Dikon Nos Mester Ta Santu?

 1. Kon e buki di Levítiko por yuda nos?

YEHOVA ta spera di tur su sirbidónan ku nan ta santu, es desir, limpi den sentido spiritual, moral i físiko. Beibel ta papia masha hopi tokante santidat, pero e ta ser menshoná mas tantu den e buki di Levítiko. Pues, un mihó komprondementu di e buki akí lo yuda nos sa kon nos por ta santu.

 2. Menshoná algun aspekto interesante di e buki di Levítiko.

² E buki di Levítiko, skirbí pa profeta Moises, ta forma parti di “henter e Skritura” ku ta probechoso pa siña hende. (2 Tim. 3:16) Den e idioma original di Beibel, e nòmber di Yehova ta aparesé un 10 biaha asina den kada kapítulo di e buki akí. P’esei, un análisis di Levítiko lo duna nos e forsa nesesario pa no hasi nada ku lo daña e nòmber di Dios. (Lev. 22:32) E echo ku e buki bes tras bes ta ripití e frase ‘ami ta Yehova,’ ta laga nos kòrda riba e importansia di obedesé Dios. Den e artíkulo akí i esun siguiente, nos lo deskubrí algun hoya spiritual balioso den e buki di Levítiko ku lo yuda nos sirbi Dios na un manera limpi i santu.

3, 4. Kiko e labamentu di Aron i su yu hòmbernan a representá? (Wak e promé plachi.)

³ Lesa Levítiko 8:5, 6. Yehova a skohe Aron pa sirbi komo sumo saserdote di Israel, i su yu hòmbernan mester a sirbi komo saserdote pa e nashon. Aron a representá Hesukristu i e yunan di Aron a representá e siguidónan ungí di Hesus. Akaso e labamentu di Aron a representá un purifikashon di Hesus? Nò. Hesus no tabatin mester di purifikashon pasobra e tabata un hende sin piká i “sin mancha.” (Heb. 7:26; 9:14) Sinembargo, e kondishon limpi di Aron despues ku a laba su kurpa a representá Hesus su kondishon limpi i hustu dilanti di Dios. Awor, kiko e labamentu di e yunan di Aron a representá?

⁴ E labamentu di e yunan di Aron a representá e proseso di purifikashon ku e hendenan skohí pa sirbi komo saserdote den shelu mester someté nan mes na dje. Akaso e purifikashon ei ta referí na e boutismo di e ungínan? Nò, pasobra boutismo no ta laba, òf kita, piká. Mas bien, boutismo ta simbolisá ku un persona a dediká su bida pa sirbi Dios inkondishonalmente. Kon e ungínan ta ser purifiká anto? Pablo a bisa ku ta “pa medio di e palabra,” pues nan mester apliká e siñansanan di Kristu plenamente den nan bida. (Efe. 5:25-27) Asina, pa medio di e Palabra di Dios, nan ta ser santifiká i labá. Ma kiko di e ‘otro karnénan’?—Huan 10:16.

 5. Dikon nos por bisa ku e Palabra di Dios ta purifiká e otro karnénan tambe?

⁵ E yunan di Aron no a representá e “multitut grandi” di otro karné di Hesus. (Rev. 7:9) Pero asina mes, e personanan batisá ei tambe ta bira limpi i santu pa medio di e Palabra di Dios. Kon? Wèl, ora e personanan ku tin e speransa di biba riba tera lesa loke Beibel ta bisa tokante e balor i poder di e sanger ku Hesus a drama, nan ta pone fe den e palabranan ei. Ademas, esaki ta motivá nan pa ‘rindi sirbishi sagrado na Yehova di dia i anochi.’ (Rev. 7:13-15) Purifikashon di e ungínan i e otro karnénan ta un proseso kontinuo. Komo resultado, nan ta komportá nan mes tur momento na un manera ekselente. (1 Ped. 2:12) Yehova ta keda hopi kontentu ora e mira kon limpi i uní e ungínan i e otro karnénan ta, ya ku nan ta obedesé nan Wardador, Hesus, i ta siguié fielmente.

 6. Dikon nos tin ku saminá nos mes regularmente?

⁶ Kiko e echo ku e saserdotenan di Israel mester tabata físikamente limpi ta nifiká pa nos awe komo sirbidónan di Yehova? Hopi hende ku nos ta studia Beibel kuné ta ripará ku nos lugánan di adorashon ta limpi i ku nos ta hende limpi ku ta bisti na òrdu. Pero e kondishon limpi di e saserdotenan ta yuda nos realisá tambe ku ken ku ke subi ‘bai na e seru di Yehova,’ es desir, ku ke djòin e adorashon berdadero, mester tin un “kurason puru.” (Lesa Salmo 24:3, 4; Isa. 2:2, 3.) Pues, Yehova ke pa nos ador’é ku un mente limpi, un kurason limpi i tambe ku un kurpa limpi. Pa logra esaki, nos tin ku saminá nos mes regularmente, i tin biaha nos ta ripará ku nos tin ku hasi kambionan drástiko pa nos por ta santu. (2 Kor. 13:5) Por ehèmpel, un sirbidó di Yehova batisá ku deliberadamente ta wak pornografia mester puntra su mes: ‘Mi ta demostrá ku mi ta santu?’ Anto e tin ku buska yudansa pa stòp ku e práktika sushi ei.—Sant. 5:14.

 7. Na armonia ku Levítiko 8:22-24, ki ehèmpel Hesus a pone?

⁷ Durante instalashon di e saserdosio di Israel, Moises mester a pone sanger di un chubatu di karné na e orea drechi, dùim drechi i dede grandi di e pia drechi di Sumo Saserdote Aron i di su yu hòmbernan. (Lesa Levítiko 8:22-24.) Esaki a nifiká ku e saserdotenan lo a hasi nan bèst pa kumpli obedientemente ku nan debernan. Asina tambe Hesus, nos Sumo Saserdote, a pone ehèmpel perfekto pa e ungínan i e otro karnénan. Su oreanan tabata kla pa skucha e guia di Dios. El a usa su mannan pa kumpli ku e boluntat di Yehova, i su pianan no a desviá niun momento for di un kurso di bida santu.—Huan 4:31-34.

 8. Kiko tur sirbidó di Yehova mester hasi?

⁸ Nos tur, kristiannan ungí i e otro karnénan, mester imitá e ehèmpel di integridat di Hesus, nos Sumo Saserdote, i kumpli obedientemente ku e instrukshonnan di Yehova ku tin den Beibel, ya ku nos no ke “hasi e spiritu santu di Dios tristu.” (Efe. 4:30) Nos mester ta determiná pa ‘hasi e kamindanan ku nos ta kana ariba stret.’—Heb. 12:13.

 9. Kiko tres ruman ku ta traha den kontakto estrecho ku miembronan di e Kuerpo Gobernante a bisa, i kon nan komentarionan por yuda bo sigui demostrá ku bo ta santu?

⁹ Laga nos konsiderá e komentarionan di algun ruman hòmber ku tin e speransa di biba riba tera i ku tin hopi aña ta traha den kontakto estrecho ku miembronan di e Kuerpo Gobernante. Un di e ruman hòmbernan a bisa: “En bèrdat esaki ta un gran privilegio, pero de bes en kuando e asosiashon estrecho ku e rumannan akí a laga mi mira ku aunke nan ta ungí ku spiritu santu, nan ta keda hende imperfekto. Asina mes, mi a hasi mi bèst atraves di tur e añanan akí pa obedesé e rumannan ku Yehova a nombra pa dirigí su organisashon.” Un otro ruman hòmber a bisa: “Tekstonan di Beibel manera 2 Korintionan 10:5, ku ta animá nos pa ‘obedesé Kristu,’ a yuda mi pa ta obedesidu i pa kooperá ku e rumannan ku ta supervisá e obra. I mi ta hasié ku henter mi kurason.” Un di tres ruman hòmber di: “Un hende ku ta stima loke Yehova ta stima, ta odia loke e ta odia i konstantemente ta buska su guia i ke hasi loke ta agrad’é, lo obedesé su organisashon i e personanan ku e ta usa pa kumpli ku su propósito riba tera.” E ruman akí ta kòrda kon impreshoná e tabata ku e ehèmpel di Ruman Nathan Knorr, kende despues a bira un miembro di e Kuerpo Gobernante. Ora ku den e Toren di Vigilansia di 1925 a sali algun punto nobo den e artíkulo “Nasementu di e Nashon,” Ruman Knorr a aseptá nan mesora aunke algun otro ruman sí a kuestioná e puntonan akí. Ta bon pa nos meditá riba e komentarionan di e rumannan akí, ya ku esei por yuda nos mira ku ora nos ta obedesé Dios nos ta demostrá ku nos ta santu.

10. Dikon ta importante pa nos obedesé Dios su lei tokante sanger?

¹⁰ Lesa Levítiko 17:10, 14. Yehova a bisa e israelitanan ku nan no tabatin mag di kome “sanger di ningun sorto di karni.” Kristiannan tambe a haña e mandamentu pa apstené di sanger, sea di hende òf di bestia. (Echo. 15:28, 29) Asta ora nos ta den un situashon ku nos bida ta na peliger, nos ta determiná pa no entregá ora ku hende ku no konosé Yehova i ku no ta interesá den obedes’é ta roga nos òf eksigí di nos pa desobedesé Yehova. Kontrali na e hendenan ei, nos sí ta stima Yehova i ke obedes’é. Pa nada di mundu nos lo no ke hasi algu ku lo pone Dios rechasá nos i saka nos for di su kongregashon. Nos sa ku algun hende lo hasi bofon di nos pasobra nos ta apstené di sanger, pero nos ta skohe pa obedesé Dios. (Hudas 17, 18) Kiko lo yuda nos keda determiná pa no kome sanger ni aseptá transfushon di sanger?—Deu. 12:23.

11. Dikon nos por bisa ku e Dia di Ekspiashon anual no tabata djis un ritual?

¹¹ E instrukshonnan ku Yehova a duna e sumo saserdote di Israel tokante kiko pa hasi ku e sanger di bestia riba e Dia di Ekspiashon ta yuda nos komprondé Dios su punto di bista di sanger. Mester a usa sanger solamente pa un propósito spesial, esta, pa haña pordon di piká (ekspiashon) ya asina e israelitanan por tabatin un relashon pasífiko ku Dios. Tur aña riba e dia ei, e saserdote mester a sprengu e sanger di un toro i di un kabritu dilanti di e tapadera, òf propisiatorio, di e arka di pakto. (Lev. 16:14, 15, 19) Pa medio di e sanger ei, Yehova lo a pordoná e pikánan di e israelitanan. Ademas, Yehova a dekretá ku ora un hòmber mata un bestia pa kome, e mester a basha su sanger abou i tap’é ku tera, “pasobra pa loke ta bida di tur karni, su sanger ta identifiká ku su bida.” (Lev. 17:11-14) Akaso tur esaki tabata djis un ritual insignifikante? Nò. E uso di sanger riba Dia di Ekspiashon, i tambe e mandamentu pa basha sanger riba tera, ta na armonia ku e mandamentu ku Yehova a duna Noe i su desendientenan sientos di aña promé, esta, ku nan no tabatin mag di kome sanger. (Gén. 9:3-6) Pues, Yehova Dios a prohibí hende di usa sanger pa sostené bida. Kiko esaki ta nifiká pa kristiannan?

12. Segun e karta di Pablo na e kristiannan hebreo, ki relashon tin entre sanger i pordon?

¹² Apòstel Pablo a skirbi e kristiannan hebreo tokante e poder di purifiká ku sanger tin. El a splika: “Segun Lei, kasi tur kos ta ser purifiká ku sanger, i a ménos ku drama sanger no tin pordon.” (Heb. 9:22) Pero Pablo a indiká ku e balor di sakrifisio di bestia tabata temporal. El a bisa ku e sakrifisionan akí simplemente a rekordá e israelitanan ku nan tabata pekadó i ku nan tabatin mester di un sakrifisio muchu mas grandi pa eliminá piká kompletamente. Sí, e Lei tabata solamente “un sombra di e kosnan bon ku lo a bini, no e realidat mes.” (Heb. 10:1-4) Pues, kon pordon di piká na un manera permanente lo a bira posibel?

13. Kiko e echo ku Hesus a presentá e balor di su sanger na Yehova ta nifiká pa bo?

¹³ Lesa Efesionan 1:7. Boluntariamente, Hesus a ‘entregá su mes pa nos’ i a muri komo un sakrifisio pa tur hende. Esei tin un gran nifikashon pa tur ku ta stim’é i ta stima su Tata. (Gal. 2:20) Sinembargo, ta loke Hesus a hasi despues di su morto i resurekshon ta loke realmente ta libra nos i hasi pordon di piká posibel. De echo, Hesus a kumpli ku loke a ser prefigurá den e Lei di Moises riba Dia di Ekspiashon. Riba e dia ei, e sumo saserdote tabata hiba un poko di e sanger di e bestianan di sakrifisio den e Santísimo di e tabernakel—i mas despues den e tèmpel di Sálomon—i present’é dilanti di Dios. Tabata komo si fuera el a drenta den presensia di Dios. (Lev. 16:11-15) Di e mesun manera, Hesus, despues di su resurekshon, a drenta den shelu i a presentá e balor di su sanger humano na Yehova. (Heb. 9:6, 7, 11-14, 24-28) Nos ta masha gradisidu ku el a hasi esei! Danki na nos fe den e balor di e sanger dramá ei, Dios ta pordoná nos di nos pikánan i nos por disfrutá di un konsenshi limpi.

14, 15. Dikon ta importante pa nos komprondé Yehova su lei tokante sanger i obedes’é?

¹⁴ Ta mas kla pa bo awor dikon Yehova a duna òrdu pa nos no kome “sanger di ningun sorto di karni”? (Lev. 17:10, 14) Bo ta komprondé pakiko sanger ta asina sagrado pa Dios? Básikamente, e ta konsiderá sanger igual ku bida. (Gén. 9:4) Sin duda, lo bo ke tin Dios su punto di bista di sanger i obedesé su mandamentu di apstené for di dje. E úniko manera ku nos por tin pas ku Dios ta si nos tin fe den e sakrifisio di reskate di Hesus i ta komprondé e balor spesial ku sanger tin pa nos Kreador.—Kol. 1:19, 20.

¹⁵ Echo ta ku inesperadamente, kualke un di nos por haña nos konfrontá ku e kuestion di sanger. Òf kisas ònferwagt un miembro di famia òf un amigu stimá tin ku disidí si e ta aseptá un transfushon di sanger òf nò. Durante un krísis asina, mester disidí tambe tokante frakshonnan di sanger òf tratamentunan médiko ku ta enbolbé uso di sanger. Niun di nos hamas lo ke aseptá algu ku Yehova su Palabra ta kondená i asina hasi Yehova su kurason tristu. P’esei, ta masha importante pa nos resa na Yehova, hasi investigashon i tuma un desishon promé ku presentá un emergensia. Si nos hasi esei, nos lo tin e fortalesa pa tuma un posishon firme i apstené di sanger. Awe, hopi dòkter i otro personanan ku ta mira transfushon di sanger komo un manera pa salba bida ta hasi yamada riba hende pa duna sanger. Ma komo e pueblo santu di Yehova, nos sa ku ta é, komo Kreador, tin e derecho di bisa kon mester usa sanger, i den su bista ‘sanger di tur sorto di karni’ ta sagrado. Pues, nos mester ta determiná pa obedesé su lei tokante sanger. Pa medio di nos kondukta santu, nos ta lag’é mira ku nos ta apresiá profundamente e balor di e sanger di Hesus: e úniko sanger ku ta hasi posibel ku nos por haña pordon di piká i bida eterno.—Huan 3:16.

16. Dikon e pueblo di Yehova mester ta santu?

¹⁶ Ora Yehova a libra e israelitanan for di sklabitut na Egipto, el a bisa nan: “Ami ta SEÑOR, kende a saka boso for di tera di Egipto, pa ta boso Dios; p’esei, sea santu, pasobra ami ta santu.” (Lev. 11:45) Yehova tabata ke pa e pueblo di Israel ta santu pasobra e mes ta santu. Anto komo Testigu di Yehova, nos awe tambe mester ta santu. E buki di Levítiko ta mustra esei bon kla.

17. Kiko bo ta pensa di e buki di Levítiko?

¹⁷ Sin duda, bo a benefisiá di nos konsiderashon di algun punto for di e buki di Levítiko. Kasi sigur bo a haña mas apresio pa e buki inspirá akí di Beibel. Despues ku bo a meditá riba algun di e informashonnan balioso ku tin den Levítiko, lo bo a haña un komprondementu mas kla di e motibunan pakiko nos mester ta santu. Pero, ki otro hoyanan spiritual nos por haña den e pasashi inspirá akí di e Palabra di Dios? Kiko mas nos por siña for di dje pa asina sirbi Yehova na un manera santu? Nos lo trata e asuntunan ei den e siguiente artíkulo.