata, e Diabel.’

13, 14. (a) Kiko investigadónan ta bisa tokante e manera ku nos selebro ta prosesá stèm di hende? (b) Kiko ta determiná ken nos lo skucha?

¹³ Tin biaha, nos ta skohe pa skucha solamente loke nos ke tende. (2 Ped. 3:5) Yehova a krea nos ku e kapasidat remarkabel di por ignorá zonido ku nos no ke tende. Para un ratu i konsentrá riba kuantu zonido diferente bo por tende na e momento akí. Probablemente, hopi di nan bo no tabata tende mes un ratu pasá. Kon bini? Wèl, aunke nos selebro tin e kapasidat di tende tur e diferente zonidonan ei pareu, e sistema límbiko (un parti di e selebro) ta yuda nos konsentrá riba ún kos so. Pero investigadónan a deskubrí ku ta bira mas difísil pa nos selebro distinguí vários zonido pareu ora ta trata di stèm di hende. Esaki ta nifiká ku ora bo tende dos stèm pareu, bo tin ku skohe riba kua bo ta bai konsentrá. Lo bo skohe esun ku bo ke skucha. E hudiunan ku tabata ke kumpli ku e deseonan di nan tata, e Diabel, no a skucha Hesus.

¹⁴ Beibel ta bisa ku nos ta haña mensahe for di ‘e kas di sabiduria’ i for di ‘e kas di bobedat.’ (Pro. 9:1-5, 13-17) Tantu sabiduria komo bobedat konstantemente ta yama nos, na moda di papia. Pues, nos tin ku skohe. Ken nos lo skucha? Esei ta dependé di ken su boluntat nos ke hasi. E karnénan di Hesus ta skucha su bos i ta siguié. (Huan 10:16, 27) Nan ta “na banda di e bèrdat.” (Huan 18:37) “Nan no konosé e stèm di hende straño.” (Huan 10:5) Esnan ku sigui Hesus humildemente lo risibí onor serka Dios.—Pro. 3:13, 16; 8:1, 18.

15. Den ki sentido e tribulashonnan di Pablo a “nifiká gloria” pa otro hende?

¹⁵ Kon nos por yuda otro hende risibí onor serka Dios? Un manera ta pa medio di nos perseveransia. Pablo a skirbi e kongregashon na Efeso: “Mi ta pidi boso pa no entregá pa motibu di e tribulashonnan ku mi ta sufri pa boso, pasobra nan ta nifiká gloria pa boso.” (Efe. 3:13) Den ki sentido e tribulashonnan di Pablo a “nifiká gloria” pa e efesionan? Pablo tabata dispuesto pa sigui sirbi e efesionan apesar di difikultat, i esei a laga nan mira ku sirbi Dios ta e privilegio di mas balioso pa un kristian. Pero si Pablo lo a entregá ora el a sufri tribulashon, su rumannan lo por a pensa ku nan relashon ku Yehova, nan sirbishi i nan speransa no tabata dje importante ei. Pablo su ehèmpel di perseveransia a duna onor i importansia na kristianismo i a demostrá e rumannan ku ser un disipel di Kristu ta bal kualke sakrifisio.

16. Ki tribulashon Pablo a eksperensiá na Listra?

¹⁶ Pensa riba e efekto ku Pablo su zelo i perseveransia tabatin. Echonan 14:19 i 20 ta konta nos kiko a pasa ku Pablo na Listra, bisando: “Algun hudiu ku a bini di Antiokia i Ikonio a konvensé e multitut pa lanta kontra nan, i nan a piedra Pablo i a lastr’é hiba pafó di stat, pensando ku e tabata morto. Ma ora e disipelnan a bin para rònt di dje, el a lanta para i a drenta e stat. Su manisé e ku Bárnabas a sali bai Derbe.” Nos por imaginá kon difísil mester tabata pa Pablo biaha 100 kilometer na pia, ún dia despues ku kasi nan a piedr’é mata!

17, 18. (a) Kon bini Timoteo lo por tabata sa di Pablo su sufrimentu na Listra? (b) Ki efekto e perseveransia di Pablo tabatin riba Timoteo?

¹⁷ Akaso Timoteo tabata un di “e disipelnan” ku a bin yuda Pablo? Probablemente, pero e buki di Echonan no ta bisa esei. Ma Timoteo tabata sa di e suseso, pasobra Pablo a skirbi den su di dos karta na Timoteo: “Abo a presta bon atenshon na mi siñansa, mi manera di biba, . . . i e persekushon- i sufrimentunan ku mi a pasa aden na Antiokia [kaminda nan a kore kuné for di e stat], Ikonio [kaminda nan a purba di piedr’é] i Listra [kaminda nan a piedr’é]. Mi a wanta e persekushonnan akí, i Señor a libra mi for di nan tur.”—2 Tim. 3:10, 11; Echo. 13:50; 14:5, 19.

¹⁸ Timoteo “a presta bon atenshon” na e susesonan ei i tabata bon na altura di Pablo su perseveransia. Esaki a hasi un impreshon profundo riba Timoteo. Ora Pablo a bolbe bishitá Listra, el a nota ku Timoteo tabata un kristian ehemplar i ku “e rumannan di Listra i Ikonio tabata papia bon di Timoteo.” (Echo. 16:1, 2) Ku tempu, Timoteo a kualifiká pa risibí responsabilidatnan mas pisá.—Flp. 2:19, 20; 1 Tim. 1:3.

19. Kon nos perseveransia por yuda otro hende?

¹⁹ Si nos perseverá den hasi e boluntat di Dios, nos ehèmpel por yuda otro hende tambe, foral hóbennan, pa nan bira sirbidónan di Dios masha balioso. Hóbennan ta opservá nos i ta siña di e manera ku nos ta papia ku hende den sirbishi di vèlt. Nan ta benefisiá tambe di mira kon nos ta trata ku situashonnan difísil den bida. Pablo a bisa ku el a “wanta tur kos” pa asina tur ku keda fiel ‘por haña salbashon huntu ku gloria eterno.’—2 Tim. 2:10.

20. Dikon nos tin ku sigui buska e gloria ku ta bini di Dios?

²⁰ Nos tin bon motibu anto pa sigui “buska e gloria ku ta bini di e úniko Dios.” (Huan 5:44; 7:18) Yehova ta duna ‘bida eterno na esnan ku ta buska su gloria i onor.’ (Lesa Romanonan 2:6, 7.) Ademas, nos “perseveransia den obra ku ta bon” por animá otro rumannan pa keda fiel i asina haña bida eterno. Pues, no laga nada stroba bo di risibí e gloria i onor ku Dios ta duna.